ក្រសួងអប់រំ យុវជន និងកីឡា និងយូនីសេហ្វ លើកកម្ពស់វិស័យអប់រំនៅកម្ពុជា តាមរយៈការដាក់ឱ្យដំណើរការថ្នាលឌីជីថល ដើម្បីជំរុញការបណ្តុះបណ្តាលគ្រូបង្រៀន

រាជធានីភ្នំពេញ ថ្ងៃទី១៨ ខែវិច្ឆិកា ឆ្នាំ២០២៥ – ក្រសួងអប់រំ យុវជន និងកីឡា និងយូនីសេហ្វ (UNICEF) បានប្រកាសដាក់ឱ្យដំណើរការជាផ្លូវការនូវ “ថ្នាលអភិវឌ្ឍសមត្ថភាព​ (CDP)”  ដែលជាប្រព័ន្ធគ្រប់គ្រងការសិក្សា (LMS) សម្រាប់គ្រូបង្រៀន គ្រូឧទ្ទេស និងបុគ្គលិកអប់រំនៅកម្ពុជា។ គំនិតផ្តួចផ្តើមនេះ ត្រូវបានបង្កើតឡើងក្នុងគោលបំណងធ្វើឌីជីថលរូបនីយកម្ម និងធ្វើឱ្យការបណ្តុះបណ្តាលគ្រូបង្រៀនមានរចនាសម្ព័ន្ធ និងលក្ខណៈស្តង់ដា ផ្លាស់ប្តូរការអភិវឌ្ឍវិជ្ជាជីវៈសម្រាប់គ្រូបង្រៀន គ្រូឧទ្ទេស និងបុគ្គលិកអប់រំនៅទូទាំងប្រទេសកម្ពុជា និងជាចុងក្រោយ ធ្វើឱ្យប្រសើរទ្បើងនូវការសិក្សារបស់កុមារគ្រប់រូប។

ឯកឧត្តមបណ្ឌិត ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា៖ “ថ្នាលអភិវឌ្ឍសមត្ថភាពនេះ គឺជាជំហាននៃការផ្លាស់ប្តូរមួយ ក្នុងដំណើររបស់កម្ពុជាឆ្ពោះទៅកាន់ការអប់រំគ្រូបង្រៀនប្រកបដោយគុណភាព”។ “តាមរយៈការធ្វើឌីជីថលរូបនីយកម្មការបណ្តុះបណ្តាលគ្រូបង្រៀន និងការអភិវឌ្ឍវិជ្ជាជីវៈ យើងកំពុងផ្តល់សិទ្ធិអំណាចដល់អ្នកអប់រំរបស់យើង ជាមួយនឹងឧបករណ៍ ចំណេះដឹង ជំនាញ និងការគាំទ្រ ដើម្បីជំរុញការសិក្សា និងធ្វើឱ្យប្រសើរទ្បើងនូវលទ្ធផលសិក្សា។ ថ្នាលអភិវឌ្ឍសមត្ថភាពនេះ បានឆ្លុះបញ្ចាំងពីការប្តេជ្ញាចិត្តរបស់ក្រសួង ចំពោះនវានុវត្តន៍ សមធម៌ និងឧត្តមភាពក្នុងវិស័យអប់រំ”។

អ្នកជំនាញផ្នែកអប់រំគ្រប់រូបទូទាំងប្រទេស អាច​ប្រើប្រាស់ថ្នាលអភិវឌ្ឍសមត្ថភាព ដើម្បីអភិវឌ្ឍសមត្ថភាព​វិជ្ជាជីវៈរបស់ខ្លួ​នជាប្រចាំ សម្រាប់ជួយលើកកម្ពស់គុណភាពអប់រំដែលផ្តល់ជូនដល់សិស្សានុសិស្ស។

លោកបណ្ឌិត វីល ផាកស៍ នាយកយូនីសេហ្វប្រចាំនៅកម្ពុជា មានប្រសាសន៍ថា៖ “នៅពេលដែលយើងគាំទ្រគ្រូបង្រៀន យើងធានាបានថាកុមារគ្រប់រូប ជាពិសេសកុមារដែលងាយរងគ្រោះបំផុត អាចទទួលបានជំនួយដែលពួកគាត់ត្រូវការ ដើម្បីឈានដល់សក្ដានុពលពេញលេញរបស់ពួកគាត់ទាំងនៅក្នុងថ្នាក់រៀន និងក្នុងជីវិត »។ «ថ្នាលអភិវឌ្ឍសមត្ថភាព នឹងដើរតួនាទីយ៉ាងសំខាន់ក្នុងការសម្រេចបាននូវគោលដៅទាំងនេះ។ តាមរយៈការកែលម្អគុណភាពអប់រំ និងជំរុញលទ្ធភាពទទួលបានការសិក្សាប្រកបដោយសមធម៌ យើងអាចកសាងប្រព័ន្ធអប់រំមួយដែលមានភាពធន់ និងបណ្តុះបណ្តាលធនធានមនុស្សប្រកបដោយជំនាញខ្ពស់ សម្រាប់អនាគតប្រទេសកម្ពុជា”។

ថ្នាលអភិវឌ្ឍសមត្ថភាពនេះ ដើរតួជាប្រព័ន្ធអេកូឡូស៊ីឌីជីថលដ៏ទូលំទូលាយ និងជាមជ្ឈមណ្ឌលសម្រាប់កម្មវិធីបណ្តុះបណ្តាលប្រកបដោយនវានុវត្តន៍ និងការចែករំលែកធនធាន។ ថ្នាលនេះមានគោលបំណងពង្រឹងជំនាញ និងចំណេះដឹងរបស់គ្រូបង្រៀន និងបុគ្គលិកវិស័យអប់រំ តាមរយៈការផ្តល់នូវការបណ្តុះបណ្តាលប្រកបដោយគុណភាពខ្ពស់ និងធនធានសំបូរបែប និងឱកាសសម្រាប់កិច្ចសហការ។

គោលបំណងរបស់ថ្នាលនេះ​ រួមមាន៖

• ការពង្រឹងវិជ្ជាជីវៈគ្រូបង្រៀន៖ ផ្តល់ឱកាសអភិវឌ្ឍវិជ្ជាជីវៈជាប្រចាំ ដើម្បីបំប៉នគ្រូបង្រៀននូវវិធីសាស្រ្តគរុកោសល្យថ្មីៗ បទពិសោធន៍ និងជំនាញអក្ខរកម្មឌីជីថល
• ការកែលម្អលទ្ធផលសិក្សា៖ ពង្រឹងវិធីសាស្ត្របង្រៀន ដើម្បីធានាបាននូវបទពិសោធន៍សិក្សាដែលកាន់តែទាក់ទាញ ប្រសិទ្ធភាព និងបរិយាបន្នសម្រាប់សិស្សគ្រប់រូប។
• ការជំរុញវប្បធម៌នវានុវត្តន៍៖ លើកទឹកចិត្តគ្រូបង្រៀនឱ្យប្រើប្រាស់វិធីសាស្ត្របង្រៀន និងរៀនប្រកបដោយនវានុវត្តន៍ និងការរួមបញ្ចូលបច្ចេកវិទ្យាទៅក្នុងថ្នាក់រៀន។
• ការបង្កើតគន្លងអាជីព៖ ផ្តល់នូវគន្លងអាជីពច្បាស់លាស់សម្រាប់ការអភិវឌ្ឍវិជ្ជាជីវៈ និងឱកាសភាពជាអ្នកដឹកនាំនៅក្នុងវិស័យអប់រំ។
• ការពង្រឹងសមត្ថភាព៖ កសាងសមត្ថភាពស្ថាប័ន ដើម្បីរៀបចំ អនុវត្ត និងវាយតម្លៃកម្មវិធីអភិវឌ្ឍគ្រូបង្រៀន ប្រកបដោយប្រសិទ្ធភាព។

ការបង្កើតថ្នាលអភិវឌ្ឍសមត្ថភាពនេះ ទទួលបានថវិកាគាំទ្រពីភាពជាដៃគូសកលសម្រាប់ការអប់រំ (GPE) សហភាពអឺរ៉ុប (EU) និងក្រសួងការបរទេស និងពាណិជ្ជកម្មអូស្ត្រាលី (DFAT) តាមរយៈមូលនិធិភាពជាដៃគូសម្រាប់អភិវឌ្ឍសមត្ថភាពវិស័យអប់រំ (CDPF-III) ដែលសម្របសម្រួលដោយយូនីសេហ្វប្រចាំនៅកម្ពុជា និងមានការចួលរួមដោយអង្គការអប់រំពិភពលោក ជាផ្នែកមួយនៃវិទ្យស្ថានបណ្ដុះបណ្ដាលនិងស្រាវជ្រាវ JSI។

ក្រសួងអប់រំ យុវជន និងកីឡា និងយូនីសេហ្វ សូមអំពាវនាវដល់គ្រូបង្រៀន នាយកសាលា និងបុគ្គលិកអប់រំទូទាំងប្រទេសកម្ពុជា ឱ្យស្វែងយល់ និងចូលរួមប្រើប្រាស់ថ្នាលនេះឱ្យសកម្ម។ ដៃគូអភិវឌ្ឍន៍ ស្ថាប័នរដ្ឋាភិបាល អង្គការសង្គមស៊ីវិល និងអ្នកផ្តល់មូលនិធិអន្តរជាតិ ត្រូវបានលើកទឹកចិត្តឱ្យចូលរួមក្នុងគំនិតផ្តួចផ្តើមដ៏សំខាន់មួយនេះ និងរួមចំណែកដល់ការអភិវឌ្ឍប្រកបដោយចីរភាពនៃវិស័យអប់រំរបស់កម្ពុជា។

សម្រាប់ព័ត៌មានបន្ថែម និងដើម្បីចូលទៅកាន់ថ្នាលអភិវឌ្ឍសមត្ថភាពនេះ សូមចូលទៅកាន់៖https://cdp.moeys.gov.kh

សម្រាប់ព័ត៌មានបន្ថែម
អំពីក្រសួងអប់រំ យុវជន និងកីឡា សូមចូលទៅកាន់៖ www.moeys.gov.kh
តាមដានក្រសួងអប់រំ យុវជន និងកីឡា តាមរយៈ Facebook | Telegram | YouTube | Instagram | TikTok

សម្រាប់ព័ត៌មានបន្ថែម សូមទំនាក់ទំនង៖
លោក សុក ថា ប្រធាននាយកដ្ឋានបរិវត្តកម្មឌីជីថល
ក្រសួងអប់រំ យុវជន និងកីឡា
ទូរស័ព្ទ៖ +៨៥៥ ៦៦ ៩០១ ៨០០ អ៊ីមែល៖ [email protected]