အရေးပေါ်အခြေအနေများကို တုံ့ပြန်ဖြေရှင်းခြင်း

အာဟာရ

၂၀၂၅ ခုနှစ်တွင်-

• ယူနီဆက်နှင့် ၎င်း၏ မိတ်ဖက်များသည် အသက် ၆ လမှ ၅၉ လအတွင်းရှိ ကလေးငယ် ၂. ၅ သန်း နီးပါးကို ကြိုတင်ကာကွယ်နိုင်သော အာဟာရဆိုင်ရာ ဝန်ဆောင်မှုများနှင့်အတူ အသက် ၂ နှစ်အောက် ကလေးငယ်များ၏ စောင့်ရှောက်ပေးသူဦးရေ ၁၉၄, ၀၀၀ ကျော်ကို ပံ့ပိုးပေးခဲ့ပါသည်။ ဤဝန်ဆောင်မှုများတွင် ဗီတာမင်အေနှင့် အနုအာဟာရဖြည့်စွက်စာများအပြင် မွေးကင်းစနှင့် နို့စို့အရွယ်ကလေးငယ် နို့တိုက်ကျွေးခြင်း (IYCF) နှင့်စပ်လျဉ်း၍ အသိပညာပေး မြှင့်တင်ပေးခြင်းတို့ပါဝင်ပြီး အကောင်းဆုံးနို့တိုက်ကျွေးရေးအလေ့အကျင့်များဖြစ်စေရန် ပံ့ပိုးပေးခဲ့ပါသည်။
• ပြင်းထန်အာဟာရချို့တဲ့မှုအတွက် ကလေးငယ်ဦးရေ ၃၆၅, ၀၀၀ ကျော်ကို စစ်ဆေးခဲ့ပြီး ပြင်းထန် အာဟာရချို့တဲ့ကလေးငယ် ၈, ၀၂၃ ဦးကို ရှာဖွေဖော်ထုတ်ကာ အသက်ကယ် ပံ့ပိုးမှုများဖြင့် ကုသပေးခဲ့ပါသည်။
• အသက်ငါးနှစ်အောက် ကလေးငယ်ဦးရေ ၁၁၄, ၀၀၀ ကျော်နှင့် ကိုယ်ဝန်ဆောင်နှင့် နို့တိုက်မိခင် ၂၅၅,၀၀၀ ကျော်တို့အား အနုအာဟာရ ဖြည့်စွက်စာမျိုးစုံ ထောက်ပံ့ပေးခဲ့သည်။

အခြေခံကျန်းမာရေးစောင့်ရှောက်မှု ၀န်ဆောင်မှုများ

၂၀၂၅ ခုနှစ်တွင်-

• ယူနီဆက်နှင့် မိတ်ဖက်အဖွဲ့များသည် ပဋိပက္ခဒဏ်သင့်ပြည်သူများနှင့် ၂၀၂၅ ခုနှစ် မတ်လ ငလျင်ဘေးသင့် ပြည်သူများအတွက် အသက်ကယ် ကျန်းမာရေးစောင့်ရှောက်မှု ဝန်ဆောင်မှုများ ပံ့ပိုးပေးခဲ့ပါသည်။
• ကိုယ်ဝန်ဆောင်အမျိုးသမီးများကို စောင့်ရှောက်ခြင်း၊ မရှိမဖြစ်လိုအပ်သော မွေးကင်းစကလေးငယ်များကို စောင့်ရှောက်ခြင်း၊ နာမကျန်းကလေးငယ်များကို စောင့်ရှောက်ခြင်းနှင့် အရေးပေါ်ရည်ညွှန်းခြင်းများအပါအဝင် လူဦးရေ ၆၇၆,၀၀၀ ကျော်ကို ရွေ့လျားဆေးခန်း၊ ပုံသေဆေးခန်းများနှင့် ကမ်းလင့်ကူညီရေး ဝန်ဆောင်မှုများမှတစ်ဆင့် အခြေခံကျန်းမာရေး စောင့်ရှောက်မှု ဝန်ဆောင်မှုများ ပေးခဲ့ပါသည်
• ယူနီဆက်သည် မွေးကင်းစကလေးများနှင့် အသက် ၅ နှစ်အောက် ကလေးများအတွက် အဓိကကျသော လူမှုအသိုင်းအဝိုင်းအခြေပြု ကျန်းမာရေးစောင့်ရှောက်မှုဆိုင်ရာ ပံ့ပိုးမှုအတွက် မိတ်ဖက်အဖွဲ့အစည်းများမှ ကျန်းမာရေးစောင့်ရှောက်မှုလုပ်သား ၄၄၅ ဦး ၏ စွမ်းဆောင်ရည်ကို တည်ဆောက်ရန် ပံ့ပိုးပေးခဲ့ပါသည်။
• လူပေါင်း ၆၄၀, ၀၀၀ ကျော်၏ လိုအပ်ချက်များကို ဖြည့်ဆည်းပေးရန်အတွက် အရေးကြီးသော အိမ်တွင်း မွေးကင်းစကလေး စောင့်ရှောက်ရေးကို ပံ့ပိုးပေးရန်အလို့ငှာ အရေးပေါ်ကျန်းမာရေးပစ္စည်းများ ၊ သန့်ရှင်းသောမီးဖွားပစ္စည်းများနှင့် မွေးကင်းစကလေးစောင့်ရှောက်ရေးပစ္စည်းများအပါအဝင် အရေးကြီးထောက်ပံ့ပစ္စည်းများနှင့် ORS၊ zinc နှင့် Amoxicillin အပါအဝင် မရှိမဖြစ်လိုအပ်သော ဆေးဝါးများကို ထောက်ပံ့ပေးခဲ့ပါသည်။

ရေနှင့် ပတ်ဝန်းကျင်သန့်ရှင်းရေး

စစ်ဘေးရှောင်ပြည်သူများ (IDPs) နှင့် နွမ်းပါးသော အသိုက်အဝန်းများအတွက် ရေနှင့် အရေးကြီးသော ပတ်ဝန်းကျင်နှင့် တစ်ကိုယ်ရည်သန့်ရှင်းရေးထောက်ပံ့ပစ္စည်းများသည် ၎င်းတို့၏ကျန်းမာရေးနှင့် သာယာဝပြောရေးကို ကာကွယ်စောင့်ရှောက်ရာတွင် အလွန်အရေးပါသည်။

၂၀၂၅ ခုနှစ်တွင် မြန်မာနိုင်ငံ၌-

• ယူနီဆက်နှင့် မိတ်ဖက်များသည် ငလျင ၊ ရောဂါဖြစ်ပွားမှု၊ ရေကြီးရေလျှံမှုနှင့် လူသားချင်းစာနာထောက်ထားမှုဆိုင်ရာ လိုအပ်ချက်များကို တုံ့ပြန်ဆောင်ရွက်ရာတွင် မြန်မာနိုင်ငံတစ်ဝှမ်း အသက်ကယ် WASH အကူအညီများ ပေးအပ်ခဲ့ပါသည်။
• အကူအညီများတွင် သန့်ရှင်းသောရေ၊ အိမ်သုံးရေစစ်ပုံးများ၊ သန့်ရှင်းသော ရေထည့်ပုံးများ ၊ ရေသန့်စင်ဓာတုပစ္စည်းများနှင့် ပျက်စီးနေသောစနစ်များကိုပြန်လည်ထူထောင်ခြင်းတို့ပါဝင်သည်။
• ယူနီဆက်သည် အရေးပေါ်ရေ ရရှိရေး ရည်မှန်းချက်ကို ကျော်လွန်ခဲ့ပြီး ရည်မှန်းချက်၏ ၁၄၂ ရာခိုင်နှုန်းအထိ ရရှိခဲ့သည်။ ၎င်းသည် ကာလရှည် စစ်ဘေးရှောင်စခန်းများနှင့် အိမ်ရှင်အသိုင်းအဝိုင်းများတွင် သန့်ရှင်းသော ရေရရှိရေးကို သိသိသာသာ တိုးတက်ကောင်းမွန်စေခဲ့သည်။
• မရှိမဖြစ်လိုအပ်သော WASH အထောက်အပံ့များသည် စီစဉ်ထားသောလွှမ်းခြုံမှု၏ ၇၀ ရာခိုင်နှုန်းအထိ ရောက်ရှိခဲ့ပြီး တစ်ကိုယ်ရေသန့်ရှင်းမှုအလေ့အကျင့်များကို အားဖြည့်ပေးကာ AWD နှင့်ကာလဝမ်းရောဂါအန္တရာယ်များကို လျှော့ချပေးပါသည်။

ပညာရေး

ကလေးများ၏ ပညာရေးသည် ၎င်းတို့၏ ကောင်းကျိုးသုခနှင့် အနာဂတ်အခွင့်အလမ်းများအတွက် အလွန်အရေးကြီးပါသည်။ မြန်မာနိုင်ငံတွင် သဘာဝဘေးအန္တရာယ်များနှင့် ဖြစ်ပွားနေဆဲပဋိပက္ခများ - နှင့် ပညာရေးအပေါ် သက်ရောက်မှုများ မြင့်တက်လာခြင်းတို့အကြား ယူနီဆက်သည် အရည်အသွေးမြင့် ပညာရေးဆိုင်ရာ အထောက်အကူပြုပစ္စည်းများကို အသုံးပြု၍ ရပ်ရွာနှင့် အိမ်တွင်းအခြေပြု သင်ယူမှု အပါအဝင် ကလေးများအတွက် ပြောင်းသာပြင်လွယ်ရှိသော သင်ယူမှု အခွင့်အလမ်းများကို တိုးမြှင့်ပေးလျက်ရှိပါသည်။ ယူနီဆက်နှင့် ၎င်း၏ မိတ်ဖက်များသည် နိုင်ငံတစ်ဝှမ်းရှိ ကလေးများအတွက် ဘေးကင်းလုံခြုံသော သင်ယူမှု ရရှိစေရန်အတွက် ဦးစားပေး ကြားဝင်ဆောင်ရွက်မှုများကို သတ်မှတ်ရန်နှင့် ပံ့ပိုးပေးရန် လုပ်ဆောင်လျက်ရှိပါသည်။

၂၀၂၅ ခုနှစ်တွင်-

• ယူနီဆက်နှင့် ၎င်း၏ မိတ်ဖက်အဖွဲ့များသည် ပဋိပက္ခနှင့် ငလျင်ဘေးသင့်ဒေသများရှိ ကလေးများနှင့် စောင့်ရှောက်သူ ၁,၄၁၃,၆၆၁ ဦးကို စိတ်ကျန်းမာရေးနှင့် လူမှုစိတ်ပိုင်းဆိုင်ရာပံ့ပိုးမှုများ ပေးခဲ့ပါသည်။
• ကလေးငယ် ၈၅၄,၄၀၁ ဦးအား အစောပိုင်းသင်ယူမှုအပါအဝင် ကျောင်းပညာရေးနှင့် ကျောင်းပြင်ပပညာရေးကို လက်လှမ်းမီသင်ယူနိုင်ရန် ထောက်ပံ့ပေးခဲ့သည်။ ဤထောက်ပံ့ပေးမှုများတွင် အခြေခံစာတတ်မြောက်မှု၊ အတွက်အချက်နှင့် လူမှုရေးနှင့် စိတ်ပိုင်းဆိုင်ရာ သင်ယူမှု၊ အထူးသဖြင့် နေရပ်စွန့်ခွာတိမ်းရှောင်နေရသူ ကလေးသူငယ်များကို အကျိုးပြုခြင်းတို့ ပါဝင်သည်။
• ယူနီဆက်နှင့် ၎င်း၏ လုပ်ဖော်ကိုင်ဖက်များသည် ကလေးငယ် ၃၈၉,၀၂၃ ဦးအား မရှိမဖြစ်လိုအပ်သော သင်ယူမှုအစီအစဉ်များအပါအဝင် တစ်ဦးချင်းသင်ယူမှု အထောက်အကူပြုပစ္စည်းများကိုလည်း ပံ့ပိုးပေးခဲ့ပါသည်။
• သင်ယူမှုအရည်အသွေးကို မြှင့်တင်ရန်အတွက် ပညာရေးဝန်ထမ်း ၂၄, ၅၃၈ ဦးကို လေ့ကျင့်သင်တန်းပေးခဲ့ပြီး ပညာသင်ထောက်ပံ့ကြေးများ ပေးအပ်ခဲ့ပါသည်။

သင်ယူမှု စဉ်ဆက်မပြတ်ဖြစ်ရေးအတွက် ယာယီသင်ယူမှုနေရာ ၁,၃၂၈ ခုကို တည်ထောင်ခဲ့သည် သို့မဟုတ် ထိန်းသိမ်းခဲ့သည်။

ကလေးသူငယ်ကာကွယ်စောင့်ရှောက်ရေး

မြန်မာနိုင်ငံတစ်ဝှမ်း ပဋိပက္ခများ ဆက်လက်ဖြစ်ပွားနေခြင်းနှင့် လူသားချင်းစာနာထောက်ထားမှုဆိုင်ရာ အခြေအနေများ ဆိုးရွားလာခြင်းတို့နှင့်အတူ ကလေးများသည် အကြီးမားဆုံးတန်ဖိုးများ ပေးဆပ်နေရပြီး နေရပ်စွန့်ခွာရခြင်း၊ အတင်းအဓမ္မ စုဆောင်းခံရခြင်း၊ ပညာရေးနှင့် ကျန်းမာရေးစောင့်ရှောက်မှု အပါအဝင် အရေးပါသော ဝန်ဆောင်မှုများနှင့်လွဲချော်ခြင်းများ ကြုံတွေ့နေကြရသည်။

၂၀၂၅ ခုနှစ်တွင်-

• ယူနီဆက်နှင့် မိတ်ဖက်များသည် ကြိုတင်ကာကွယ်မှုမှ တုံ့ပြန်မှုအထိ ကလေးသူငယ် ကာကွယ်စောင့်ရှောက်ရေးဆိုင်ရာ ကျယ်ပြန့်သော ကြားဝင်ဆောင်ရွက်မှုများ ပါဝင်သည့် ဝန်ဆောင်မှုအမျိုးမျိုးကို ပံ့ပိုးပေးခဲ့ပါသည်။ ကာကွယ်ရေး ၀န်ဆောင်မှုများတွင် ရပ်ရွာလူထုအသိပညာပေးပွဲများ ၊ ကလေးသူငယ် ကာကွယ်ရေးနှင့် တားဆီးစောင့်ရှောက်ရေး သတင်းစကားများဖြန့်ဝေခြင်း၊ ပေါက်ကွဲစေတတ်သော လက်နက်ပစ္စည်း အန္တရာယ်ပညာပေးခြင်း (EORE) ၊ ကျား ၊ မအခြေပြုအကြမ်းဖက်မှု (GBV) အန္တရာယ်လျှော့ချခြင်း၊ လိင်ပိုင်းဆိုင်ရာ အမြတ်ထုတ်ခြင်းနှင့် အလွဲသုံးစားမှုမှ ကာကွယ်ခြင်း (PSEA) တို့ပါဝင်သည်။
• ငလျင်ဘေးသင့်ကလေးငယ်များအတွက် အသက်အရွယ်နှင့် ကျား ၊ မအလိုက် သင့်လျော်သော ကလေးသူငယ်ကာကွယ်စောင့်ရှောက်ရေးပစ္စည်း ၁၅,၈၄၁ ခုကိုဖြန့်ဝေခဲ့ပြီး ကလေးများနှင့်ဆယ်ကျော်သက်လူငယ် ၂၃,၆၆၃ ဦး အကျိုးခံစားခွင့်ရရှိခဲ့ပါသည်။

ကလေးများနှင့်လူကြီးများအပါအဝင် လူမှုအသိုင်းအဝိုင်းအဖွဲ့ဝင်ဦးရေ ၉၆၀,၀၀၀ ကျော်သည် လူသားချင်းစာနာထောက်ထားမှုဆိုင်ရာ ဝန်ထမ်းများ၏ လိင်ပိုင်းဆိုင်ရာအမြတ်ထုတ်မှုနှင့် အလွဲသုံးစားမှု (SEA) ကို သတင်းပို့ရန် လုံခြုံသော၊ လျှို့ဝှက်ပြီး လက်လှမ်းမီနိုင်သောလမ်းကြောင်းများကို ရယူအသုံးပြုနိုင်ခဲ့သည်။ ယူနီဆက်သည် ကလေးသူငယ်များ လိုအပ်မှုရှိနေသော နေရာများအားလုံးသို့ အဆီးအတားမရှိဘဲ လူသားချင်းစာနာထောက်ထားမှုဆိုင်ရာ ပံ့ပိုးမှုများလက်လှမ်းမီရရှိနိုင်ရန် ဆက်လက်စည်းရုံး လုပ်ဆောင်နေပါသည်။

အကျပ်အတည်းနှင့် ဆက်စပ်နေသည့် စိန်ခေါ်မှုများ ရှိနေသော်လည်း ယူနီဆက်သည် မြန်မာနိုင်ငံတစ်ဝှမ်းရှိ ထိခိုက်လွယ်ဆုံး ကလေးသူငယ်များနှင့် လူမှုအသိုင်းအဝိုင်းများကို ဆက်လက်ပံ့ပိုးသွားရန် စိတ်ပိုင်းဖြတ်ထားသည်။

ပဋိပက္ခနှင့် အကျပ်အတည်းကာလများအပါအဝင် မြန်မာနိုင်ငံတွင် နှစ်ပေါင်း ၇၅ နှစ်ကျော် သက်တမ်းရှိ ယူနီဆက်သည် အစီအစဉ်များကို လျင်မြန်စွာ လိုက်လျောညီထွေဖြစ်အောင် ပြုလုပ်နိုင်ပြီး အကျိုးရလဒ်များ ထိထိရောက်ရောက်နှင့် အရှိန်အဟုန်ဖြင့် ဖြစ်ထွန်းနိုင်ရန် ၎င်း၏ ကျယ်ပြန့်သော မိတ်ဖက်ကွန်ရက်ကို စည်းရုံးဆော်ဩနိုင်သည်။

[1] https://www.unicef.org/emergencies/core-commitments-children