«NINETY ONE» тобының қатысушылары ЮНИСЕФ-тің Қазақстандағы ізгі ниет елшілері болды

АЛМАТЫ, 16 мамыр 2023 ж. – 1 маусымда Қазақстанда атап өтілетін балаларды қорғау күні қарсаңында БҰҰ Балалар Қоры (ЮНИСЕФ) танымал «NINETY ONE» Q-Pop тобының қатысушыларын ЮНИСЕФ-тің Қазақстандағы ізгі ниет елшілері ретінде тағайындауын жариялады. «NINETY ONE» мүшелері өз дауыстары мен атақ-даңқының арқасында балалардың құқықтарын қорғау және ілгерілетумен айналысатын әлемдегі басқа атақты адамдардың қатарына қосылды.

«NINETY ONE» тобы ұлттық музыкалық чарттарда бірінші орынға ие және Қазақстандағы және одан тыс жерлердегі ең танымал музыкалық ұжымдардың бірі болып табылады. Топтың атауы 1991 жылды, яғни Қазақстанның өз тәуелсіздігін алған жылын білдіреді. Осылайша, топ Қазақстанда жаңа тәуелсіз музыкалық жанрдың - әлеуметтік желілердің арқасында миллиондардың махаббатына ие болған Q-Pop-тың дүниеге келуін бейнелейді. «NINETY ONE» мүшелері тек талантты вокалисттер, орындаушылар мен бишілер ғана емес, олар барлық әндерінің сөздері мен музыкасының авторлары. ЮНИСЕФ сияқты, олар жастардың дауысы естілу керек деп санайды және олардың музыкасының арқасында олар бұған жетуге тырысады. «NINETY ONE» қатысушылары жастардың ой еркіндігі мен ақыл-ой әл-ауқатының маңыздылығының белсенді жақтаушылары болып табылады. Олар өз әндерінде ел жастарын өзін-өзі дамытуға және әр адамның бойындағы бірегейлікті түсінуге шақырады.

«Қазақстандағы ЮНИСЕФ-тің ізгі ниет елшісі болу біз үшін үлкен мәртебе. ЮНИСЕФ тек біздің елде ғана емес, бүкіл әлемде үлкен жұмыс атқаруда және біз мұндай жұмысқа қолдау көрсету мүмкіндігіне ие болғанымызға өте қуаныштымыз. Музыка адамдарды біріктіреді және біздің музыкамыздың көмегімен біз адамдардың жүрегі мен санасына жетіп, Қазақстандағы балалардың алдында тұрған аса маңызды мәселелер туралы хабардарлықты арттыра аламыз деп үміттенеміз», - деді «NINETY ONE» тобының мүшесі Ace.

 

«ЮНИСЕФ-тің бір бөлігі болу да үлкен жауапкершілік. Біз ЮНИСЕФ - тің үмітін ақтап, балалар мен жастарды тыңдауға және олардың өміріне әсер ететін шешімдерге қатысуға мүмкіндік береміз деп үміттенеміз», - деді «NINETY ONE» тобының мүшесі ZAQ.

Өткен жылы «NINETY ONE» тобы ЮНИСЕФ пен TikTok-тың «Психикалық әл-ауқат бәрінен маңызды» атты бірлескен науқанын қолдады. Олардың қолдауының арқасында 100 000-нан астам жастар психикалық денсаулық туралы маңызды ақпарат алды.

«Өз жанкүйерлеріміздің арқасында біз жасөспірімдер мен жастардың қажеттіліктері мен ұмтылыстарын түсінеміз. Әндеріміздің көмегімен біз оларды игі істерге шабыттандыруға тырысамыз. Біз олардың жаңа нәрселерден қорықпағанын және өздеріне сенгенін қалаймыз. Енді біз ЮНИСЕФ-пен күш-жігерімізді біріктіреміз, осылайша әр баланың өз арманын жүзеге асыруға мүмкіндігі болады», - деп Alem атап өтті.

«Біз буллингтің қандай болатынын білеміз және сіз туралы қоғамдық пікір тек сіздің сыртқы келбетіңізге байланысты қалыптасады. Біз буллингті жеңудің қаншалықты қиын екенін білеміз. Енді бізде ЮНИСЕФ бағдарламаларын қолдауға және балаларға осы қиындықтарды жеңуге көмектесуге мүмкіндігіміз бар», - деді Bala.

ЮНИСЕФ-тің Қазақстандағы ізгі ниет елшілері ретінде «NINETY ONE» балалар онлайн және офлайн режимінде кездестіретін түрлі мәселелер туралы қоғамның хабардарлығын арттыруға көмектеседі. Бұл ретте, Интернеттегі психикалық денсаулық пен қауіпсіздік мәселесіне ерекше назар аударылатын болады. Музыкалық ұжымның қатысушылары өз алаңдарын медиада балалардың құқықтарын қорғау ісінде пайдаланатын болады және олар арқылы жастарға әсер ететін мәселелерге назар аударатын болады.

Елімізде әрбір баланың игілігі үшін жүргізіліп жатқан отыз жылға жуық жұмысы барысында Қазақстандағы ЮНИСЕФ өнер, спорт және музыка әлемінің көрнекті қайраткерлерімен ынтымақтастық дәстүрге ие. Көрнекті музыкант және композитор Батырхан Шүкенов ЮНИСЕФ-тің Қазақстандағы алғашқы ізгі ниет елшісі болды. Әлемдегі ең үздік он шахматшының бірі Динара Сәдуақасова бес жыл бойы Қазақстандағы ЮНИСЕФ бастамаларын белсенді қолдап келеді.

ЮНИСЕФ-тің Қазақстандағы өкілі Артур Ван Дизен тағайындау туралы жариялаған кезінде: «Музыка адамдарға үміт береді. «NINETY ONE» - бұл жастар арасында өте танымал қазақстандық әртістердің жаңа буыны. Біз ұқсас құндылықтармен бөлісеміз және олар ЮНИСЕФ-тің керемет ізгі ниет елшілері болатынына сенімдімін».

Бүкіл әлемде ЮНИСЕФ 200-ге жуық ізгі ниет елшілерімен ынтымақтасады. Мұндай ынтымақтастық балалар мен әйелдердің құқықтары туралы, сондай-ақ осы құқықтарды қорғауға және ілгерілетуге байланысты ЮНИСЕФ қызметі туралы қоғамның хабардарлығын арттыруға бағытталған. ЮНИСЕФ-тің 50 жылға жуық уақытқа созылған танымал адамдармен ынтымақтастығы балалардың мүдделері үшін мемлекеттік саясатқа оң әсер етуге, бүкіл әлемдегі балалардың мәселелеріне қоғамның назарын аударуға және ЮНИСЕФ қолдайтын бағдарламаларды жүзеге асыру үшін қаражат жинауға көмектеседі. Халықаралық, аймақтық және ұлттық деңгейдегі елшілер ЮНИСЕФ-тің ең танымал тұлғаларының бірі болып табылады. Өнер, музыка, кино, спорт және басқа да салалардың көрнекті қайраткерлері бола отырып, олар бүкіл әлемдегі балалардың алдында тұрған мәселелерді шешуде маңызды рөл атқарады. Елшілер ЮНИСЕФ-ке балалар мен жасөспірімдердің ең осал санаттарына көмектесуге және оларға үміт ұялатуға көмектесу арқылы халықтың хабардарлығын арттыру және қолдау көрсету үшін өз уақыттарын ерікті түрде құрбан етеді.