Politika ara-tsosialy sy fitantanana volam-panjakana ho fanasoavana ny ankizy
Ny UNICEF dia manamafy ny fanekena noraisina, ny fanatontosana andraikitra ary ny fahafahan’ny firenena manao lalàna sy mandrafitra teti-bola, ho an'ny politika sosialy tsimialonjafy sy fitantanana ny volam-panjakana ho fanasoavana ny ankizy.
Ireo zava-tsarotra
Ny fampiasam-bola amin'ny sehatra ara-tsosialy dia misy fiantraikany amin'ny fianakaviana sy ny ankizy, ka izay no antony mahatonga azy hanampy amin'ny fampandrosoana ara-tsosialy, ara-toekarena ary ara- kolotsaina ao amin'ny firenena iray. Na izany aza, eto Madagasikara, ny tetibola natokana ho an’ny sehatry ny fahasalamana sy ny fanabeazana (amin'ny isanjaton'ny harin-karena faobe) dia tsy mbola mahatratra ny fetra mifanaraka amin’ny tolo-kevitra iraisam-pirenena, ho tombontsoan'ny fianakaviana sy ny ankizy. Tamin'ny taona 2017, ny teti-bola ho an'ny Ministeran'ny fahasalamana dia 6 isan-jaton'ny tetibolam-panjakana ary ny fampianarana dia 18 isan-jato.
Ankoatr'izay, ny 91 isan-jaton'ny mponina Malagasy dia miaina ambanin'ny fetran’ny fahantrana eto amin’ny firenena; any amin'ny faritra ianjadian’ny haintany dia mahatratra 98 isan-jato izany. Ny ankizy no anisan'ireo tena voakasik'izany, ka ankizy 4 ao anatin’ny 5 no miaina ao anatin’ny fahantrana ara-bola. Hahatratra 20 tapitrisa ny isan'ny ankizy hatramin'ny taona 2050. Ity fivoarana haingana ity dia mety ho tombony lehibe ara-demografika na fanamby lehibe ara-toekarena sy ara-tsosialy, raha toa ka tsy raisina ho laharam-pahamehana ny olana mahakasika ny ankizy.
Ny fanohanana ny politika ara-tsosialy sy ny fandresen-dahatra mirindra notanterahan’ireo mpisehatra ara-tsosialy samihafa dia ilaina mba hiatrehana ireo fanamby ireo.
Ireo hetsika notanterahan’ny UNICEF
Fandresen-dahatra momba ny fampiasam-bola amin'ny sehatra ara-tsosialy sy ny fangaraharana mikasika ny tetibolam-panjakana
Nanomboka tamin'ny taona 2016 dia nikarakara hetsika isan-karazany ny UNICEF mba hanatanterahana fandresen-dahatra mikendry ny fampiasam-bola amin'ny sehatra sosialy (fahasalamana, fanabeazana, sakafo ara-pahasalamana, fiahiana ara-tsosialy, rano ary fanadiovana) sy ny fahazoana tetibola mangarahara. Izany fangaraharahana izany dia hahafahana manaraka akaiky ny fitsinjarana sy ny fandaniam-bola ho an'ny sehatra ara-tsosialy sy ny ankizy, amin'ny alalàn’ny fiaraha-miasa amin'ny Tale Jeneralin'ny Tetibola ao amin'ny Minisiteran'ny Fitantanam-bola sy ny Tetibola. Ireo hetsika ireo dia ahitana ireto:
• Fanohanana ny famolavolana sy fampahalalana ny vahoaka momba ny tetibola ho an’ny daholobe ary fanaovana tatitra mikasika izany ho an’ny olom-pirenena;
• Fanohanana ny famolavolana sy ny fanapariahana fandaharana mikasika ny fangaraharan’ny tetibolam-panjakana;
• Famoronana sy fampandehanana tranonkala iray momba ny fangaraharan’ny tetibolam-panjakana;
• Fanohanana ny famokarana tatitra an-dahatsary mikasika ny fangaraharan’ny tetibolam-panjakana eto Madagasikara
Fanatevenam-pahaizana ho an’ireo mpiara-miombon'antoka eto an-toerana hanatsarana ny famolavolana ny tetibola ho an’ny sehatra ara-tsosialy
Ny UNICEF dia nikarakara fifanakalozan-dresaka ara-politika teo amin’ny mpiaramiombon’antoka eto an-toerana sy ny governemanta ary ny fiarahamonim-pirenena mba hahazoana tetibolam-panjakana mifanaraka amin'ny tanjona kendrena eo amin'ny sehatra samihafa (fahasalamana, fanabeazana, sakafo ara-pahasalamana, fiahiana ara-tsosialy, rano ary fanadiovana).
Ity fifanakalozan-dresaka ity dia manampy amin'ny fandraisana andraikitra sy ny fanatanterahana izany ary ny fampitomboana ny fahafahan'ny firenena manao lalàna, mandrindra ary mamolavola teti-bola ho an'ny politika ara-tsosialy tsimialonjafy.
Ny fampielezana ny tetibolam-panjakana mikasika ny sehatra ara-tsosialy eny anivon’ny fiarahamonim-pirenena, ny mpanao gazety ary ireo mpikambana amin'ny sehatra tsy miankina dia tafiditra ao anatin'ny fanatevenam-pahaizana izay nokarakarain’ny UNICEF.
