ទស្សនកិច្ចរបស់សមាជិកសភានៃបណ្តាប្រទេសតំបន់អ៊ឺរុបខាងជើង (ន័រឌីក)មកកម្ពុជា បង្ហាញថាកិច្ចខិតខំប្រឹងប្រែងរួមគ្នាជាពហុភាគី គឺជាគន្លឹះនៃការលើកកម្ពស់សុខភាពសម្រាប់ប្រជាពលរដ្ឋនៅតំបន់ដាច់ស្រយាលនៃប្រទេស

រាជធានីភ្នំពេញ ថ្ងៃទី៩ ខែកុម្ភៈ ឆ្នាំ២០២៤៖ នៅថ្ងៃនេះ គណៈប្រតិភូរួមមួយនៃសមាជិកសភា​មកពីប្រទេសដាណឺម៉ាក ន័រវេស និងស៊ុយអែត បានបញ្ចប់​ទស្សនកិច្ចរយៈពេល​បួនថ្ងៃរបស់ខ្លួនមកប្រទេសកម្ពុជា ដើម្បីសង្កេតមើល​ប្រសិទ្ធភាពនៃកម្មវិធីរបស់ Gavi សម្ព័ន្ធថ្នាំបង្ការសកល មូលនិធិសកល និងយូនីសេហ្វ ​ក្រោមការគាំទ្ររបស់​បណ្ដាប្រទេសន័រឌីកតាមរយៈ​ភាពជាដៃគូពហុភាគី ក្នុងការ រួមចំណែក​ចំពោះ​វឌ្ឍនភាពគួរឲ្យកត់សម្គាល់នៅក្នុងវិស័យសុខភាពមាតា និងទារក​នៅប្រទេស។

ក្រោមកិច្ចសហការរៀបចំ​របស់ក្រសួងសុខាភិបាល​នៃរាជរដ្ឋាភិបាលកម្ពុជា រួមជាមួយនឹង Gavi សម្ព័ន្ធថ្នាំបង្ការសកល មូលនិធិសកល​ដើម្បីប្រយុទ្ធនឹងជំងឺអេដស៍ របេង និងគ្រុនចាញ់ និងយូនីសេហ្វ បេសកកម្មនេះ​ក៏ជាឱកាសសម្រាប់​សមាជិកសភាទាំងដប់រូប ពិភាក្សា និងស្វែងយល់ពីអ្នកពាក់ព័ន្ធ​ អំពីវិធីដែលភាពជាដៃគូដ៏រឹងមាំ និងភាពជាដៃគូនៅមូលដ្ឋាន​ អាចបង្កើនវឌ្ឍនភាព​ពាក់ព័ន្ធនឹងសុខភាព និងសិទ្ធិរបស់ស្រ្តី និងកុមារ ឆ្លើយតបនឹងផលប៉ះពាល់អវិជ្ជមានជាបន្តបន្ទាប់នៃ​ជំងឺកូវីដកន្លងមក សម្រេចបាន​នូវលទ្ធភាព​ប្រកបដោយសមធម៌​ក្នុងការទទួលបាន​ការថែទាំសុខភាពចម្បង និងពន្លឿន​ការអភិវឌ្ឍ​សេដ្ឋកិច្ចសង្គម​​។

កម្មវិធីផ្តល់ថ្នាំបង្ការប្រចាំរបស់ប្រទេសកម្ពុជា​បានសម្រេចនូវការគ្របដណ្ដប់ក្នុងកម្រិតខ្ពស់នៅក្នុងតំបន់អាស៊ីអាគ្នេយ៍ ដោយសម្រេចបាននូវអត្រានៃការផ្តល់ថ្នាំបង្ការលើសពី ៨០ភាគរយក្នុងរយៈពេលជាច្រើនឆ្នាំកន្លងទៅនេះសម្រាប់សម្រាប់ថ្នាំបង្ការ DPT3 ( ថ្នាំបង្ការរួមបញ្ចូលគ្នាប្រឆាំងនឹងជំងឺខាន់ស្លាក់ ក្អកមាន់ និងតេតាណូស)។ នៅក្នុងរយៈពេល១០ឆ្នាំកន្លងមក ប្រទេសកម្ពុជាបានបញ្ចូល ដោយជោគជ័យនូវថ្នាំបង្ការថ្មីចំនួន៧មុខបន្ថែមទៀតក្រោមការឧបត្ថម្ភរបស់ Gavi។ ថ្នាំបង្ការទាំងនោះ រួមមាន​ DTP-HepB (ថ្នាំបង្ការប្រាំប្រភេទ)៖ បង្ការជំងឺ​ខាន់ស្លាក់ តេតាណូស ក្អកមាន់ ជំងឺរលាកថ្លើមប្រភេទបេ និងរលាកស្រោមខួរ ថ្នាំបង្ការ PCV៖ បង្ការជំងឺរលាកសួត ថ្នាំបង្ការ IPV៖ បង្ការជំងឺគ្រុនស្វិតដៃជើង (ថ្នាំបង្ការ​មេរោគជំងឺគ្រុនស្វិតដៃជើងអសកម្ម) ថ្នាំបង្ការ JE៖ បង្ការជំងឺរលាកខួរក្បាលជប៉ុន ថ្នាំបង្ការ MR៖ បង្ការជំងឺកញ្ជ្រិល និងស្អូច ថ្នាំបង្ការ HPV៖ បង្ការជំងឺមហារីកមាត់ស្បូន។

អត្រាប្រេវ៉ាឡង់នៃ​ការចម្លងមេរោគអេដស៍ ជំងឺរបេង និងគ្រុនចាញ់​ បានធ្លាក់ចុះគួរឲ្យកត់សម្គាល់​នៅក្នុងរយៈពេលជាងមួយទសវត្សរ៍​កន្លងទៅនេះ។ នៅឆ្នាំ២០១៧ ប្រទេសកម្ពុជា បានក្លាយជាប្រទេសមួយក្នុងចំណោមប្រទេសចំនួន៧ ដែលសម្រេចបានគោលដៅ HIV សកល ៩០-៩០-៩០ និងក្នុងឆ្នាំ២០២១ បានចាកចេញពីបញ្ជីប្រទេស៣០ដែលមានបន្ទុកជំងឺរបេងខ្ពស់។ ប្រទេសកម្ពុជាបាន សម្រេចនូវការលប់បំបាត់ការស្លាប់ពីជំងឺរបេងនៅត្រឹម២០២០ មុនកាលកំណត់ និងគ្មានការរាយការណ៍ ពីករណីស្លាប់ដោយ ជំងឺគ្រុនចាញ់ចាប់តាំងពីឆ្នាំ២០១៨មកម្លេះ។  

ក្នុងកំឡុងពេលនៃទស្សនកិច្ច គណៈប្រតិភូ​បានចុះទស្សនកិច្ចសកម្មភាពតាមមូលដ្ឋាន​នៅខេត្តសៀមរាប រួមទាំង​ភូមិមាត់ខ្លា ដែលភូមិបណ្ដែតទឹក ដើម្បីស្វែងយល់ដោយផ្ទាល់អំពី​ កិច្ចខិតខំប្រឹងប្រែង និង​បញ្ហាប្រឈម​នានាចំពោះ​ការពង្រឹង​ប្រព័ន្ធសុខាភិបាល និងការផ្ដល់​ការថែទាំសុខភាពបឋម ដូចជា ការផ្ដល់ថ្នាំបង្ការ ការថែទាំមុន និងក្រោយពេលសម្រាលកូន ការត្រួតពិនិត្យអាហារូបត្ថម្ភ ការលើកកម្ពស់សុខភាពផ្លូវភេទ និងសុខភាពបន្តពូជ និង​ការធ្វើតេស្តរក​ជំងឺគ្រុនចាញ់ ទៅដល់​សហគមន៍ដែលពិបាកទៅដល់។

ឯកឧត្តម said Åsmund Aukrust និងឯកឧត្តម Dag Inge Ulstein សមាជិកសភាមកពី ប្រទេសន័រវេស បានមានប្រសាសន៍ថា៖ “យើងមានកិត្តិយសណាស់ដែលបានមក ធ្វើទស្សនកិច្ចនៅ កម្ពុជា និងបានឃើញនូវការរៀបចំផ្តល់សេវាសុខភាពដល់ប្រជាពលរដ្ឋ។ សកម្មភាព ទាំងនេះបានជួយ សង្រ្គោះ និងផ្លាស់ប្តូរជីវិតមនុស្ស ជាពិសេសយើងបានចងចាំនៅពេលឃើញការងាររបស់យូនីសេហ្វផលប្រយោជន៍ដល់កុមារនៅភូមិបណ្តែតទឹក។ ដោយសហការជាមួយអាជ្ញាធរមូលដ្ឋាន ពួកគេបានផ្តល់នូវសេវាផ្តល់ថ្នាំបង្ការជាប្រចាំ និងការត្រួតពិនិត្យសុខភាព។”

ទស្សនកិច្ចទៅកាន់សាលារៀនបឋមសិក្សា និងអនុវិទ្យាល័យអារញ្ញរង្សី បានផ្ដល់ឱកាស​សម្រាប់គណៈប្រតិភូ​ ដើម្បីទំនាក់ទំនងដោយផ្ទាល់ជាមួយក្មេងជំទង់ ​អំពី​ការគាំទ្រដែលពួកគេបាន​ទទួលពាក់ព័ន្ធនឹង​សិទ្ធិក្នុងការទទួលបាន​សុខភាពផ្លូវភេទ និងសុខភាពបន្តពូជ និងវិធានការផ្នែកអាកាសធាតុ និងសកម្មភាពពួកគេធ្វើឲ្យមានការផ្លាស់ប្ដូរវិជ្ជមាន​នៅក្នុងសហគមន៍​របស់ខ្លួន។

លោកជំទាវ Gunvor Wibroe សមាជិកសភាប្រទេសដាណឺម៉ាក បានមានប្រសាសន៍ថា៖
”ខ្ញុំពេញចិត្តជាមួយនឹងវឌ្ឍនភាព ដែលក្រុមគណៈប្រតិភូបានឃើញ សម្រាប់ប្រជាពលរដ្ឋងាយរងគ្រោះ កុមារ ក្មេងជំទង់ និងស្រ្តីនៅកម្ពុជា ដែលកើតចេញពីកិច្ចសហប្រតិបត្តិការរវាងសង្គមស៊ីវិល និងអន្តរ
ស្ថាប័ន។ យើងជឿជាក់ថា លទ្ធផលដែលយើងបានឃើញដូចជា ការផ្តល់ថ្នាំបង្ការ សុខភាពបន្តពូជ និងសិទ្ធិ រួមទាំងការងារគាំទ្រការលើកកម្ពស់សិទ្ធិស្រ្តី និងសុខភាពមាតា កំពុងធ្វើឲ្យមានការផ្លាស់ប្តូរវិជ្ជមានដ៏ធំធេង មិនត្រឹមតែសម្រាប់ប្រជាពលរដ្ឋម្នាក់ៗប៉ុណ្ណោះទេ ប៉ុន្តែសម្រាប់សហគមន៍នានា​ និងប្រទេសទាំងមូលផងដែរ។

ឯកឧត្តម  Joar Forssell និងឯកឧត្តម Tomas Eneroth សមាជិកសភាប្រទេសស៊ុយអ៊ែត បានមានប្រសាសន៍ថា៖ “យើងពេញចិត្តជាខ្លាំងជាមួយការងារដែល Gavi សម្ព័ន្ធថ្នាំបង្ការសកល មូលនិធិសកល និងយូនីសេហ្វ កំពុងបំពេញនៅក្នុងប្រទេសកម្ពុជា និងមានមោទនភាពចំពោះការគាំទ្រ របស់ប្រទេសស៊ុយអ៊ែតទៅដល់ស្ថាប័នទាំងអស់នោះ។ វាច្បាស់ណាស់សម្រាប់យើងដែលចាំបាច់ត្រូវ បន្តការវិនិយោគក្នុងកិច្ចសហប្រតិបត្តិការអភិវឌ្ឍន៍។”

ក្រុមគណៈប្រតិភូសមាជិកសភាក៏​បានជួបជាមួយរដ្ឋមន្រ្តី​ក្រសួងសុខាភិបាល និងមន្រ្តីជាន់ខ្ពស់​នៃក្រសួងសុខាភិបាល សមាជិកសភាកម្ពុជា ទីភ្នាក់ងារសហប្រជាជាតិ អង្គការសង្គមស៊ីវិល និង​ដៃគូអភិវឌ្ឍន៍​ផ្សេងទៀត ដើម្បីពិភាក្សាអំពី​អាទិភាពនៅក្នុងវិស័យ​សុខាភិបាល បញ្ហាប្រឈមឆ្ពោះទៅរក​ការសម្រេចបានគោលដៅអភិវឌ្ឍន៍​ប្រកបដោយចីរភាព (SDGs) និងតួនាទីរបស់ដៃគូ​នៅក្នុងការ​ដោះស្រាយបញ្ហាប្រឈម​ទាំងនេះ។

លោកបណ្ឌិត វីល ផាកស៍ នាយកយូនីសេហ្វប្រចាំកម្ពុជា បានមានប្រសាសន៍ថា៖ “កិច្ចគាំទ្រ​សប្បុរសធម៌​របស់ប្រទេសដាណឺម៉ាក ន័រវេស និងស៊ុយអែត បានរួមចំណែកដល់​វឌ្ឍនភាពគួរឲ្យកត់សម្គាល់​ទៅលើ​លទ្ធផលផ្នែកសុខភាពសម្រាប់សហគមន៍ងាយរងគ្រោះបំផុត និងសហគមន៍​ពិបាកទៅដល់មួយចំនួននៅប្រទេសកម្ពុជា ដោយផ្តល់ផលប្រយោជន៍ដល់​អាយុជីវិតមនុស្សរាប់លាននាក់ រួមទាំង​កុមារ។ តាមរយៈ​ការបន្ត​កិច្ចសហប្រតិបត្តិការពហុភាគីដ៏រឹងមាំ និង​ការវិនិយោគរួមគ្នា ដែលផ្ដល់អាទិភាពចំពោះ​ការទទួលបាន​សេវាសង្គមចាំបាច់ប្រកបដោយសមធម៌ យើងអាច​ជួយកុមារឲ្យសម្រេចបាន​យ៉ាងពេញលេញនូវសិទ្ធិរបស់ពួកគេ និងបង្កើតឱកាស​សម្រាប់អនាគតមួយដែលកាន់តែមានសុខភាពល្អ និងភាពរីកចម្រើន​ សម្រាប់កុមារ​គ្រប់រូប​នៅកម្ពុជា។”

សម្រាប់ព័ត៌មានបន្ថែម សូមទំនាក់ទំនង៖  

លោក អាឌ្រាន បូណូ
ប្រធានផ្នែកទំនាក់ទំនង យូនីសេហ្វកម្ពុជា
ទូរសព្ទ: +៨៥៥ ៩២ ៥៥៥ ២៩៤
សារអេទ្បិកត្រូនិក៖ [email protected]

Meg Sharafudeen
អ្នកគ្រប់គ្រងជាន់ខ្ពស់ផ្នែកទំនាក់ទំនង ប្រព័ន្ធផ្សព្វផ្សាយ និងទំនាក់ទំនងយុទ្ធសាស្រ្ត
Gavi សម្ព័ន្ធ​ថ្នាំបង្ការសកល
ទូរសព្ទ៖ +៤១ ៧៩ ៧១១ ៥៥ ៥៤
សារអេទ្បិកត្រូនិក៖ [email protected]

###

អំពី Gavi សម្ព័ន្ធថ្នាំបង្ការសកល

Gavi សម្ព័ន្ធថ្នាំបង្ការសកល គឺជាភាពជាដៃគូរវាងសាធារណៈ និងឯកជន ដែលជួយ​ផ្ដល់ថ្នាំបង្ការប្រឆាំងនឹងជំងឺគ្រោះថ្នាក់បំផុតនៅក្នុងពិភពលោក ​ទៅដល់​កុមារចំនួនជាងពាក់កណ្ដាលនៃកុមារទាំងអស់​នៅក្នុងពិភពលោក។ សម្ព័ន្ធថ្នាំបង្ការសកល ប្រមូលផ្តុំនូវបណ្តា​ប្រទេសកំពុងអភិវឌ្ឍ និងរដ្ឋាភិបាលជាម្ចាស់ជំនួយ អង្គការសុខភាពពិភពលោក យូនីសេហ្វ ធនាគារពិភពលោក ឧស្សាហកម្មថ្នាំបង្ការទីភ្នាក់ងារបច្ចេកទេស សង្គមស៊ីវិល មូលនិធិ Bill & Melinda Gates និងដៃគូវិស័យឯកជន​ផ្សេងទៀត។ សូមមើល​បញ្ជីពេញលេញ​នៃរដ្ឋាភិបាលជាម្ចាស់ជំនួយ និងអង្គការនាំមុខផ្សេងទៀត ដែលផ្ដល់មូលនិធិដល់ការងារ​របស់ Gavi ដោយចុចទីនេះ។ ចាប់តាំងពីការបង្កើតនៅឆ្នាំ២០០០មក Gavi បានជួយដល់ការផ្តល់ថ្នាំបង្ការ​ដល់កុមារ​មួយជំនាន់ពេញ ពោលគឺកុមារចំនួនជាង ១ប៊ីលាននាក់ និងបានបង្ការមរណភាពនាពេលអនាគតចំនួនជាង១៧,៣លាន ដែលជួយកាត់បន្ថយមរណភាពរបស់​កុមារ​ចំនួនពាក់ កណ្ដាល​នៅក្នុងប្រទេសចំណូលទាប​ចំនួន ៧៨ប្រទេស។

សម្រាប់ព័ត៌មានបន្ថែមអំពីការងាររបស់ Gavi សូមចូលទៅកាន់៖ www.gavi.org
តាមដាន Gavi សម្ព័ន្ធភាព​ថ្នាំបង្ការ​នៅលើ Facebook | Twitter

អំពីមូលនិធិសកល ដើម្បីប្រយុទ្ធនឹង​ជំងឺអេដស៍ របេង និងគ្រុនចាញ់

មូលនិធិសកល គឺជាភាពជាដៃគូកម្រិតពិភពលោក​ ដើម្បីជម្នះនឹងមេរោគអេដស៍ ជំងឺរបេង និងគ្រុនចាញ់ ព្រមទាំងធានានូវ​អនាគតមួយដែលកាន់តែមានសុខភាពល្អ សុវត្ថិភាព និងសមធម៌​សម្រាប់មនុស្សគ្រប់រូប។ យើងកៀរគរថវិកា និងវិនិយោគថវិកាជាង ៥ប៊ីលានដុល្លារអាមេរិក​ក្នុងមួយឆ្នាំ ដើម្បី​ប្រយុទ្ធនឹងជំងឺឆ្លងគ្រោះថ្នាក់បំផុត ដេញដោលចំពោះ​ភាពអយុត្តិធម៌ដែលជំរុញឲ្យមានជំងឺទាំងនេះ និងពង្រឹងប្រព័ន្ធសុខាភិបាល និងការត្រៀមលក្ខណៈជាមុនចំពោះ​ការរាតត្បាតជំងឺនៅក្នុងប្រទេសដែលរងការប៉ះទង្គិចបំផុតជាង ១០០ប្រទេស។ យើងបង្រួបបង្រួម​អ្នកដឹកនាំពិភពលោក សហគមន៍ សង្គម
ស៊ីវិល បុគ្គលិក​សុខាភិបាល និងវិស័យឯកជន​ ដើម្បីស្វែងរកដំណោះស្រាយ ដែលមានផលប៉ះពាល់ខ្លាំងបំផុត ហើយយើងពង្រីក​ដំណោះស្រាយទាំងនេះទៅទូទាំងពិភពលោក។ ចាប់តាំងពីឆ្នាំ២០០២ ភាពជាដៃគូមូលនិធិសកល​បានសង្គ្រោះអាយុជីវិតមនុស្ស​ចំនួន ៥៩លាននាក់។

សម្រាប់ព័ត៌មានបន្ថែមអំពី​ការងាររបស់មូលនិធិសកល សូមចូលទៅកាន់៖ https://www.theglobalfund.org/

សូមតាមដានមូលនិធិសកលនៅលើ Facebook | Twitter