ՅՈՒՆԻՍԵՖ-ի թիմն այցելել է Սյունիքի սահմանամերձ գյուղեր

Դավիթ Բեկում հետևեցինք հեռավար ուսուցման դասընթացին, որ կազմակերպվել էր ՅՈՒՆԻՍԵՖ-ի և E-school Armenia -ի հետ մեր համատեղ ծրագրի շնորհիվ։ Նախկինում Դավիթ Բեկ-ի դպրոցին համապատասխան տեղեկատվական տեխնոլոգիաներ էինք տրամադրել հեռավար ուսուցման դասերը պատշաճ կազմակերպելու համար։ Այս այցելության ժամանակ Ծավի, Ներքին հանդի, Շիկահողի, Սրաշենի, Շիշկերտի, Ճակատենի և  Բաձրավան գյուղի բոլոր 58 աշակերտներին տրամադրվեցին պլանշետներ։ Իսկ մյուս՝ Դավիթ բեկ, Որոտան և Շուռնուխ գյուղերում պլանշետներ տրամադրվեցին հաշմանդամություն ունեցող, դժվար պայմաններում ապրող կամ պատերազմում զոհված կամ վիրավոր դարձած ծնողների 57 երեխաներին:

«Չափազանց կարևոր է, որ երեխաները ստանան այնպիսի աջակցություն, որ համապատասխանի հենց իրենց կարիքներին, և որ այդ աջակցությունը ժամանակին լինի, հատկապես երբ խոսքը սահմանամերձ գյուղերում ապրող երեխաների մասին է, որոնք կարող է մատչելիության և անվտանգության հետ կապված յուրահատուկ խոչընդոտներ ունենան: Տրամադրված պարագաների և ՅՈՒՆԻՍԵՖ-ի շարունակվող ծրագրերի շնորհիվ, հուսանք, առավել բարենպաստ պայմաններ կստեղծենք այս երեխաների կրթության շարունակականության համար, ինչպես նաև սոցիալհոգեբանական բարեկեցության, երբ երեխաները,գուցե, իրենց միայնակ զգան: Այս պահին մեր աշխատանքները կենտրոնացած են հեռավար ուսուցման հասանելիությունը ապահովող միջոցների ընդլայման շուրջ, քանի որ այս համայնքները առերեսվում են ժամանակավոր արգելափակումների կամ դպրոցների հասանելիության խափանումների հետ հակամարտության և կորոնավիրուսային համավարակի պատճառով»,- նշել է ՅՈՒՆԻՍԵՖ-ի կրթության ծրագրերի համակարգող Հասմիկ Առաքելյանը:

«Մեր այցելած դպրոցները կարիք ունեն արտակարգ իրավիճակների արձագանքման վերապատրաստումների, աղետների ռիսկերի կառավարման մշակված պլանների: Դրանց մեծ մասում չկան ապաստարաններ։ Իհարկե, անվտանգային հարցերը մնում են առաջնային մեր այցելած բնակավայրերի համար, բայց դպրոցների ջրի խնդիրը, ջեռուցումը, ինչպես նաև սանիտարահիգիենիկ պայմանների բացակայությունը պակաս կարևոր չեն երեխաների և ուսուցիչների համար։ Կառավարության, այլ գործընկերների և դոնորների հետ համակարգելով՝  պետք է փորձենք մեր հետագա ծրագրերով արձագանքել այս խնդիրներին, և լուծել դրանք՝ ըստ առաջնահերթության»,- նշել է ՅՈՒՆԻՍԵՖ-ի Կլիմայի փոփոխության ծրագրի ղեկավար Վիգեն Շիրվանյանը։

Հանդիպեցինք նաև այս գյուղերում ապրող երեխաների և երիտասարդների հետ՝ քննարկելու նրանց հուզող խնդիրները։ ՅՈՒՆԻՍԵՖ-ի Երիտասարդական ծրագրերի համակարգող Հասմիկ Ալեքսանյանն ամփոփեց․ «Երեխաներն ինձ պատմեցին, որ համայնքներում իրենց զարգացման համար շատ քիչ հնարավորություններ կան: Քննարկեցինք կյանքի համար կարևոր՝ այսպես կոչված 21-րդ դարի հմտություններ, և շատերը նշեցին, որ հրաշալի կլիներ, եթե կարողանային ձեռք բերել և գործնականում կիրառել դրանք, օրինակ, սովորել ինչպես կառավարել սթրեսը, դիմակայուն դառնալ, ձեռք բերել լսելու և շփվելու, հարաբերություններ ձևավորելու, առաջնորդելու հմտություններ և այլն։ Երիտասարդները դեռ չգիտեն՝ ինչպես կարող են իրենց համայնքի ակտիվ անդամ լինել, մասնակցել որոշումների կայացմանը, հանդես գալ համայնքի զարգացմանը նպաստող գաղափարներով, ծրագրերով: Առաջիկայում մենք կփորձենք օգտակար լինել մարզի դեռահասներին և երիտասարդներին՝ նրանց զարագանալու ու հզորանալու հնարավորություններ ընձեռելով: Անհամբեր կսպասեմ առաջիկա հանդիպումներին մեր ծրագրերը կյանքի կոչելիս»:

Մեր այցելության ընթացքում ձյուն էր տեղում, իսկ ձմեռն արդեն իր տիրապետության տակ էր առել գյուղերն ու համայնքները: Փաթեթներ էինք պատրաստել 10 գյուղերում բնակվող 168 երեխաների և երիտասարդների համար: Դրանք ներառում էին ուսուցողական և զարգացնող խաղեր, կավագործությամբ զբաղվելու փաթեթներ, մանկական և պատանեկան գրքեր, տաք հագուստ և այլն: Ու քանի որ մեր այցից ընդամենը օրեր անց Ամանորն էր, հույս ունեինք մի փոքր նրանց ուրախացնել ու կարծես՝ դա մեզ մոտ ստացվեց:

«Երեխաների, ծնողների և ուսուցիչների ուրախությունն ու երջանկությունը բառերով նկարագրելն անհնար է: Միանշանակ էր մի բան՝ իրենց հետ հանդիպումը ոգեշնչման ամենամեծ աղբյուր էր թե՛ ինձ, թե՛ թիմի համար:  Կարողանալ ցույց տալ երեխաներին, որ իրենց կողքին ենք, ստիպել նրանց հավատալ Ամանորի հրաշքին՝ աննկարագրելի մեծ հպարտություն էր ու է՛լ ավելի մեծ պատասխանատվություն մեր աշխատանքի ու երեխաների նկատմամբ»,- իր հույզերով կիսվեց ՅՈՒՆԻՍԵՖ-ի Կրթության բաժնի օգնական Հերմինե Կատվալյանը։

Սակայն անգամ այլընտրանքային ճանապարհները դեռևս դժվարանցանելի են, հատկապես ձմռան ամիսներին և մառախլապատ եղանակային պայմաններին. դրանք դեռ ամբողջովին պատրաստ չեն, ասֆալտապատ չեն, դժվարանցանելի են ու վտանգավոր։

Ի լրումն այցելության ժամանակ տրամադրած փաթեթների, ՅՈՒՆԻՍԵՖ-ն աջակցել է նաև Սյունիքի տեղական առողջապահական հաստատություններին՝ կազմակերպելով մանկաբուժական շարժական կետեր և ամրապնդելով մոտակա առողջապահական հաստատությունների աշխատակիցների կարողությունները, որպեսզի երեխաներն ու իրենց ընտանիքներն առողջապահական ծառայություններից օգտվելու հնարավորություն ունենան՝ չնայած տիրող իրավիճակին: 2020-2021 թվականների ընթացքում սոցիալ-հոգեբանական աջակցություն ենք տրամադրել Լեռանային Ղարաբաղից տեղահանված և Սյունիքում ապրուստ հիմնած երեխաներին ու նրանց ընտանիքներին, ինչպես նաև տրամադրել ենք գրենական պիտույքներ, վաղ ուսումնառության համար հավաքածուներ, սնունդ, հիգիենայի և այլ պարագաներ:

ՅՈՒՆԻՍԵՖ-ն իր ծրագրերի միջոցով Սյունիքի մարզի հետ համագործակցության երկար պատմություն ունի, ու 2022 թվականին և անդին շարունակելու ենք աջակցել երեխաներին՝ արձագանքելով նրանց կարիքներին: Կյանքի ենք կոչելու երիտասարդական զարգացման ծրագրեր, հիմնելու ենք վաղ ուսումնառության կենտրոններ և ամրապնդելու ենք առողջապահական և երեխայի պաշտպանության ծառայությունները Սյունիքում:

Չնայած բոլոր դժվարություններին և խնդիրներին՝ մենք հավատարիմ ենք մեր նպատակներին ու տեսլականին․ յուրաքանչյուր երեխա պետք է ապրի ապահով, անվտանգ միջավայրում, պետք է որակյալ կրթություն ստանա և իր ողջ ներուժը զարգացնելու հնարավորություն ունենա։