តម្រូវការបន្ទាន់ដើម្បី​សុវត្ថិភាពចរាចរណ៍សម្រាប់កុមារ

ការវិវត្តន៍នានាដែលបានសង្គ្រោះជីវិត 

សូម្បី​តែ​ក្នុង​ពេល​មាន​វិបត្តិ​នេះក្តី កម្ពុជា​បង្ហាញ​ថា ​ការធ្វើសកម្មភាពត្រឹមត្រូវគឺ​បានសង្គ្រោះ​ជីវិត ។ ពីឆ្នាំ ២០២៣ ដល់ ២០២៤ គ្រោះថ្នាក់ចរាចរណ៍បានធ្លាក់ចុះ ១៤ ភាគរយ មកនៅត្រឹម ២.៨៤៤ ករណី ។ ករណីស្លាប់បានធ្លាក់ចុះ ៥ ភាគរយ មកត្រឹម ១.៥០៩ ករណី ។ អ្នករងគ្រោះថ្នាក់បាន​ធ្លាក់​ចុះចំនួន ១៧ ភាគរយ ​មក​នៅ​ត្រឹម ៣.៧២០ ករណី ។ 

វឌ្ឍនភាព​នេះ ​បង្ហាញ​ថា នៅ​ពេល​កម្ពុជា​ធ្វើ​សកម្មភាព ​កុមារ​នៅរស់រានមានជីវិត ។ ប៉ុន្តែយើងត្រូវតែស្វែងយល់ថាហេតុអ្វីបានជាកុមារនៅតែប្រឈមមុខនឹងគ្រោះថ្នាក់បែបនេះ ទើប​យើង​អាច​សង្គ្រោះ​ជីវិត​បាន​ច្រើន ។  

ហេតុអ្វីបានជាផ្លូវថ្នល់កម្ពុជា បង្កការស្លាប់ចំពោះកុមារ  

កម្ពុជា​មានការរីក​ចម្រើន​យ៉ាង​ឆាប់​រហ័ស ។ យានយន្តកាន់តែច្រើនមានពាសពេញផ្លូវ ដែលមិនត្រូវបានសាងសង់ឡើងសម្រាប់ចរាចរណ៍ដូចបច្ចុប្បន្ននេះទេ ។ ដោយសារ ៨៥ ភាគរយនៃយានជំនិះគឺជាម៉ូតូ​ (ខណៈដែលប្រទេសភាគច្រើនមានភាគរយយានជំនិះជាម៉ូតូទាបជាងនេះខ្លាំង) កុមារប្រឈមមុខនឹងគ្រោះថ្នាក់នេះច្រើនជាងគេ៖ 

• ចំណេះដឹងអំពីសុវត្ថិភាពមានកម្រិត មានន័យថា កុមារមិនអាចដឹងពីគ្រោះថ្នាក់ចរាចរណ៍ ឬការពារខ្លួនបានទេ ។
• ការប្រើប្រាស់ផ្លូវមិនបានត្រឹមត្រូវ មានន័យថាគ្មានទីកន្លែងសុវត្ថិភាពសម្រាប់មនុស្សដើម្បីដើរ ជិះកង់ ឬជិះម៉ូតូ ។
• ការគ្មានវិធានការសុវត្ថិភាពជុំវិញសាលារៀន ធ្វើឱ្យកុមារប្រឈមនឹងហានិភ័យខ្ពស់ ។
• ការមិនយកចិត្តទុកដាក់ប្រើមួកសុវត្ថិភាព ធ្វើឱ្យគ្មានការការពារចំពោះក្បាលរបស់កុមារនៅក្នុងប្រទេសដែលមានការប្រើប្រាស់ម៉ូតូច្រើនជាងមធ្យោបាយធ្វើដំណើរផ្សេងៗទៀត ។
• មនុស្សពេញវ័យដែលមិនយកចិត្តទុកដាក់ចំពោះវិធានការសុវត្ថិភាព ធ្វើឱ្យកុមារដែលពឹងផ្អែកលើពួកគេ ប្រឈមនឹងគ្រោះថ្នាក់ចរាចរណ៍ ។ 

បញ្ហានេះធ្វើឲ្យកុមារស្លាប់ សូម្បីពេលកំពុងដើរទៅសាលារៀន ។ ​ឥឡូវ កម្ពុជាកំពុងតែដាក់ចេញនូវ​ដំណោះស្រាយ​ដែល​អាច​សង្គ្រោះ​ជីវិត ។ 

ដំណោះស្រាយ​សុវត្ថិភាពចរាចរណ៍​របស់កម្ពុជា  

កិច្ចខិតខំប្រឹងប្រែងផ្នែកសុវត្ថិភាពចរាចរណ៍របស់កម្ពុជា ដឹកនាំដោយគណៈកម្មាធិការជាតិសុវត្ថិភាពចរាចរណ៍ផ្លូវគោក ក្រសួងសាធារណការ និងដឹកជញ្ជូន និងក្រសួង​ ព្រមទាំងស្ថាប័នផ្សេងៗទៀតរបស់រដ្ឋាភិបាល ដោយមានការគាំទ្រពីយូនីសេហ្វ ធ្វើការគ្រប់គ្រងវិបត្តិនេះតាមរយៈវិធានការណ៍មួយចំនួន៖ 

ដំណោះស្រាយទី ១ ៖ បង្រៀនជំនាញការពារជីវិត​ដល់គ្រប់គ្រួសារទាំងអស់ 

ចំណេះដឹងប្រែក្លាយផ្លូវថ្នល់ដែលមានគ្រោះថ្នាក់ ទៅជាកន្លែងដែលកាន់តែមានសុវត្ថិភាព ។ យុទ្ធនាការរបស់កម្ពុជា បង្រៀនកុមារ ឪពុកម្តាយ និងសហគមន៍តាមរយៈ ៖ 

• កម្មវិធីតំបន់សុវត្ថិភាពសាលារៀន ដែលធានាសុវត្ថិភាពចរាចរណ៍នៅជុំវិញតំបន់សាលារៀន ។
• ការអប់រំនៅនឹងកន្លែងផ្ទាល់ ដែលផ្តោតគោលដៅលើសហគមន៍សាលារៀន ដែលរួមមាន គ្រូ សិស្ស ឪពុកម្តាយ និងអាណាព្យាបាល ក៏ដូចជាអាជ្ញាធរមូលដ្ឋានដើម្បីឱ្យមានចំណេះដឹងកាន់តែប្រសើរឡើង និងផ្លាស់ប្តូរអាកប្បកិរិយាប្រកបដោយហានិភ័យរបស់ពួកគេ ។
• ការលើកកម្ពស់ការយល់ដឹង ដោយប្រើថ្នាលប្រព័ន្ធផ្សព្វផ្សាយសង្គម ដើម្បីបញ្ជូនសារ ។ 

ដំណោះស្រាយទី ២ ៖ បង្កើត​តំបន់សុវត្ថិភាពសាលារៀនដែលកុមារប្រមូលផ្តុំទីនោះ  

កម្ពុជា​ការពារ​កុមារ​នៅទី​កន្លែងណា​ដែល​ពួកគេ​ប្រមូលផ្តុំ​ច្រើន ។ វិធានការនានារួមមាន៖ 

• កំណត់ល្បឿន ៣០ គីឡូម៉ែត្រក្នុងមួយម៉ោងនៅតំបន់សាលារៀន ដោយមានការអនុវត្តយ៉ាងតឹងរ៉ឹងក្នុងអំឡុងពេលសិស្សចេញចូលសាលា ។
• គំនូសដើរឆ្លងផ្លូវច្បាស់ បរិក្ខារបន្ថយល្បឿន គំនូសផ្លូវ និងស្លាកសញ្ញាចរាចរណ៍នៅគ្រប់តំបន់សាលារៀន ។
• មានអ្នកត្រួតពិនិត្យសុវត្ថិភាពដែលមានទទួលការបណ្តុះបណ្តាល នៅតាមកន្លែងឆ្លងកាត់ផ្លូវ ដោយប្រើបុគ្គលិកសាលារៀន និងអ្នកស្ម័គ្រចិត្តក្នុងមូលដ្ឋាន ។  

ដំណោះស្រាយទី ៣ ៖ ពង្រឹង​ការអនុវត្តច្បាប់ចរាចរណ៍ផ្លូវគោគដែលការពារជីវិត 

ច្បាប់​រឹងមាំ ត្រូវការ​ការ​អនុវត្តឱ្យបាន​ខ្លាំងក្លា​ ។ កម្ពុជាជួយសង្គ្រោះជីវិតដោយអនុវត្តយ៉ាងសកម្មនូវបទប្បញ្ញត្តិសុវត្ថិភាពសំខាន់ៗបំផុតដូចជា ៖ 

• ការពាក់មួកសុវត្ថិភាពជាកាតព្វកិច្ចសម្រាប់អ្នកជិះម៉ូតូ ដោយមានការដាក់ពិន័យពិតប្រាកដចំពោះអ្នកដែលមិនគោរពតាមច្បាប់ ។
• គ្មានការអត់ឱនចំពោះការប្រើប្រាស់ទូរស័ព្ទពេលដើរ ពេលជិះកង់ ពេលជិះម៉ូតូ ឬបើកបរយានយន្ត ។
• ការអនុវត្តល្បឿនកំណត់យ៉ាងតឹងរឹងនៅក្នុងតំបន់សាលារៀន និងតំបន់លំនៅដ្ឋានដែលកុមាររស់នៅ និងលេង ។
• ការត្រួតពិនិត្យសុវត្ថិភាពជាប្រចាំ ដើម្បីធានាបានថា យានយន្តបំពេញតាមស្តង់ដារសុវត្ថិភាព​ ។
• ការដាក់ពិន័យភ្លាមៗចំពោះឥរិយាបថបើកបរប្រកបដោយគ្រោះថ្នាក់ ដែលបង្កហានិភ័យដល់កុមារ ។