Կյանքի հմտություններ Լեռնային Ղարաբաղի հակամարտությունից տուժած երիտասարդների համար

«Մենք ապրում ենք անընդհատ փոփոխվող աշխարհում և պետք է սովորենք դիմակայել բոլոր առաջացող մարտահրավերներին։ Հենց դրա համար ՅՈՒՆԻՍԵՖ-ը գործարկել է կյանքի հմտությունների այս դասընթացը, որպեսզի երիտասարդներին հնարավորություն ընձեռի ձեռք բերել այն հմտությունները, որոնք կօգնեն նրանց ավելի պատրաստ լինել բազմազան մարտահրավերների, զարգացնել դիմակայունությունը, նպատակներ սահմանել ու հնարավորինս ճիշտ որոշումներ կայացնել իրենց և իրենց համայնքերի համար»։

 

«Պետքական բաներ սովորեցինք, որ կարևոր է հատկապես պատանեկության շրջանում։ Այն, ինչ այստեղ սովորեցինք, դպրոցում չէինք սովորի, հաստա՛տ։ Դասընթացից հետո հասկացա, որ ես չպետք է կուլ գնամ մյուսներին, չպետք է անեմ բաներ, որ մյուսներն են ուզում ու սպասում ինձնից, սակայն ես դա չեմ ուզում։ Այսինքն, սկսեցի ինձ ավելի լավ ճանաչել, ավելի լավ հասկանալ, թե ինչ եմ ուզում, ինչը՝ ոչ»։

«Ես սկսեցի մասնակցել դասընթացին, ու սկզբում ինձ թվաց, որ ամեն ինչն էլ գիտեմ։ Հետո արդեն ընթացքում հասկացա, որ դասերի արդյունքում օգտակար էր ընկերներիս կարծիքը լսելը։ Ինչ-որ բան փոխվեց, ես հիմա ավելի լավ եմ կարողանում կառավարել հույզերս։ Իրականում, մի քիչ տաքարյուն եմ, ու շուտ եմ բարկանում, հիմա սկսել եմ ավելի հանգիստ նայել շատ բաների։ Կարծում եմ, ամեն մի երիտասարդին այս դասընթացն ինչ-որ լավ օգուտ կտա»։

«Վա՜յ, ինձ շատ էր պետք այս դասընթացը։ Օգնեց, որ որոշ բացասական գծերի վրա աշխատեմ։ Օրինակ, շատ վատատես էի, հիմա արդեն համեմատաբար ավելի լավատես եմ դարձել․ ամեն անգամ փարձում եմ լավը գտնել և միայն վատի վրա չկենտրոնանալ։ Եթե էլի նման դասընթաց լիներ, հա՛մ ընկերներիս կասեի, հա՛մ էլ ինքս մեծ սիրով նորից կգայի։ Ախր, մեր քաղաքում երիտասարդների ու հատկապես, երիտասարդ աղջիկների համար այնքա՜ն քիչ են հետաքրքիր զբաղմունքները»։