လူမှုရေးဆိုင်ရာမူဝါဒနှင့် ကလေးသူငယ်အခွင့်အရေးများ စောင့်ကြည့်မှု
ဆင်းရဲနွမ်းပါးမှုနှင့် ချို့တဲ့မှုအတွက် အထိအခိုက်လွယ်မှုကို လျှော့ချခြင်း
- ရရှိနိုင်ပါသည်:
- English
- မြန်မာ
စိန်ခေါ်မှု
ယူနီဆက်၏ အချက်အလက်များနှင့် သုတေသနများသည် ကလေးသူငယ်များ၊ မိသားစုများနှင့် လူမှုအသိုက်အဝန်းများအား ပံ့ပိုးရန် အစီအစဉ်များ စီမံရေးဆွဲ၊ အကောင်အထည်ဖော်ရာတွင် ခိုင်မာသည့်အကူအညီဖြစ်စေပါသည်။
မြန်မာနိုင်ငံတွင် ကျွန်ုပ်တို့သည် မိခင်နှင့် ကလေးကျန်းမာရေး၊ အာဟာရ၊ ပညာရေး၊ ရေ၊ သန့်ရှင်းရေးနှင့် ကလေးသူငယ်အခွင့်အရေးများအတွက် ရှိေနသည့် ကွာဟချက်များနှင့် တိုးတက်နိုင်သည့် အပိုင်းများကို ဖော်ထုတ်ရန် လုပ်ဆောင်ပါသည်။
မြန်မာနိုင်ငံရှိ ကလေးငယ်များနှင့် မိသားစုများစွာသည် ကျန်းမာရေးစောင့်ရှောက်မှု ကဲ့သို့သော အခြေခံ ၀န်ဆောင်မှုများကို ရရှိရန် ကြာရှည်စွာ ရင်ဆိုင်ပြီး ရုန်းကန်နေကြရသည်။ သိသာထင်ရှားသည့် ခြိမ်းခြောက်မှုတစ်ခုဖြစ်သော ကပ်ရောဂါသည် ဆင်းရဲနွမ်းပါးမှုကို မြင့်တက်စေပြီး ၀န်ဆောင်မှုများ ရရှိမှုကို လျော့ကျစေပါသည်။
၂၀၂၀ အစောပိုင်းတွင် ထုတ်ပြန်ခဲ့သော UNICEF ၏ အချက်အလက်များအရ
- မြန်မာနိုင်ငံရှိ ကလေးသူငယ်များ၏သုံးပုံတစ်ပုံခန့်သည် ဆင်းရဲသောအိမ်ထောင်စုများတွင် နေထိုင်ကြပါသည်။
- နောက်ထပ် ၃၄ ရာခိုင်နှုန်းသော ကလေးသူငယ်များသည် စီးပွားရေးအရ မလုံခြုံသော အိမ်ထောင်စုများတွင် နေထိုင်ကြပြီး စီးပွားရေး၊ ကျန်းမာရေး သို့မဟုတ် လူမှုရေး ထိခိုက်မှုများကြောင့် ဆင်းရဲနွမ်းပါးမှုတွင်းသို့ တွန်းပို့ခံရနိုင်ချေရှိပါသည်။
၂၀၂၁ ခုနှစ် ဖေဖော်ဝါရီ ၁ ရက်တွင် စစ်တပ်က အာဏာသိမ်းခြင်းသည် အကျပ်အတည်းကို ပိုမိုနက်ရှိုင်းစေခဲ့ပါသည်။ ကလေးသူငယ်များနှင့် အမျိုးသမီးများသည် ဆင်းရဲမွဲတေမှုနှင့် ဖယ်ထုတ်ခံရမှုများပြားလာခြင်းကြောင့် အပြင်းထန်ဆုံး ထိခိုက်ခံစားနေရသည်။ ၎င်းတို့ရဲ့ လိုအပ်ချက်များကိုဖြည့်ဆီးပေးရန်အရေးတကြီးလိုအပ်နေပါသည်။
- ယူနီဆက်၏ အချက်အလက်များအရ မသန်စွမ်းကလေးသူငယ်များ၏ အခွင့်အရေးအပါအ၀င် ကလေးသူငယ်များအနေဖြင့် လူ့အဖွဲ့အစည်းတွင် အပြည့်အ၀ပါဝင်ခွင့်နှင့် မွေးစာရင်းမှတ်ပုံတင်ခြင်း စသည့် အခွင့်အရေးများကို မြှင့်တင်ရန် လိုအပ်ကြောင်း အထောက်အထားများကို ဖော်ပြထားပါသည်။
- သိသာထင်ရှားသော တိုးတက်မှုများရှိနေသော်လည်း ငါးနှစ်အောက်ကလေးတစ်သန်း (၂၀ ရာခိုင်နှုန်းနီးပါး) သည် မွေးစာရင်းများကို မှတ်ပုံတင်ထားခြင်းမရှိပါ။
ဖြေရှင်းနည်း
COVID-19 ကပ်ရောဂါ၏အကျိုးဆက်များ၊ ကလေးသူငယ်များနှင့်မိသားစုများအပေါ် လက်ရှိအကျပ်အတည်းများက မည်ကဲ့သို့သက်ရောက်မှုများရှိနေမည်ကို ယူနီဆက်အနေဖြင့်လေ့လာစောင့်ကြည့်လျှက်ရှိပါသည်။ ကလေးများအား ဆင်းရဲနွမ်းပါးမှုနှင့် အထိအခိုက်လွယ်မှု၏ အဆိုးရွားဆုံးသက်ရောက်မှုများမှ ကာကွယ်နိုင်ရန်၊ မိသားစုများနှင့် ရပ်ရွာအသိုင်းအဝိုင်းအတွက် ဘေးဒဏ်ခံနိုင်စွမ်းရှိနိုင်မှုတို့အားပံ့ပိုးပေးနိုင်ရန် ကျွန်ုပ်တို့၏ ကြိုးပမ်းမှုများကို ယင်းအချက်အလက်များက အထောက်အကူပြုပါသည်။
လူသားချင်းစာနာထောက်ထားမှု လိုအပ်ချက်များကို ဖြည့်ဆည်းပေးခြင်း
ဤကိစ္စသည် လျင်မြန်စွာ ပြောင်းလဲနေသောလူသားချင်းစာနာထောက်ထားမှု ကဏ္ဍတစ်ခုဖြစ်ပြီး ကျွန်ုပ်တို့သည် နိုင်ငံတစ်ဝန်း၌ အသက် ၂ နှစ်မှ ၅ နှစ်အတွင်း မိန်းကလေးနှင့်ယောက်ျားလေးများ ၁၅၀,၀၀၀ နှင့် ငါးနှစ်အောက် မသန်စွမ်းကလေးသူငယ် ၇၅,၀၀၀ ကို ထောက်ပံ့ပေးရန်လျှာထားလုပ်ဆောင်နေပါသည်။ ဤလုပ်ငန်းအတွက် ချင်း၊ ကချင်၊ ကရင်၊ ရခိုင်နှင့် ရှမ်းပြည်နယ်၊ မန္တလေးနှင့် ရန်ကုန်တိုင်းဒေသကြီးများအား အဓိကဦးစားပေးအဖြစ် သတ်မှတ်အကောင်အထည်ဖော်သွားမည်ဖြစ်သည်။
မိတ်ဖက်များနှင့် ကျွန်ုပ်တို့သည် မိသားစု၀င်ငွေများကို ဖြည့်ဆည်းရန်နှင့် ကလေးသူငယ်များ၏ မရှိမဖြစ်လိုအပ်သောလူမှုရေး ၀န်ဆောင်မှုများရရှိရေး အပါအ၀င် အခြေခံလိုအပ်ချက်များအတွက် ဖြည့်စွက်ရန် ကလေးသူငယ်ငွေကြေးထောက်ပံ့မှုဆောင်ရွက်နိုင်ရန်ညှိနှိုင်းနေပါသည်။ရှေ့ပြေးကျန်းမာရေး အာမခံအစီအစဉ်
ယူနီဆက်သည် ကလေးသူငယ်များနှင့် ကိုယ်ဝန်ဆောင် အမျိုးသမီးများအတွက် အရေးပေါ် ကျန်းမာရေး အသေးစားအာမခံအစီအစဉ်ကို ရှေ့ပြေးစမ်းသပ်နေပါသည်။ စစ်အုပ်ချုပ်ရေးအောက်တွင် လက်ရှိ ရှိနေသော လှိုင်သာယာမြို့နယ်နှင့် ရွှေပြည်သာမြို့နယ်များတွင် ယာယီအခြေချနေထိုင်မှုတည်နေရာများတွင် ၂၀၂၁ ခုနှစ် ဧပြီလတွင် ပထမဆုံးစတင်ခဲ့ပါသည်။
ရည်ရွယ်ချက်မှာ အကျိုးခံစားခွင့်ရှိသူ ၁၀,၀၀၀ အား ကျန်းမာရေးအချက်အလက်များ၊ ဆေးကုသမှုဆိုင်ရာ ဆွေးနွေးမှုများ၊ ပြင်ပလူနာ လွှဲပြောင်းပေးခြင်းနှင့် ဆေးရုံတက်သည့် ကုန်ကျစရိတ်များပေးခြင်း ကို ၁၂ လတာစီမံကိန်း ကာလဖြင့် ရှေ.ပြေး၀န်ဆောင်မှုများလုပ်ဆောင်နေပါသည်။
ပိုမိုကောင်းမွန်သော ဘဝအခွင့်အလမ်းများအတွက် မှတ်ပုံတင်ခြင်း
၂၀၂၀ တွင် ယူနီဆက်သည် ကရင်ပြည်နယ်၊ ရန်ကုန်နှင့် ပဲခူးတိုင်းဒေသကြီးတို့တွင် မသန်စွမ်း ကလေးသူငယ် ၃၀၀,၀၀၀ အတွက် ရှေ့ပြေး မသန်စွမ်းမှတ်ပုံတင်ခြင်းနှင့် အသိအမှတ်ပြုခြင်း အစီအစဉ်ကို ပြုလုပ်ခဲ့ပါသည်။
ယူနီဆက်၏ ပံ့ပိုးမှုဖြင့် Vital Registration E-Platform ၌ ကလေး ၃.၃ သန်းကျော်၏ မွေးစာရင်းများကို ရာသက်ပန် မှတ်တမ်းတင်ထားခဲ့ပြီး ၎င်းတို့၏ ဘ၀ နောက်ပိုင်းတွင် ပိုမိုကာကွယ်မှု အခွင့်အလမ်းများ ပေးအပ်ခဲ့ပါသည်။
စိန်ခေါ်မှုများကို ဆက်လက်ရင်ဆိုင်နေရခြင်း
အကျပ်အတည်းကာလတွင် ယူနီဆက်သည် နိုင်ငံ၏ အထိအခိုက်လွယ်မှု အရှိဆုံးသော ကလေးသူငယ်များနှင့် ရပ်ရွာများအား ဆက်လက်ထောက်ပံ့ရန် သန္နိဋ္ဌာန်ချထားပါသည်။ မြန်မာနိုင်ငံတွင် တည်ငြိမ်အေးချမ်းချိန်နှင့် အကျပ်အတည်းရှိချိန် နှစ်ခုစလုံးတွင် ကျွန်ုပ်တို့ အလုပ်လုပ်သည့် အတွေ့အကြုံမှာ နှစ်ပေါင်း ၇၀ ရှိပါသည်။ ဆိုလိုသည်မှာ ကျွန်ုပ်တို့သည် ကျွန်ုပ်တို့၏ အစီအစဉ်များကို အလျင်အမြန် လိုက်လျောညီထွေဖြစ်အောင် ပြောင်းလဲနိုင်ပြီး ကျွန်ုပ်တို့၏ ကျယ်ပြန့်သော မိတ်ဖက်ကွန်ယက်များကို ရလဒ်များကို ထိထိရောက်ရောက်နှင့် အတိုင်းအတာတစ်ခုထိရောက်အောင် ဆောင်ရွက်နိုင်ပါသည်။
ဤပဏာမခြေလှမ်းများအားလုံးတွင် ယူနီဆက်သည် အလိုအပ်ဆုံးသော ကလေးသူငယ်များနှင့် ရပ်ရွာလူထုများအပေါ် အာရုံစိုက်နေဆဲဖြစ်ပါသည်။