«Балалар батырлары»: Елордада ЮНИСЕФ фотокөрмесі ашылды

Көрме ЮНИСЕФ-тің 75 жылдығына арналған

31 Наурыз 2022
Heroes of Children general banner
UNICEF Kazakhstan/2022/Ospan Ali

НҰР-СҰЛТАН, 1 cәуір 2022 жыл - Бүгін Елордада Қазақстандағы ЮНИСЕФ Өкілдігінің ұйымдастыруымен әлемде ЮНИСЕФ-тің жұмыс істей бастағанына 75 жыл толуына орай және Қазақстандағы Балалар жылына арналған фотокөрме ашылды. Экспозиция «Балалар батырлары» (Heroes of Children) деп аталады және ЮНИСЕФ-пен бірлесіп, балалардың құқықтарын қорғау, ілгерілету және сақтау, сондай-ақ Қазақстандағы әрбір баланы тең мүмкіндіктермен қамтамасыз ету жолында аянбай еңбек етіп жүрген 30 адамның портреттері мен оқиғалары ұсынылған. Көрме кейіпкерлерінің арасында өмірлік қиын жағдайдағы аса ұрымтал балалар мен отбасыларды қолдау үшін ЮНИСЕФ-пен күш біріктірген мұғалімдерді, дәрігерлерді, жастарды, ғалымдарды, еріктілерді және қоғам белсенділерін кездестіруге болады. Олар біздің арамызда өмір сүреді және күн сайын әрбір баланың бақытты балалық шаққа құқығы болуы үшін еңбек етеді.

Көрмеге портреттері қойылған батырлар – күн сайын балалардың игілігі үшін еңбек етіп жүрген жүздеген, мыңдаған адамдардың бір бөлшегі ғана. Осы көрменің көмегімен ЮНИСЕФ бала құқықтарын насихаттайтын және қорғайтын әрбір және барлық адамдардың жұмысын дәріптегісі келеді.

Экспозиция кураторы – белгілі қазақстандық фотограф Оспан Әли.

«Мен ЮНИСЕФ-пен бірлесіп жұмыс істеу мүмкіндігіне ие болғаныма қуандым. 75 жыл бойы осы ұйым бүкіл әлемде жұмыс істеп келеді. Кейіпкерлеріміздің фотосуреттері мен оқиғалары арқылы біз ЮНИСЕФ-тің Қазақстандағы жұмысы, Қордың серіктестермен бірлесіп балаларға көрсетіп жатқан көмегі туралы айтып береміз. Мен үшін әр кейіпкердің балаларды қорғауға қосқан үлесін авторлық портрет арқылы жеткізуге тырысу ерекше маңызды болды. Жастармен жұмыс жасау, олардың жобалары мен жалынды жанарларын көру аса қызықты болды. Жасына қарамастан, олар ̶ қазірдің өзінде қатарластары үшін керемет үлгі. ЮНИСЕФ жобаларына қатысу олар үшін үлкен мүмкіндіктер ашады», - деді көрме туралы Оспан Әли.

Солардың ішінде ЮНИСЕФ жобасына қатысқан соң, мүгедектер арбасына таңылған адамдарға арналған электросамокат құрастырған Эльдар Гребневті атап өтуге болады. Сондай-ақ ауаны тазартатын сүзгіні жасаушы – алматылық талантты жасөспірім Даниил Ким бар. Көрмеде сонымен қатар UniSat жобасының басқа қатысушыларымен бірге былтырғы жылы стратосфераға өзінің алғашқы наносерігін ұшырған алматылық мектептің математика және информатика мұғалімі Лейла Марденованың портретін де көруге болады.

Дәрігер, психолог, иммунолог, әлеуметтік қызметкер, педиатр, еріктілер – фотокөрменің барлық осы кейіпкерлері қазақстандық балалардың бақытты да салауатты болашағына өз үлестерін қосудан танбай, көпшілікке үлгі болып жүр.

«ЮНИСЕФ 75 жыл бұрын күллі әлем Екінші дүниежүзілік соғыстан кейін қирандыларда жатқанда құрылды. Сол кезде де, қазір де ұйымның алдына қойылған басты міндет әрбір баланың құқықтарын қорғау болды және солай болып қала береді. Бүгінгі әлем көптеген дағдарыстармен бетпе-бет келіп жатыр - пандемия, климаттың өзгеруі, кедейлік және теңсіздік. Солардың барлығы адамға теріс әсер етеді, бірақ бәрінен де аса ұрымтал балаларға тиетін соққы ауыр. Сондықтан, біз бұрынғыдай денсаулық сақтау және әл-ауқат жүйелерін құруға және нығайтуға, аурулармен күресуге, аса маңызды әлеуметтік қызметтер көрсетуге, білім мен біліктілікті арттыру бағдарламаларын іске асыруға және барлық балалар мен олардың отбасылары үшін қауіпсіз орта құруға көмектесу үшін жұмыс жасауды жалғастырамыз. Сол жұмыстың барлығы біздің серіктестерімізсіз, аса маңызды жобаларды қолдайтын, алдыңғы шепке шығып, сынаққа төтеп беруге дайын адамдарсыз мүмкін болмас еді. 75 жылға бойлаған тарихымыз – балалар үшін бас біріктірген адамдар шабыт берген үздіксіз өзгерістер тарихы. Осы көрме арқылы біз барлық серіктестерімізге, жақтастарымызға және қызметкерлерімізге тарихымызды баянды еткені үшін шын жүректен алғыс айтамыз. Әрқашан қолдау көрсетіп жүретіндеріңіңз үшін рахмет!» – деді Қазақстандағы ЮНИСЕФ өкілі Артур ван Дизен.

Көрме 1 сәуірден 14 сәуір аралығында Нұр-Сұлтандағы «Mega Silk Way» сауда орталығының бірінші қабатында өтеді. 

 

Редакторларға арналған ақпарат 

Барлық кейіпкерлердің оқиғалары сілтеме арқылы қолжетімді.

Медиа байланыс

Эльвира Яушева
Қоғаммен байланыс жөніндегі бөлім басшысы
ЮНИСЕФ
Тел: +7 778 021 19 12

ЮНИСЕФ ТУРАЛЫ

ЮНИСЕФ әрбір баланың құқықтары мен аман-саулығын қамтамасыз ету үшін жұмыс істейді. ЮНИСЕФ серіктестерімен бірге 190 елде және аумақта тұрмысы мүшкіл және оқшау қалған балаларды қамтуға ерекше назар аудара отырып, әлемнің түкпір-түкпірінде балалардың игілігі үшін өз міндеттемелерін орындау үшін жұмыс жасайды.

ЮНИСЕФ жұмысы туралы толығырақ ақпарат веб-сайтта: www.unicef.org.

InstagramFacebook және Twitter желілеріндегі парақшаларымызға жазылыңыздар. 

 

UniSat жобасы

UniSat – ЮНИСЕФ және әл-Фараби атындағы ҚазҰУ КеАҚ ұйымдарының бірлескен білім беру бағдарламасы. 2020 жылы осы бағдарлама аясында 20 қыз бала наносерік жасап, стратосфераға шығарды. Ұшырылған наносеріктер Жерді суретке түсіріп, радиация, қысым, гравитация, жарық пен газ құрамы туралы мәліметтер жинады? Аталмыш мәліметтерді ғалымдар жіті талдайтын болады.

2021 жылы Dubai Cares қолдауымен ЮНИСЕФ және әл-Фараби атындағы ҚазҰУ Қазақстанның барлық өңірлерін қамтуға және көбірек адамдарды оқытуға мүмкіндік берген онлайн-курс ашты. Курста бағдарламаға қатысушылар ғарыш кемесін құрастырудың маңызды кезеңдерін: жобалауды, дизайнды, бағдарламалауды, құрастыруды, сынақтан өткізуді және ұшыруды меңгерді.

UniSat бағдарламасының мақсаты – қыздардың наносеріктер жасау саласындағы білімдері мен құзыреттерін дамыту, сондай-ақ ұжымда жұмыс істеу, шешендік өнер, тайм-менеджмент және шығармашылық жасампаздық сияқты дағдыларды жетілдіру.

 

Samgau UPSHIFT бағдарламасы

Қазақстан Республикасы Еңбек және халықты әлеуметтік қорғау министрлігі (ЕХӘҚМ) және БҰҰ Балалар қорының (ЮНИСЕФ) қолдауымен «Жастар қызметкерлері қоғамдастығы» қоғамдық бірлестігі 2020 жылдың желтоқсан айынан бастап озық эксперименталды оқытуды әдістерін қолдана отырып, жасөспірімдер мен жастар арасында әлеуметтік кәсіпкерлік дағдыларын нығайту жөніндегі SAMGAU (UPSHIFT) бағдарламасын жүзеге асырып жатыр. Халықтың осал топтарына (АИТВ және басқа да созылмалы аурулары бар, мүгедектігі бар, ата-анасының қамқорлығынсыз қалған жастарға) ерекше назар аударылады. ЮНИСЕФ инновациялық зертханасының алдыңғы қатарлы бастамасы болып табылатын UPSHIFT әдістемесін пайдалана отырып, бағдарлама жастарды дамытудың, жастардың әлеуметтік инновациялар және кәсіпкерлік саласын игеруінің озық тәжірибелерін біріктіреді.