Fiaraha-miasa sy fifanarahan'ny sehatra tsy miankina sy ny fanjakana
Niditra an-tsehatra ny UNICEF mba hanampiana ny sehatra tsy miankina, entina mampiroborobo ny zon'ny ankizy sy mamolavola hetsika ho an'ny tontolo fampiasam-bola mifandraika amin'ny zon'ny ankizy
Ireo zava-tsarotra
Any Madagasikara dia 14 isan-jaton'ny tovovavy 15 ka hatramin'ny 19 taona no iharan'ny herisetra ara-nofo. Any amin'ny toerana be mpizahan-tany dia mijanona ho olana lehibe ny fitrandrahana ara-nofo. Araka ny fanadihadiana nataon'ny UNICEF, tany amin'ny toerana roa tena falehan’ny mpizahan-tany sy toerana fitrandrahana harena an-kibon'ny tany eto Madagasikara, dia 16 isan-jaton'ny ankizy no nanao firaisana ara-nofo voalohany an-katerena. Ao amin'ny tanànan'i Nosy Be, 40 isan-jaton'ny firaisana ara-nofo voalohany nataon'ireo tovovavy izay nohadihadiana dia nitranga tao anatin’ny tontolon'ny fivarotan-tena.
Ny fidirana an-tsehatra amin'ny fanohanana ny zon'ny ankizy izay tanterahin’ny sehatra tsy miankina dia mitarika fiantraikany tsara eo amin'ny fiaraha-monina ary hanampy amin'ny fiadiana amin'ireo herisetra sy fanararaotana isan-karazany, izay mihatra amin’ny ankizy.
Ny tsy fahampian'ny fahalalana sy ny tsy fanajana ny zon'ny ankizy eo anivon’ny sehatra tsy miankina sy ny tontolo manodidina azy iray manontolo dia mifamatotra amin'ny tsy fahampian'ny fanentanana sy ny fandraisana anjaran’ireo mpisehatra rehetra ao anatin’ny sehatra tsy miankina, ny governemanta ary ny fiarahamonim-pirenena. Ilaina noho izany ny manamafy ny fiaraha-miasa miaraka amina orinasa, mamantatra ny fahalemena eo amin'ny sehatra tsy miankina mikasika ny zon'ny ankizy, ary manatanteraka fandresen-dahatra mba hitondrana fiovana eo amin’ny fomba fanao sy ny politika ary ny lalàna manome vahana ny fanajana ny zon'ny ankizy.
Ireo hetsika notanterahan’ny UNICEF
Fanadihadiana mikasika ny toe-javatra momba ny ankizy any amin'ny sehatra manan-danja voalohany amin'ny fizahan-tany, ny fitrandrahana ary ny fandraharahana ara-pambolena
Ny UNICEF dia mikendry ny hanatanterahana fanadihadiana mikasika ny toe-javatra misy momba ny ankizy eo amin'ny sehatry ny fizahantany, fitrandrahana harena an-kibon'ny tany ary ny fandraharahana ara-pambolena.
Fiaraha-miasa mba hanamafisana ny fahafahan'ny sehatra tsy miankina manaja sy manohana ny zon'ny ankizy
Raisin’ny UNICEF ho laharam-pahamehana ny fanatevenam-pahaizana sy fanamafisana fahaiza-manao ho an’ny sehatra tsy miankina, mba hanatsarana sy hanamafisana ny politikam-pitantanana orinasa, ny fomba fanao ary ny fihetsik'ireo tompon’andraikitra voalohany eny anivon’ny orin’asa. Anisan’ny tanjona amin’izany ihany koa ny hamolavolana – miaraka amin'ireo mpiara-miombon'antoky ny fanjakana – hetsika izay ilaina amin'ny fametrahana tontolo fampiasam-bola, hahafahana manaja sy manohana ny zon'ny ankizy. Ireo fitaovana naroso tao anatin’ny Fitsipika mitari-dalana momba ny zon'ny zaza sy ny orinasa (PDEE) dia manasa ireo mpandraharaha ara-toekarena rehetra mba hanatanteraka hetsika maromaro hahafahana manaja, manohana ary mampiroborobo ny zon'ny ankizy.
Mpisehatra ao anatin’ny sehatry ny fizahantany, fitrandrahana ary ny teknolojian'ny fampahalalana, serasera ary ny fandraharahana ara-pambolena, miisa 97 no nahazo fiofanana mikasika ny fitsipika mitari-dalana momba ny fanajana ny zon'ny zaza.
Hatramin'ny fiandohan'ny taona 2018 dia mpandray anjara mavitrika miisa 50 avy amin'ny sehatra tsy miankina no namaritra politika izay mifanaraka amin'ny fitsipika mitari-dalana momba ny fanajana ny zon'ny ankizy.
Ny fiaraha-miasan’ny sehatra tsy miankina sy ny fanjakana dia mety hisy fiantraikany amin'ny fitondratenan'ny orinasa ary mety hamporisika ihany koa ny fanohanana ireo tetik’asa eo amin'ny sehatry ny fitrandrahana sy ny fizahantany indrindra indrindra.
Fiaraha-miasa entina mampiasa ireo fitaovana sy fahaiza-manao fototra ananan’ny sehatra tsy miankina mba hanohanana ireo fandaharan’asan’ny UNICEF
Ny UNICEF dia manentana ny sehatra tsy miankina mba hiditra an-tsehatra amin'ny fanatanterahana ireo fandaharan'asany. Amin’ny trangana hain-tany, rivo-doza ary tondra-drano, ny fanentanana izay nataon’ny UNICEF dia nahafahana nanatanteraka fifanarahana fiaraha-miasa amin'ny Fondation TELMA ho fanohanana fianakaviana miisa 10 930 lasibatran’ny voina voajanahary. Najoro ihany koa ny fiaraha-miasa niaraka tamin'ny Airtel Madagascar entina manatanteraka ilay tetik’asa mikasika ny fandefasana vola "Let us Learn". Ny fiaraha-miasa miaraka amin'i Galana dia fanoitra iray hahafahana mahazo fitaovana ilaina amin’ny fanabeazana sy fiahiana ara-tsosialy.
Tamin'ny fiatrehana ny pesta, ny UNICEF dia nanamora ny fifanarahana nataon’i Ambatovy sy Vitafoam (orinasa mpanamboatra kidoro) niaraka tamin'ny Minisiteran'ny fahasalamana.
Tamin'ny taona 2017, ny fifanarahana niaraka tamin'ny sehatra tsy miankina dia nahafahana nahazo fanoitra mitentina $190,000 ka ankizy miisa 70 000 sy fianakaviana 23 000 lasibatry ny krizy no afaka nisitraka izany.
Nohamafisina ny fandresen-dahatra sy fanabeazana eo anivon’ireo mpisehatra manam-pahefana, entina mampiroborobo sy manohana ary miantoka ny fanajana ny zon'ny ankizy
Tamin'ny taona 2017, ny UNICEF dia nametraka fiaraha-miasa niaraka tamin'ny Ministera misahana ny sehatra tsy miankina mba hampiroboroboana ny fitsipika mitari-dalana momba ny fanajana ny zon'ny ankizy. Tao anatin’ireo ezaka mifandraika amin’ny fiarovana izany zon’ny ankizy izany, ny UNICEF – nanomboka ny taona 2016 – dia nanohana ny fikarakarana ny forum nasionaly avo lenta mikasika ny Tanjon’ny Fampandrosoana maharitra sy ny andraikitra ara-tsosialin’ireo orin’asa. Nandray anjara tamin’izany ny solontena miisa 600 avy amin’ny sehatra tsy miankina, ny fiarahamonim-pirenena, ny governemanta ary ireo mpiaramiombon’antoka ara-teknika sy ara-bola.
