យុវជននាំមកនូវស្នាមញញឹមដល់កុមារដែលរងផលប៉ះពាល់ដោយជម្លោះ

សម្រាប់កញ្ញា ចន្ថា និងអ្នកស្ម័គ្រចិត្តដទៃទៀត កម្មវិធីបុណ្យភូមិមានជើង (Bonn Phum on the Move) នេះ ដែលបានជួបជុំគ្នាក្រោមប្រធានបទ “រួមគ្នាដើម្បីសន្តិភាព រួមគ្នាដើម្បីសិទ្ធិកុមារ” ពោលគឺតំណាងឱ្យការវិលត្រឡប់ទៅរកភាពប្រក្រតីវិញ និងភាពធូរស្រាលពីផលវិបាកនៃព្រឹត្តិការណ៍ថ្មីៗនេះ ។

កញ្ញាស៊ីណុង អាយុ ១៧ ឆ្នាំ បាននិយាយថា “យើងមានភាពតានតឹងខ្លាំងណាស់ព្រោះការសិក្សារបស់យើងមិនបានដំណើរការទៅដោយរលូន ។ យើងត្រូវសម្រាកមួយរយៈដោយសារជម្លោះ” ។ “ឥឡូវយើងសប្បាយរីករាយឡើងវិញ ហើយយើងអាចញញឹមវិញបាន” ។

ម៉ាលីន អាយុ ១៧ ឆ្នាំ ដែលបានចំណាយពេលពេញមួយថ្ងៃគូរមុខ បាននិយាយថា  “ការប្រារព្ធព្រឹត្តិការណ៍នៅព្រះវិហារគឺដូចជាឱសថសម្រាប់ព្យាបាលស្ថានភាពផ្លូវចិត្តរបស់ប្រជាជន” ។ “វាអាចជួយប្រជាជននៅព្រះវិហារឱ្យភ្លេចទុក្ខព្រួយរបស់ពួកគេមួយរយៈ។ ចំពោះខ្លួនខ្ញុំផ្ទាល់ ខ្ញុំមិនមែនត្រឹមតែជាអ្នកស្ម័គ្រចិត្តយុវជន​ប៉ុណ្ណោះទេ ប៉ុន្តែថែមទាំងជាអ្នកចូលរួមលេងយ៉ាងសប្បាយរីករាយផងដែរ ។

ជារៀងរាល់ឆ្នាំ ទិវាកុមារពិភពលោក នៅថ្ងៃទី២០ ខែវិច្ឆិកា គឺជាខួបនៃអនុសញ្ញាអង្គការសហប្រជាជាតិស្តីពី​សិទ្ធិកុមារ ដែលប្រទេសកម្ពុជាបានផ្តល់សច្ចាប័នក្នុងឆ្នាំ ១៩៩២ ។ វាគឺជាទិវាសកម្មភាពសកលសម្រាប់កុមារ ដោយកុមារ និងតំណាងឱ្យវេទិកាមួយសម្រាប់ការបន្តការប្តេជ្ញាចិត្តចំពោះសិទ្ធិកុមារ និងសម្រាប់យុវជន​ក្នុងការលើកឡើងពីបញ្ហាដែលមានសារៈសំខាន់ចំពោះពួកគេ ។

អស់រយៈពេលបីឆ្នាំកន្លងមកនេះ យូនីសេហ្វ ប្រចាំកម្ពុជា បានសហការជាមួយបណ្តាញយុវជន ភ្លើងគប់ ដើម្បីរៀបចំពិធីកម្មវិធីបុណ្យភូមិមានជើង នៅតាមខេត្តដាច់ស្រយាល និងពិបាកទៅដល់ ដោយនាំមកនូវភាពសប្បាយរីករាយ ការរៀនសូត្រ និងឱកាសដល់ជនងាយរងគ្រោះ និងផ្តល់ភាពអង់អាចដល់កុមារជាអ្នកផ្លាស់ប្តូរនៅក្នុងសហគមន៍ និងប្រទេសរបស់ពួកគេ ។

ក្នុងឆ្នាំ ២០២៥ ការរៀបចំទិវាកុមារពិភពលោកនៅខេត្តព្រះវិហារ រួមជាមួយអាជ្ញាធរខេត្ត គឺជាការអំពាវនាវឱ្យមានសន្តិភាព និងការការពារសម្រាប់កុមារគ្រប់រូប ក្នុងកាលៈទេសៈទាំងអស់ និងជាឱកាសមួយ ដើម្បីផ្សព្វផ្សាយទៅដល់កុមារដែលងាយរងគ្រោះបំផុតមួយចំនួនរបស់ប្រទេស ។ យុវជនជាង ១០០ នាក់មកពីខេត្តព្រះវិហារ ទទួលបានការបណ្តុះបណ្តាលឱ្យសម្របសម្រួលព្រឹត្តិការណ៍នេះ ដឹកនាំសកម្មភាព និងនាំមកនូវក្តីសង្ឃឹមដល់សហគមន៍របស់ពួកគេឡើងវិញ ។

សម្រាប់អ្នកស្ម័គ្រចិត្ត វាគឺជាឱកាសមួយដើម្បីកសាងជំនាញផ្ទាល់ខ្លួនរបស់ពួកគេ និងបង្កើនទំនុកចិត្ត 
ខណៈ​​ពេលត្រូវគាំទ្រកុមារឱ្យរៀនសូត្រ ញញឹម និងស្រមៃមើលអនាគតដ៏មានសង្ឃឹមជាងមុន ។

លោក ម៉ាលីន បាននិយាយ ដោយប្រើសុភាសិតខ្មែរទូទៅមួយ ដើម្បីពិពណ៌នាអំពីតួនាទីរបស់កុមារនៅក្នុងសង្គមថា “កុមារប្រៀបដូចជាក្រដាសទទេមួយសន្លឹក ។ ប្រសិនបើយើងដឹកនាំពួកគេបានល្អ ពួកគេនឹងធំឡើងបានល្អ ហើយក្លាយជា ទំពាំងស្នងឫស្សី ដែលត្រូវតែបន្តវេនពីមនុស្សជំនាន់មុន” ។

“ដូច្នេះ យើងគួរតែចំណាយពេលវេលារបស់យើងឱ្យមានប្រយោជន៍ដោយខិតខំធ្វើអ្វីៗ ដើម្បីបង្កើនសមត្ថភាព​ផ្ទាល់ខ្លួន។ នៅពេលដែលយើងធ្វើការងារស្ម័គ្រចិត្ត យើងទទួលបានបទពិសោធន៍ជាច្រើនដែលយើងមិនធ្លាប់មានពីមុនមក ទាំងជំនាញទន់ និងជំនាញរឹង ។ ការងារស្ម័គ្រចិត្តជួយបណ្តុះបណ្តាលយើងឱ្យក្លាយជាយុវជនដែលមានសមត្ថភាព មានទាំងចំណេះដឹង និងជំនាញជាក់ស្តែង” ។

ព្រឹត្តិការណ៍ភូមិ យូនីសេហ្វ រយៈពេលពីរថ្ងៃ នៅវិទ្យាល័យចំណេះដឹងទូទៅ និងបច្ចេកទេស ជា ស៊ីម ត្បែងមានជ័យ ក៏មានការសម្តែងដោយសិល្បករល្បីៗ ដូចជា Kesorrr និង Roxy ផងដែរ ដោយចាប់ផ្ដើមពីព្រឹត្តិការណ៍រត់ប្រណាំងចម្ងាយប្រាំមួយគីឡូម៉ែត្រ ក្រោមប្រធានបទ “រត់ដើម្បីសន្តិភាព រត់ដើម្បីកុមារ” នៅតំបន់បុរាណវិទ្យាកោះកេរ្តិ៍ ដែលជាប្រាសាទប្រវត្តិសាស្ត្រ និងជាសមាជិកនៃបញ្ជីបេតិកភណ្ឌពិភពលោករបស់អង្គការយូណេស្កូ ។ ការរត់ប្រណាំងនេះ មានអ្នកចូលរួមរត់ចំនួន ៩០០ នាក់ រួមទាំងកុមារប្រហែល ២០០ នាក់ផងដែរ ។