မြန်မာနိုင်ငံရှိ ကလေးသူငယ်များ

ရှင်သန်ရပ်တည်ရန် ကလေးသူငယ်အားလုံးတွင် တည်ငြိမ်အေးချမ်းမှုနှင့် လုံခြုံမှုတို့ လိုအပ်ပါသည်။

ယင်းအစား မြန်မာနိုင်ငံ၏ကလေးသူငယ်မျိုးဆက်တစ်ဆက်၏ ကျန်းမာပျော်ရွှင်မှု၊ သူတို့၏ အနာဂတ်နှင့် ရှင်သန်မှုတို့ ကို ပဋိပက္ခအရှိန်မြင့်တက်လာမှု၊ မလုံခြုံမှု၊ နေရပ်စွန့်ခွာထွက်ပြေးရမှုနှင့် ဆင်းရဲမှုတို့က ခြိမ်းခြောက်ထားသည်။ ၂၀၂၁ခုနှစ်၊ ဖေဖော်ဝါရီလကတည်းကပင်၊ နိုင်ငံတဝှမ်း မငြိမ်သက်မှုများ ဖြစ်ပေါ်လာသည့်အတွက်၊ ကလေးသူငယ်များ နေရပ်စွန့်ခွာ ထွက်ပြေးရခြင်း၊ အဖမ်းဆီးခံရခြင်း၊ ထိခိုက်ဒဏ်ရာရနေကြသည့်အပြင်၊ သေကြေပျက်စီးနေကြရသည်။

အကြိတ်အနယ်ကြိုးစားရယူထားရသော ကျန်းမာရေးနှင့် ပညာသင်ယူမှုဆိုင်ရာ တိုးတက်မှုများသည် လျှင်မြန်စွာပင် ဆုတ်ယုတ်လျော့ပါးနေပြီဖြစ်သည်။
ကလေးသူငယ်များ၏အခွင့်အရေးများသည် ၎င်းတို့ကို ကာကွယ်ရန် တာဝန်ရှိသူများအပါအဝင် လျစ်လျူရှုခြင်းကို ခံနေရပါသည်။
စီးပွားရေးဆိုင်ရာအကြပ်အတည်းနှင့် အဓိကဝန်ဆောင်မှုများကိုရယူနိုင်ခွင့်ကင်းမဲ့ခြင်းတို့က ကလေးသူငယ်မြောက် များစွာကို သိသာထင်ရှားသည့် ရုပ်ပိုင်းဆိုင်ရာ၊ စိတ်ပိုင်းဆိုင်ရာ၊ ပညာရေးပိုင်းဆိုင်ရာနှင့် စီးပွားရေးဆိုင်ရာ စိန်ခေါ်ချက်များဖြင့် ထိတွေ့စေသည်။ များစွာသော သူများသည် ယင်းအခက်အခဲများကို ကျော်ဖြတ်နိုင်ရန် ကြိုးစားရုန်းကန်ကြရဦးမည်ဖြစ်သည်။

မည်သည့်နေရာမှ မလုံခြုံတော့ပါ

ကိုဗစ်-၁၉ က မြန်မာနိုင်ငံရှိကလေးသူငယ်များကို ကြီးမားသောစိန်ခေါ်မှုများနှင့် ထိတွေ့စေခဲ့ပြီးသားဖြစ်ကာ၊ ကလေး သူငယ်ပေါင်း (၁၂) သန်းသည် တစ်နှစ်ကျော်မျှကြာအောင် စာသင်ကျောင်းများ နှင့်ကင်းကွာနေပြီဖြစ်သည်။

လက်ရှိအကြပ်အတည်းက ကလေးသူငယ်များရင်ဆိုင်ကြရသည့်စိန်ခေါ်မှုများကို ပိုမိုကြီးမား စေပါသည်။ ကလေး သူငယ်မြောက်များစွာက စနစ်တကျစီစဉ်ထားသောသင်ယူနိုင်မှုကို ဆုံးရှုံးနေရဆဲဖြစ်ပြီး၊ တိုက်ခိုက်မှုများနှင့် ပညာရေးဆိုင်ရာ နေရာများတွင် နေရာယူထားခြင်းကို မျက်မြင်တွေ့နေရ သည့် အခြားသောကလေးသူငယ်များအနေဖြင့်လည်း ကျောင်းကပင်လျှင် ၎င်းတို့အတွက် မလုံခြုံစေ တော့ကြောင်း ခံစားနေကြရသည်။

ကလေးသူငယ် (၁,၀၀၀) ခန့်နှင့် လူငယ်များသည် ထင်ရှားသည့်အကြောင်းပြချက်မရှိဘဲ ဖမ်းဆီးထိန်းသိမ်း ခံရသည်။ တော်တော်များများမှာ ထိုစဉ်ကတည်းကပင် ပြန်လွှတ်သည့်အထဲပါသော်လည်း၊ သူတို့၏အတွေ့အကြုံများက ၎င်းတို့၏ စိတ်ကျန်းမာရေးနှင့် ပျော်ရွှင်မှုတို့အတွက် ကာလရှည်သက်ရောက်မှုများ ရှိပါလိမ့်မည်။

ကလေးသူငယ်သန်းပေါင်းများစွာ၏ စိတ်ကျန်းမာပျော်ရွှင်မှုနှင့် အနာဂတ်အလားအလာများမှာ ထိခိုက်နစ်နာနေပြီ ဖြစ်သည့်အပြင်၊ အချို့သောဖြစ်ရပ်များတွင်မူ အမြဲတမ်းနစ်နာသွားစေပါသည်။

လူသားချင်းစာနာထောက်ထားမှုဆိုင်ရာအကြပ်အတည်း

၂၀၂၁ ခုနှစ်တွင် ကုလသမဂ္ဂသည် နိုင်ငံအနှံ့အပြား၌ လူသားချင်းစာနာထောက်ထားမှုဆိုင်ရာအထောက်အပံ့များနှင့် ကြိုတင်ကာကွယ်ရေးဆိုင်ရာဝန်ဆောင်မှုများအနေဖြင့် လူဦးရေစုစုပေါင်း(၃)သန်းအတွက် ရည်မှန်းထားသည်။ ယင်းတွင် ယခင်ကသတ်မှတ်ထားသည့် ပဋိပက္ခဒဏ်သင့်ဒေသများရှိ ပြည်သူ(၁)သန်းနှင့် ဖေဖော်ဝါရီလ (၁) ရက်နေ့ကတည်းက သတ်မှတ်လိုက်သည့် နောက်ထပ် ပြည်သူ(၂) သန်းပါဝင်သည်။

အိမ်ခြေရာမဲ့ဖြစ်မှု

၂၀၂၁ ခုနှစ်တွင် လူဦးရေ (၂၀၀,၀၀၀)ခန့်သည် နေရပ်စွန့်ခွာထွက်ပြေးကြရပြီး၊ တနည်းပြောရလျှင်၊ ၎င်းတို့၏ အိမ်များတွင် ဆက်လက်နေထိုင်ပါက အသက်အန္တရာယ်စိုးရိမ်ရသောကြောင့် ၎င်းတို့၏အိမ်များမှ ထွက်ပြေးရခြင်းဖြစ်သည်။ လူတော်တော်များများမှာရုန်းကန်နေကြရပြီး၊ အဓိကကျသည့် လူသားချင်းစာနာထောက်ထားမှုဆိုင်ရာ အထောက်အပံ့များနှင့် ဝန်ဆောင်မှုများကို လွယ်ကူစွာ မရရှိ နိုင်ကြပေ။

အခြေခံအကျဆုံး တားဆီးကာကွယ်ရေးဆိုင်ရာ ကျန်းမာရေးစောင့်ရှောက်မှု ပျောက်ဆုံးနေပြီဖြစ်သည်

နိုင်ငံတစ်လွှားရှိ ကလေးသူငယ်သန်းပေါင်းများစွာအနေဖြင့် အခြေခံကျန်းမာရေးဝန်ဆောင်မှုများကို ခံစားခွင့် မရှိကြပေ။ ကလေးသူငယ် (၁)သန်းနီးပါးသည် ဝက်သက်၊ ပိုလီယိုနှင့် ဆုံဆို့နာတို့ကို ကြိုတင်ကာကွယ်ရန် လုပ်ရိုးလုပ်စဉ် ကာကွယ်ဆေးများကို မရရှိနိုင်ကြပေ။ ကလေးသူငယ်(၅)သန်းနီးပါးသည် ကူးစက်ရောဂါများနှင့် အမြင်အာရုံကွယ်မှုတို့မှ ကာကွယ်ပေးမည့် ရိုးရှင်းသောဗီတာမင်အေဖြည့်စွက်မှုမရှိဘဲ ရှေ့ဆက်နေကြရသည်။ ကလေးသေဆုံးမှုနှုန်းနှင့် အာဟာရ မပြည့်ဝမှုတို့မှာ မြင့်မား နေဆဲပင်ဖြစ်သည်။

ကမ္ဘာ့ကပ်ရောဂါက ဆင်းရဲမွဲတေမှုကို တွန်းအားပေးနေသည်

ကိုဗစ်တတိယလှိုင်းက စီးပွားရေးနှင့် ပြည်သူတို့၏ကျန်းမာရေးတို့အတွက် အလွန်ဆိုးရွားသည့် အကျိုးဆက်များကို ဖြစ်ပေါ်စေသည်။ ကမ္ဘာ့ကပ်ရောဂါဆိုက်မှုကြောင့် မြင့်တက်လာသည့် ဆင်းရဲမွဲတေမှုသည် ကလေးသူငယ်များနှင့် အမျိုးသမီး များအပေါ်သို့ အဆိုးရွားဆုံး သက်ရောက်မည် ဖြစ်သည်။

ဘေးမကင်းသောရေများက အသက်အန္တရာယ်ကိုခြိမ်းခြောက်နေသည့် ရောဂါကို ဖြစ်ပေါ် စေသည်

ဘေးမကင်းသောရေများက ကလေးသူငယ်များ၏ကျန်းမာရေးနှင့် သူတို့၏ဖြစ်တည်မှုတို့အပေါ် တိုက်ရိုက်အကျဆုံးသော ခြိမ်းခြောက်မှုတခုပင်ဖြစ်သည်။ ဘေးကင်းသောရေမရှိမှုနှင့် ဘေးကင်း သောရေလုံလောက်စွာမရှိမှုတို့က သန့်ရှင်းရေးစနစ်နှင့် ပတ်ဝန်းကျင်သန့်ရှင်းရေးတို့ကို ပိုမိုဆိုးဝါးစေရန် တွန်းအားပေးနေပါသည်။ မြန်မာနိုင်ငံကဲ့သို့သောနိုင်ငံများတွင်၊ သုတေသနအဆိုအရ အသက်အရွယ်(၅)နှစ်အောက် ကလေးသူငယ်များသည် ဘေးမကင်းသောရေများနှင့်ဆက်စပ်နေသည့် ဝမ်းပျက်ဝမ်းလျောရောဂါကြောင့် အသက်သေဆုံးနိုင်ချေ အဆ (၂၀) ပိုများပါသည်။

ကျန်းမာရေးစောင့်ရှောက်မှုဆိုင်ရာ တိုးတက်မှုများကို ဆုံးရှုံးနေပြီဖြစ်သည်

မြန်မာနိုင်ငံ၏ကျန်းမာရေးစောင့်ရှောက်မှု၊ ပညာရေး၊ ရေနှင့်သန့်ရှင်းရေးအပြင်၊ ကလေးသူငယ် ကြိုတင် ကာကွယ်ရေးတို့သည် လက်ရှိအကြပ်အတည်းမတိုင်ခင်တွင် အားလုံးတိုးတက်နေပြီဖြစ်သည်။ ကလေးသူငယ်များနှင့် လူ့အဖွဲ့အစည်းများထံသို့ ဘဏ္ဍာငွေခွဲဝေချထားသုံးစွဲရေးမှာမြင့်တက်နေခဲ့သည်။ ယင်းတိုးတက်မှုများမှာ ယခုအခါတွင် ဆိုးရွားစွာထိခိုက်သွားပြီဖြစ်သည့်အပြင်၊ ကလေးသူငယ်များ၏ လိုအပ်ချက်များကိုဖြည့်စည်းရန်မှာ ပိုမို၍အရေးပေါ်ကိစ္စတခု ဖြစ်လာပြီဖြစ်သည်။

UNICEF အနေဖြင့်မည်သို့တုံ့ပြန်နေသနည်

ကျွန်ပ်တို့အနေဖြင့် တည်ငြိမ်အေးချမ်းသည့်ကာလတွင်ဖြစ်စေ၊ အကြပ်အတည်းကာလတွင်ဖြစ်စေ မြန်မာနိုင်ငံရှိ ကလေးသူငယ်များအတွက် လုပ်ကိုင်ဆောင်ရွက်ထားသည့် နှစ်ပေါင်း(၇၀)စာ အတွေ့အကြုံများအပေါ် အခြေတည် ထားပါသည်။ ပြုလွယ်ပြင်လွယ်ရှိမှုဟူသည် ကျွန်ပ်တို့၏ဆောင်ပုဒ်ပင်ဖြစ်ပြီး၊ UNICEF အနေဖြင့် ၎င်း၏လုပ်ငန်းများကို ဒေသတွင်းလိုအပ်ချက်အတွက် တုံ့ပြန်ဆောင်ရွက်ရန် အလိုက်သင့်ပြင်ဆင်ထားပါသည်။

UNICEF အနေဖြင့် ကလေးသူငယ်များ၏ရှင်သန်ရေးနှင့် ကျန်းမာပျော်ရွှင်မှုတို့အတွက် အရေးပါလှသည့် ဝန်ဆောင်မှုများနှင့် အသက်ကယ်နေသည့်ထောက်ပံ့ပစ္စည်းများကို ပံ့ပိုးပေးရန်အတွက် ကတိကဝတ်ပြုထားပြီး ဖြစ်သည်.

ကျွန်ပ်တို့အနေဖြင့် စိန်ခေါ်မှုအရှိဆုံးအခြေအနေများတွင်ပင် နေထိုင်နေကြရသည့် ကလေးသူငယ်များထံသို့ပင် ပံ့ပိုးကူညီမှုများရောက်ရှိအောင် ဆက်လက်ဆောင်ရွက်နေသည်။ အတိုင်းအတာတစ်ခုဖြင့် အကောင်းဆုံးရလဒ်များကို ဆောင်ကျဉ်းပေးရန်နှင့် လူ့အသက်များကိုကယ်တင်ရန်အတွက် ရင်းမြစ်ပစ္စည်းများကို သေချာစွာဖြန့်ဝေသုံးစွဲနိုင်ရန် မိတ်ဖက်အဖွဲ့အစည်းများစွာနှင့်ပူးပေါင်းဆောင်ရွက်လျက်ရှိသည်။

UNICEF အနေဖြင့် အထိခိုက်ခံရဆုံးသောကလေးများ၊ အဆင်းရဲဆုံးသောကလေးများ၊ မသန်စွမ်းသောကလေးများ၊ နေရပ်စွန့်ခွာထွက်ပြေးရသူများနေထိုင်ရာစခန်းများတွင်ရှိနေသည့် ကလေးများအပြင်၊ ရွှေ့ပြောင်းကလေးများနှင့် ဒုက္ခသည်ကလေးများထံသို့ ရောက်ရှိနိုင်အောင် အထူးအာရုံစိုက်ဆောင်ရွက်ပါသည်။ ထို့ပြင် ကျွန်ပ်တို့အနေဖြင့် ရောက်ရှိရန်ခက်ခဲသော ဒေသများရှိ ကလေးသူငယ်များ၏လိုအပ်ချက်များကို ဖြည့်စည်းပေးရန် ဆောင်ရွက်နေသည့်အပြင်၊ ယင်းသို့ဆောင်ရွက်ရာ၌ ယခုအခါတွင် မာရှယ်လောထုတ်ပြန်ထားသည့် မြို့ပြဒေသများလည်း ပါဝင်လာပြီဖြစ်သည်။