ទិន្នន័យថ្មីបង្ហាញថា មានការធ្លាក់ចុះទំនុកចិត្តចំពោះវ៉ាក់សាំងកុមារ រហូតដល់ ៤៤ ភាគរយ សម្រាប់ប្រទេសមួយចំនួន ក្នុងអំឡុងមានជំងឺរាតត្បាតកូវីដ-១៩
- Available in:
- English
- Khmer
របាយការណ៍ថ្មីរបស់យូនីសេហ្វបានបង្ហាញថា មានកុមារចំនួន ៦៧ លាននាក់ មិនបានចាក់វ៉ាក់សាំងម្តង ឬពីរដង ក្នុងរយៈពេលជាងបីឆ្នាំកន្លងមកនេះ ដោយសារភាពរអាក់រអួលក្នុងការផ្ដល់សេវា ដោយសារប្រព័ន្ធសុខាភិបាលជួបការលំបាក ការបង្វែរធនធានដែលខ្វះខាត ជម្លោះ និងភាពផុយស្រួយ និងការធ្លាក់ចុះទំនុកចិត្ត។
ទីក្រុងញូយ៉ក ថ្ងៃទី២០ ខែមេសា ឆ្នាំ២០២៣៖ យូនីសេហ្វ បានជូនដំណឹងនៅថ្ងៃនេះនៅក្នុងរបាយការណ៍ថ្មីមួយស្ដីពីការចាក់ថ្នាំបង្ការថា ការយល់ឃើញរបស់សាធារណជនអំពីសារៈសំខាន់នៃវ៉ាក់សាំងសម្រាប់កុមារ បានធ្លាក់ចុះក្នុងអំឡុងពេលការរាតត្បាតនៃជំងឺកូវីដ-១៩ នៅក្នុងប្រទេសចំនួន ៥២ ក្នុងចំណោម ៥៥ ប្រទេសដែលត្រូវបានសិក្សា ។
របាយការណ៍ស្ថានភាពកុមារក្នុងពិភពលោកឆ្នាំ២០២៣ ៖ សម្រាប់កុមារគ្រប់រូប ការចាក់វ៉ាក់សាំងបង្ហាញពីការយល់ឃើញអំពីសារៈសំខាន់នៃវ៉ាក់សាំងសម្រាប់កុមារ បានធ្លាក់ចុះជាងមួយភាគបីនៅសាធារណរដ្ឋ កូរ៉េ ប៉ាពួញូហ្គីណេ ហ្គាណា សេណេហ្គាល់ និងប្រទេសជប៉ុន បន្ទាប់ពីជំងឺរាតត្បាតជាសកលបានចាប់ផ្តើម។ នៅក្នុងទិន្នន័យថ្មីនេះ ដែលបានប្រមូលដោយគម្រោងទំនុកចិត្តវ៉ាក់សាំង (The Vaccine Confidence Project)ហើយបានចេញផ្សាយនៅថ្ងៃនេះដោយយូនីសេហ្វក្នុងប្រទេសចិន ឥណ្ឌា និងម៉ិកស៊ិកូ ដែលជា ប្រទេសបានធ្វើការសិក្សាតែប៉ុន្មានប៉ុណ្ណោះ ដែលទិន្នន័យបង្ហាញថាការយល់ឃើញអំពីសារៈសំខាន់នៃវ៉ាក់សាំង មានការកើនទ្បើង។ នៅក្នុងប្រទេសភាគច្រើនដទៃទៀត មនុស្សមានអាយុក្រោម ៣៥ ឆ្នាំ និងជាស្ត្រី ទំនងជារាយការណ៍អំពីទំនុកចិត្តរបស់ខ្លួនកម្រិតទាបជាងគេ អំពីវ៉ាក់សាំងសម្រាប់កុមារបន្ទាប់ពី ជំងឺរាតត្បាតជាសកលបានចាប់ផ្តើម។*
ទំនុកចិត្តលើវ៉ាក់សាំង មានការប្រែប្រួល និងទៅតាមពេលវេលា។ ការប្រមូលទិន្នន័យ និងវិភាគបន្ថែមគឺជាការចាំបាច់ដើម្បីកំណត់ថា តើរបកគំហើញនេះបានឆ្លុះបញ្ចាំងពីនិន្នាការរយៈពេលវែងដែរ ឬយ៉ាងណា ។ ទោះបីជាមានការធ្លាក់ចុះនូវទំនុកចិត្តក៏ដោយ ការគាំទ្រជាទូទៅសម្រាប់វ៉ាក់សាំងនៅតែមានច្រើនដដែល ។ ជាង ៨០ ភាគរយនៃអ្នកឆ្លើយតបនឹងការអង្កេតនៅក្នុងប្រទេសជិតពាក់កណ្តាលនៃប្រទេសទាំង ៥៥ ដែលបានសិក្សា យល់ឃើញថា វ៉ាក់សាំងមានសារៈសំខាន់សម្រាប់កុមារ។
ទោះជាយ៉ាងណាក៏ដោយ របាយការណ៍នេះក៏បានបញ្ជាក់ថា ភាពប្រទាក់ក្រឡានៃកត្តាជាច្រើនបង្ហាញថា ការគំរាមកំហែងនៃការរារែកក្នុងការទទួលវ៉ាក់សាំង អាចកំពុងតែកើនឡើង។ កត្តាទាំងនេះ រួមមាន ភាពមិនប្រាកដប្រជាអំពីវិធានការឆ្លើយតបនឹងជំងឺរាតត្បាត ការទទួលបានព័ត៌មានក្លែងក្លាយមិនពិតកើនឡើង ការថយចុះទំនុកចិត្តលើអ្នកជំនាញ និងការបែកបាក់នៃនិន្នាការនយោបាយ។
លោកស្រី ខេតធឺរីន រូស្សែល នាយិកាប្រតិបត្តិយូនីសេហ្វ បានលើកឡើងថា “នៅពេលជំងឺរាតត្បាតជាសកលបានឈានដល់កម្រិតកំពូលអ្នកវិទ្យាសាស្ត្របានបង្កើតវ៉ាក់សាំងយ៉ាងឆាប់រហ័ស ដែលជួយសង្គ្រោះជីវិតមនុស្សរាប់មិនអស់។ ប៉ុន្តែទោះបីជាមានសមិទ្ធផលជាប្រវត្តិសាស្ត្រនេះក៏ដោយ ការភ័យខ្លាច និងព័ត៌មានមិនពិតអំពីវ៉ាក់សាំងគ្រប់ប្រភេទ បានរីកសាយភាយយ៉ាងទូលំទូលាយដូចគ្នានឹងមេរោគនេះផងដែរ» ។ “ទិន្នន័យនេះគឺជាសញ្ញាព្រមានគួរឲ្យព្រួយបារម្ភ ។ យើងមិនអាចអនុញ្ញាតឲ្យទំនុកចិត្តលើការទទួលវ៉ាក់សាំង ត្រូវបានបំផ្លាញដោយជំងឺរាតត្បាតជាសកលនោះទេ។ ទន្ទឹមនេះ រលកនៃការស្លាប់បន្ទាប់អាចជាកុមារដែលមានជំងឺកញ្ជ្រឹល ខាន់ស្លាក់ ឬជំងឺដែលអាចបង្ការបានផ្សេងទៀត» ។
អ្វីដែលគួរឲ្យព្រួយបារម្ភគឺ ការធ្លាក់ចុះនូវទំនុកចិត្តដែលបានកើតឡើងចំពេលមានការធ្លាក់ចុះជាបន្តបន្ទាប់ក្នុងទ្រង់ទ្រង់ធំបំផុតនូវការចាក់ថ្នាំបង្ការកុមារដែលមិនធ្លាប់មានក្នុងរយៈពេល ៣០ ឆ្នាំកន្លងមក ដែលបង្កដោយជំងឺរាត្បាតជាសកលកូវីដ-១៩។ ជំងឺរាតត្បាតជាសកលនេះបានរំខានដល់ការចាក់វ៉ាក់សាំងកុមារស្ទើរនៅគ្រប់ទីកន្លែង ជាពិសេសដោយសារតែមានសម្ពាធតម្រូវការយ៉ាងខ្លាំងទៅលើប្រព័ន្ធសុខាភិបាល ការបង្វែរធនធាននៃការចាក់ថ្នាំបង្ការសម្រាប់ការចាក់វ៉ាក់សាំងការពារជំងឺកូវីដ-១៩ បញ្ហាខ្វះបុគ្គលិកសុខាភិបាល និងវិធានការតម្រូវឲ្យមនុស្សនៅក្នុងផ្ទះ ។
របាយការណ៍ថ្ងៃនេះបានព្រមានថា កុមារសរុបចំនួន ៦៧ លាននាក់ មិនបានទទួលវ៉ាក់សាំងនៅចន្លោះឆ្នាំ ២០១៩ ដល់ឆ្នាំ២០២១ ដោយអត្រាគ្របដណ្តប់នៃការទទួលវ៉ាក់សាំងមានការថយចុះនៅក្នុងប្រទេសចំនួន ១១២។ កុមារដែលបានកើតមុន ឬកើតក្នុងអំឡុងពេលជំងឺរាតត្បាតជាសកលនេះ ឥឡូវនេះ បានឆ្លងផុតអាយុដែលត្រូវទទួលវ៉ាក់សាំងតាមធម្មតា ដែលនេះបង្ហាញពីភាពចាំបាច់ដែលត្រូវមានវិធានការបន្ទាន់ដើម្បីពន្លឿនការផ្ដល់វ៉ាក់សាំងដល់កុមារដែលមិនបានទទួល និងទប់ស្កាត់ការផ្ទុះជំងឺដែលអាចបង្កឲ្យមានការស្លាប់។ ឧទាហរណ៍ ក្នុងឆ្នាំ២០២២ ករណីជំងឺកញ្ជ្រឹល មានចំនួនច្រើនជាងពីរដងនៃចំនួនសរុបកាលពីឆ្នាំមុន។ ក្នុងឆ្នាំ២០២២ ចំនួនកុមារដែលធ្លាក់ខ្លួនពិការដោយជំងឺគ្រុនស្វិតដៃជើង មានការកើនឡើង ១៦ ភាគរយ ។ នៅពេលប្រៀបធៀបរយៈពេលពីឆ្នាំ ២០១៩ ដល់ ២០២១ ជាមួយនឹងរយៈពេល ៣ ឆ្នាំមុន មានការកើនឡើងចំនួន ៨ ដងនៃចំនួនកុមារដែលធ្លាក់ខ្លួនពិការដោយសារជំងឺគ្រុនស្វិតដៃជើង ដែលនេះបង្ហាញពីភាពចាំបាច់ដែលត្រូវមានកិច្ចខិតខំប្រឹងប្រែងផ្តល់វ៉ាក់សាំងប្រកបដោយនិរន្តរភាព។
ជំងឺរាតត្បាតសកល ក៏បានធ្វើឲ្យវិសមភាពដែលមានស្រាប់កាន់តែធ្ងន់ធ្ងរឡើងផងដែរ។ ចំពោះកុមារដែលនៅតំបន់ឆ្ងាយដាច់ស្រយាល ជាពិសេសនៅក្នុងសហគមន៍ដែលខ្វះខាតបំផុត ការចាក់វ៉ាក់សាំងនៅតែមិនមាន មិនអាចទទួលបាន ឬមិនមានតម្លៃសមរម្យ ។ សូម្បីមុនពេកមានជំងឺរាតត្បាតជាសកលនេះក៏ដោយ វឌ្ឍនភាពនៃការចាក់វ៉ាក់សាំង ក៏បានជាប់គាំងអស់រយៈពេលជិតមួយទសវត្សរ៍ ខណៈពិភពលោកកំពុងជួបប្រទះការលំបាកក្នុងការផ្ដល់ជូនវ៉ាក់សាំងទៅឲ្យកុមារដែលខ្វះខាតបំផុត។
ក្នុងចំណោមកុមារ ៦៧ លាននាក់ដែលមិនបានទទួលវ៉ាក់សាំងតាមធម្មតា ចន្លោះឆ្នាំ ២០១៩ និង ២០២១ មានកុមារចំនួន ៤៨ លាននាក់ មិនបានទទួលវ៉ាក់សាំងធម្មតាសូម្បីម្ដង ឬហៅថា "សូន្យដូស"។ គិតត្រឹមដំណាច់ឆ្នាំ ២០២១ ប្រទេសឥណ្ឌា និងនីហ្សេរីយ៉ា (ប្រទេសទាំងពីរដែលមានក្រុមកំណើតច្រើន) មានកុមារដែលសូន្យដូសច្រើនជាងគេ ប៉ុន្តែការកើនឡើងនៃចំនួនកុមារសូន្យដូស គឺគួរឲ្យកត់សម្គាល់ជាពិសេសនៅក្នុងប្រទេសមីយ៉ាន់ម៉ា និងហ្វីលីពីន។
កុមារដែលមិនបានទទួលវ៉ាក់សាំង រស់នៅក្នុងសហគមន៍ក្រីក្របំផុត ដាច់ស្រយាលបំផុត និងជាជនក្រីក្របំផុត ដោយពេលខ្លះត្រូវរងផលប៉ះពាល់ដោយសារជម្លោះ។ ទិន្នន័យថ្មីដែលផលិតសម្រាប់របាយការណ៍ដោយមជ្ឈមណ្ឌលអន្តរជាតិសម្រាប់សមធម៌សុខភាព (ICEH) បានរកឃើញថា ក្នុងគ្រួសារក្រីក្របំផុត មានកុមារ ម្នាក់ ក្នុងចំណោម ៥នាក់ទទួលបានវ៉ាក់សាំងសូន្យដូស ខណៈអ្នកមានបំផុតទទួលបានត្រឹមតែ ម្នាក់ ក្នុងចំណោម ២០ ប៉ុណ្ណោះ ។ ការសិក្សាបានរកឃើញថា កុមារដែលមិនបានចាក់វ៉ាក់សាំងច្រើនតែរស់នៅក្នុងសហគមន៍ពិបាកទៅដល់ ដូចជា តំបន់ជនបទ ឬតំបន់អនាធិបតេយ្យក្នុងទីក្រុង។ ពួកគេច្រើនតែមានម្តាយដែលមិនទទួលបានការអប់រំ ហើយមានសំទ្បេងតិចតួចនៅក្នុងការសម្រេចចិត្តក្នុងគ្រួសារ។ បញ្ហាប្រឈមទាំងនេះកើតឡើងច្រើនជាងគេនៅក្នុងប្រទេសដែលមានចំណូលទាប និងមធ្យម ដោយកុមារប្រមាណ ម្នាក់ក្នុងចំណោម ១០ នាក់នៅក្នុងតំបន់ទីក្រុងទទួលបានសូន្យដូស និង មាន ម្នាក់ ក្នុងចំណោម ៦ នាក់នៅតំបន់ជនបទ ។ នៅក្នុងប្រទេសដែលមានចំណូលមធ្យមកម្រិតខ្ពស់ ស្ទើរតែគ្មានគម្លាតរវាងកុមារនៅទីក្រុង និងជនបទ។
លោកវេជ្ជបណ្ឌិត អានៀរបាន ឆាតឺរជី ប្រធានស្តីទីយូនីសេហ្វប្រចាំកម្ពុជា បានមានប្រសាសន៍ថា
"យើងស្វាគមន៍ចំពោះកិច្ចខិតខំប្រឹងប្រែង និងវឌ្ឍនភាពដ៏ធំធេងដែលសម្រេចបានដោយប្រទេសកម្ពុជា រួមជាមួយដៃគូ ក្នុងការបង្ការកុមារពីជំងឺដ៏កាចសាហាវ និងក្នុងការពង្រីកការគ្របដណ្តប់ ការផ្តល់ថ្នាំបង្ការជាតិ រួមទាំងវ៉ាក់សាំងការពារជំងឺកូវីដ-១៩។ ការផ្តល់ថ្នាំបង្ការ គឺជាសិទ្ធិជាមូលដ្ឋានសម្រាប់កុមារគ្រប់រូប ហើយគ្មាននរណាម្នាក់ត្រូវទុកចោលឡើយ។ យូនីសេហ្វ សហការជាមួយអាជ្ញាធរជាតិ ដើម្បីសម្រេចបាននូវសមិទ្ធផលក្នុងផ្តល់នូវវ៉ាក់សាំងដល់កុមារគ្រប់រូប និងធានាឲ្យមានការទទួលបានវ៉ាក់សាំងប្រកបដោយសមធម៌សម្រាប់ទាំងអស់គ្នា ដោយមិនគិតពីភូមិសាស្ត្រ ជាតិសាសន៍ ឬស្ថានភាពសេដ្ឋកិច្ចសង្គម។ កុមារគ្រប់រូប ត្រូវទទួលបាននូវការរស់រានមានជីវិត និងភាពរីកចម្រើន។”
ដើម្បីចាក់វ៉ាក់សាំងដល់កុមារគ្រប់រូប ចាំបាច់ត្រូវពង្រឹងការថែទាំសុខភាពបឋម និងផ្តល់ឲ្យបុគ្គលិកជួរមុខជាស្ត្រីភាគច្រើននូវធនធាន និងជំនួយដែលពួកគេត្រូវការ។ របាយការណ៍នេះបង្ហាញពីស្ត្រីដែលស្ថិតនៅជួរមុខនៃការផ្តល់វ៉ាក់សាំង ប៉ុន្តែពួកគេប្រឈមមុខនឹងបញ្ហាប្រាក់ខែទាប ការងារក្រៅផ្លូវការ បញ្ហាខ្វះការបណ្តុះបណ្តាលផ្លូវការ និងឱកាសការងារ និងការគំរាមកំហែងសន្តិសុខរបស់ពួកគេ។
ដើម្បីដោះស្រាយវិបត្តិការរស់រានមានជីវិតរបស់កុមារនេះ យូនីសេហ្វកំពុងស្នើឲ្យរដ្ឋាភិបាលនានា
ពង្រឹងការប្តេជ្ញាចិត្តរបស់ខ្លួនទ្វេដង ក្នុងការបង្កើនការផ្តល់ហិរញ្ញប្បទានសម្រាប់ការចាក់ថ្នាំបង្ការ និងធ្វើការជាមួយភាគីពាក់ព័ន្ធ ដើម្បីដោះសោធនធានដែលមាន រួមទាំងមូលនិធិដែលនៅសេសសល់ពីជំងឺកូវីដ-១៩ សំដៅអនុវត្តជាបន្ទាន់ និងពន្លឿនការចាក់វ៉ាក់សាំង កិច្ចខិតខំប្រឹងប្រែងដើម្បីការពារកុមារ និងទប់ស្កាត់ការរីករាលដាលនៃជំងឺ។
របាយការណ៍ ទាមទារឲ្យរដ្ឋាភិបាលនានា៖
- កំណត់ជាបន្ទាន់ និងផ្ដល់ជូនកុមារទាំងអស់ ជាពិសេសកុមារដែលខកខានមិនបានចាក់វ៉ាក់សាំងក្នុងអំឡុងពេលការរាតត្បាតនៃជំងឺកូវីដ-១៩
- ពង្រឹងតម្រូវការសម្រាប់វ៉ាក់សាំង រួមទាំងដោយការកសាងទំនុកចិត្ត
- ផ្តល់អាទិភាពដល់ការផ្តល់មូលនិធិដល់សេវាចាក់ថ្នាំបង្ការ និងការថែទាំសុខភាពបឋម
- កសាងប្រព័ន្ធសុខភាពដែលធន់ទ្រាំ តាមរយៈការវិនិយោគលើបុគ្គលិកសុខាភិបាលស្ត្រី នវានុវត្តន៍ និងការផលិតក្នុងស្រុក
លោកស្រី ខេតធឺរីន រូស្សែល បានមានប្រសាសន៍ថា “ការផ្តល់ថ្នាំបង្ការបានជួយសង្គ្រោះជីវិតមនុស្សរាប់លាននាក់ និងការពារសហគមន៍ពីការរីករាលដាលជំងឺដ៏សាហាវ។ យើងដឹងយ៉ាងច្បាស់ថា ជំងឺឆ្លងដោយគ្មានព្រំដែន។ ការចាក់ថ្នាំបង្ការធម្មតា និងប្រព័ន្ធសុខភាពរឹងមាំ គឺជាវិធានការដ៏ល្អបំផុតរបស់យើងក្នុងការទប់ស្កាត់ការរាតត្បាតនាពេលអនាគត ការស្លាប់ដែលមិនចាំបាច់ និងការឈឺចាប់។ ដោយមានធនធាននៅសេសសល់ពីកត្តាជំរុញការចាក់វ៉ាក់សាំងការពារជំងឺកូវីដ-១៩ ឥឡូវនេះដល់ពេលដែលត្រូវប្តូរទិសដៅមូលនិធិទាំងនោះ ដើម្បីយកទៅពង្រឹងសេវាចាក់ថ្នាំបង្ការ និងវិនិយោគលើប្រព័ន្ធប្រកបដោយនិរន្តរភាពសម្រាប់កុមារគ្រប់រូប ។
#####
កំណត់សម្គាល់សម្រាប់និពន្ធនាយក៖
របាយការណ៍ស្ថានភាពកុមាររបស់ពិភពលោក គឺជារបាយការណ៍របស់យូនីសេហ្វ។ ការបោះពុម្ពឆ្នាំ ២០២៣ គឺជាការបោះពុម្ពលើកដំបូងនៃរបាយការណ៍ដែលបាននិយាយអំ់ពីការចាក់ថ្នាំបង្ការធម្មតា។ យូនីសេហ្វ បានផ្ដល់វ៉ាក់សាំងសង្គ្រោះជីវិតដល់ស្ទើរតែពាក់កណ្តាលនៃកុមារនៅលើពិភពលោកជារៀងរាល់ឆ្នាំ។
បន្ទាប់ពីម៉ោង ០០.0១ GMT ថ្ងៃទី២០ ខែមេសា អ្នកអាចស្វែងរកព័ត៌មានបន្ថែមនៅលើគេហទំព័ររបស់យើង ហើយទាញយករបាយការណ៍នៅទីនេះ។ ឯកសារពហុព័ត៌មាន រួមទាំងរូបថតថ្មី វីដេអូ b-roll និងករណីសិក្សា អាចរកបាននៅទីនេះ។
*គម្រោងទំនុកចិត្តវ៉ាក់សាំង (VCP) នៅសាលាអនាម័យ និងឱសថត្រូពិចទីក្រុងឡុងដ៍ បាននឹងកំពុងតាមដានទំនុកចិត្តវ៉ាក់សាំងតាំងពីឆ្នាំ ២០១៥ ដោយការវិភាគទិន្នន័យពីការអង្កេតរបស់ប្រទេសតំណាងជាតិ។ ទិន្នន័យដែលបង្ហាញក្នុងរបាយការណ៍នេះ ទទួលបានមកពីការសិក្សាឡើងវិញទ្រង់ទ្រាយធំនៃការផ្លាស់ប្តូរទំនុកចិត្តលើវ៉ាក់សាំងរវាងឆ្នាំ ២០១៥ និងខែវិច្ឆិកា ២០១៩ និងចាប់តាំងពីឆ្នាំ ២០២១។ ទិន្នន័យនៅក្នុងរបាយការណ៍នេះតំណាងឲ្យសំណុំរងនៃសំណុំទិន្នន័យពេញលេញដែលប្រមូលបានដោយ VCP ។ អ្នកអាចស្វែងរកសំណុំទិន្នន័យពេញដោយប្រើប្រាស់ ឧបករណ៍ ផែនទីអន្តរកម្មនេះ។
អំពីយូនីសេហ្វ៖ យូនីសេហ្វ ធ្វើការនៅទីតាំងដែលពិបាកបំផុតក្នុងពិភពលោក ដើម្បីសម្រេចទៅដល់កុមារដែលជួបការលំបាកបំផុតក្នុងពិភពលោក។ ជាង ១៩០ ប្រទេស និងទឹកដី ដែលយើងធ្វើការដើម្បី់កុមារគ្រប់រូប គ្រប់ទីកន្លែង សំដៅកសាងពិភពលោកឲ្យល្អប្រសើរសម្រាប់អ្នកគ្រប់គ្នា។
សម្រាប់ព័ត៌មានបន្ថែមអំពីអង្គការ យូនីសេហ្វ និងការងាររបស់ខ្លួន សូមចូលមើល៖ www.unicef.orgTwitter, Facebook, Instagram និង YouTube
សម្រាប់ព័ត៌មានបន្ថែម សូមទាក់ទង៖
អ្នកស្រី Tess Ingram យូនីសេហ្វ ញូវយ៉ក ទូរសព្ទ: +១ ៩៣៤ ៨៦៧ ៧៨៦៧ ឬ tingram@unicef.org
លោក Hadrien Bonnaud យូនីសេហ្វកម្ពុជា ទូរសព្ទ: +៨៥៥ ៩២ ៥៥៥ ២៩៤ ឬ hbonnaud@unicef.org
លោក មាស ប៊ុនលី យូនីសេហ្វកម្ពុជា ទូរសព្ទ: +៨៥៥ ១២ ៧៣៣៩០៩ ឬ bmeas@unicef.org
ទំនាក់ទំនងប្រព័ន្ធផ្សព្វផ្សាយ
About UNICEF
UNICEF promotes the rights and wellbeing of every child, in everything we do. Together with our partners, we work in 190 countries and territories to translate that commitment into practical action, focusing special effort on reaching the most vulnerable and excluded children, to the benefit of all children, everywhere.
For more information about UNICEF and its work for children, visit www.unicef.org.
