នាទិវាពិភពលោកប្រឆាំងពលកម្មកុមារ យូនីសេហ្វអំពាវនាវឱ្យបង្កើនកិច្ចការពារកុមារដែលកំពុងផ្លាស់ទី

រាជធានីភ្នំពេញ ថ្ងៃទី១២ ខែមិថុនា ឆ្នាំ២០២៥ - នាទិវាពិភពលោក​ប្រឆាំងពលកម្ម​កុមារ យូនីសេហ្វ​​អំពាវនាវឱ្យមាន​សកម្មភាពបន្ថែមទៀត ដើម្បី​ការពារសិទ្ធិ​កុមារដែល​រងផលប៉ះពាល់ពីទេសន្តរប្រវេសន៍។ របាយការណ៍ស្រាវជ្រាវស្តីពី ស្ថានភាពកុមារដែលរងផលប៉ះពាល់ដោយទេសន្តរប្រវេសន៍ រវាងប្រទេសកម្ពុជា និងប្រទេសថៃ¹ នៃក្រសួងសង្គមកិច្ច អតីតយុទ្ធជន និងយុវនីតិសម្បទា ដោយមាន​ការគាំទ្រពីយូនីសេហ្វ​ ជាមួយនឹងការផ្ដល់មូលនិធិពី​សហភាពអឺរ៉ុប (EU) តាមរយៈ​កម្មវិធី PROTECT បង្ហាញ​អំពីវិសាលភាព​នៃ​ហានិភ័យពាក់ព័ន្ធនឹង​កិច្ចការពារ​កុមារ​ ដែលធ្វើទេសន្តរប្រវេសន៍​នៅក្នុងប្រទេសកម្ពុជា និង​ទៅកាន់ប្រទេស​ជិតខាង។ ហានិភ័យទាំងនេះ រួមមាន អំពើជួញដូរមនុស្ស ការរំលោភបំពាន ការកេងប្រវ័ញ្ច ភាពមានទំនាស់នឹងច្បាប់ និងពលកម្មកុមារ។

“ពលកម្ម​កុមារ​​​ ធ្វើឱ្យកុមារបាត់បង់សិទ្ធិ​ក្នុងការទទួលបានកុមារភាពប្រកបដោយសុវត្ថិភាព និងសុខភាពរឹងមាំ មិនបានទទួលការអប់រំ ព្រមទាំងបំផ្លាញសុខុមាលភាព​ផ្លូវកាយ និងផ្លូវចិត្ត​របស់កុមារ” នេះជាប្រសាន៍របស់លោកបណ្ឌិត វៀល ផាកស៍ ​នាយកយូនីសេហ្វប្រចាំកម្ពុជា។ “ទោះជាពួកគេធ្វើទេសន្តរប្រវេសន៍តែម្នាក់ឯង ឬជាមួយគ្រួសារនៅក្នុងប្រទេស​ ឬ​ឆ្លងកាត់ព្រំដែនក្ដី ​កុមារគឺងាយរងគ្រោះពីហានិភ័យទាំងនេះ។ ដោយគ្មាន​ឯកសារស្របច្បាប់ កិច្ចការពារ និងលទ្ធភាពទទួលបាន​ការអប់រំ​ កុមារទេសន្តរ​ប្រវេសន៍​​​ប្រឈមនឹងហានិភ័យ​កាន់តែខ្ពស់​ពីការកេងប្រវ័ញ្ចនានា។”

លោកបណ្ឌិត វៀល ផាកស៍ បានបន្តទៀតថា “ដោយសហការជាមួយសហភាពអឺរ៉ុប យូនីសេហ្វ​កំពុងធ្វើការងារយ៉ាងជិតស្និទ្ធជាមួយ​អាជ្ញាធរ​​ និង​អ្នកពាក់ព័ន្ធ ដើម្បីពង្រឹង​ប្រព័ន្ធកិច្ចការពារ​កុមារឆ្លងដែនរវាង​ប្រទេសកម្ពុជា និងប្រទេសជិតខាង ជាពិសេស ធានាការទទួលបានសេវាចាំបាច់ និងអនុវត្ត​វិធានការដោយឥតរុញរា ដើម្បីធ្វើឱ្យកុមារទេសន្តរប្រវេសន៍​មានសុវត្ថិភាព និងទទួលបាន​ការគាំទ្រ។”

នៅឆ្នាំ ២០២៤ នៅទូទាំងសកលលោក កុមារចំនួនជិត ១៣៨ លាននាក់ ​បានរងនូវពលកម្ម​កុមារ​ រួមទាំង​កុមារប្រមាណ ៥៤លាននាក់ កំពុងធ្វើការងារ​ប្រកបដោយគ្រោះថ្នាក់ ដែលអាចបង្កគ្រោះថ្នាក់ចំពោះ​សុខភាព សុវត្ថិភាព ឬការអភិវឌ្ឍរបស់​ពួកគេ នេះបើយោងតាម​ការប៉ាន់ស្មានថ្មី​ ដែលអង្គការអន្តរជាតិខាងការងារ (ILO)​ និងយូនីសេហ្វបញ្ចេញនៅថ្ងៃនេះ²។ ទិន្នន័យចុងក្រោយគេបង្ហាញនូវការធ្លាក់ចុះ​ចំនួន​កុមារសរុបជាង ២០លាននាក់​ ចាប់តាំងពីឆ្នាំ ២០២០ មក ដែលនេះជាការបង្ហាញភាពធូរស្រាលឡើងវិញពី​ការកើនឡើងគួរឱ្យព្រួយបារម្ភ​នៅចន្លោះឆ្នាំ២០១៦ និងឆ្នាំ២០២០។

ក្នុងរយៈពេលមួយទសវត្សរ៍មុន ប្រទេស​កម្ពុជា​បានចាត់វិធានការចម្បងៗ ដើម្បី​ការពារ​កុមារពីអំពើហិង្សា ការកេងប្រវ័ញ្ច និងការរំលោភបំពាន។ នៅរវាងឆ្នាំ ២០១០ និងឆ្នាំ ២០២១ សមាមាត្រនៃកុមារដែលចូលរួមនៅក្នុងពលកម្ម​កុមារ បានធ្លាក់ចុះពី ៣៧ភាគរយ ​មកនៅត្រឹម ១៧ភាគរយ។ ថ្វីបើមានវឌ្ឍនភាពបែបនេះក្ដី ចំនួននេះនៅតែគួរឲ្យព្រួយបារម្ភ ដោយកុមារម្នាក់ក្នុងចំណោមកុមារ ៥នាក់ ​នៅកម្ពុជា កំពុងចូលរួមក្នុងសកម្មភាពសេដ្ឋកិច្ច³។ របាយការណ៍ស្រាវជ្រាវស្តីពី ស្ថានភាពកុមារដែលរងផលប៉ះពាល់ដោយទេសន្តរប្រវេសន៍ រវាងប្រទេសកម្ពុជា និងប្រទេសថៃ បង្ហាញថា ភាពក្រីក្រជារឿយៗបានជំរុញឲ្យកុមារធ្វើចំណាកស្រុកពីកម្ពុជាទៅប្រទេសថៃ ហើយពួកគេប្រឈមមុខនឹងហានិភ័យកាន់តែខ្ពស់​ពាក់ព័ន្ធនឹងពលកម្ម​កុមារ ជាពិសេស នៅពេលដែលពួកគេបែកចេញពីគ្រួសាររបស់ពួកគេ។⁴ កុមារដែលឆ្លងដែនដោយខុសច្បាប់ ប្រឈមនឹងហានិភ័យឥតឈប់ឈរ​ពីអំពើជួញដូរមនុស្ស ការរំលោភបំពាន ការកេងប្រវ័ញ្ច និង​បំពានច្បាប់។ កុមារជាច្រើន​ពុំបានទៅរៀន ដោយសារគ្រួសាររបស់ពួកគេពឹងផ្អែកលើ​ប្រាក់ចំណូលប្រចាំថ្ងៃ និង​ពុំមានលទ្ធភាពទទួលបាន​សេវាចាំបាច់នានា ដូចជា ការថែទាំសុខភាពជាដើម។

ពលកម្ម​កុមារក៏ជះឥទ្ធិពលលើកុមារដែលស្ថិតនៅក្នុងប្រទេសកម្ពុជាផងដែរ។ ពួកគេធ្វើការងារ​នៅតាមទីកន្លែងផ្សេងៗគ្នា រួមទាំង​នៅការដ្ឋានសំណង់ និងភោជនីយដ្ឋាន និង កុមារអាយុអប្បបរមាការងារ​​ចូលរួម​នៅក្នុងស្ថានភាពពលកម្មកុមារពាក់ព័ន្ធ​នឹងការលក់ដូរ ការងារតាមផ្ទះ ការកាត់ដេរសម្លៀកបំពាក់ កសិកម្ម ការកែច្នៃអាហារសមុទ្រ ការនេសាទ​ និងការសុំទានដោយមានការរៀបចំ^5_។ កុមារមានពិការភាព​ស្ថិតក្នុងចំណោម​កុមារងាយរងគ្រោះបំផុត ដោយសារពួកគេអាចត្រូវបានគេប្រើប្រាស់​ដើម្បីយកទៅសុំទាន ហើយពួកគេពុំមាន​លទ្ធភាពគ្រប់គ្រាន់​ដើម្បីទទួលបាន​សេវាចាំបាច់ឡើយ។

ហានិភ័យអាកាសធាតុ ដូចជា ភាពរាំងស្ងួត ទឹកជំនន់ និងកម្ដៅក្ដៅហួសប្រមាណ បានរំខាន​ជីវភាពរស់នៅ និងបង្ខំ​គ្រួសារជាច្រើន​ ជាពិសេស គ្រួសារជនទេសន្តរប្រវេសន៍​ ឱ្យ​ជួប​ការលំបាក និងបំពេញការងារប្រកបដោយគ្រោះថ្នាក់។ ហានិភ័យអាកាសធាតុទាំងនេះ មានទំនាក់ទំនងកាន់តែច្រើនឡើង​ជាមួយពលកម្ម​កុមារ ដែលនាំឲ្យប៉ះពាល់​ដល់​ប្រាក់ចំណូលរបស់គ្រួសារ និងរុញច្រានឱ្យ​កុមារធ្លាក់ក្នុង​​ការកេងប្រវ័ញ្ចការងារ។ នេះគឺជាបញ្ហាប្រឈមដោយផ្ទាល់​ចំពោះ​គោលដៅអភិវឌ្ឍន៍​ប្រកបដោយចីរភាព (SDG) ទី ៨ ដែលអំពាវនាវឱ្យមានការលុបបំបាត់​ពលកម្មកុមារ និងកិច្ចការពារ​ពលករងាយរងគ្រោះ។ ដើម្បីដោះស្រាយបញ្ហាប្រឈមទាំងនេះ យូនីសេហ្វ​អំពាវនាវឱ្យ​មានការពង្រឹងកិច្ចសហប្រតិបត្តិការឆ្លងកាត់ព្រំដែន ដើម្បីបង្កើតប្រព័ន្ធការពារកុមាររួមគ្នាប្រកបដោយភាពរឹងមាំ ដែលធានាសុវត្ថិភាព និងសុខុមាលភាពរបស់កុមារងាយរងគ្រោះ។
 

^{1 4 5} របាយការណ៍ស្រាវជ្រាវស្តីពី ស្ថានភាពកុមារដែលរងផលប៉ះពាល់ដោយទេសន្តរប្រវេសន៍ រវាងប្រទេសកម្ពុជា និងប្រទេសថៃ ក្រសួងសង្គមកិច្ច អតីតយុទ្ធជន និងយុវនីតិសម្បទា ខែមករា ឆ្នាំ២០២៥

² Despite progress, child labour still affects 138 million children globally – ILO, UNICEF

³ Cambodia Demographic and Health Survey (CDHS), 2021–22.