អំពីយើង

យូនីសេហ្វបាន និងកំពុងបំពេញការងារនៅកម្ពុជា ចាប់តាំងពីឆ្នាំ ១៩៥២ មកម៉្លេះ ដើម្បីការពារសិទ្ធិកុមារ។

Truo Thary, three years old, preschool girl, is greeting UNICEF team.
UNICEF Cambodia/2017/Bona KHOY

យូនីសេហ្វយកចិត្តទុកដាក់ដំបូងគេលើកុមារ និងក្មេងជំទង់។ មិនថាពួកគេជាអ្នកណា។ មិនថាពួកគេរស់នៅទីណាឡើយ។

យើងជឿជាក់ថា កុមារគ្រប់រូបទោះជាពួកគេកំពុងស្ថិតក្នុងកាលៈទេសៈបែបណាក៏ដោយ មានសិទ្ធិរីកចម្រើនសម្រេចសក្តានុពល ទទួលបានការប្រតិបត្តិប្រកបដោយសេចក្តីថ្លៃថ្នូរ និងចូលរួមក្នុងសង្គម។

ចាប់តាំងពីឆ្នាំ ១៩៥២​ មក យូនីសេហ្វបាន និងកំពុងធ្វើការងារជាមួយនឹងដៃគូនានា ដើម្បីនាំសេវា និង​ឱកាសនានាមកកាន់  ប្រទេសកម្ពុជា ដូចជា អប់រំ សុខភាព អាហារូបត្ថម្ភ ការការពារ ទឹកស្អាតនិងអនាម័យ និងធានាយ៉ាងណាឲ្យសេវាទាំងនេះ បានទៅដល់អ្នកដែលជួបនឹងការខ្វះខាតជាងគេ រាប់បញ្ចូលទាំងក្នុងស្ថានភាពអាសន្នផងដែរ។

យូនីសេហ្វ លើកកម្ពស់សិទ្ធិ និងសុខុមាលភាពរបស់កុមារគ្រប់រូប ក្នុងគ្រប់សកម្មភាពការងារទាំងអស់របស់​យើង។ រួមគ្នាជាមួយនឹង​ដៃគូរបស់យើង យើងខិតខំបំប្លែងការប្តេជ្ញាចិត្តនេះឲ្យក្លាយទៅជាសកម្មភាពជាក់ស្តែង ជាមួយនឹងការខិតខំប្រឹងប្រែងផ្តល់សេវា​ដល់​កុមារី និងកុមារា ដែលងាយរងគ្រោះជាងគេ និងដែលត្រូវបានគេផាត់ចេញពីសេវា នានានៅតាមតំបន់ប្រជុំជន និងតំបន់ជនបទ​នៃប្រទេសកម្ពុជា។ យើងផ្តោតការយកចិត្តទុកដាក់លើសមធម៌ ដើម្បីឲ្យសមិទ្ធផលការងាររបស់យើងផ្តល់ផលដល់កុមារគ្រប់រូប។

យើងធ្វើការងារជាមួយនឹងយុវជន និងសម្រាប់យុវជន ដើម្បីឲ្យសំឡេងរបស់ពួកគេត្រូវបានគេស្តាប់ឮ ហើយយើងធ្វើការងារជាមួយនឹង​ដៃគូនានា ចាប់ពីកម្រិតសហគមន៍ រហូតដល់ថ្នាក់ជាតិ ដើម្បីកសាងនូវដំណោះ​ស្រាយដែលជួយឲ្យកុមារ និងយុវជនទទួលបានអនាគត​កាន់តែល្អប្រសើរ។

យើងខិតខំស្វែងរកការគាំទ្រ ដើម្បីផ្តល់ឲ្យកុមារនូវការចាប់ផ្តើមល្អបំផុតក្នុងជីវិត ព្រោះថាការថែទាំសមស្របនៅ​វ័យក្មេងបំផុត ជួយកសាងនូវមូលដ្ឋានរឹងមាំបំផុតសម្រាប់អនាគតមនុស្សម្នាក់ និងរបស់សង្គមមួយ​។

យូនីសេហ្វ គឺជាអង្គការមួយក្នុងចំណោមអង្គការដំបូងៗ ដែលបានវិលត្រលប់មកប្រទេសកម្ពុជាវិញ​ក្រោយការដួររលំ របបខ្មែរក្រហមក្នុងឆ្នាំ ១៩៧៩ ដើម្បីដឹកនាំកិច្ចខិតខំប្រឹងប្រែងឆ្លើយតប ចំពោះស្ថានភាពអាសន្ន។ ដូច្នេះ យើងបំពេញតួនាទីពិសេស ក្នុងការជំរុញឲ្យមានការបង្កើតនូវប្រព័​ន្ធមួយ ដើម្បីជួយឲ្យកុមារក្នុងប្រទេសនេះអាចអភិវឌ្ឍ តាមរយៈការកសាងកិច្ចសហប្រតិបត្តិការយ៉ាងរឹងមាំ ជាមួយនឹងសហគមន៍ សង្គមស៊ីវិល និងរដ្ឋាភិបាល។

យើងមានជំនាញធ្វើការងារក្នុងប្រទេសនេះជាង ៦៥ ឆ្នាំ មានបណ្តាញពាសពេញពិភពលោក មាន​ចិត្តមុះមុត ក្នុង ការប្រើប្រាស់នវានុវត្តន៍ កសាងភាពជាដៃគូប្រកបដោយភាពរស់រវើក និងមានការប្តេជ្ញាចិត្ត ដើម្បីសម្រេចឲ្យបាននូវ សិទ្ធិសម្រាប់កុមារគ្រប់រូប។ ការងាររបស់យើង គឺអព្យាក្រឹត និងពុំប្រកាន់និន្នាការនយោបាយឡើយ។ យើងធ្វើការងារ នៅក្នុងប្រទេសកម្ពុជា ដើម្បីផ្តល់ឲ្យកុមារនូវបរិយាកាសមួយដែលពួកគេអាចទទួលបានការការពារ សុខភាពល្អប្រសើរនិងការអប់រំ ដែលជួយឲ្យពួកគេអាចកសាងជីវិតកាន់តែល្អប្រសើរសម្រាប់​ខ្លួនឯង និងសម្រាប់ប្រទេសជាតិរបស់ពួកគេ។

សូមស្វែងយល់ពីការងាររបស់យើង នៅកម្ពុជា

Students are playing hopscotch at the school playground. Peam Ror School. Peam Koh village. Peam Ror District. Svay Rieng Province. Cambodia, 2018
UNICEF Cambodia/2018/Fani Llaurado

ភារកិច្ច

យូនីសេហ្វមានភារកិច្ចលើកកម្ពស់សិទ្ធិរបស់កុមារគ្រប់រូប នៅគ្រប់ទីកន្លែងទាំងអស់។

យូនីសេហ្វ គឺជាអង្គការតែមួយគត់ ដែលទទួលភារកិច្ចពីមហាសន្និបាតអង្គការសហប្រជាជាតិ ឲ្យធានាសិទ្ធិកុមារគ្រប់រូប នៅគ្រប់ទិសទីទាំងអស់។ ភារកិច្ចនេះ មានចែងនៅក្នុងអនុសញ្ញាស្តីពីសិទ្ធិកុមារ (CRC) ដែលចែងពីសិទ្ធិជាសកល និង ដែលមិនអាចដកហូតបាន។

ការងាររបស់យើងននៅកម្ពុជា ត្រូវបានតម្រង់ទិសដោយគោលដៅអភិវឌ្ឍន៍ប្រកបដោយចីរភាព ដែលត្រូវបានអនុម័ត ដោយអ្នកដឹកនាំពិភពលោក ក្នុងឆ្នាំ ២០១៥ យុទ្ធសាស្រ្តចតុកោណ ដើម្បីកំណើនការងារ សមធម៌ និងប្រសិទ្ធភាព ផែនការយុទ្ធសាស្រ្តអភិវឌ្ឍន៍ជាតិ និងអនុវត្ត ក្រោមក្របខ័ណ្ឌជំនួយអភិវឌ្ឍន៍របស់អង្គការសហប្រជាជាតិនៅកម្ពុជា។

ចក្ខុវិស័យរបស់យើង គឺពិភពលោកមួយដែលកុមារគ្រប់រូបមានឱកាសស្មើភាពគ្នា។ នៅកម្ពុជា យើងផ្តោតការយកចិត្តទុកដាក់ លើការពង្រីកសេវាដល់កុមារងាយរងគ្រោះ មិនថាពួកគេនៅទីណានោះឡើយ។