កម្មវិធីជាតិជំនួយសង្គមក្នុងកញ្ចប់គ្រួសារ ផ្តល់ឱកាសដល់កុមារគ្រប់រូប
ជំនួយសង្គមសំខាន់ៗសម្រាប់សហគមន៍ដែលងាយរងគ្រោះបំផុតនៅកម្ពុជា ជួយធ្វើឲ្យគ្រួសារមានអាហារទទួលទាន ធ្វើឲ្យកុមារអាចបន្តចូលរៀនបាន និងផ្តល់ឱកាសស្មើភាពដល់ពួកគេក្នុងការទទួលបានអនាគតភ្លឺស្វាង។
- English
- Khmer
ថ្ងៃទី១៩ ខែកក្កដា ឆ្នាំ២០២៤ រាជធានីភ្នំពេញ – កុមារី ផន ភារម្យ អាយុប្រាំបួនឆ្នាំ រៀនថ្នាក់ទី ៣ រស់នៅជាយក្រុងភ្នំពេញ ជាមួយម្តាយ ប្អូនស្រី និងយាយទួត បាននិយាយថា “ខ្ញុំឃើញម្តាយខ្ញុំញញឹមនៅពេលខ្ញុំទៅសាលារៀន”។ “ខ្ញុំឃើញគាត់តស៊ូជារៀងរាល់ថ្ងៃ ដូច្នេះខ្ញុំនឹងខិតខំរៀនសូត្រដើម្បីរកប្រាក់ចិញ្ចឹមគាត់”។
អ្នកស្រី ជេត សោភ័ណ អាយុ ២៤ ឆ្នាំ ជាម្តាយ ស្នាក់នៅផ្ទះ តែងតែចង់បានកូនប្រុសពៅ និងកូនស្រីអាយុប្រាំមួយឆ្នាំរបស់គាត់ឈ្មោះ ផល ស្រីភួង ទទួលបានអ្វីដែលល្អបំផុត ប៉ុន្តែដោយសារស្ថានភាពនៅក្នុងគ្រួសារ គ្រប់យ៉ាងតែងតែមិនងាយស្រួលសម្រាប់គាត់នោះទេ។ ដើម្បីតស៊ូចិញ្ចឹមគ្រួសារដោយប្រភពប្រាក់ចំណូលតិចតួចចំនួនពីរពីម្តាយ និងឪពុករបស់នាងផ្ទាល់ សោភ័ណ មិនអាចរកការងារក្រៅម៉ោងធ្វើបានទេ ពីព្រោះនាងត្រូវផ្តល់ការមើលថែទាំពេញម៉ោងដល់ជីដូនចាស់របស់នាង។ ក្នុងអំឡុងពេលដ៏សែនលំបាកនេះ អ្នកជិតខាងដែលមានចិត្តសប្បុរសបានផ្តល់អង្ករដល់ពួកគេ ដើម្បីប្រាកដថា ពួកគេមានអាហារសម្រាប់ទទួលទាន។ ពេលខ្លះ នៅពេលដែលនាងមិនមានលុយឲ្យ ភារម្យ ទិញរបស់ញ៉ាំនៅសាលារៀន មិត្តរួមថ្នាក់របស់គាត់បានឲ្យលុយគាត់ពីរបីរយរៀល ។
នាងនិយាយថា “ខ្ញុំពិតជាបារម្ភពីអនាគតកូនខ្ញុំណាស់ ពីព្រោះខ្ញុំមិនមានការងារធ្វើ មិនមានលទ្ធភាពបញ្ជូនពួកគេទៅសាលារៀនដើម្បីទទួលបានការអប់រំល្អ”។ នៅខណៈពេលដែលការសិក្សានៅសាលារដ្ឋត្រូវបានផ្តល់ជូនដោយឥតគិតថ្លៃនោះ ចំណាយបន្ថែមលើសម្ភារៈប្រើប្រាស់សំខាន់ៗ ដូចជា ឯកសណ្ឋាន កាតាប និងសៀវភៅសិក្សា ព្រមទាំងអាហារក្នុងអំឡុងពេលសិក្សានៅសាលារៀន អាចរារាំងសិស្សមិនឲ្យចូលរៀន និងបង្កើនឱកាសក្នុងការបោះបង់ការសិក្សារបស់ពួកគេ ជាពិសេសនៅថ្នាក់កាន់តែខ្ពស់ នៅពេលដែលចំណាយខាងក្រៅមានការកើនឡើង។
នាងនិយាយថា “ពេលខ្លះ ខ្ញុំមិនឱ្យគាត់ទៅសាលារៀនទេ ពីព្រោះខ្ញុំមិនចង់ឱ្យគាត់ឃើញក្មេងៗដទៃទៀតកំពុងញ៉ាំអី នៅ ពេលដែលគាត់មិនមានអ្វីញ៉ាំទាល់តែសោះ”។ “ពេលខ្លះ ខ្ញុំមានអារម្មណ៍អាណិតកូនៗរបស់ខ្ញុំ ខ្ញុំយំ។ ពួកគេទាំងពីរនាក់មានសំណាងអាក្រក់ណាស់”។
សោភ័ណ និងគ្រួសាររបស់នាង នៅទីបំផុត បានចុះបញ្ជីអត្តសញ្ញាណកម្មគ្រួសារក្រីក្រ និងមានសិទ្ធិទទួលបានអត្ថប្រយោជន៍តាមរយៈកម្មវិធីជាតិជំនួយសង្គមក្នុងកញ្ចប់គ្រួសារ ដែលជាការធ្វើសមាហរណកម្មកម្មវិធីឧបត្ថម្ភសាច់ប្រាក់ជូនដល់គ្រួសារក្រីក្រ និងងាយរងគ្រោះនៅទូទាំងប្រទេស។ នៅប្រទេសកម្ពុជា ប្រជាជនប្រហែល ១៨ ភាគរយរស់នៅក្រោមបន្ទាត់ភាពក្រីក្រ ហើយកុមារមួយភាគបួនប្រឈមមុខនឹងភាពក្រីក្រច្រើនទម្រង់ មានន័យថា ពួកគេទំនងជាជួយការលំបាកខ្លាំង ដើម្បីទទួលបានការអប់រំ សេវាសុខាភិបាល និងសេវាដទៃទៀត។
កម្មវិធីជាតិនេះ ត្រូវបានដាក់ឱ្យដំណើរការនៅខែមេសា ឆ្នាំ២០២៤ ដោយរាជរដ្ឋាភិបាលកម្ពុជា និងមានការគាំទ្រពីយូនីសេហ្វ។ កម្មវិធីនេះរួមបញ្ចូលអត្ថប្រយោជន៍នានានៃរាល់ជំនួយសង្គមដែលមានស្រាប់ និងតាមការគ្រោងទុក ដូចជា ការផ្ទេរសាច់ប្រាក់សម្រាប់ស្ត្រីមានផ្ទៃពោះ និងកុមារអាយុក្រោម ២ ឆ្នាំ ការផ្ទេរសាច់ប្រាក់សម្រាប់កុមារដែលមកពីគ្រួសារក្រីក្រនៅសាលាបឋមសិក្សា និងអនុវិទ្យាល័យ ការផ្ទេរសាច់ប្រាក់សម្រាប់ជនពិការ និងការផ្ទេរសាច់ប្រាក់តាមការគ្រោងទុកសម្រាប់មនុស្សវ័យចំណាស់ និងចាប់ផ្តើមអនុវត្តការផ្ទេរសាច់ប្រាក់សម្រាប់អ្នកផ្ទុកមេរោគអេដស៍/អ្នកជំងឺអេដស៍។ កម្មវិធីនេះក៏ជំនួសកម្មវិធីផ្ទេរសាច់ប្រាក់សម្រាប់ជំងឺកូវីដ-១៩ ដែលកំពុងត្រូវបានបិទជាបណ្តើរៗផងដែរ។
តាមរយៈមូលនិធិពីសហភាពអឺរ៉ុប យូនីសេហ្វបានគាំទ្រដល់ការអភិវឌ្ឍប្រព័ន្ធចែកចាយឌីជីថល និងការអភិវឌ្ឍសមត្ថភាពរបស់ប្រតិបត្តិករទាំងនៅថ្នាក់ជាតិ និងថ្នាក់ក្រោមជាតិ រួមទាំងមន្ត្រីកម្មវិធីនៅតាមឃុំ មណ្ឌលសុខភាព និងសាលារៀនផងដែរ។
ដោយទទួលបានសាច់ប្រាក់ជារៀងរាល់ខែពីកម្មវិធីជាតិជំនួយសង្គមក្នុងកញ្ចប់គ្រួសារ ដែលរួមបញ្ចូលប្រាក់ឧបត្ថម្ភសម្រាប់មនុស្សចាស់ សម្រាប់ជីដូនរបស់នាងផងដែរនោះ សោភ័ណ្ឌ អាចទិញសៀវភៅសិក្សាថ្មីៗ និងឯកសណ្ឋានសិស្សថ្មីឲ្យកូនប្រុសរបស់នាង នៅសល់ពីនោះ នាងបានចំណាយលើម្ហូបអាហារ រួមទាំងចំណាយប្រចាំថ្ងៃរបស់ ភារម្យ ផងដែរ។
សោភ័ណ និយាយថា “ខ្ញុំមានអារម្មណ៍រីករាយខ្លាំងណាស់ ដែលបានទទួលជំនួយកញ្ចប់គ្រួសារ”។ “ពេលនេះ កូនប្រុសរបស់ខ្ញុំអាចទៅសាលារៀនបានដោយមិនបារម្ភអំពីរឿងលុយទៀតទេ។ គាត់អាចទិញនំចំណីបាន ដោយមិនចាំបាច់មើលក្មេងដទៃទៀតញ៉ាំទៀតទេ។ ប្រសិនបើគ្មានកញ្ចប់គ្រួសារនោះទេ កូនៗរបស់ខ្ញុំប្រហែលជាត្រូវបោះបង់ការសិក្សាហើយ”។
តាមរយៈការដាក់បញ្ចូលអត្ថប្រយោជន៍នានានៅក្នុងកញ្ចប់តែមួយ កម្មវិធីនេះមានបំណងផ្តល់ការគាំទ្រគ្រប់ជ្រុងជ្រោយដល់គ្រួសារ និងកុមារក្រីក្រ និងងាយរងគ្រោះនៅគ្រប់ដំណាក់កាលនៃជីវិត។ មធ្យោបាយនេះជួយការពារគ្រួសារពីភាពក្រីក្រ ពន្លឿនការអភិវឌ្ឍធនធានមនុស្ស និងលើកកម្ពស់ភាពរីកចម្រើនប្រកបដោយបរិយាបន្ន ដោយមិនទុកនរណាម្នាក់ចោលឡើយ។ ចាប់តាំងពីពេលដាក់ឲ្យដំណើរការកម្មវិធីនេះក្នុងខែមេសា ឆ្នាំ២០២៤ កុមារប្រហែល ៧៥០.០០០ នាក់ មកពីគ្រួសារដែលងាយរងគ្រោះបំផុតនៅប្រទេសកម្ពុជា បានទទួលជំនួយសំខាន់ៗតាមរយៈកម្មវិធីជាតិជំនួយសង្គមក្នុងកញ្ចប់គ្រួសារ។
លោក ឌី រិទ្ធី ជនបង្គោលនៃក្រុមប្រឹក្សាឃុំ នៅក្នុងឃុំភ្លើងឆេះរទេះ ដែលអ្នកស្រី សោភ័ណ និងក្រុមគ្រួសាររស់នៅ មានប្រសាសន៍ថា “នៅក្នុងសហគមន៍របស់ខ្ញុំ កញ្ចប់គ្រួសារបានផ្តល់ជំនួយសំខាន់ៗដល់គ្រួសារដែលងាយរងគ្រោះ រួមទាំង កុមារ មនុស្សវ័យចំណាស់ និងជនពិការផងដែរ។ “កញ្ចប់គ្រួសារដើរតួនាទីអ្នកជំរុញទឹកចិត្តកុមារឱ្យចូលរៀន តាមរយៈការផ្តល់សម្ភារៈសិក្សាសំខាន់ៗ និងឯកសណ្ឋាន។ វាលើកទឹកចិត្តពួកគេឱ្យបន្តការសិក្សា និងធ្វើឲ្យពួកគេមានអនាគតភ្លឺស្វាង”។
ភ័ណ ចង់ឱ្យកូនៗរបស់នាងទទួលបានឱកាសច្រើនជាងអ្វីដែលនាងធ្លាប់មាន នៅពេលធំឡើង។ នាងស្រមៃថា កូនៗរបស់នាងអាចចូលរៀននៅសាកលវិទ្យាល័យ និងរួចផុតពីភាពលំបាក។
មេរៀនដ៏សំខាន់បំផុតរបស់នាងសម្រាប់ពួកគេ៖ “ការអប់រំនឹងក្លាយជាទ្រព្យសម្បត្តិដ៏អស្ចារ្យបំផុត”។
នាងនិយាយថា “ខ្ញុំតែងតែដាស់តឿនកូនខ្ញុំឲ្យខិតខំរៀនសូត្រ ពីព្រោះខ្ញុំមិនមានអ្វីបន្សល់ទុកឲ្យពួកគេទេ”។ “អ្វីដែលខ្ញុំអាចធ្វើបានគឺ បញ្ជូនពួកគេទៅសាលារៀន។ ខ្ញុំចង់ឲ្យពួកគេទាំងពីរនាក់មានការអប់រំខ្ពស់ និងមានអនាគតល្អ”។
នាងមានគម្រោងចុះឈ្មោះឲ្យកូនស្រីរបស់នាងចូលរៀននៅសាលាបឋមសិក្សានៅឆ្នាំក្រោយ។ ចំពោះ ភារម្យ បច្ចុប្បន្ន គាត់ចំណាយពេលវេលារបស់គាត់ទាំងនៅក្នុងថ្នាក់រៀន និងនៅសួនកុមារ ធ្វើអ្វីដែលគាត់ចូលចិត្តបំផុត។
ភារម្យ និយាយថា “ខ្ញុំសប្បាយចិត្ត ដែលបានទៅសាលារៀន។ “នៅទីនោះ ខ្ញុំរៀនសូត្របានច្រើន ហើយខ្ញុំចូលចិត្តលេងបាល់ទាត់ជាមួយមិត្តភក្តិរបស់ខ្ញុំ”។
