របាយការណ៍ថ្មីពិនិត្យអំពីវិធីពង្រឹងរបបអាហារនៅកម្ពុជា ដើម្បីឆ្លើយតបនឹងបញ្ហាខ្វះអាហារូបត្ថម្ភគ្រប់ទម្រង់

រាជធានីភ្នំពេញ ថ្ងៃទី៦ ខែវិច្ឆិកា ឆ្នាំ២០២៣៖ នៅថ្ងៃនេះ ដើម្បីអបអរសាទរទិវា​អាហារូបត្ថម្ភជាតិលើក
ទី១០ ក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ (ក.ក.ជ) ដោយមានមានការគាំទ្រពី​​កម្មវិធីស្បៀងអាហារពិភពលោក (WFP) មូលនិធិសហប្រជាជាតិដើម្បីកុមារ (យូនីសេហ្វ) និងក្រុមការងារអ្នកពាក់ព័ន្ធសំខាន់ៗ បានប្រកាសផ្សព្វផ្សាយរបាយការណ៍ស្ដីពីការវិភាគលើការបំពេញបញ្ហាខ្វះអាហារូបត្ថម្ភ ​ដែលជាភស្តុតាងដ៏សំខាន់ ដើម្បីស្វែងយល់​កាន់តែច្បាស់អំពីឧបសគ្គដើម្បីទទួលបានរបបអាហារប្រកបដោយ​សុខភាពល្អនៅក្នុងប្រទេស។

ការវិភាគនេះបង្ហាញថា បើទោះជាមានវឌ្ឍនភាពគួរឱ្យកត់សម្គាល់​ក្នុងការពង្រឹង​ការទទួលបាន និង​ការទទួលទាន​អាហារប្រកបដោយសុខភាពល្អ និងមានអាហារូបត្ថម្ភគ្រប់គ្រាន់ក្តី របបអាហារបច្ចុប្បន្ន​នៅតែមិន​គ្រប់គ្រាន់នៅឡើយ ដែលជាកត្តារួមចំណែកឱ្យមាន​បញ្ហាខ្វះអាហារូបត្ថម្ភគ្រប់ប្រភេទ បង្កើនហានិភ័យ​នៃជំងឺមិនឆ្លង និង​បង្កឱ្យមាន​បន្ទុកសេដ្ឋកិច្ចប្រចាំឆ្នាំ​ចំនួន ១,៥ប៊ីលានដុល្លារ​ក្នុងមួយឆ្នាំ ឬស្មើនឹង ៦,៦ភាគរយ​នៃផលិតផលក្នុងស្រុក​សរុប (GDP)។

លោកស្រី Claire Conan អ្នកតំណាង និងនាយិកាប្រចាំប្រទេស​នៃ​កម្មវិធីស្បៀងអាហារពិភពលោក (WFP) ប្រចាំកម្ពុជា បានមានប្រសាសន៍ថា៖“គោលបំណងនៃការវិភាគនេះ គឺដើម្បីផ្ដល់ភស្តុតាងសម្រាប់​គោលនយោបាយ និងវិធានការជាតិ ដែលអាច​ធ្វើឡើងសម្រាប់ប្រព័ន្ធស្បៀងអាហារ ប្រព័ន្ធកិច្ចគាំពារសង្គម និងប្រព័ន្ធសុខាភិបាល ដើម្បីពង្រឹង​​អាហារូបត្ថម្ភ ដោយផ្ដោតលើ​ប្រជាជន​ងាយរងគ្រោះបំផុត។ យើងជឿជាក់ថា ការវិភាគលើ​ការបំពេញ​បញ្ហាខ្វះអាហារូបត្ថម្ភ ផ្ដល់នូវព័ត៌មានរួម​សម្រាប់ការផ្លាស់ប្ដូរ ពោលគឺជាភស្តុតាង ដើម្បីប្រើប្រាស់​នៅក្នុងសេចក្ដី​សម្រេចចិត្តរបស់យើង។ វឌ្ឍនភាព និងគោលដៅប្រកបដោយមហិច្ឆិតារបស់កម្ពុជា ​ពឹងផ្អែកលើសមត្ថភាព​របស់យើង​ក្នុងការដោះស្រាយ​បញ្ហាបន្ទាន់ទាំងនេះ និងកំណត់នូវដំណោះស្រាយឈ្នះ-ឈ្នះចំពោះបញ្ហា​អាហារូបត្ថម្ភ និងការប្រែប្រួលអាកាសធាតុ។”

របាយការណ៍​នេះបង្ហាញថា ជិត ៨០ភាគរយ​នៃកាឡូរី ទទួលទាននៅកម្ពុជា បានមកពី​បាយ និងស្ករ ដោយបរិភោគជាមួយអាហារដទៃដែលមានសារជាតិចិញ្ចឹមមិនគ្រប់គ្រាន់។ របកគំហើញនេះ​បន្ថែមទៅលើ​ទិន្នន័យដែលមានស្រាប់​ពី​ការអង្កេត​ប្រជាសាស្រ្ត និងសុខភាព​កម្ពុជាឆ្នាំ២០២១-២០២២ ដែលបានបង្ហាញថា កុមារអាយុពី៦ ទៅ ២៣ខែចំនួនតិចជាងពាក់កណ្ដាល (៤២ភាគរយ) ទទួលបាន​របបអាហារ​ដែលអាចទទួលយកបានក្នុងបរិមាណបន្តិចបន្តួច។

លោកបណ្ឌិត វីល ផាកស៍ នាយកយូនីសេហ្វប្រចាំកម្ពុជា បានថ្លែងថា៖ “អាហារូបត្ថម្ភល្អ គឺជាមូលដ្ឋាននៃការរស់រានមានជីវិត ការលូតលាស់ និងការអភិវឌ្ឍរបស់កុមារ។ កុមារដែលទទួលបាន​សារធាតុចិញ្ចឹមល្អតាមពីអាហារ​មានជីវជាតិប្រកបដោយ​គុណភាព​ អាចរៀនសូត្រ និងចូលរួម​នៅក្នុងសហគមន៍​របស់ពួកគេបានល្អជាងកុមារខ្វះអាហារូបត្ថម្ភ​។ ពួកគេក៏មានភាពធន់នឹងជំងឺខ្លាំងជាងផងដែរ។ កុមារត្រូវការ​សារធាតុចិញ្ចឹម និងការថែទាំល្អ ចាប់ពីវ័យ​ទារក និងពេញមួយជីវិត ដើម្បីសម្រេចនូវសក្ដានុពលពេញលេញរបស់ពួកគេ។ យើងចង់ឱ្យប្រជាពលរដ្ឋទាំងអស់​នៅកម្ពុជា​ទទួលទាន និងទទួលបានផលប្រយោជន៍​ពី​របបអាហារដែលមានជីវជាតិគ្រប់គ្រាន់ និងផ្តល់សុខភាពល្អ ដោយធានាថា គ្មានជនងាយរងគ្រោះបំផុតណាម្នាក់ត្រូវបានគេទុកចោលឡើយ។”

គ្រួសារនៅកម្ពុជាសរុបចំនួន ១៦ភាគរយ ​គ្មានលទ្ធភាពទទួលបាន​របបអាហារមានជីវជាតិឡើយ ដោយបញ្ហានេះបញ្ជាក់​អំពីសារសំខាន់​នៃ​កម្មវិធីជំនួយសង្គម ដើម្បីទប់ស្កាត់​គ្រួសារជាច្រើន​ពីការធ្លាក់ក្នុងស្ថានភាពមិនទទួលបានអាហារគ្រប់គ្រាន់ ដូចជាផ្លែឈើ បន្លែ សណ្ដែក ទឹកដោះគោ ស៊ុត ខ្លាញ់ និងប្រេងឆា​ ក្នុងបរិមាណមិនគ្រប់គ្រាន់ ដើម្បីបំពេញកម្រិត​នៃការទទួលទានទៅតាមការណែនាំ។ នៅពេលជាមួយគ្នានេះដែរ អាហារដែលមានការកែច្នៃខ្លាំងជ្រុល និងអាហារសម្រន់ដែលសម្បូរទៅដោយជាតិ​អំបិល ខ្លាញ់ និងស្ករ មានយ៉ាងទូលំទូលាយ ហើយអាហារប្រភេទទាំងនេះមានតម្លៃសមរម្យ និងទទួលបានភាពពេញនិយម​ តាមរយៈ​យុទ្ធនាការទីផ្សារ និងពាណិជ្ជកម្មដ៏ខ្លាំងក្លា ដែលបញ្ហានេះបង្កឱ្យយុវជនប្រឈមនឹងទម្លាប់ហូបរបបអាហារដែលគ្មានសុខភាពល្អ។

ឯកឧត្តម សុខ ស៊ីឡូ អគ្គលេខាធិការ​នៃក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ បានថ្លែងថា៖ “បើទោះជា​ភាពស្គមស្គាំងខ្លាំងរបស់កុមារ ការរាលដាលនៃបញ្ហាខ្វះមីក្រូជីវជាតិ និងភាពខុសគ្នានៃការទទួលបានអាហារូបត្ថម្ភ​នៅតែមានក្ដី រាជរដ្ឋាភិបាល​កម្ពុជា​នឹងផ្ដល់អាទិភាពចំពោះ​ការពង្រឹងប្រព័ន្ធស្បៀងអាហារ ដើម្បីដោះស្រាយបញ្ហាទាំងនេះ ដូចការបង្ហាញនៅក្នុងយុទ្ធសាស្រ្តបញ្ចកោណ ដែលគូសបញ្ជាក់នូវសារសំខាន់​នៃ​កិច្ចគាំពារសង្គម ការថែទាំសុខភាពជាសកល ការសម្របខ្លួនទៅតាមការប្រែប្រួលអាកាសធាតុ និងការកាត់បន្ថយ​ការប្រែប្រួលអាកាសធាតុ។ យើងសម្រេចបានវឌ្ឍនភាពគួរជាទីកត់សម្គាល់ចំពោះសុខភាពមាតា និងទារក និងលទ្ធផលពាក់ព័ន្ធនឹងអាហារូបត្ថម្ភ ដែលយើងទាំងអស់គ្នាគប្បីមានមោទនភាព។”

ភាពងាយរងគ្រោះរបស់កម្ពុជាចំពោះ​ការប្រែប្រួលអាកាសធាតុ​ បង្កហានិភ័យចំពោះ​របបអាហារ​ប្រកប​ដោយ​​សុខភាពល្អ។ ដោយគិតលើឥទ្ធិពលនៃការប្រែប្រួលអាកាសធាតុតែមួយ របាយការណ៍​នៃការវិភាគលើ​ការបំពេញបញ្ហាខ្វះអាហារូបត្ថម្ភ​បានរកឃើញថា តម្លៃស្បៀងអាហារប្រកបដោយ​ជីវជាតិទំនងជា​កើនឡើង​ចំនួន​ ១០ភាគរយនៅត្រឹមឆ្នាំ២០៣០ និង ២០ភាគរយ​ នៅត្រឹមឆ្នាំ២០៥០ ដែលធ្វើឱ្យ​ប្រជាជនដែលងាយរងគ្រោះរួចហើយ រឹតតែពិបាកទទួលបានរបបអាហារប្រកបដោយជីវជាតិ។

ជាការពិត កម្ពុជាមានវឌ្ឍនភាពគួរឱ្យកត់សម្គាល់​​ ប៉ុន្តែ​ការពង្រឹងបន្ថែមលើស្ថានភាពអាហារូបត្ថម្ភ គឺជាការចាំបាច់ ដើម្បី​រក្សាវឌ្ឍនភាពនេះ។ របកគំហើញនានា​គូសបញ្ជាក់ថា គោលដៅប្រកបដោយមហិច្ឆិតារបស់​កម្ពុជា​​ក្នុងការ​សម្រេចបាន​ឋានៈជាប្រទេសមានប្រាក់ចំណូល​មធ្យមកម្រិតខ្ពស់​នៅត្រឹមឆ្នាំ២០៣០ គឺពឹងផ្អែកលើការកែលម្អ​​ស្ថានភាពអាហារូបត្ថម្ភ។ ការប្រែប្រួលអាកាសធាតុគំរាមកំហែងបន្ថែមទៀតចំពោះ​មហិច្ឆិតាទាំងនេះ។

របាយការណ៍នេះស្នើនូវកម្រងនៃ​អន្តរាគមន៍​ជាគំរូថា ប្រទេសកម្ពុជា​អាចពិចារណាពង្រឹងបន្ថែមលើរបបអាហាររបស់គ្រួសារ និងភាពធន់​នៅក្នុងបរិបទនៃការប្រែប្រួលអាកាសធាតុ ដោយផ្អែកលើ​តម្រូវការរបស់​កុមារកំពុង​បៅដោះម្ដាយ (១២-២៣ខែ) កុមារក្នុងវ័យចូលរៀន (៦-៧ឆ្នាំ) កុមារីជំទង់ (១៤-១៥ឆ្នាំ) ស្រ្ដីជាម្ដាយកំពុងបំបៅដោះកូន និងបុរសពេញវ័យ តាមរយៈការបង្កើនជីវជាតិអាហារ អត្ថប្រយោជន៍នៃការឧបត្ថម្ភសាច់ប្រាក់ ការផ្ដល់អាហារនៅតាមសាលារៀន តាមរយៈការផ្លាស់ប្ដូរអាកប្បកិរិយាសង្គម​ ឆ្ពោះទៅរក​របបអាហារប្រកបដោយសុខភាពល្អ​នៅក្នុងចំណោមក្រុមប្រជាពលរដ្ឋទាំងអស់ និង​ការគ្រប់គ្រង​លើអាហារ និងភេសជ្ជៈកែច្នៃខ្លាំងជ្រុល និង​មិនផ្តល់ផលល្អដល់សុខភាពជាដើម។

 ###

សម្រាប់ព័ត៌មានបន្ថែម សូមទំនាក់ទំនង៖    

ឯកឧត្តម សយ អ៊ឹង អគ្គលេខាធិការរង នៃក្រុមប្រឹក្សាស្ដារអភិវឌ្ឍន៍កសិកម្ម និងជនបទ
ទូរសព្ទ៖ +៨៥៥៩២៦៧៨៩ ; សារអេទ្បិកត្រូនិក៖ [email protected]

អ្នកស្រី ជា ជូ មន្រ្តីទំនាក់ទំនង WFP ប្រចាំកម្ពុជា
ទូរសព្ទ៖+៨៥៥៧៨៥៦៥២៨៣;​ សារអេទ្បិកត្រូនិក៖ [email protected]
លោក អាឌ្រាន បូណូ ប្រធានផ្នែកទំនាក់ទំនង យូនីសេហ្វកម្ពុជា  
ទូរសព្ទ ៖ +៨៥៥ ២៣២៦០២០៤; សារអេទ្បិចត្រូនិក៖ [email protected]