ប្រព័ន្ធគ្រប់គ្រងព័ត៌មានថ្មី សម្រាប់ពង្រឹងកិច្ចការពារកុមារ ត្រូវបានប្រកាសដាក់ឲ្យប្រើប្រាស់ ស្របពេលដែលរបាយការណ៍បានរកឃើញថា ចំនួនកុមារកំពុងរស់ក្នុងមណ្ឌលថែទាំ បានថយចុះ ៥៩% បើធៀបនឹង៥ឆ្នាំមុន

រាជធានីភ្នំពេញ ព្រះរាជាណាចក្រកម្ពុជា ថ្ងៃទី២៥ ខែមិថុនា ឆ្នាំ២០២១៖ នៅថ្ងៃនេះក្រសួងសង្គមកិច្ច អតីតយុទ្ធជន និងយុវនីតិសម្បទា  បានប្រកាសដាក់ឲ្យប្រើប្រាស់នូវប្រព័ន្ធគ្រប់គ្រងព័ត៌មានកិច្ចការពារកុមារនៅក្នុងប្រទេសកម្ពុជា (CPIMS) និងប្រកាសផ្សព្វផ្សាយរបាយការណ៍ស្តីពីការអនុវត្តផែនការសកម្មភាពដើម្បីធ្វើឱ្យប្រសើរឡើងនូវការថែទាំកុមារ និងសមាហរណកម្មកុមារ របាយការណ៍ស្តីពីការអនុវត្តល្អក្នុងការរៀបចំកម្មវិធីថែរក្សាកុមារក្នុងគ្រួសារ និងការបង្ការការបំបែកកុមារ​ពីគ្រួសារក្នុងប្រទេសកម្ពុជា និងប្រកាសស្តីពីនីតិវិធីអនុវត្តការថែទាំកុមារដោយសាច់ញាតិនិងឪពុកម្តាយធម៌។

ដោយមានការគាំទ្រពីអង្គការយូនីសេហ្វ USAID សហភាពអឺរ៉ុប និងអង្គការដៃគូដទៃទៀត ប្រព័ន្ធគ្រប់គ្រងព័ត៌មាន​កិច្ចការពារកុមារនៅក្នុងប្រទេសកម្ពុជា (CPIMS) ត្រូវបានបង្កើតឡើង។ ប្រព័ន្ធព័ត៌មាននេះនឹងអនុញ្ញាតឲ្យក្រសួងស្ថាប័ន អ្នកផ្តល់សេវា ទីភ្នាក់ងារអភិវឌ្ឍន៍ អង្គការមិនមែនរដ្ឋាភិបាល អ្នកស្វែងរកព័ត៌មាន និងសាធារណៈជនអាចទាញយកព័ត៌មានស្តីពីវឌ្ឍនភាពនៃការផ្តល់សេវាការពារកុមារ និងទិន្នន័យដ៏មានតម្លៃទៅប្រើប្រាស់ក្នុងការរៀបចំគោលនយោ​បាយ ផែនការសកម្មភាពនានា របាយការណ៍វាយតម្លៃ សំដៅផ្តល់ការគំាទ្រ និងកិច្ចគាំពារកុមារគ្រប់រូបនៃព្រះរាជាណាចក្រកម្ពុជា។

ប្រព័ន្ធ CPIMS មានសូចនាករចំនួន៥០ នៃវិស័យស្នូលចំនួន៥ ដែលពាក់ព័ន្ធនឹងកិច្ចការពារកុមារ ស្ថិតក្រោម​ដែនសមត្ថកិច្ចក្រសួង ស្ថាប័នចំនួន១៤ និងអង្គការដៃគូចំនួន២។ ដោយមានកិច្ចសហការយ៉ាងជិតស្និតប្រកបដោយការទទួលខុសត្រូវពីសំណាក់ថ្នាក់ដឹកនាំ និងមន្ត្រីបង្គោលរបស់អ្នកពាក់ព័ន្ធខាងលើ ក្នុងរយៈពេល ៣ឆ្នាំ យើងបង្កើតបាននូវប្រព័ន្ធគ្រប់គ្រងព័ត៌មានកិច្ចការកុមារនៅក្នុងប្រទេសកម្ពុជា CPIMS(CPIMS Dashboard)។  ប្រព័ន្ធ CPIMS វាស់វែងវឌ្ឍភាពនៃការការពារកុមារ ប្រព័ន្ធនេះត្រូវបានរៀបចំទិន្នន័យជាទម្រង់ឌីជីថលផ្តល់ភាពងាយស្រួលក្នុងការចូលស្វែងរកទិន្នន័យតាម​​តម្រូវការ។ សូចនាករទាំង ៥០ ត្រូវបានប្រើប្រាស់សម្រាប់ការតាមដាន និងវាយតម្លៃវឌ្ឍនភាពនៃកិច្ចការពារកុមារ។ ប្រព័ន្ធថ្មីនេះជួយបំពេញចំណុចខ្វះខាត ដែលជាធាតុចូលដ៏មានសារសំខាន់ និងចាំបាច់សម្រាប់ការអភិវឌ្ឍប្រព័ន្ធការពារកុមារដែលប្រកបដោយប្រសិទ្ធភាព។

ក្រសួងសង្គមកិច្ច អតីតយុទ្ធជន និងយុវនីតិសម្បទា មានសេចក្តីសោមនស្សរីករាយដែលបានប្រកាសដាក់ឲ្យដំណើរការផ្ទាំងព័ត៌មាននៃប្រព័ន្ធCPIMSនេះ និងសូមថ្លែងអំណរគុណដល់ក្រសួង ស្ថាប័នដែលបានសហការ រៀបចំនូវឧបករណ៍ដ៏មានអត្ថប្រយោជន៍នេះ ដើម្បីផ្តល់សេវាឲ្យកាន់តែប្រសើរឡើង និងសូមថ្លែងអំណរគុណដល់អង្គការយូនីសេហ្វដែលបានផ្តល់ជំនួយបច្ចេកទេស USAID និងសហភាពអឺរ៉ុប  ដែលបានគាំទ្រផ្នែកហិរញ្ញវត្ថុ ក្នុងការរៀបចំប្រព័ន្ធការពារកុមារក្នុងទម្រង់ជាឌីជីថលដែលធ្វើឱ្យប្រព័ន្ធនេះកាន់តែមានភាពល្អប្រសើរមួយកម្រិតទៀត”។

នៅក្នុងព្រឹត្តិការណ៍នេះផងដែរ ក្រសួងក៏បានប្រកាសផ្សព្វផ្សាយពីរបាយការណ៍ស្តីពីផែនការសកម្មភាពរយៈពេល ៥​ឆ្នាំ ដែលជាផែនការប្រកបដោយមហិច្ឆតាខ្ពស់ សម្រាប់លើកកម្ពស់សេវាថែទាំកុមារ ដោយបានដាក់ចេញនូវគោលដៅធ្វើយ៉ាងណាឲ្យកុមារដែលកំពុងរស់នៅក្នុងមណ្ឌលថែទាំយ៉ាងហោចណាស់ ៣០% បានវិលត្រឡប់ទៅរកគ្រួសាររបស់ពួកគេវិញប្រកបដោយសុវត្ថិភាព។ នៅឆ្នាំ២០១៦ ផែនការសកម្មភាពនេះត្រូវបានប្រកាសដាក់ឲ្យអនុវត្តដោយក្រសួងសង្គមកិច្ច អតីតយុទ្ធជន និងយុវនីតិសម្បទា សហការជាមួយអង្គការយូនីសេហ្វ USAID សហភាពអឺរ៉ុប និងកម្មវិធីភាពជាដៃគូសម្រាប់ការពារកុមារ (3PC) និងកម្មវិធី Family Care First រៀបចំផែនការសកម្មភាព ដើម្បីធ្វើសមាហរណកម្មកុមារប្រកបដោយសុវត្ថិភាពពីមណ្ឌលថែទាំទៅកាន់ការថែទាំតាមគ្រួសារ ផ្តល់ការគាំទ្រដល់ការថែរក្សាគ្រួសារឱ្យរស់នៅជុំគ្នា និងជំរុញឲ្យមានការប្រើប្រាស់ជម្រើសថែទាំផ្សេងៗទៀត ក្រៅពីយកកុមារទៅដាក់នៅតាមមណ្ឌលថែទាំ។ ជាលទ្ធផលនៃការអនុវត្តផែនការ បានរកឃើញថា ចាប់តាំងពីពេលដែលផែនការត្រូវបានប្រកាសដាក់ឱ្យអនុវត្ត មណ្ឌលថែទំាកុមារបានថយចុះ៤៣% និងមានកុមាររស់នៅក្នុងមណ្ឌលថែទាំតិចជាងមុន ៥៩%។

លោកស្រី ហ្វ័រូហ្គ ហ្វយូហ្សិថ នាយិកាយូនីសេហ្វប្រចាំកម្ពុជាបានមានប្រសាសន៍ថា “វឌ្ឍនភាពដែលសម្រេចបាននេះ នាំមកនូវភាពសប្បាយរីករាយឥតឧបមា ព្រោះការចិញ្ចឹមបីបាច់ និងការថែទាំដែលមានកិច្ចការពារពីគ្រួសារ មានសារៈសំខាន់យ៉ាងខ្លំាងចំពោះសុខមាលភាពកុមារ។ ប៉ុន្តែយើងក៏នៅមានការងារជាច្រើនទៀតដែលត្រូវធ្វើ ដើម្បីធានាឲ្យមានការអនុវត្តឲ្យបានពេញលេញនូវគោលនយោបាយដែលផ្តោតលើគ្រួសារ និងការផ្តល់សេវាគាំទ្រដល់គ្រួសារ ដើម្បីផ្តល់លទ្ធភាពឲ្យមាតាបិតាអាចផ្តល់ការថែទាំ និងការពារដល់កូនៗរបស់ពួកគេ។ ព័ត៌មាននៃប្រព័ន្ធ CIPMS នេះ គឺជាឧបករណ៍ដ៏មានអត្ថប្រយោជន៍សម្រាប់រៀបចំ និងធ្វើឲ្យប្រសើរទ្បើងនូវគោលនយោបាយ និងសេវានានា។”

​​​​ម្យ៉ាងវិញទៀត ដើម្បីបន្តពង្រឹងការថែទាំគ្រួសារឲ្យបានរស់នៅជួបជុំគ្នា និងផ្តល់នូវការថែទាំជំនួសតាមគ្រួសារនៅក្នុងប្រទេស ក្រសួងសង្គមកិច្ច អតីតយុទ្ធជន និងយុវនីតិសម្បទាបានចេញប្រកាស ស្តីពីនីតិវិធីអនុវត្តការថែទាំកុមារ​ដោយសាច់ញាតិ និងឪពុកម្ដាយធម៌ ផងដែរ។ ប្រកាសនេះផ្តល់ការណែនាំយ៉ាងជាក់ច្បាស់ដល់ស្ថាប័ន និងភាគីពាក់ព័ន្ធអំពីការអនុវត្តវិធានការណ៍ដែលប្រើប្រាស់ជាជម្រើសជំនួសឱ្យការយកកុមារទៅដាក់ឱ្យរស់នៅតាមមណ្ឌលថែទាំ ខណៈពេលដែលកំពុងមានការរៀបចំផែនការផ្តល់ការថែទាំជាអចិន្ត្រៃយ៍ ដោយមានការផ្តោតការយកចិត្តទុកដាក់ធ្វើយ៉ាងណាឲ្យគ្រួសារអាចបន្តរស់នៅជុំគ្នាបានប្រកបដោយសុវត្ថិភាពនិងសុភមង្គល។
កំណត់ចំណាំសម្រាប់និពន្ធនាយក៖

ប្រព័ន្ធគ្រប់គ្រងព័ត៌មានកិច្ចការពារកុមារអាចចូលមើល និងទាញយកទិន្នន័យនៅតាមតំណភ្ជាប់ https://cpims-cambodia.ona.io  និងផែនការពង្រឹងការថែទាំកុមារ និងសមាហរណកម្មកុមារ អាចទាញយកតាមតំណភ្ជាប់៖ https://bit.ly/35OkXX2

សម្រាប់ព័ត៌មាន សូមទាក់ទង៖

ក្រសួងសង្គមកិច្ច អតីតយុទ្ធជន និងយុវនីតិសម្បទា

លោក ភី ណូ ប្រធាននាយកដ្ឋានសុខុមាលភាពកុមារ

សារអេឡិកត្រូនិក៖ [email protected], ទូរសព្ទចល័ត៖ (+៨៥៥) ៩២ ៤៦២ ២៦៣