ကလေးသူငယ် ကာကွယ်စောင့်ရှောက်ရေး
ကလေးများသည် ဘေးအန္တရာယ်ကင်းရှင်းစွာ ရှင်သန်ကြီးပြင်းရန် အခွင့်အရေးရှိပါသည်
- English
- မြန်မာ
စိန်ခေါ်မှု
ယောင်္ကျားလေးငယ်များနှင့် မိန်းကလေးငယ်များ အားလုံးသည် အကြမ်းဖက်ခံရခြင်း၊ ခေါင်းပုံဖြတ်ခံရခြင်း၊ အလွဲသုံးစားပြုခံရခြင်းနှင့် လျစ်လျူရှုခံရခြင်းတို့မှ ကင်းဝေးပြီး ဘေးကင်းလုံခြုံစွာ အကာအကွယ်ရယူနိုင်ခွင့် အပြည့်အဝ ရှိကြသည်။
ကလေးသူငယ်များအား ဆိုးရွားပြင်းထန်သော ထိခိုက်နစ်နာမှုများမှ အကာအကွယ်ပေးရမည့် အခြေခံအခွင့်အရေးများကို မြန်မာနိုင်ငံက အတည်ပြု လက်မှတ်ရေးထိုးထားသည့် ‘ကလေးသူငယ်အခွင့်အရေးများဆိုင်ရာ သဘောတူစာချုပ် (CRC)’ နှင့် ၂၀၁၉ ခုနှစ်တွင် ပြဋ္ဌာန်းခဲ့သည့် ‘မြန်မာနိုင်ငံ ကလေးသူငယ်အခွင့်အရေးဥပဒေ’ တို့တွင် အခိုင်အမာ ထည့်သွင်းပြဋ္ဌာန်းထားပြီး ဖြစ်သည်။
အကျပ်အတည်းအတွင်း ပိတ်မိနေသည့် ကလေးငယ်များ
သို့ရာတွင် မြန်မာနိုင်ငံတစ်ဝန်း ပဋိပက္ခများ ဆက်လက်ပြင်းထန်နေသည်နှင့်အမျှ ကလေးသူငယ် အမြောက်အမြားသည် သတ်ဖြတ်ခံရခြင်း၊ ပြင်းထန်စွာ ထိခိုက်ဒဏ်ရာရခြင်း၊ ဥပဒေကြောင်းအရ ဆွေးနွေးတိုင်ပင်ခွင့် ဆုံးရှုံးကာ မတရားဖမ်းဆီးထိန်းသိမ်းခံရခြင်း၊ ၎င်းတို့၏ နေအိမ်များနှင့် မိခင်ရပ်ရွာများကို စွန့်ခွာ၍ အဓမ္မ စစ်ဘေးတိမ်းရှောင်ရခြင်း စသည့် ကြီးလေးသော အခွင့်အရေးချိုးဖောက်မှုများနှင့် ရင်ဆိုင်နေရသည်။ ယင်းအခြေအနေများသည် ထိတ်လန့်ကြောက်ရွံ့မှုနှင့် မတည်ငြိမ်မှုများကြားတွင် ခါးသီးစွာ ကြီးပြင်းလာရသည့် ကလေးသူငယ် မျိုးဆက်တစ်ခုကို ဖြစ်ပေါ်စေပြီး၊ ၎င်းတို့၏ ရပိုင်ခွင့်များနှင့် လုံခြုံစိတ်ချရသော အနာဂတ် ဖန်တီးနိုင်မည့် အခွင့်အလမ်းများကိုပါ ဆုံးရှုံးပျက်စီးစေလျက် ရှိသည်။
ကျောင်းများနှင့် ဆေးရုံများကို တိုက်ရိုက်သော်လည်းကောင်း၊ သွယ်ဝိုက်၍သော်လည်းကောင်း ပစ်မှတ်ထား တိုက်ခိုက်ခြင်းများကြောင့် ကလေးငယ်များအတွက် အကန့်အသတ်ရှိလှသော ဘေးကင်းရာ ခိုလှုံခွင့် နယ်မြေများ ပိုမိုကျဉ်းမြောင်းသွားရသည်။ ထို့ပြင် ပဋိပက္ခတွင် ပါဝင်ပတ်သက်နေသည့် အဖွဲ့အစည်းများ၏ အဓမ္မ လူသစ်စုဆောင်းခြင်း အန္တရာယ်ကိုလည်း ကလေးငယ်များ ရင်ဆိုင်နေရသည်။
အထူးသဖြင့် အရပ်သားများ နေထိုင်ရာ ဒေသများတွင် မြေမြှုပ်မိုင်းနှင့် အခြားသော ပေါက်ကွဲစေတတ်သော စစ်ကျန်လက်နက်ပစ္စည်းများ အသုံးပြုမှုကြောင့် ကလေးသူငယ်များအပါအဝင် အပြစ်မဲ့ ပြည်သူများ အသက်ဆုံးရှုံးနေရသည်။ လက်ရှိတွင် အရပ်သား သေဆုံးဒဏ်ရာရမှု စုစုပေါင်း၏ ၂၀ ရာခိုင်နှုန်းကျော်သည် မြေမြှုပ်မိုင်းများကြောင့် ဖြစ်သည်။ နေပြည်တော် ကောင်စီနယ်မြေမှလွဲ၍ ကျန်ပြည်နယ်နှင့် တိုင်းဒေသကြီး အားလုံးတွင် မြေမြှုပ်မိုင်းအန္တရာယ် ပြန့်နှံ့နေပြီး၊ မြန်မာနိုင်ငံသည် ကမ္ဘာတစ်ဝန်း မြေမြှုပ်မိုင်းကြောင့် ထိခိုက်ဒဏ်ရာရမှု အများဆုံးနိုင်ငံများ စာရင်းတွင် ပါဝင်နေသည်။
ဖြေရှင်းနည်း
အကူအညီရယူခြင်း
အဆက်မပြတ် ပြောင်းလဲလှုပ်ခတ်နေသော လူသားချင်းစာနာထောက်ထားမှုဆိုင်ရာ အခြေအနေများကို တုံ့ပြန်ဆောင်ရွက်နိုင်ရန် ယူနီဆက်သည် မိမိတို့၏ ကျယ်ပြန့်သော အတွေ့အကြုံများနှင့် နိုင်ငံတစ်ဝန်းရှိ မိတ်ဖက်ကွန်ရက်များကို ထိရောက်စွာ အသုံးပြုလျက် ရှိသည်။ ဘေးဒုက္ခကြုံတွေ့နေရသူများထံသို့ အရေးကြီးပြီး အရည်အသွေးပြည့်ဝသော ကလေးသူငယ် ကာကွယ်စောင့်ရှောက်ရေး ဝန်ဆောင်မှုများ ထဲထဲဝင်ဝင် လက်လှမ်းမီ ရရှိစေရန် အစွမ်းကုန် ဆောင်ရွက်လျက် ရှိပါသည်။
၂၀၂၆ ခုနှစ်အတွင်း ယူနီဆက် (UNICEF) အနေဖြင့် အောက်ပါလုပ်ငန်းစဉ်များကို အကောင်အထည်ဖော် ပံ့ပိုးပေးရန် ရည်မှန်းချက်ထား ဆောင်ရွက်နေပါသည် -
- ကလေးသူငယ်များ၊ ဆယ်ကျော်သက်များနှင့် ၎င်းတို့ကို စောင့်ရှောက်နေသူများ အပါအဝင် စုစုပေါင်း လူဦးရေ ၄၄၁,၀၀၀ အား ရပ်ရွာအခြေပြု စိတ်ကျန်းမာရေးနှင့် လူမှုစိတ်ပိုင်းဆိုင်ရာ ရိုင်းပင်းကူညီမှု ဝန်ဆောင်မှုများ (MHPSS) ပေးအပ်ရန်။
- ပြည်သူလူထု ၄၆၇,၀၀၀ ခန့်အား မြေမြှုပ်မိုင်းနှင့် ပေါက်ကွဲစေတတ်သော စစ်ကျန်လက်နက်ပစ္စည်းများ၏ အန္တရာယ်မှ ကာကွယ်ပေးနိုင်မည့် အသိပညာပေးမှုများ ပြုလုပ်ရန်နှင့် မိုင်းဒဏ်ကြောင့် အသက်ရှင်ကျန်ရစ်သူများအား လိုအပ်သော ထောက်ပံ့ကူညီမှုများ ပေးအပ်ရန်။
- လူဦးရေ ၁၈၀,၀၀၀ အား ကျား၊ မ အခြေပြု အကြမ်းဖက်မှု (GBV) အန္တရာယ် လျှော့ချရေး၊ ကြိုတင်ကာကွယ်ရေးနှင့် ထိရောက်သော တုံ့ပြန်ဖြေရှင်းမှုဆိုင်ရာ ကူညီပံ့ပိုးမှုများ ပေးအပ်ရန်။
- ပြည်သူလူထု ၃၅၀,၀၀၀ နီးပါးထံသို့ ကလေးသူငယ် အကာအကွယ်ပေးရေးဆိုင်ရာ သတင်းစကားများနှင့် အသိပညာပေး လှုပ်ရှားမှုများ ကျယ်ကျယ်ပြန့်ပြန့် အရောက်လှမ်းနိုင်ရန်။
