សហរដ្ឋអាមេរិកផ្តល់វ៉ាក់សាំង ចនសាន់ & ចនសាន់ (Johnson & Johnson) ជាងមួយលានដូស ដែលជាវ៉ាក់សាំងចាក់តែមួយដូស ដើម្បីប្រយុទ្ធប្រឆាំងជំងឺកូវីដនៅកម្ពុជា

រាជធានីភ្នំពេញ ថ្ងៃទី៣០ ខែកក្កដា ឆ្នាំ២០២១៖ វ៉ាក់សាំងកូវីដ-១៩ “ចនសាន់ & ចនសាន់” ចំនួន ៤៥០,៥០០ ដូស ដែលជាអំណោយរបស់សហរដ្ឋអាមេរិកតាមរយៈយន្តការកូវ៉ាក់បានមកដល់កម្ពុជានៅថ្ងៃនេះ។ វ៉ាក់សាំងបន្ថែមចំនួន ៦០៩,៦០០ ដូសទៀត រំពឹងថានឹងមកដល់កម្ពុជានៅថ្ងៃទី២ ខែសីហា ឆ្នាំ២០២១ ខាងមុខ។ វ៉ាក់សាំង “ចនសាន់ & ចនសាន់” ត្រូវបានទទួលស្គាល់ ក្នុងបញ្ជីប្រើប្រាស់ជាបន្ទាន់ដោយអង្គការសុខភាពពិភពលោក និងជាប្រភេទវ៉ាក់សាំងដំបូងគេដែលតម្រូវឲ្យចាក់តែម្តង សម្រាប់ប្រជាជនកម្ពុជាចំនួនជាងមួយលាននាក់ ដែលនឹងទទួលបានវ៉ាក់សាំងពេញលេញដោយគ្រាន់តែចាក់តែមួយដូសគត់។

យន្តការកូវ៉ាក់ និងដៃគូ ដែលរួមមានយូនីសេហ្វ និងអង្គការសុខភាពពិភពលោក បានជួយសម្រួលដល់ការដឹកជញ្ជូនវ៉ាក់សាំងនេះមកដល់កម្ពុជាដោយសុវត្ថិភាព។ កូវ៉ាក់ (COVAX) គឺជាយន្តការសកលមិនធ្លាប់មាន ដើម្បីពន្លឿនការអភិវឌ្ឍ និងការផលិតវ៉ាក់សំាងកូវីដ-១៩ ដែលមានសុវត្ថិភាព និងធានាឲ្យមានការទទួលបានវ៉ាក់សាំងប្រកបដោយយុត្តិធម៌ និងសមធម៌ និងឆាប់រហ័សបំផុតតាមដែលអាចធ្វើទៅបាន។ យូនីសេហ្វ គឺជាទីភ្នាក់ងារដឹកនាំកិច្ចលទ្ធកម្ម និងការដឹកជញ្ជូនវ៉ាក់សំាងកូវីដ-១៩ តាមរយៈយន្តការកូវ៉ាក់ ហើយនេះគឺជាប្រតិបត្តិការទ្រង់ទ្រាយធំបំផុត និងមានភាពស្មុគស្មាញបំផុតមិនធ្លាប់មាននៅក្នុងប្រវត្តិសាស្រ្ត​នៃយុទ្ធនាការផ្តល់ថ្នាំបង្ការ។

ចាប់តាំងពីមានការរាតត្បាតនៃជំងឺកូវីដ-១៩ សហរដ្ឋអាមេរិកបានផ្តល់ជំនួយជាង ១១ លានដុល្លារដល់ប្រទេសកម្ពុជា តាមរយៈទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ (USAID)។ លើសពីនេះ សហរដ្ឋអាមេរិកកំពុងផ្តល់ថវិកាចំនួន ៤ ពាន់លានដុល្លារដល់យន្តការកូវ៉ាក់ ដែលក្នុងនោះបានផ្តល់វ៉ាក់សាំងចំនួនជាង ៦៥៤,០០០ ដូសដល់ប្រទេសកម្ពុជារួចហើយ មុនពេលការមកដល់នៃវ៉ាក់សាំងនៅថ្ងៃនេះ។

ឯកអគ្គរដ្ឋទូតស្តីទីសហរដ្ឋអាមេរិកប្រចាំកម្ពុជា លោក Benjamin Wohlauer បានមានប្រសាសន៍ថា “យើងមានមោទកភាពជាខ្លាំងដែលបានផ្តល់វ៉ាក់សាំង “ចនសាន់ & ចនសាន់” ចំនួន ១ លានដូសដល់ប្រជាជនកម្ពុជា ដែលជាផ្នែកមួយនៃកិច្ចខិតខំប្រឹងប្រែងរបស់យើងក្នុងការផ្តល់វ៉ាក់សាំងជាសកល។ លោក Benjamin បានបន្តថា “ការទទួលបានវ៉ាក់សាំងជាសកលប្រកបដោយសុវត្ថិភាព និងប្រសិទ្ធភាពគឺជាមធ្យោបាយចាំបាច់ រួមជាមួយការពាក់ម៉ាស់ រក្សាចម្ងាយពីគ្នា និងការលាងសម្អាតដៃ ដើម្បីឈានទៅបញ្ចប់ការរីករាលដាលនៃជំងឺកូវីដ-១៩។ យើងនឹងបន្តបរិច្ចាគវ៉ាក់សាំងជាច្រើនលានដូសបន្ថែមទៀតនៅទូទាំងពិភពលោក ក្នុងរយៈពេលប៉ុន្មានខែខាងមុខនេះ នៅពេលដែលការផ្គត់ផ្គង់ដំណើរការ តាមរយៈកិច្ចសហការជាមួយក្រុមហ៊ុនផលិតវ៉ាក់សាំងអាមេរិក ដើម្បីបង្កើនលទ្ធភាពផ្គត់ផ្គង់វ៉ាក់សាំងសម្រាប់ពិភពលោកទាំងមូល ក៏ដូចជាបន្តសហការជាមួយដៃគូនានាដើម្បីពង្រីកសមត្ថភាពនៃផលិតកម្មវ៉ាក់សាំងជាសកលសំដៅកម្ចាត់ជំងឺរាតត្បាតនេះ។”

ខណៈប្រទេសជាច្រើនកំពុងជួបប្រទះនឹងបញ្ហាប្រឈមនៃការផ្គត់ផ្គង់វ៉ាក់សំាង    ​យន្តការចែករំលែកវ៉ាក់សំាងរបស់កូវ៉ាក់ គឺជាវិធីសាស្ត្រដ៏ឆាប់រហ័សមួយដើម្បីភ្ជិតគម្លាតនៃការផ្គត់ផ្គង់ដែលកំពុងមានចំពោះមុខ និងធ្វើយ៉ាងណាឲ្យក្រុមងាយរងគ្រោះជាងគេដូចជា បុគ្គលិកសុខាភិបាល មនុស្សចាស់ជរា អ្នកដែលមានភាពងាយរងគ្រោះមួយចំនួន និងអ្នករស់នៅតំបន់ពិបាកទៅដល់ បានទទួលការការពារពីជំងឺកូវីដ-១៩។

លោក ចាទ្បាក់ អាប់ឌេលវ៉ាហាប់ នាយកស្តីទីយូនីសេហ្វនៅកម្ពុជា បានមានប្រសាសន៍ថា “ជំងឺកូវីដ-១៩ នៅតែបន្តគំរាមកំហែងយ៉ាងធ្ងន់ធ្ងរដល់ប្រទេសកម្ពុជា និងប្រទេសនានានៅក្នុងតំបន់ ប៉ុន្តែរាជរដ្ឋាភិបាលកម្ពុជា និងដៃគូរួមទាំងយូនីសេហ្វបាន និងកំពុងធ្វើការយ៉ាងសកម្មដើម្បីប្រយុទ្ធប្រឆាំងនឹងជំងឺនេះ ដោយក្នុងនោះ វ៉ាក់សាំងគឺជាឧបករណ៍ដ៏មានឥទ្ធិពលបំផុតមួយក្នុងចំណោមវិធីសាស្រ្តដទៃទៀតក្នុងដំណើរការនេះ។ រាជរដ្ឋាភិបាលកម្ពុជាបានសម្រេចនូវវឌ្ឍនភាពដ៏អស្ចារ្យក្នុងការចាក់វ៉ាក់សាំងដល់ពលរដ្ឋរបស់ខ្លួន ធ្វើឲ្យប្រទេសកម្ពុជាឈរនៅលំដាប់ក្នុងចំណោមប្រទេសក្នុងតំបន់ដែលបានចាក់វ៉ាកសាំងជូនពលរដ្ឋខ្លួនបានច្រើនជាងគេ ហើយនេះគឺជាសមិទ្ធផលមួយគួរឲ្យកត់សម្គាល់។” លោកចាទ្បាក់ បានបន្តថា “យើងសូមវាយតម្លៃខ្ពស់ដល់ការដឹកនំារបស់រាជរដ្ឋាភិបាលកម្ពុជា និងទឹកចិត្តសប្បុរសធម៌របស់រដ្ឋាភិបាលសហរដ្ឋអាមេរិកចំពោះជំនួយវ៉ាក់សាំងទាំងនេះ ធ្វើឲ្យយើងឈានមួយជំហានទៀតទៅរកជ័យជំនះលើជំងឺរាតត្បាតកូវីដ-១៩។”

ទន្ទឹមគ្នានឹងការគំាទ្រដល់ការអនុវត្តយុទ្ធនាការចាក់វ៉ាក់សាំងកូវីដ-១៩ យូនីសេហ្វក៏បន្តគំាទ្រដល់កម្មវិធីផ្តល់ថ្នាំបង្ការរបស់រាជរដ្ឋាភិបាលកម្ពុជាផងដែរ តាមរយៈការធ្វើផែនការ ការគ្រប់គ្រងបរិក្ខារត្រជាក់ និងវ៉ាក់សាំង ការជំរុញតម្រូវការវ៉ាក់សាំង ការកសាងសមត្ថភាព និងយុទ្ធនាការអប់រំផ្សព្វផ្សាយដោយផ្តោតលើស្រ្តី និងកុមារងាយរងគ្រោះបំផុត។ ផ្អែកតាមបទពិសោធជាង ៧០ឆ្នាំ នៅក្នុងប្រទេសកម្ពុជា យូនីសេហ្វកំពុងបំពេញការងារជាមួយដៃគូនានា ដើម្បីទប់ស្កាត់ការផ្សព្វផ្សាយព័ត៌មានមិនពិត និងធានាថាសហគមន៍បានចូលរួមទាំងស្រុងក្នុងដំណើរការវ៉ាក់សាំង។

យន្តការកូវ៉ាក់ គឺជាភាពជាដៃគូរវាងអង្គការសុខភាពពិភពលោក (WHO) សម្ព័ន្ធសកលសម្រាប់វ៉ាក់សាំង និងថ្នាំបង្ការ (GAVI) និងសម្ព័ន្ធនវានុវត្តន៍ដើម្បីត្រៀមទប់ទល់នឹងជំងឺរាតត្បាត (CEPI) និងយូនីសេហ្វ។