យូនីសេហ្វ និងប្រទេសកម្ពុជាបន្តការប្ដេជ្ញាចិត្តក្នុងការលើកកម្ពស់អាហារូបត្ថម្ភ សម្រាប់ទាំងអស់គ្នា
- English
- Khmer
រាជធានីភ្នំពេញ ថ្ងៃទី១៣ ខែមិថុនា ឆ្នាំ២០២៥ - នៅថ្ងៃនេះ ក្រសួងសុខាភិបាលនៃព្រះរាជាណាចក្រកម្ពុជាបានដាក់ឱ្យអនុវត្តផែនទីបង្ហាញផ្លូវសម្រាប់ពន្លឿនការកែលម្អអាហារូបត្ថម្ភ ២០២៣-២០៣០ ដែលជាគំនិតផ្ដួចផ្ដើមទីពីរថ្នាក់ជាតិ ដើម្បីបង្កើនល្បឿនវឌ្ឍនភាពនៅក្នុងការដោះស្រាយបន្ទុកនៃបញ្ហាកង្វះអាហារូបត្ថម្ភ និងធានាថា កុមារ យុវវ័យ និងមនុស្សធំគ្រប់រូបទទួលបានអាហារូបត្ថម្ភ ដែលពួកគេត្រូវការដើម្បីលូតលាស់។ ផែនទីបង្ហាញផ្លូវនេះ ដឹកនាំដោយក្រសួងសុខាភិបាល ដោយសហការជាមួយក្រសួងពាក់ព័ន្ធ ព្រមទាំងមានការគាំទ្រពីយូនីសេហ្វ និងដៃគូអភិវឌ្ឍន៍នានា។
ក្នុងនៅរយៈពេលប៉ុន្មានឆ្នាំថ្មីៗនេះ ប្រទេសកម្ពុជាបានបង្កើតវឌ្ឍនភាពគួរឱ្យកត់សម្គាល់ចំពោះជីវិតរបស់កុមារ។ នៅរវាងឆ្នាំ២០១៤ និងឆ្នាំ២០២១ អត្រាភាពក្រិសក្រិននៅក្នុងចំណោមកុមារអាយុក្រោម៥ឆ្នាំ បានធ្លាក់ចុះពី ៣២ភាគរយ មកនៅត្រឹម ២២ ភាគរយ។ ទោះជាយ៉ាងណាក្ដី កុមារម្នាក់ក្នុងចំណោម១០នាក់ ដែលមានអាយុក្រោម៥ឆ្នាំ បន្តទទួលរងបញ្ហាភាពស្គមស្គាំងធ្ងន់ធ្ងរ ដែលគំរាមកំហែងដល់អាយុជីវិត ។ ប្រេវ៉ាឡង់នៃភាពស្គមស្គាំងនៅតែពុំមានការប្រែប្រួលឡើយនៅក្នុងរយៈពេលមួយទសវត្សរ៍កន្លងទៅនេះ ដែលនេះជាការគូសបញ្ជាក់អំពីសេចក្ដីត្រូវការបន្ទាន់ក្នុងការបន្ត និងពង្រីកកិច្ចខិតខំប្រឹងប្រែងដើម្បីកែលម្អអាហារូបត្ថម្ភរបស់កុមារ។
ទន្ទឹមនឹងនេះដែរ អត្រាកុមារលើសទម្ងន់ បានកើនឡើងពី ២ភាគរយ ទៅ ៤ភាគរយ នៅរវាងឆ្នាំ២០១៤ និងឆ្នាំ២០២១ ហើយនិន្នាការគួរឱ្យព្រួយបារម្ភពាក់ព័ន្ធការអនុវត្តការផ្ដល់ចំណីអាហារដល់កុមារបង្ហាញថា កុមារចំនួនតែ ៥៤ភាគរយប៉ុណ្ណោះ ដែលទទួលបានទឹកដោះម្ដាយតាំងពីដំបូង ហើយកុមារតែ ៥០ភាគរយ ដែលទទួលបានការបំបៅដោះម្ដាយតែមួយមុខគត់នៅក្នុងរយៈពេល ៦ខែ ដំបូងនៃអាយុរបស់ពួកគេ។
ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានមានប្រសាសន៍ថា: “រាជរដ្ឋាភិបាលកម្ពុជាប្តេជ្ញាចិត្តកែលម្អ អាហារូបត្ថម្ភសម្រាប់ទាំងអស់គ្នា ដោយរៀបចំឱ្យមានប្រព័ន្ធផ្តល់សេវា និងអន្តរាគមន៍អាហារូបត្ថម្ភប្រកបដោយគុណភាព។ ប្រព័ន្ធសុខាភិបាលបានដាក់បញ្ចូលសេវាអាហារូបត្ថម្ភទៅក្នុងសេវាថែទាំសុខភាពបឋមដែលចូលរួមលើកកម្ពស់អាហារូបត្ថម្ភដ៏ប្រសើរបំផុត និងជាការចាប់ផ្តើមដ៏ល្អក្នុងជីវិត។ យុទ្ធសាស្ត្រចតុកោណដើម្បីកំណើនការងារសមធម៌ និងប្រសិទ្ធភាព ដំណាក់កាលទី៤ និងផែនការយុទ្ធសាស្រ្តអភិវឌ្ឍន៍ជាតិ (២០១៩-២០២៣) បញ្ជាក់ជាថ្មីពីការប្តេជ្ញាចិត្តយ៉ាងមុតមាំរបស់ រាជរដ្ឋាភិបាលកម្ពុជា ចំពោះគោលដៅអភិវឌ្ឍន៍ប្រកបដោយចីរភាពសម្រាប់ឆ្នាំ២០៣០ ពោលគឺ ការកាត់បន្ថយភាពក្រីក្រ និងការលើកកម្ពស់សុខភាព អាហារូបត្ថម្ភ និងអនាម័យជាពិសេសក្នុងចំណោមជនក្រីក្រ និងជនងាយរងគ្រោះ។”
ផែនទីបង្ហាញផ្លូវនេះមានបំណងធានាថា សហគមន៍ទាំងអស់នៅកម្ពុជាទទួលបានអាហារូបត្ថម្ភ សុខភាព និងសុខុមាលភាពល្អបំផុត។ ផែនទីបង្ហាញផ្លូវនេះ កំណត់ទិសដៅជាតិពាក់ព័ន្ធនឹងកាត់បន្ថយប្រេវ៉ាឡង់នៃភាពស្គមស្គាំងនៅក្នុងចំណោមកុមារអាយុក្រោម ៥ឆ្នាំ ឱ្យមកនៅត្រឹម ៥ភាគរយ នៅត្រឹមឆ្នាំ២០៣០ និងបង្កើនវឌ្ឍនភាពឆ្ពោះទៅរកការទទួលបានជាសកលនូវអាហារូបត្ថម្ភប្រកបដោយគុណភាព ក្នុងអំឡុងពេលកុមារភាពវ័យកណ្តាល និងវ័យជំទង់ សម្រាប់ស្ត្រីក្នុងវ័យបន្តពូជ និងអំឡុងពេលមានផ្ទៃពោះ ការសម្រាលកូន និងក្រោយសម្រាល។
តាមរយៈការដាក់កម្រិតចំពោះសមត្ថភាពរបស់កុមារក្នុងការសម្រេចបានសក្ដានុពលរបស់ខ្លួន ភាពស្គមស្គាំងរបស់កុមារមានផលប៉ះពាល់រយៈពេលវែងទៅលើមូលធនមនុស្ស និងវឌ្ឍនភាពជាតិ។ អាកាសធាតុអាក្រក់ខ្លាំងពាក់ព័ន្ធនឹងការប្រែប្រួលអាកាសធាតុ ដែលគំរាមកំហែងចំពោះសន្តិសុខស្បៀង បង្កឧបសគ្គបន្ថែមទៀតដល់កុមារ និងសហគមន៍ក្នុងការទទួលបានរបបអាហារប្រកបដោយជីវជាតិ និងការដោះស្រាយបញ្ហាកង្វះអាហារូបត្ថម្ភ។
“កុមារដែលពុំទទួលបានអាហារូបត្ថម្ភគ្រប់គ្រាន់ទាំងបរិមាណ និងគុណភាព ពុំត្រឹមតែមានរាងកាយក្រិសក្រិនប៉ុណ្ណោះឡើយ ប៉ុន្តែថែមទាំងប្រឈមមុខនឹងឧបសគ្គរយៈពេលវែងនៅក្នុងការអភិវឌ្ឍពុទ្ធិផងដែរ ដែលនេះជាការកាត់បន្ថយយ៉ាងខ្លាំងក្លាចំពោះឱកាសរបស់ពួកគេក្នុងការរៀនសូត្រ ធំលូតលាស់ និងការរទទួលបានឱកាសនានានៅពេលនេះអនាគត” នេះជាសម្ដីរបស់លោកបណ្ឌិត អានៀរបាន ឆាតឺរជី នាយករងរបស់យូនីសេហ្វនៅកម្ពុជា។ “ផែនទីបង្ហាញផ្លូវរហ័សនេះ តំណាងឱ្យការប្តេជ្ញាចិត្តជាថ្មីក្នុងការលុបបំបាត់ការស្គមស្គាំងចំពោះកុមារនៅកម្ពុជា និងលើកកម្ពស់អាហារូបត្ថម្ភសម្រាប់ទាំងអស់គ្នា ហើយនេះគឺជាគោលដៅមួយប្រកបដោយមហិច្ឆិតាខ្ពស់ ដែលនឹងទាមទារឱ្យមានសកម្មភាព និងការសម្របសម្រួលគ្នានៅក្នុងចំណោមក្រសួងពាក់ព័ន្ធ សង្គមស៊ីវិល វិស័យឯកជន និងដៃគូអភិវឌ្ឍន៍។ យូនីសេហ្វបញ្ជាក់សាជាថ្មីនូវការប្ដេជ្ញាចិត្តរបស់ខ្លួនចំពោះការគាំទ្ររាជរដ្ឋាភិបាលកម្ពុជានៅក្នុងការពង្រីកអន្តរាគមន៍នានាប្រកបដោយប្រសិទ្ធភាព ការវិនិយោគលើអាហារូបត្ថម្ភនៅគ្រប់កម្រិត ព្រមទាំងការការពារសុខភាព និងសក្ដានុពលរបស់ប្រជាជនជំនាន់ក្រោយ។”
ផែនទីបង្ហាញផ្លូវនេះចែងអំពីអភិក្រមវដ្ដជីវិតគ្រប់ជ្រុងជ្រោយ ដោយផ្ដោតលើក្រុមប្រជាជនសំខាន់ៗចំនួនបួន គឺ ស្រ្តីក្នុងវ័យបន្តពូជ កុមារអាយុក្រោម៥ឆ្នាំ កុមារក្នុងវ័យសិក្សា និងយុវវ័យ។ អាទិភាពស្នូលនៃផែនទីបង្ហាញផ្លូវនេះរួមមាន៖
- ការពិនិត្យ និងការព្យាបាលបញ្ហាកង្វះអាហារូបត្ថម្ភនៅតាមសហគមន៍ រួមមាន ការប្រើប្រាស់វិធីសាស្រ្តវាស់ជុំវិញដើមដៃ (MUAC) នៅតាមគ្រួសារ ការពិនិត្យតាមដានភាពលូតលាស់ និងសេវាបង្ការនានា ដូចជា ការផ្ដល់វីតាមីនអា និងការផ្ដល់ថ្នាំទម្លាក់ព្រូន។
- ការពង្រឹងអាហារូបត្ថម្ភសម្រាប់ស្រ្តីមានផ្ទៃពោះ និងស្រ្តីកំពុងបំបៅដោះកូន តាមរយៈការផ្ដល់ប្រឹក្សាយោបល់ក្នុងពេលមានផ្ទៃពោះ ការបន្ថែមមីក្រូសារជាតិ និងការគាំទ្រចំពោះការចាប់ផ្ដើមបំបៅដោះកូនតាំងពីដំបូង និងតែមួយគត់ ដោយមានការជំរុញគាំទ្រពីគោលនយោបាយស្ដីពីលំហែរមាតុភាព និងកន្លែងការងារដែលបង្កលក្ខណៈងាយស្រួលសម្រាប់ការបំបៅដោះកូន។
- ការពង្រឹងការបញ្ចុកចំណីទារក និងកុមារ តាមរយៈការកែលម្អការអនុវត្តការបំបៅដោះកូន ការផ្ដល់អាហារបន្ថែម ព្រមទាំងការពិនិត្យតាមដាន និងការលើកកម្ពស់ភាពធំលូតលាស់របស់កុមារ។
- ការអប់រំអំពីអាហារូបត្ថម្ភ និងកម្មវិធីផ្ដល់អាហារតាមសាលារៀន សម្រាប់យុវវ័យ ជាពិសេស ក្មេងស្រី ដើម្បីដោះស្រាយលើទាំងបញ្ហាពាំក់ព័ន្ធនឹងការទទួលបានអាហារូបត្ថម្ភពុំគ្រប់គ្រាន់ និងកំណើនហានិភ័យនៃជំងឺធាត់។
- ការបង្កើនការប្រើប្រាស់អាហារព្យាបាលដែលផលិតនៅក្នុងស្រុក ដូចជា នូទ្រិច (Nutrix) ដែលផលិតនៅកម្ពុជា សម្រាប់ការព្យាបាលបញ្ហាខ្វះអាហារូបត្ថម្ភស្រួចស្រាល់ធ្ងន់ធ្ងរ។
- ការវិនិយោគកាន់តែច្រើននៅក្នុងប្រទេសទៅលើអាហារូបត្ថម្ភ រួមទាំងការវិភាជថវិកាចំពោះអាហារព្យាបាលដែលរៀបចំរួចជាស្រេចសម្រាប់បរិភោគ (Ready-to-Use Therapeutic Foods (RUTF)) ព្រមទាំងអភិបាលកិច្ចកាន់តែខ្លាំងក្លា និងភាពជាដៃគូជាមួយវិស័យឯកជន ដើម្បីធានានិរន្តរភាព។
ទំនាក់ទំនងប្រព័ន្ធផ្សព្វផ្សាយ
About UNICEF
UNICEF promotes the rights and wellbeing of every child, in everything we do. Together with our partners, we work in 190 countries and territories to translate that commitment into practical action, focusing special effort on reaching the most vulnerable and excluded children, to the benefit of all children, everywhere.
For more information about UNICEF and its work for children, visit www.unicef.org.
