យូនីសេហ្វ និងសភាពាណិជ្ជកម្មអឺរ៉ុបប្រចាំកម្ពុជា សហការគ្នាដើម្បីលើកកម្ពស់សិទ្ធិកុមារតាមរយៈការធ្វើធុរកិច្ចប្រកបដោយការទទួលខុសត្រូវ

រាជធានីភ្នំពេញ ថ្ងៃទី៣ ខែធ្នូ ឆ្នាំ២០២៥ – នៅថ្ងៃនេះ យូនីសេហ្វ និងសភាពាណិជ្ជកម្មអឺរ៉ុបប្រចាំកម្ពុជា (EuroCham) បានចុះហត្ថលេខាលើអនុស្សរណៈនៃការយោគយល់គ្នា (MoU) រយៈពេល ៣ឆ្នាំ (២០២៥-២០២៨) ដើម្បីពង្រឹងការចូលរួមរបស់វិស័យឯកជន ក្នុងការលើកកម្ពស់សិទ្ធិ និងសុខុមាលភាពកុមារ។

ភាពជាដៃគូនេះ កៀរគរបណ្តាញធុរកិច្ចដ៏ទូលំទូលាយរបស់ EuroCham និងជំនាញបច្ចេកទេសរបស់យូនីសេហ្វ ដើម្បីលើកកម្ពស់ការអនុវត្តធុរកិច្ចប្រកបដោយការទទួលខុសត្រូវ ការគិតគូរពីកុមារ និងចីរភាព ដែលជួយជំរុញវឌ្ឍនភាពឆ្ពោះទៅរកគោលដៅអភិវឌ្ឍន៍ប្រកបដោយចីរភាព (SDGs)ជាពិសេសគោលដៅដែលទាក់ទងនឹងសិទ្ធិកុមារ ការអប់រំ ទឹកស្អាត អនាម័យ សុខភាព និងអាហារូបត្ថម្ភ ការប្រែប្រួលអាកាសធាតុ បរិវត្តកម្មឌីជីថល បរិយាបន្នពិការភាព សមភាពយេនឌ័រ និងការផ្តល់ភាពអង់អាចដល់យុវជន។

លោកបណ្ឌិត វីល​ ផាកស៍ នាយកយូនីសេហ្វប្រចាំកម្ពុជា មានប្រសាសន៍ថា៖ «ជាមួយនឹងធនធាន និងជំនាញដ៏ច្រើនសន្ធឹកសន្ធាប់របស់ខ្លួន អាជីវកម្មនានាមានតួនាទីយ៉ាងសំខាន់ក្នុងការដោះស្រាយបញ្ហាប្រឈមជាសកល និងការកសាងពិភពលោកមួយដែលមានសុវត្ថិភាព និងចីរភាពជាងមុនសម្រាប់កុមារគ្រប់រូប»។ លោកបានបន្តថា៖ «យើងមានមោទកភាពក្នុងការសហការជាមួយសភាពាណិជ្ជកម្មអឺរ៉ុប នៅក្នុងកិច្ចខិតខំប្រឹងប្រែងនេះ។ តាមរយៈការសហការគ្នាយ៉ាងជិតស្និទ្ធ និងការដាក់សិទ្ធិកុមារជាអាទិភាពនៃការអនុវត្តធុរកិច្ចប្រកបដោយចីរភាព យើងអាចបង្កើតគំនិតថ្មី ពង្រីកដំណោះស្រាយរបស់យើង ឈានទៅរកទីផ្សារថ្មី និងដោះស្រាយបញ្ហាប្រឈមសំខាន់ៗ ដើម្បីជួយឱ្យយុវជនជំនាន់ក្រោយរបស់កម្ពុជា អាចបញ្ចេញសក្តានុពលរបស់ពួកគេបានពេញលេញ»។

លោក Martin Brisson នាយកប្រតិបត្តិសភាពាណិជ្ជកម្មអឺរ៉ុបប្រចាំកម្ពុជា បានមានប្រសាសន៍ថា «សភាពាណិជ្ជកម្មអឺរ៉ុបប្រចាំកម្ពុជា មានមោទកភាពចំពោះភាពជាដៃគូជាមួយយូនីសេហ្វ ដែលនឹងជួយពង្រឹងការប្តេជ្ញាចិត្តរួមរបស់យើង ក្នុងការលើកកម្ពស់ការអនុវត្តធុរកិច្ចប្រកបដោយការទទួលខុសត្រូវ ដើម្បីគាំទ្រ និងលើកកម្ពស់សិទ្ធិកុមារ។ តាមរយៈការលើកកម្ពស់ការយល់ដឹងរួមគ្នា ការចូលរួមផ្នែកគោលនយោបាយ និងការកសាងសមត្ថភាព យើងនឹងផ្តល់លទ្ធភាពដល់សមាជិករបស់យើងក្លាយជាអ្នកដឹកនាំគំរូ។ កិច្ចសហប្រតិបត្តិការនេះនឹងជួយយើងក្នុងការជំរុញសកម្មភាពរួម កៀរគរជំនាញឯកទេស និងបង្កើតបរិយាកាសអំណោយផលកាន់តែប្រសើរ ដើម្បីឱ្យយុវជនកម្ពុជាមានការរីកចម្រើនលូតលាស់»។

តាមរយៈកិច្ចសហប្រតិបត្តិការនេះ យូនីសេហ្វ និង EuroCham មានគោលបំណងកៀរគរវិស័យឯកជន ឱ្យក្លាយជាកម្លាំងចលករដ៏មានឥទ្ធិពលនៃការផ្លាស់ប្តូរជាវិជ្ជមានសម្រាប់កុមារ និងយុវជន តាមរយៈការបញ្ជ្រាបសិទ្ធិកុមារទៅក្នុងយុទ្ធសាស្ត្រស្នូលនៃអាជីវកម្ម ការវិនិយោគ និងប្រតិបត្តិការការងារ។

នៅក្នុងភាពជាដៃគូនេះ សមាជិករបស់ EuroCham នឹងត្រូវបានលើកទឹកចិត្ត និងគាំទ្រឱ្យចូលរួមចំណែកក្នុងកម្មវិធីរបស់យូនីសេហ្វ តាមរយៈការធ្វើធុរកិច្ចប្រកបដោយការទទួលខុសត្រូវ ការវិនិយោគដែលគិតគូរពីកុមារ និងការអនុវត្តប្រកបដោយចីរភាព។ កិច្ចសហប្រតិបត្តិការនេះ ក៏មានគោលបំណងលើកកម្ពស់ការយល់ដឹងនៅក្នុងសហគមន៍ធុរកិច្ច អំពីសិទ្ធិកុមារ និងឥរិយាបថសាជីវកម្មដែលមានការទទួលខុសត្រូវ ដែលស្របតាមស្តង់ដារចីរភាព និងការពិនិត្យផ្ទៀងផ្ទាត់ហ្មត់ចត់ (due-diligence) របស់សហភាពអឺរ៉ុប។

លើសពីនេះ ភាពជាដៃគូនេះនឹងបង្កើតឱកាសសម្រាប់សកម្មភាពរួមគ្នា រួមទាំងតាមរយៈគំនិតផ្តួចផ្តើមផ្តល់ភាពអង់អាចដល់យុវជន សកម្មភាពកសាងសមត្ថភាព និងការអភិវឌ្ឍគោលការណ៍ណែនាំរួម ព្រមទាំងឧបករណ៍ធុរកិច្ច ដែលជួយប្រែក្លាយគោលការណ៍សិទ្ធិកុមារឱ្យទៅជាសកម្មភាពជាក់ស្តែង។

អំពីសភាពាណិជ្ជកម្មអឺរ៉ុបប្រចាំកម្ពុជា

សភាពាណិជ្ជកម្មអឺរ៉ុបប្រចាំកម្ពុជា (EuroCham Cambodia) ត្រូវបានបង្កើតឡើងក្នុងឆ្នាំ២០១១ ដោយសមាគមធុរកិច្ចបារាំង អាល្លឺម៉ង់ និងអង់គ្លេសប្រចាំកម្ពុជា ដើម្បីបម្រើជាសភាពាណិជ្ជកម្មផ្លូវការរបស់សហគមន៍ធុរកិច្ចអឺរ៉ុបក្នុងព្រះរាជាណាចក្រកម្ពុជា។ ចាប់តាំងពីពេលនោះមក EuroCham បានរីកចម្រើនដល់សមាជិកជាង ៤០០ នាក់ និងមានសាខាជាតិ ៧ រួមមាន ២៣ ប្រទេសអឺរ៉ុប។

សកម្មភាពស្នូលរបស់ EuroCham Cambodia គឺការលើកកម្ពស់ ការគាំទ្រ និងការតំណាងសមាជិករបស់ខ្លួន ព្រមទាំងផលប្រយោជន៍ធុរកិច្ចអឺរ៉ុប នៅក្នុងកិច្ចសន្ទនាជាមួយរាជរដ្ឋាភិបាលកម្ពុជា ដោយមានគោលបំណងអភិវឌ្ឍបរិយាកាសធុរកិច្ច និងវិនិយោគដែលមានប្រសិទ្ធភាព និងអំណោយផលសម្រាប់ទាំងអស់គ្នា។

គោលបំណងសំខាន់ៗរបស់ EuroCham មានដូចជា៖

• ប្រឹក្សាយោបល់ និងតស៊ូមតិ លើបញ្ហាសំខាន់ៗទាក់ទងនឹងការធ្វើធុរកិច្ចនៅកម្ពុជា
• លើកកម្ពស់ការវិនិយោគ នៅកម្ពុជា
• ធ្វើការដើម្បីបង្កើនលទ្ធភាព សម្រាប់ធុរកិច្ចអឺរ៉ុប ក្នុងការទទួលបានទីផ្សារកម្ពុជា និងច្រាសមកវិញ; និងសម្រួលដល់ការធ្វើធុរកិច្ចរវាងសហគ្រាសធុនតូច និងមធ្យមរបស់កម្ពុជា និងរដ្ឋសមាជិកសហភាពអឺរ៉ុប
• ផ្តល់សេវាកម្ម ទាក់ទងនឹងបញ្ហាសេដ្ឋកិច្ច ច្បាប់ បច្ចេកទេស ហិរញ្ញវត្ថុ ទីផ្សារ និងបញ្ហាធុរកិច្ចផ្សេងទៀតនៅក្នុងសហភាពអឺរ៉ុប និងកម្ពុជា ព្រមទាំងផ្តល់ព័ត៌មានជាក់លាក់នៃឧស្សាហកម្មដល់វិនិយោគិន
• លើកកម្ពស់អត្តសញ្ញាណធុរកិច្ច ដ៏រឹងមាំរបស់សហភាពអឺរ៉ុប ចំពោះសហគមន៍ធុរកិច្ចកម្ពុជា
• ធ្វើការយ៉ាងជិតស្និទ្ធ ជាមួយភាគីពាក់ព័ន្ធកម្ពុជា ក្នុងការគាំទ្រដល់កំណើនសេដ្ឋកិច្ចកម្ពុជាប្រកបដោយបរិយាបន្ន និងចីរភាព

សម្រាប់ព័ត៌មានបន្ថែម សូមទំនាក់ទំនង៖​​
Stew Post, Senior Communications Officer,
📧 [email protected]