កិច្ចសហការគ្រប់គ្រងករណីគាំទ្រកុមារងាយរងគ្រោះ

មន្រ្តីសង្គមកិច្ចគ្រប់គ្រងករណី រួមគ្នាគាំទ្រជនរងគ្រោះ និងគ្រួសារពីអំពើហិង្សា ឲ្យទទួលបានសេវាចាំបាច់បំផុត ឲ្យចេញផុតពីរបួសផ្លូវចិត្ត ទៅរកស្ថិរភាពចិត្ត

Jesse Lee Gray
© UNICEF Cambodia/2013/Luis Barreto
UNICEF Cambodia/2013/Luis Barreto
09 កុម្ភៈ 2022

សកម្មភាពដំបូងនៃថ្ងៃមួយដ៏ស្ងប់ស្ងាត់នៅក្នុងផ្ទះ ​បានប្រែក្លាយជាសោកនាដ្ឋកម្ម​មួយដែលកើតទ្បើងនៅក្រុងតាខ្មៅ។

រចនា1 គឺកូនតែម្នាក់ប៉ុណ្ណោះ​របស់ម្ដាយនាងជាមួយប្ដីមុន។ ម្ដាយរបស់នាងឈ្មោះ បញ្ញា2 និងមានកូនស្រីពីរនាក់​ជាមួយ​ប្ដីថ្មីរបស់គាត់ និងកំពុងពរពោះកូនម្នាក់ទៀត។ ម្ដាយរបស់នាងធ្វើការងារ​ជាច្រើនម៉ោង​នៅក្នុងការដ្ឋានសំណង់ ហើយឪពុកចុងរបស់នាង​គ្មានការងារធ្វើជាប់លាប់ឡើយ និងហើយតែងតែ ជាមនុស្សពេញវ័យតែម្នាក់គត់​នៅផ្ទះ។ រចនាដែលមានអាយុ ១១ឆ្នាំ និងឪពុកចុងរបស់នាងតែង​តែមិនចុះសម្រុងគ្នាឡើយ ប៉ុន្តែ​នៅពេលសាលារៀន​បិទទ្វារដោយសារការរាតត្បាតនៃជំងឺកូវីដ ស្ថានភាពដ៏​លំបាកនេះ​បានប្រែក្លាយទៅជាគ្រោះថ្នាក់។

នៅថ្ងៃមួយ នៅពេលម្ដាយនាង​កំពុងធ្វើការងារ ហើយប្អូនស្រីរបស់នាងកំពុងលេង​នៅខាងក្រៅផ្ទះ រចនាបានជួបប្រទះនឹងរឿងដែលមិននឹកស្មានដល់។ ឪពុកចុងរបស់នាងបានចាប់នាងរំលោភសេពសន្ធវៈ​ និងបានគំរាមកំហែង​បង្កគ្រោះថ្នាក់បន្ថែមទៀតលើនាង និងគ្រួសារ ប្រសិនបើនាងនិយាយប្រាប់នរណាម្នាក់។ ស្ថានភាពដ៏តានតឹងផ្លូវចិត្ត​នេះ​បានបន្តរហូតដល់​ម្ដាយនាងបានរកឃើញភស្តុតាងនៃការរំលោភបំពាននេះ។ បន្ទាប់ពីនិយាយជាមួយរចនា បញ្ញាបានទៅប្ដឹងនគរបាលភ្លាម ហើយនគរបាល​បានចាប់ខ្លួន​ឪពុកចុងរូបនេះ​នៅថ្ងៃដដែលនោះដែរ។

មន្រ្តីនគរបាលដែល​កាន់ករណីនេះ បានទាក់ទង​អ្នកស្រី ឃុន សុភ័ក្ត្រ អនុប្រធាន​ការិយាល័យ​សង្គមកិច្ច និងសុខុមាលភាពសង្គមស្រុក (DOSWA) នៃខេត្តកណ្ដាល។ បន្ទាប់មកអ្នកស្រី​ សុភ័ក្រ្ត ​បានទាក់ទងអ្នកស្រី សុខ លីកា បុគ្គលិកសង្គម​នៅអង្គការមិត្តសំទ្បាញ់ ដែលជា​អង្គ​ការមិនរកប្រាក់ចំណេញមួយផ្ដល់ការគាំទ្រ​ដល់គ្រួសារនានា ដែលបានឆ្លងកាត់របួសស្នាមផ្លូវចិត្តបែបនេះ។ អ្នកស្រីសុភ័ក្រ្ត និងលីកា បានចុះសួរសុខទុក្ខ​រចនា និងគ្រួសាររបស់នាងនៅថ្ងៃបន្ទាប់ ដើម្បីប៉ាន់ប្រមាណ​តម្រូវការរបស់ពួកគេ និងភ្ជាប់​ទំនាក់ទំនងពួកគេជាមួយនឹងធនធានដ៏ត្រឹមត្រូវឲ្យបានឆាប់បំផុតតាមអាចធ្វើបាន ពោលគឺការគាំទ្រចិត្តសង្គម ការពិគ្រោះយោបល់ផ្លូវច្បាប់ និងជំនួយហិរញ្ញវត្ថុ ។

ការគាំទ្រដល់ការធ្វើ​អន្តរកាលពី​របួសស្នាមផ្លូវចិត្ត​ទៅរកស្ថិរភាព គឺជាដំណើរការដ៏ពិបាក និងស្មុគស្មាញ ដែលទាមទារនូវឯកទេស ក្តីករុណា និងកិច្ចការសហការយ៉ាងខ្លាំងក្លាទៅលើ​ករណីនីមួយៗ។ តួអង្គ​នីមួយៗ​មានតួនាទីត្រូវធ្វើ ដើម្បីជួយ​ជនរងគ្រោះ និងគ្រួសារ​របស់ពួកគេឲ្យបានធូរស្បើយឡើងវិញ និង​ដើម្បីទទួលបានភាពយុត្តិធម៌។

គ្រួសារ គឺជាខ្សែរបន្ទាត់ការពារដំបូង​នៅក្នុង​កិច្ចការពារ​កុមារ ពោលគឺ​ធ្វើអ្វីៗ ដើម្បីកុំឲ្យមានអំពើហិង្សា​នៅក្នុងផ្ទះ និងប្រសិនបើមាន ពួកគេត្រូវដឹងអំពី​ទីកន្លែង និងរបៀបរាយការណ៍ ដូចអ្វីដែល​បញ្ញា​បានធ្វើសម្រាប់​រចនាដែរ។ នគរបាលត្រូវតែយល់ច្បាស់អំពីសិទ្ធិរបស់កុមារ​នៅក្នុងប្រព័ន្ធ​យុត្តិធម៌ អនុវត្តតាមនីតិវិធីកុមារមេត្រី និងសំខាន់បំផុតទាក់ទងភ្លាមទៅកាន់​បុគ្គលិកសេវាសង្គម​នៅក្នុងក្រុង/ស្រុក​របស់ពួកគេដូចជាអ្នកស្រី សុភ័ក្ត្រ។ ក្រសួងសង្គមកិច្ច អតីតយុទ្ធជន និងយុវនីតិសម្បទា​ (ក្រសួង ស.អ.យ) តាមរយៈ​ការិយាល័យ (DOSWA) របស់ខ្លួន មានតួនាទីសម្របសម្រួល​ ដែលធានានូវ​ដំណើរការ​ដ៏ត្រឹមត្រូវ ជួយលើកកម្ពស់​សិទ្ធិរបស់កុមារ និងភ្ជាប់ទំនាក់ទំនង​ជនរងគ្រោះ និងគ្រួសាររបស់ពួកគេ​ជាមួយសេវាឯកទេសដ៏ត្រឹមត្រូវ។ បុគ្គលិកសង្គម​មកពីវិស័យ​មិនរកប្រាក់ចំណេញ ដូចជាអ្នកស្រី លីកា ផ្ដល់​ការពិគ្រោះយោបល់ចិត្តសង្គម និងធ្វើការងារដោយពួតដៃគ្នាជាមួយ​បុគ្គលិកសេវាសង្គម​ពី​រដ្ឋាភិបាល ដើម្បី​បង្កើត​បណ្ដាញសេវាគាំទ្រ​ដ៏ត្រឹមត្រូវ​នៅជុំវិញ​ជនរងគ្រោះនៃអំពើហិង្សា។

 

ថ្ងៃទី០១ ខែធ្នូ ឆ្នាំ២០២១៖ អ្នកស្រី សុខ លីកា បុគ្គលិកសង្គមនៃអង្គការមិត្តសំទ្បាញ់ កំពុងធ្វើការប្រចាំថ្ងៃរបស់គាត់នៅការិយាល័យរបស់គាត់នាទីក្រុងភ្នំពេញ ប្រទេសកម្ពុជា។
UNICEF Cambodia/2021/Bunsak But
ថ្ងៃទី០១ ខែធ្នូ ឆ្នាំ២០២១៖ អ្នកស្រី សុខ លីកា បុគ្គលិកសង្គមនៃអង្គការមិត្តសំទ្បាញ់ កំពុងធ្វើការប្រចាំថ្ងៃរបស់គាត់នៅការិយាល័យរបស់គាត់នាទីក្រុងភ្នំពេញ ប្រទេសកម្ពុជា។

ការកសាងប្រព័ន្ធកិច្ចការពារ​កុមារ​មកដល់កម្រិតដូចនៅថ្ងៃនេះ បានចំណាយពេលច្រើន និងបាន​សម្របសម្រួលកិច្ចខិតខំប្រឹងប្រែងពី​តួអង្គជាច្រើន។ បើទោះបីជាមានវឌ្ឍនភាពក្ដី ក៏នៅតែមានការងារជាច្រើនដែលត្រូវធ្វើ ដើម្បីធានាថាករណីនានា​ ដូចជាករណីរចនា​ នឹងត្រូវបានកាត់បន្ថយមកកម្រិតទាបបំផុត។

យូនីសេហ្វ កំពុងគាំទ្រក្រសួង ស.អ.យ ក្នុងការពង្រឹង​ប្រព័ន្ធកិច្ចការពារ​កុមារជាតិ និងកសាងសមត្ថភាព​របស់មន្រ្តីថ្នាក់ក្រុង/ស្រុកខណ្ឌ ដូចជាអ្នកស្រី សុភ័ក្រ្ត ដែល​ស្ថិតនៅក្នុងចំណោម​មន្រ្តីរដ្ឋាភិបាល ដែលត្រូវបាន​តែងតាំងជាលើកដំបូង ជាមួយនឹងសេចក្តីបរិយាយតួនាទី និងមុខងារច្បាស់លាស់ ដោយផ្ដោតលើ​កិច្ចការពារ​កុមារតែមួយមុខប៉ុណ្ណោះ។ ពួកគេកំពុងទទួលការបណ្ដុះបណ្ដាល ដើម្បីទទួលបាន​ការទទួលស្គាល់​ជា​អ្នកសង្គមកិច្ចពាក់កណ្ដាល​វិជ្ជាជីវៈ។ មន្រ្តីសង្គមកិច្ច​របស់រដ្ឋាភិបាលទាំងនេះ​​នឹងដើរតួនាទី​យ៉ាងសំខាន់នៅក្នុងការ​ធ្វើឲ្យ​កុមារកម្ពុជា​ទទួលបាន​កិច្ចការពារកាន់តែខ្លាំង។

ទោះបីជាយ៉ាងណាក្ដី សម្រាប់ពេលនេះ រាជរដ្ឋាភិបាល​នៅកម្រិតថ្នាក់​មូលដ្ឋាន​ នៅតែត្រូវការ​ការគាំទ្រ​បន្ថែម​ក្នុងការផ្ដល់​សេវាល្អបំផុតដល់​កុមារដែលប្រឈមនឹងហានិភ័យ។ កម្មវិធីភាពជាដៃគូដើម្បីការពារ​កុមារ (3PC) ត្រូវបានបង្កើតឡើងនៅឆ្នាំ២០១១ ដើម្បី​ឆ្លើយតបនឹង​សេចក្ដីត្រូវការរបស់រាជរដ្ឋាភិបាល និងអ្នកផ្ដល់សេវាដែលមិនរកប្រាក់ចំណេញ នៅក្នុងការធ្វើការងាររួមគ្នា​ដោយរលូន។ 3PC គាំទ្រដល់ការសម្របសម្រួល​នៅទូទាំងក្រសួង ស.អ.យ យូនីសេហ្វ និងអង្គការ Friends-International ដើម្បីពង្រឹង​ប្រព័ន្ធកិច្ចការពារ​កុមារជាតិ។ អង្គការ​ Friends-International ដែលរួមគ្នាជាមួយអង្គការមិត្តសំទ្បាញ់ ដែលជាកន្លែងធ្វើការងាររបស់អ្នកស្រីលីកា សម្របសម្រួល​បណ្ដាញគ្របដណ្ដប់មួយនៃ​អង្គការមិនមែនរដ្ឋាភិបាលចំនួន១៣ និងអង្គការតាមសហគមន៍​ជាង ៤០ ទៀត។

ដោយសារបណ្ដាញ​នៃដៃគូដែលត្រូវបានបង្កើតយ៉ាងល្អ​របស់ 3PC ដែលធ្វើការងារួមគ្នា​នេះហើយ ដែលធ្វើឲ្យគ្រួសាររបស់​រចនា​ទទួលបានការគាំទ្រដ៏ត្រឹមត្រូវ ស្របពេលដែលកម្មវិធី Primero ផ្ដល់លទ្ធភាពប្រើប្រាស់យ៉ាងឆាប់រហ័ស។ ការគ្រប់គ្រងករណីឌីជីថល Primero ត្រូវបានដាក់ឲ្យដំណើរការ​នៅពាក់កណ្ដាលឆ្នាំ២០២០ និងពង្រីកការអនុវត្ត​​ទៅដល់​គ្រប់ក្រុង/ស្រុកខណ្ឌ​ ជាមួយនឹងការបណ្ដុះបណ្ដាល​ក្រោមការគាំទ្ររបស់យូនីសេហ្វ។ ប្រព័ន្ធនេះ​ធ្វើឲ្យបុគ្គលិកផ្តល់សេវាសង្គមរាជ​រដ្ឋាភិបាលដូចជា អ្នកស្រីសុភ័ក្រ្ត​ មានភាពងាយស្រួលជាងពេលណាៗទាំងអស់ក្នុងការចុះឈ្មោះ​កុមារប្រឈមហានិភ័យជាផ្លូវការ និងភ្ជាប់ទំនាក់ទំនង​ពួកគេជាមួយ​សេវាសង្គមដ៏ត្រឹមត្រូវ ស្របពេលដែលរក្សាការសម្ងាត់ចំពោះ​ព័ត៌មានផ្ទាល់ខ្លួនរបស់ពួកគេ។

“តួនាទី​នៃកម្លាំងសេវាសង្គម​យ៉ាងខ្លាំងក្លា និងប្រព័ន្ធជាតិដែលមានការសម្របសម្រួល មានសារសំខាន់ជាងពេលណាៗទាំងអស់ ដោយសារយើងធ្វើការងារ ដើម្បីធ្វើឲ្យមានតុល្យភាពគ្នាចំពោះ​ផលប៉ះពាល់នៃជំងឺរាតត្បាត ដែល​បានបង្កើនហានិភ័យ​នៃអំពើហិង្សា ឬការរំលោភបំពាន ជាពិសេស​នៅផ្ទះ” នេះគឺជាសម្ដី​របស់លោកស្រី Lucia Soleti ប្រធានផ្នែកកិច្ចការពារកុមាររបស់យូនីសេហ្វ។ “យូនីសេហ្វ មានមោទនភាព​ក្នុងការធ្វើការងារជាមួយរាជរដ្ឋាភិបាល និងដៃគូ 3PC ដទៃទៀត ដើម្បីកសាង​សមត្ថមភាពបច្ចេក​ទេស​​របស់កម្លាំង​ការងារនេះ ដើម្បីឲ្យពួកគេ​អាចការពារ​កុមារប្រកបដោយប្រសិទ្ធភាពប្រឆាំងនឹងអំពើហិង្សា ដោយសហការគ្នារវាងដៃគូរដ្ឋាភិបាល និង​ដៃគូសង្គមស៊ីវិល។ យើង​សូមថ្លែងអំណរគុណចំពោះ​ការគាំទ្រ​ហិរញ្ញវត្ថុជាបន្តបន្ទាប់​ពីដៃគូនានាដូចជា USAID រដ្ឋាភិបាលជប៉ុន និងយូនីសេហ្វអូស្រ្តាលី សម្រាប់ការកសាង​ប្រព័ន្ធកិច្ចការពារកុមារ​របស់កម្ពុជា។”

ថ្ងៃទី០១ ខែធ្នូ ឆ្នាំ២០២១៖ អ្នកស្រី សុខ លីកា បុគ្គលិកសង្គមនៃអង្គការមិត្តសំទ្បាញ់ ផ្តល់សម្ភាសន៍ជាមួយបុគ្គលិកយូនីសេហ្វ នៅការិយាល័យរបស់អ្នកស្រី ក្នុងទីក្រុងភ្នំពេញ ប្រទេសកម្ពុជា។
UNICEF Cambodia/2021/Bunsak But
ថ្ងៃទី០១ ខែធ្នូ ឆ្នាំ២០២១៖ អ្នកស្រី សុខ លីកា បុគ្គលិកសង្គមនៃអង្គការមិត្តសំទ្បាញ់ ផ្តល់សម្ភាសន៍ជាមួយបុគ្គលិកយូនីសេហ្វ នៅការិយាល័យរបស់អ្នកស្រី ក្នុងទីក្រុងភ្នំពេញ ប្រទេសកម្ពុជា។

អ្នកស្រី លីកា​ បានសង្កត់ធ្ងន់លើសារសំខាន់នៃការធ្វើការងារ​ជាមួយ​គ្រួសារ ក្នុងការផ្ដល់​ការគាំទ្រយ៉ាងខ្លាំងក្លា​​ដល់​កុមាររងផលប៉ះពាល់ ដើម្បីស្ដារស្ថានភាពផ្លូវចិត្ត និងជាសះស្បើយឡើងវិញ និងសំខាន់បំផុត ដើម្បីជួយ​ទប់ស្កាត់អំពើហិង្សា​នាពេលអនាគត។ អ្នកស្រី លីកា បានពន្យល់ថា “​នៅក្នុងការចុះជួបសួរសុខទុក្ខលើកទីមួយរបស់ខ្ញុំ ម្ដាយភ័យខ្លាចយ៉ាងខ្លាំងថា ឪពុកចុងនឹងចេញពីពន្ធនាគារ និងបង្កគ្រោះថ្នាក់ដល់គ្រួសាររបស់គាត់”។ តាមរយៈ​​ការពិគ្រោះយោបល់ជាប្រចាំ អ្នកស្រី លីកា បានមើលឃើញថា បញ្ញា​ “ងាកមកផ្ដោតលើ​ពេលបច្ចុប្បន្ន និងធ្វើឲ្យ​ប្រាកដថា កូនស្រ្តីរបស់គាត់មានសុវត្ថិភាព។ គាត់ក៏សូម្បីតែដឹងអំពីរបៀបលើកទឹកចិត្តកូនស្រីគាត់​ឲ្យបង្ហាញ​អំពី​អារម្មណ៍​របស់នាងផងដែរ។”

បើទោះបីជាឪពុកចុងរបស់រចនា​នៅតែស្ថិតនៅក្នុងមន្ទីរឃុំឃាំងដើម្បីរង់ចាំការជំនុំជម្រះក្ដី អ្នកស្រីលីកា និងសុភ័ក្ត្រ​កំពុងធ្វើការងាររួមគ្នា ដើម្បីធានាថាបញ្ញាទទួលបាន​ការគាំទ្រពេញលេញ ដើម្បីឆ្លងកាត់ដំណើរការ​នៃការផ្ដល់ភស្តុតាងដ៏ពិបាកនេះ។ អ្នកស្រីលីកា បានចែករំលែកដោយមោទនភាពថា បញ្ញា “គឺជា​ស្រី្តរឹងមាំ និង​ត្រៀមខ្លួនរួច​ក្នុងការតាមដាន​រហូតដល់ទីបញ្ចប់ ដើម្បីសុវត្ថិភាពនៃគ្រួសាររបស់នាង។” ចំណុចនេះមានសារៈសំខាន់ ដោយសារ ដូចការកត់សម្គាល់របស់អ្នកស្រីសុភ័ក្រ្ត “​ប្រសិនបើ គ្រួសារមិនយល់អំពីដំណើរការនេះ និងទទួលបានដំបូន្មានដ៏ច្បាស់លាស់​ទេ នៅពេលខ្លះ ពួកគេបោះបង់ចោល មុនពេលករណីរបស់ពួកគេទៅដល់ចំពោះ​​មុខចៅក្រម។” អ្នកស្រីសុភ័ក្រ្ត កំពុងធ្វើឲ្យប្រាកដថា បញ្ញាយល់​អំពី​ជំហាននីមួយៗ​នៃ​ដំណើរការ​ផ្លូវច្បាប់ និង​ដំណើរការរដ្ឋបាល និងធានាថា គាត់ទទួលបាន​ការពិគ្រោះយោលប់ផ្នែកច្បាប់ពីអ្នកឯកទេស ដែលធានាថាករណីនេះមានភាពរីកចម្រើនទៅមុខ។

ស្ថិរភាពហិរញ្ញវត្ថុសម្រាប់គ្រួសារក៏ជា​មូលដ្ឋានគ្រឹះ​សម្រាប់ការស្តារឲ្យមានភាពធូរស្បើយឡើងវិញផងដែរ។ ចាប់តាំងពីការប្ដឹង និងការចាប់ខ្លួនប្ដីរបស់គាត់ បញ្ញា​បានឈប់ធ្វើការងារនៅក្រៅផ្ទះ ដើម្បីមើលថែយ៉ាងដល់​ចំពោះកូនស្រីរបស់គាត់ និងបានចាប់ផ្ដើម​មុខរបរ​បោកសម្លៀកបំពាក់នៅផ្ទះ។ បើទោះបីជា​​មុខរបរ​បានប្រាក់មួយចំនួនក្ដី ប្រាក់ចំណូលនេះតិចជាង​ប្រាក់ចំណូលពីមុនរបស់គាត់។ ក្នុងអំឡុងពេលនៃ​អន្តរកាលនេះ អង្គការមិត្តសំទ្បាញ់​កំពុងផ្ដល់ប្រាក់ឧបត្ថម្ភបន្តិចបន្តួច និងជួយបញ្ញារៀបចំផែនការពង្រីកមុខរបររបស់គាត់។ នៅខណៈនេះដែរ អ្នកស្រីសុភ័ក្ត្រ ​កំពុងធ្វើការងារជាមួយបញ្ញា ដើម្បីពិនិត្យមើលថា តើគ្រួសារនេះមានលក្ខណៈសម្បត្តិ​ដើម្បីទទួលបានប័ណ្ណក្រីក្រដែរឬទេ ដើម្បីឲ្យពួកគេ​អាចចុះឈ្មោះ​នៅក្នុងកម្មវិធីឧបត្ថម្ភសាច់ប្រាក់​ជាតិ និងទទួលបាន​សេវាសង្គមចាំបាច់ពីរដ្ឋាភិបាល។ ប្រសិនបើពួកគេមានគ្រប់លក្ខណៈវិនិច្ឆ័យ​ទាំងអស់ អ្នកស្រីសុភ័ក្រ្ត នឹង​ជួយបញ្ញាបញ្ចប់ដំណើរការនេះ និងដាក់លិខិតស្នាមឲ្យបានត្រឹមត្រូវ។

ទាំងអ្នកស្រីលីកា និងទាំងសុភ័ក្រ្ត​ ​សប្បាយចិត្ត​ក្នុងការរាយការណ៍ថា បរិយាកាសគ្រួសារ​មានភាពប្រសើរឡើង​ច្រើន​នៅក្នុងរយៈពេលប៉ុន្មានខែចុងក្រោយនេះ។ នៅពេលអំឡុងពេលនៃការចុះសួរសុខទុក្ខរបស់អ្នកស្រីលីកា ប្អូនស្រីរចនា និយាយកាន់តែច្រើនជាមួយម្ដាយរបស់នាងនៅចន្លោះពេលរវាងការចុះសួរសុខទុក្ខ ហើយនាងបានចូលរៀនវិញ។ សំខាន់បំផុត នាងចាប់ផ្ដើមគិតអំពីអនាគតរបស់នាង។ នាងបានប្រាប់អ្នកស្រីលីកាថា “​ខ្ញុំចង់រៀនចប់ថ្នាក់វិទ្យាល័យរបស់ខ្ញុំណាស់ និងបន្តការសិក្សាបន្ថែមទៀត ដើម្បីក្លាយជាគ្រូបង្រៀន ឬវេជ្ជបណ្ឌិត ដើម្បីឲ្យ​ខ្ញុំ​អាចថែទាំ​គ្រួសាររបស់ខ្ញុំបាន។”

 


 

1 ឈ្មោះត្រូវបានផ្លាស់ប្ដូរ ដើម្បីការពារឯកជនភាពរបស់​ជនពាក់ព័ន្ធ

2 ឈ្មោះត្រូវបានផ្លាស់ប្ដូរ ដើម្បីការពារឯកជនភាពរបស់​ជនពាក់ព័ន្ធ