ទឹកស្អាត និងអនាម័យ

កម្មវិធី WASH និងកម្មវិធីអាកាសធាតុ និងបរិស្ថាន​សម្រាប់ឆ្នាំ ២០២៤-២០២៨ របស់យូនីសេហ្វធ្វើការឆ្ពោះទៅរកការសម្រេចបានសិទ្ធិរបស់កុមារក្នុងការទទួលបានទឹកស្អាត អនាម័យបរិស្ថាន និងអនាម័យខ្លួនប្រាណ ដូចមានចែងក្នុងអនុសញ្ញាអង្គការសហប្រជាជាតិស្តីពីសិទ្ធិកុមារ (UNCRC) និងគោលដៅអភិវឌ្ឍន៍ប្រកបដោយចីរភាព (SDG) ដើម្បីសម្រេចបានការទទួលបានទឹកផឹក និងអនាម័យដែលត្រូវបានគ្រប់គ្រងដោយសុវត្ថិភាព ត្រឹមឆ្នាំ ២០៣០ ។

យូនីសេហ្វ សហការណ៍ជាមួយរាជរដ្ឋាភិបាលកម្ពុជា និងដៃពាក់ព័ន្ធ ដើម្បីបង្កើនលទ្ធភាពទទួលបានទឹកស្អាត និងអនាម័យ ដល់កុមារ ដែលមិនទាន់ទទួលបានសេវាគ្រប់គ្រាន់ ហើយ ពួកគេរស់នៅក្នុង សហគមន៍ មានភាពក្រីក្រ មានទីតាំងភូមិសាស្រ្តដាច់ស្រយាលឬ ក៏ជាក្រុមរងគ្រោះខ្លាំង និងជាក្រុមរស់នៅក្នុងតំបន់ដែលប្រឈមនឹងហានិភ័យខ្លាំងបំផុតពីការប្រែប្រួលអាកាសធាតុ ។ យូនីសេហ្វ ផ្តោតលើសេវាកម្មដែលមានភាពធន់នឹងអាកាសធាតុ ដើម្បីធានាថា សហគមន៍ត្រៀមខ្លួនកាន់តែប្រសើរសម្រាប់អនាគត បង្កើតផលជះយូរអង្វែង​ដែលការពារជនងាយរងគ្រោះបំផុត និងរួមចំណែកដល់ការអភិវឌ្ឍប្រទេសជាតិប្រកបដោយចីរភាព ។

យើងជឿជាក់ថា កិច្ចខិតខំប្រឹងប្រែងដើម្បីធានានិរន្តរភាពភពផែនដីដែលអាចរស់នៅបាន មិនត្រឹមតែគិតពីតម្រូវការពិសេស និងភាពងាយរងគ្រោះរបស់យុវវ័យប៉ុណ្ណោះទេ ប៉ុន្តែក៏ត្រូវតែដាក់បញ្ចូលពួកគេនៅក្នុងដំណោះស្រាយផងដែរ ។ កុមារ និងយុវជនមានជំនាញ បទពិសោធន៍ និងគំនិតសំខាន់ៗដើម្បីរួមចំណែកដល់សង្គមមួយដែលកាន់តែមានសុវត្ថិភាព និងនិរន្តរភាពថែមទៀត ។

ជំរុញការទទួលបានទឹកស្អាត អនាម័យដែលធន់នឹងអាកាសធាតុ

យើងធ្វើការដើម្បីធានាឱ្យមានប្រពន្ធ័ អនាម័យជាមូលដ្ឋាន កាន់តែប្រសើរក្នុង ផ្ទះ សាលារៀន និងមូលដ្ឋានថែទាំសុខភាព ដើម្បីឱ្យកុមារអាចរស់នៅ រៀនសូត្រ និងទទួលបានសេវាសុខភាពក្នុងបរិយាកាសដែលកាន់តែមានសុវត្ថិភាពថែមទៀត ។ ការកែលម្អប្រភពទឹក និងបង្កើតនូវប្រភពទឹកថ្មីផ្សេងៗបន្ថែមដែលធន់នឹងមុខសញ្ញាគ្រោះថ្នាក់នានា ដូចជាគ្រោះរាំងស្ងួត និងទឹកជំនន់ គឺមានសារៈសំខាន់ខ្លាំងណាស់ដើម្បីធានាថា ក្រុមដែលងាយរងគ្រោះបំផុត ត្រូវបានការពារក្នុងអំឡុងពេលមានវិបត្តិអាកាសធាតុ ។ កិច្ចការងាររបស់យូនីសេហ្វ អាចទទួលបានសមិទ្ធផលបាន គឺមានការចូលរួមពីវិស័យឯកជន និងអាជ្ញាធរមូលដ្ឋាន ដើម្បីកែលម្អគុណភាពសេវាកម្ម និងបង្កើតដំណោះស្រាយអាជីវកម្មប្រកបដោយនិរន្តរភាព រួមទាំងតាមរយៈការប្រើប្រាស់ប្រព័ន្ធថាមពលកកើតឡើងវិញ និងការបង្កើនលទ្ធភាពទទួលបានសេវាកម្មទឹកស្អាត និងអនាម័យ ។ ដើម្បីគាំទ្រការផ្លាស់ប្តូរទៅរកអនាម័យដែលត្រូវបានគ្រប់គ្រងដោយសុវត្ថិភាព និងជួយកាត់បន្ថយហានិភ័យសុខភាព និងបរិស្ថានពីការបន្ទោបង់ពាសវាលពាសកាល យូនីសេហ្វផ្តោតលើការលើកកម្ពស់ដំណោះស្រាយផ្អែកលើធម្មជាតិសម្រាប់ការគ្រប់គ្រងភក់បង្គន់ស្របតាមគោលការណ៍នៃការកាត់បន្ថយ ការប្រើប្រាស់ឡើងវិញ និងការកែច្នៃឡើងវិញ ។

ជួយឱ្យប្រជាជនយល់ពីតម្លៃការប្រើប្រាស់បង្គន់ ទឹកស្អាត និងសាប៊ូ

ការបង្កើនការយល់ដឹងក៏ជាផ្នែកដ៏ធំមួយនៃការងាររបស់យូនីសេហ្វផងដែរ ដើម្បីសម្រេចបានបរិស្ថានស្អាត និង សុវត្ថិភាពសម្រាប់កុមារដើម្បីលូតលាស់ ។ ហើយដើម្បីសម្រេចបានគោលដៅនេះមានប្រសិទ្ធភាព លុះត្រាតែប្រជាជនយល់ពីសារៈសំខាន់នៃការប្រើប្រាស់បង្គន់ ទឹកស្អាត និងសាប៊ូនៅផ្ទះ សាលារៀន និងមូលដ្ឋានថែទាំសុខភាព និងនៅក្នុងសហគមន៍ ។ យើងក៏អនុវត្តយុទ្ធសាស្រ្តផ្លាស់ប្តូរឥរិយាបថសង្គម ដើម្បីបង្កើនតម្រូវលើសេវាកម្មដែលមានភាពធន់នឹងអាកាសធាតុកាន់តែប្រសើរថែមទៀត ដូច្នេះ សហគមន៍យល់ពីហានិភ័យអាកាសធាតុ និងការការពារខ្លួនរបស់ពួកគេ និងគ្រួសាររបស់ពួកគេក្នុងពេលបច្ចុប្បន្ននេះ ក៏ដូចជានាពេលអនាគត ។

បង្កើនហិរញ្ញប្បទាន និងកិច្ចសម្របសម្រួលសម្រាប់កម្មវិធីទឹកស្អាត និងអនាម័យ

ដោយសហការជាមួយរាជរដ្ឋាភិបាល និងដៃគូពាក់ព័ន្ធផ្សេងទៀត យូនីសេហ្វធ្វើការកំណត់ពីកង្វះខាតផ្នែកហិរញ្ញវត្ថុ​សម្រាប់វិស័យទឹកស្អាតនិងអនាម័យ និងដាក់ចេញនូវសកម្មភាពជាយុទ្ធសាស្រ្តដើម្បីគាំទ្រវិស័យនេះ ក្នុងការកៀរគរធនធានដែលត្រូវការ ដើម្បីសម្រេចបានចំណុចដៅទី ៦​.១ និង ៦.២ នៃគោលដៅអភិវឌ្ឍន៍ប្រកបដោយចីរភាពរបស់កម្ពុជា ។ យូនីសេហ្វបង្កើតភស្តុតាងដោយធ្វើការប្រមូល និងវិភាគទិន្នន័យដើម្បីប្រើប្រាស់ជាមូលដ្ឋានសម្រាប់អនុវត្តកម្មវិធី ។ យើងស្វែងរកដំណោះស្រាយក្នុងការគៀងគរហិរញ្ញប្បទានសម្រាប់សេវាទឹកស្អាតនិងអនាម័យប្រកបដោយនវានុវត្តន៍ ស្វែងរកភាពជាដៃគូ និងវិធីសាស្រ្តនានា ហើយធ្វើយ៉ាងណាឱ្យសហគមន៍កាន់តែមានភាពធន់ឆ្លើយតបនឹងហានិភ័យអាកាសធាតុ ដោយធ្វើការវិភាគលើមុខសញ្ញា គ្រោះមហន្តរាយ និងរៀបចំបង្កើតផែនការត្រៀមលក្ខណៈសម្រាប់វិស័យទឹកស្អាតនិងអនាម័យ ។