យុវជនកម្ពុជារួមគ្នាប្តេជ្ញាចិត្តចូលរួមសកម្មភាពអាកាសធាតុថ្នាក់ជាតិ តាមរយៈសន្និសីទយុវជនកម្ពុជាឆ្នាំ២០២៥

រាជធានីភ្នំពេញ ថ្ងៃទី​៣ ខែមិថុនា ឆ្នាំ ២០២៥ —​ មេដឹកនាំយុវជនផ្នែកអាកាសធាតុ តំណាងក្រសួង-ស្ថាប័នរដ្ឋាភិបាលពាក់ព័ន្ធ​ និងដៃគូអភិវឌ្ឍន៍ប្រមាណជាង ២៥០ នាក់ បានជួបជុំគ្នានៅថ្ងៃនេះក្នុងសន្និសីទយុវជនក្នុងស្រុក (LCOY) ឆ្នាំ២០២៥ ដើម្បីជំរុញបន្ថែមសំឡេងយុវជនទៅក្នុងរបៀបវារៈអាកាសធាតុ និងការប្តេជ្ញាចិត្តទៅនឹងការប្រែប្រួលអាកាសធាតុ​ក្នុងផែនការជាតិរួមចំណែកឆ្លើយតបនឹងការប្រែប្រួលអាកាសធាតុ ដំណាក់កាលទី៣ (NDC3.0) សម្រាប់ប្រទេសកម្ពុជា។

ផែនការជាតិរួមចំណែកឆ្លើយតបនឹងការប្រែប្រួលអាកាសធាតុនៅកម្ពុជា ដំណាក់កាលទី៣ (NDC3.0)​ នឹងរៀបចំដាក់ជូនអនុសញ្ញាក្របខ័ណ្ឌសហប្រជាជាតិ ស្តីពីការប្រែប្រួលអាកាសធាតនាខែកក្កដា ឆ្នាំ ២០២៥ ខាងមុខនេះ ក្នុងគោលបំណង​បង្ហាញពីភាពប្រសើរជាងមុននូវមហិច្ឆតា ការពន្លឿនប្រសិទ្ធិភាព និង​បរិយាបន្ន ដើម្បីកាត់បន្ថយការបំភាយឧស្ម័នផ្ទះកញ្ចក់ ។ សន្និសីទយុវជនកម្ពុជា​ឆ្នាំ២០២៥នេះ ផ្តល់ឱកាស​​ដល់យុវជនក្នុងការចូលរួមចំណែកលើការកំណត់ផែនការជាតិ និង​បង្ហាញអំពីទស្សនវិស័យ​របស់ពួកគេ ក្នុងរបៀបវារៈ​អាកាសធាតុរបស់កម្ពុជា​នាពេលអនាគត​ ។ ការចូលរួមជាមតិរបស់យុវជនកម្ពុជានេះ នឹងត្រូវដាក់បញ្ចូលទៅក្នុង​សេចក្តីថ្លែងការណ៍ផ្លូវការ​របស់យុវជននៃអនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុ និងក្នុងសេចក្តីថ្លែងការណ៍យុវជនអន្តរជាតិ ដែលនឹងត្រូវរៀបចំមុនពេលសន្និ សីទបណ្តាភាគីលើកទី ៣០ នៃអនុសញ្ញាក្របខ័ណ្ឌអង្គការសហប្រជាជាតិស្តីពីការប្រែប្រួលអាកាសធាតុ ដែលនឹងប្រព្រឹត្តទៅនៅក្នុងប្រទេស ប្រេស៊ីល។

ថ្លែងក្នុងកម្មវិធីបើកសន្និសីទយុវជនកម្ពុជា​ឆ្នាំ២០២៥​ ឯកឧត្តម ជួប ប៉ារីស៍ រដ្ឋលេខាធិការ ក្រសួងបរិស្ថានតំណាងឯកឧត្តមបណ្ឌិតអ៊ាង សុផល្លែត រដ្ឋមន្ត្រីក្រសួងបរិស្ថាន ​បានមានប្រសាសន៍ថា៖ “សំឡេងយុវជន​ គឺជាធាតុចូលយ៉ាងសំខាន់ក្នុងការធានាពីភាពធន់ និងចីរភាពសម្រាប់អនាគត​កម្ពុជា ។​ សន្និសីទនេះ គឺមិនត្រឹមតែជាវេទិការសម្រាប់ការ​សន្ទនាប៉ុនោះទេ ប៉ុន្តែជាវេទិការសម្រាប់លើកម្ពស់ការរួមចំណែកយ៉ាងសកម្មរបស់យុវជនដែលប្រកបដោយអត្ថន័យ សម្រាប់​កំណត់​របៀបវារៈ​អាកាសធាតុរបស់កម្ពុជា ។​​ គំនិតយោលបល់ និងកម្លាំងរបស់យុវជន គឺជាស្នូលក្នុងដំណោះស្រាយអាកាសធាតុ ដែលការពារអនាគតរបស់ពួកយើង ។”

តាមរយៈការគាំទ្រពី​ក្រសួង​បរិស្ថាន អង្គការយូនីសេហ្វ​ កម្មវិធីអភិវឌ្ឍន៍សហប្រជាជាតិ (UNDP) និងក្រុមប្រឹក្សាយុវជនលើការប្រែប្រួលអាកាសធាតុ សន្និសីទយុវជនកម្ពុជា​ឆ្នាំ២០២៥នេះ ផ្តល់នូវវេទិការថ្នាក់ជាតិមួយ​សម្រាប់យុវជនកម្ពុជា ចែករំលែកពីការយល់ឃើញលើដំណោះស្រាយបរិស្ថានប្រកបដោយភាពច្នៃប្រឌិត និងការចូលរួមសកម្មពីយុវជន ដើម្បីឆ្លើយតបនឹងបញ្ហាអាកាសធាតុ ។

លោក ស៊ីថាន​ ស៊ីលីដា ​យុវជនតំណាង បេក្ខភាព LCOY 2023 និង បានចូលរួមក្នុង COP29 បានបញ្ហាញចំណាប់អារម្មណ៍ថា ៖  តាមរយៈ​ LCOY ខ្ញុំយល់ច្បាស់ថា ការទទួលបានឱកាសចូលរួមពិតប្រាកដ គឺមិនមែនគ្រាន់តែជានាមសម្រាប់ការចូលរួមនោះទេ។ ការចូលរួមដែលពិតប្រាកដ គឺជាការរបង្រួបបង្រួមស្មារតីរបស់អ្នកនាំសារដែលបំផុសគំនិត អ្នកការពារ និងអ្នកផ្លាស់ប្តូរដែលធ្វើសកម្មភាព ហើយទាំងអស់នេះ គឺដើម្បីប្រទេសកម្ពុជាប្រកបដោយចីរភាព ។ 

លោកស្រី អាល្សីហ្សា ឆាកឃឺ អ្នកតំណាងកម្មវិធីអភិវឌ្ឍន៍សហប្រជាជាតិ​ (UNDP) ប្រចាំនៅកម្ពុជាបានមានប្រសាសន៍ថា៖ ការរៀបចំ NDC3.0 របស់កម្ពុជា បានបង្ហាញពីយកចិត្តទុកដាក់លើតួនាទីរបស់យុវជនក្នុងសកម្មភាពអាកាសធាតុ​ ប៉ុន្តែយន្តការ និងទំនួលខុសត្រូវជាក់លាក់សម្រាប់តាមដានការចូលរួមរបស់យុវជនក្រៅពីសកម្មភាពស្មគ្រ័ចិត្តនៅមានភាពខ្វះចន្លោះនៅឡើយ ។ UNDP បានរួមចំណែកគាំទ្រដើម្បីផ្លាស់ប្តូរការចូលរួមរបស់យុវជនពីការយល់ដឹងទៅជាការចូលរួមយ៉ាងសកម្ម និងកំពុងអនុវត្តផែនទីបង្ហាញផ្លូវសម្រាប់ការចូលរួមរបស់យុវជនក្នុង NDC 3.0 ​ក្នុងគោលបំណង ពង្រឹងសម្ព័ន្ធភាពយុវជនដឹកនាំអាកាសធាតុរបស់កម្ពុជា ក្នុងការប្រើប្រាស់និងអភិវឌ្ឍជំនាញរបស់ពួកគេ ដើម្បីកំណត់សកម្មភាព និងយន្តការជាក់លាក់លើការអនុវត្ត និងការតាមដានការចូលរួមរបស់យុវជនក្នុង NDC 3.0 ។ ដូច្នេះ នាងខ្ញុំមានការរំពឹងទុកខ្ពស់លើ LCOY 2025 នេះជាឱកាសដ៏សំខាន់មួយ ដែលអនុញ្ញាតិ្តឱ្យយុវជនចូលរួមយ៉ាងសកម្មក្នុងការជម្រុញសកម្មភាពអាកាសធាតុនៅកម្ពុជា។

តាមរយៈរបាយការណ៍ឯកសារសន្ទស្សន៍ហានិភ័យអាកាសធាតុសម្រាប់កុមារសម្រាប់កម្ពុជា ឆ្នាំ ២០២៤ បានបង្ហាញថា កុមារចំនួនជិត២លាននាក់ ច្រើនជាង១ភាគ៣ នៃ​យុវជនសរុបក្នុងប្រទេសកម្ពុជា រស់នៅក្នុងតំបន់ដែលមានហានិភ័យអាកាសធាតុខ្ពស់ ឬខ្ពស់ណាស់ ហើ តំបន់ជនបទប្រឈមនឹងហានិយភ័យខ្ពស់ជាងគេ ។   ផលប៉ះពាល់ពីការប្រែប្រួលអាកាសធាតុ​ ដែលមានដូចជាការកើនឡើងកម្ដៅ ទឹកជំនន់ រាំងស្ងួត និងលក្ខណៈធាតុអាកាសដែលមិនអាចទាយទុកបាន កំពុងប៉ះពាល់យ៉ាងខ្លាំងដល់ការអប់រំ សុខភាព និងជីវភាពរស់នៅ។

លោកបណ្ឌិត អានៀរបាន ឆាតឺរជី នាយករងរបស់យូនីសេហ្វនៅកម្ពុជា បានមានប្រសាសន៍ថា​​ បញ្ហាអាកាសធាតុ ​គឺជា​បញ្ហា​សិទ្ធិ​កុមារ​​ ។ ប្រមាណជាជិត ២​ ភាគ ៣ នៃ ប្រជាជនកម្ពុជា គឺស្ថិតនៅអាយុក្រោម ៣០ ឆ្នាំ ដែលគួរទទួលបានការចូលរួមជាភាពដឹកនាំនៅគ្រប់កម្រិតនៃការគ្រប់គ្រងអាកាសធាតុ ។ ទោះបី ជាកុមារ និងយុវជនមិនមែនជាអ្នកបង្កឲ្យមាននូវវិបត្តិអាកាសធាតុ ប៉ុន្តែ ពួកគេគឺជាក្រុមដែលទទួលរងផលប៉ះពាល់មុនគេ​ ។  ហើយ យុវជនក៏កំពុងចូលរួមយ៉ាងសកម្មក្នុងការស្វែងរកដំណោះស្រាយ ។ ការច្នៃប្រឌិត និងការប្តេជ្ញារបស់ពួកគេ គឺមានសារៈសំខាន់ក្នុងការជំរុញឲ្យមានភាពរីកចម្រើន ដែលមានស្ថិរភាពពិតប្រាកដ ។ 
យូនីសេហ្វពិតជាមានមោទកភាព​គាំទ្រយុវជនក្នុងការកសាងកម្ពុជាប្រកបដោយ​សុខភាពល្អនិងចីរភាពជាងមុន​ ។

សន្និសីទនេះ បានរួមបញ្ចូលការពិភាក្សាដឹកនាំដោយយុវជន សិក្ខាសាលាអំពីគោលនយោបាយ និងការបង្ហាញអំពីការច្នៃប្រឌិតបៃតង និងសកម្មភាពអាកាសអាតុដែលផ្អែកលើសហគមន៍ ។ លទ្ធផលនៃសន្និសីទនេះ គឺការចងក្រងសេចក្តីថ្លែងការណ៍របស់យុវជនកម្ពុជាអំពីសកម្មភាពអាកាសធាតុមានរួមបញ្ចូលអនុសាសន៍ និងការកំណត់អាទិភាព ដែលយុវជនបានរៀបចំ ដើម្បីជាធាតុចូលក្នុងគោលនយោបាយអាកាសធាតុនៅប្រទេស និងជាពិសេស ជាធាតុចូលសម្រាប់ប្រទេសកម្ពុជា ក្នុង COP30 និងក្នុងដំណើរការបូកសរុបបញ្ចប់ ផែនការជាតិរួមចំណែកឆ្លើយតបនឹងការប្រែប្រួលអាកាសធាតុនៅកម្ពុជា ដំណាក់កាលទី៣ (NDC3.0)​​ ក្នុងគោលបំណងកាត់បន្ថយការបញ្ចេញឧស្ម័នកម្រិតថ្នាក់ជាតិ និងដោះស្រាយបញ្ហាអាកាធាតុ​។

###

សម្រាប់ព័ត៌មានបន្ថែម សូមទំនាក់ទំនង៖ 

ឯកឧត្តម ស៊ុំ ធី អគ្គនាយកនៃអគ្គនាយកដ្ឋានគោលនយោបាយ និងយុទ្ធសាស្រ្ត

ក្រសួងបរិស្ថាន

ទូរស័ព្ទ៖ +855 16 907 764 អ៊ីម៉េល៖ [email protected]