Լեռնային Ղարաբաղի հակամարտություն․ աջակցություն տուժած ընտանիքներին և երեխաներին
ԼՂ հակամարտությունից տուժած երեխաները չեն դադարել երազել ապագայի մասին։ Բոլորս ենք պարտավոր աջակցել
- Հասանելի է նաև:
- Հայերեն
- English
Լեռնային Ղարաբաղի հակամարտության սրումը կործանարար ազդեցություն թողեց հազարավոր հայ երեխաների վրա, ինչի հետևանքով 2020 թվականին մոտ 90,000 մարդ տեղահանվեց Լեռնային Ղարաբաղից: Բազմաթիվ ընտանիքներ ստիպված եղան ամեն ինչ սկսել զրոյից, քանի որ Հայաստան էին տեղափոխվել միայն առաջին անհրաժեշտության պարագաներով, շատերն անգամ առանց դրա: Հակամարտության սրման առաջին շաբաթից սկսած՝ ՅՈՒՆԻՍԵՖ-ը աշխատում էր գործընկերների հետ՝ աջակցելու Լեռնային Ղարաբաղից տեղահանված և Հայաստանի համայնքներում հաստատված երեխաներին և ընտանիքներին:
2020-2021 թվականներին ՅՈՒՆԻՍԵՖ-ը հակամարտությունից տուժած ավելի քան 30,000 երեխաների, դեռահասների և երիտասարդների տրամադրել է դպրոցական պայուսակներ և պարագաներ, ձմեռային հագուստ, սննդի փաթեթներ, COVID-19-ի կանխարգելման պարագաներ և հիգիենայի փաթեթներ: ՅՈՒՆԻՍԵՖ-ը գործընկերների հետ համատեղ ստեղծեց բժիշկների շարժական թիմեր՝ առողջապահական ծառայությունները հասանելի դարձնելու երեխաներին և կանանց: Ավելին, երեխաներին և ընտանիքներին տրամադրվել է հոգեսոցիալական աջակցություն անհատական և խմբակային թերապիաների միջոցով, ինչպես նաև վերապատրաստել ենք դեռահասներին և փոխանցել նրանց կյանքի հիմնարար հմտություններ, ինչպիսիք են հույզերի կառավարումը, ինքանճանաչումը, լսելու և հարաբերություններ ձևավորելու հմտությունները և այլն:
Քանի որ երեխաների կրթությունը խաթարվեց, ՅՈՒՆԻՍԵՖ-ն սկսեց աշխատել գործընկերների հետ՝ առցանց և առկա լրացուցիչ դասընթացներ անցկացնելու ուղությամբ, ինչպես նաև վերակահավորեց դասասենյակներ և վերանորոգեց դպրոցների սանհանգույցներ՝ հնարավորություն ստեղծելով ընդունել և տեղավորել նոր աշակերտներին: Ավելին, որպեսզի փոքր երեխաները շարունակեն նախադպրոցական կրթություն ստանալ, ապաստարաններում հիմնվեցին այլընտրանքային զարգացման կենտրոններ:
Քանի դեռ երեխաները շարունակում են տուժել հակամարտության և համավարակի հետևանքներից, մեր աշխատանքն ավարտված չէ: 2022թ-ին մենք շարունակում ենք աշխատել, որպեսզի հիմնական սոցիալական ծառայությունները հասանելի լինեն հակամարտությունից տուժած երեխաներին, այդ թվում՝ նրանց ընտանիքներին տրամադրելով դրամական և վաուչերային աջակցություն, ինչպես նաև բարելավելով երեխայի պաշտպանության համակարգերը, տրամադրվող հոգեբանական ծառայությունները և նրանց կրթական միջավայրը:
