ЮНИСЕФ RES 2026 EXPO көрмесінде климатқа төзімді білім беруді іс жүзінде көрсететін «Болашақ мектебі» павильонын таныстырды

АСТАНА, 2026 жылғы 22 сәуір — Бүгін ЮНИСЕФ «RES 2026 EXPO» Халықаралық жасыл технологиялар және орнықты шешімдер көрмесінде «School of the Future» («Болашақ мектебі») интерактивті павильонын таныстырды. Павильон Орталық Азия елдеріндегі балалардың оқу жағдайын жақсартуға және климаттық іс-қимылдарды қолдауға бағытталған климатқа бағдарланған білім беру тәсілдерін паш етеді.

Өңірдегі балалар аномальді ыстық, су тапшылығы және ауаның ластануы сияқты күшейіп келе жатқан климаттық қысымға тап болуда. Сонымен қатар, көптеген мектептер экстремалды ауа райы құбылыстары мен климаттың өзгеруінің ұзақ мерзімді салдарлары жағдайында қиындықтарға кезігуде. «Жасыл мектептер» өңірлік платформасы аясында әзірленген «School of the Future» павильоны мектептердің қалай қауіпсіз, төзімді және экологиялық кеңістікке айнала алатыны туралы балаға бағдарланған пайымды ұсынады. Бұл ретте ол балалар мен жастардың бойында «жасыл» жаққа өту кезеңіне қажетті білім мен дағдыларды қалыптастыруды көздейді. 

Иммерсивті білім беру ортасы ретінде құрылған павильон күрделі саяси тәсілдерді нақты өмірде қолдануға болатын және ауқымын кеңейтуге жарамды практикалық шешімдерге айналдырады. Ол сыныптардан бастап мектеп аулаларына дейінгі күнделікті мектеп кеңістігінің климатқа төзімділікті, экологиялық хабардарлықты және орнықты дамуды арттыруға қалай үлес қоса алатынын көрсетеді.

Келушілер климатқа бағдарланған мектептердің негізгі компоненттерін бейнелейтін бірқатар тақырыптық аймақтарды аралай алады. Олардың қатарында күн панельдері мен зияткерлік жарықтандыру жүйелері сияқты энергия тиімді шешімдер, су үнемдеу технологиялары, үй-жайлардағы ауа сапасын жақсарту және климатқа бейімделген инфрақұрылым, сондай-ақ қалдықтарды басқару мен қайта өңдеудің практикалық тәсілдері бар.

Павильон сонымен қатар мектептердің «тірі зертхана» ретіндегі рөлін ерекше атап өтеді. Мұнда балалар тек оқулықтар арқылы ғана емес, қоршаған ортамен өзара әрекеттесу арқылы да білім алады. Интерактивті элементтер қалдықтарды сұрыптау, энергияны ұтымды пайдалану және ресурстарды үнемдеу сияқты орнықты тәжірибелердің күнделікті мектеп өміріне қалай енгізілетінін және өмір бойы сақталатын мінез-құлық дағдыларын қалай қалыптастыратынын көрсетеді.

Жеке бөлім қауіпсіз және орнықты ұтқырлыққа арналған. Онда мектеп көлік жүйелері, қауіпсіз бағыттар және зиянды шығарындыларды азайту балалар үшін сау қоршаған ортаны қалай қалыптастыратыны көрсетілген. Мысалы, электрлі мектеп автобустары көміртегі шығарындыларын азайтуға мүмкіндік берсе, қауіпсіз жаяу жүргіншілер мен велосипед инфрақұрылымы балалардың қауіпсіздігі мен әл-ауқатын арттырады.

Сонымен қатар, павильон жасыл аймақтар мен биоалуантүрліліктің маңыздылығына, соның ішінде үлгілі мектеп бақтары мен білім алуға да, климаттың өзгеруіне бейімделуге де ықпал ететін табиғатқа негізделген шешімдерге назар аударады. Бұл элементтер мектептердің қоғамдық экологиялық белсенділік пен төзімділіктің орталығына қалай айнала алатынын паш етеді.

«Біз осы жерден көріп отырған шешімдер — жай ғана дерексіз тұжырымдамалар емес, бұл мектептердің жұмысы мен балалардың оқу процесін түбегейлі өзгерте алатын практикалық және ауқымын кеңейтуге болатын тәсілдер», — деп атап өтті ЮНИСЕФ-тің Еуропа және Орталық Азия елдері бойынша Өңірлік директорының міндетін атқарушы Октавиан Бивол. — «Осы элементтерді біріктіре отырып, «School of the Future» білім беру жүйелерінің климаттық тәуекелдерге қалай жауап бере алатынын және балалардың өзгерістер агентіне айналуына қалай мүмкіндік беретінін көрсетеді».

Павильон Орталық Азия елдеріне білім беру жүйелерін «жасылдандыруды» жеделдетуге қолдау көрсетуге бағытталған өңірлік ынтымақтастық механизмі — «Жасыл мектептер» өңірлік платформасымен (RGSP) тығыз байланысты. Платформа климаттық білім беруді, орнықты инфрақұрылымды, жастардың қатысуын, сондай-ақ өңірдегі басқару және қаржыландыру жүйелерін нығайтуды ілгерілетеді.

RGSP сияқты бастамалар арқылы ЮНИСЕФ әрбір баланың қауіпсіз, сау және орнықты ортада білім алуын қамтамасыз етуге ұмтыла отырып, климаттық міндеттемелерді практикалық іс-қимылдарға айналдыруда үкіметтерге қолдау көрсетуді жалғастыруда.