“តោះ ឆាតលេង ហេស៎” យុទ្ធនាការទប់ស្កាត់ការល្បួងតាមប្រព័ន្ធអនឡាញ
ការជួបជាមួយមនុស្សថ្មីៗនៅតាមប្រព័ន្ធអនឡាញ គឺជារឿងរំភើប ប៉ុន្តែយើងត្រូវប្រាកដថា មិត្តភាពទាំងនោះ គឺជាទំនាក់ទំនងដ៏សមរម្យ និងត្រឹមត្រូវ។
- Available in:
- English
- Khmer
ការបិទខ្ទប់ដោយសារជំងឺកូវីដ១៩ មានន័យថាមនុស្សជាច្រើន ជាពិសេស កុមារ កំពុងចំណាយពេលយ៉ាងច្រើនជាងពេលណាៗទាំងអស់ នៅលើប្រព័ន្ធអនឡាញ ដើម្បីទាក់ទងជាមួយមនុស្សនៅក្នុងជីវិតប្រចាំថ្ងៃរបស់ពួកគេ។
ពិភពអនឡាញជួយកុមារក្នុងការរៀនសូត្រ លេងកម្សាន្ត និងទាក់ទងជាមួយមិត្តភក្តិ និងគ្រួសារ ប៉ុន្តែវាក៏មានហានិភ័យ និងគ្រោះថ្នាក់នានា ដូចជាការលួងលោមតាមប្រព័ន្ធអនឡាញ និងការកេងប្រវ័ញ្ចផ្លូវភេទកុមារផងដែរ។
ការល្បួងតាមប្រព័ន្ធអនឡាញគឺជាការរំលោភបំពានផ្លូវភេទ ហើយវាកើតឡើងនៅពេលដែលមនុស្សពេញវ័យមានទំនាក់ទំនងជាមួយមនុស្សវ័យក្មេង អាយុក្រោម១៨ឆ្នាំ ដោយសារពួកគេចង់មានទំនាក់ទំនងផ្លូវភេទ។ ការលួងលោមប្រភេទនេះកើតឡើងនៅក្នុងរយៈពេលជាបន្តបន្ទាប់ ហើយជនប្រព្រឹត្តជានិច្ចកាលតែងចាប់ផ្ដើម តាមរយៈការកសាងទំនាក់ទំនងជាមួយនឹងមនុស្សវ័យក្មេង ដើម្បីដឹងអំពីតម្រូវការ និងភាពងាយរងគ្រោះរបស់ពួកគេ។ នៅពេលដែលពួកគេទទួលបានទំនុកចិត្តហើយ ការរំលោភបំពានកើតឡើងបន្តិចម្ដងៗ តាមរយៈការបោកប្រាស់ និងការទាមទារ។ ទំនាក់ទំនងនេះក៏រមែងតែងធ្វើឡើងក្នុងលក្ខណៈសម្ងាត់ និងអាចប្រែក្លាយទៅជាគ្រោះថ្នាក់ផ្នែកផ្លូវកាយ។
ជាមួយនឹងចំនួនកុមារកាន់តែច្រើនដែលប្រើប្រាស់ប្រព័ន្ធអនឡាញជារៀងរាល់ថ្ងៃ ការផ្ដល់ភាពអង់អាចដល់ពួកគេឱ្យដឹងអំពីការជ្រើសរើសត្រឹមត្រូវតាមប្រព័ន្ធអនឡាញ មានសារសំខាន់កាន់តែខ្លាំងឡើង។
តោះ ឆាតលេង ហេស៎ គឺជាសាច់រឿងខ្លីៗរបស់មិត្តភក្ដិជិតស្និទ្ធចំនួនបួននាក់ ដែលពួកគាត់រៀនស្វែងយល់ពីតុល្យភាពរវាងជំនឿទុកចិត្ត ទំនាក់ទំនង និងហានិភ័យនៅតាមប្រព័ន្ធអនឡាញ និងរិះរកវិធីដើម្បីប្រយុទ្ធប្រឆាំងនឹងការល្បួងតាមប្រព័ន្ធអនឡាញ និងវិធីបោកប្រាស់ ដែលជនប្រព្រឹត្តប្រើប្រាស់។
ការជួបជាមួយមនុស្សថ្មីៗនៅតាមប្រព័ន្ធអនឡាញ គឺជារឿងរំភើប ប៉ុន្តែយើងត្រូវប្រាកដថា មិត្តភាពទាំងនោះ គឺជាទំនាក់ទំនងដ៏សមរម្យ និងត្រឹមត្រូវ។ សូមទស្សនាវីដេអូទាំងបួនភាគ ដើម្បីស្វែងយល់អំពីវិធីនានាដែលមិត្តភក្ដិទាំងបួននាក់នេះជួយគ្នាទៅវិញទៅមក ក្នុងការឆ្លងកាត់រឿងមួយចំនួនទាំងក្នុង និងក្រៅប្រព័ន្ធអនឡាញ។
រួមគ្នា យើងអាចធ្វើឱ្យប្រព័ន្ធអនឡាញកាន់តែមានសុវត្ថិភាព តាមរយៈការធ្វើឲ្យសហគមន៍មានភាពសកម្ម និងមានទំនួលខុសត្រូវផ្នែកសង្គមជាងមុន។
នេះគឺជាវិធីមួយចំនួនដែលអ្នកអាចធ្វើបាន ដើម្បីជួយប្រយុទ្ធប្រឆាំងនឹងការលួងលោមតាមប្រព័ន្ធអនឡាញ និងការកេងប្រវ័ញ្ចផ្លូវភេទនៅប្រទេសកម្ពុជា និងធ្វើឱ្យប្រព័ន្ធអ៊ីនធឺណែតកាន់តែមានសុវត្ថិភាពសម្រាប់កុមារ៖
១. ជួយពង្រឹងភស្តុតាង និងផលប៉ះពាល់នៃយុទ្ធនាការនេះ។
២. ចែករំលែកវីដេអូទាំងនេះជាមួយអ្នកដទៃទៀត ដើម្បីលើកកម្ពស់ការយល់ដឹង។
៣. ប្លុកជនប្រព្រឹត្តចោល និងរាយការណ៍អំពីបញ្ហាកង្វល់នានាទៅកាន់អង្គការ APLE
កម្ពុជា តាមរយៈទូរស័ព្ទ ០៩២ ៣១១ ៥១១ ឬ"
http://www.internethotlinecambodia.org/reporting-portal/
*** ប្រសិនបើ អ្នក គឺជាយុវជនម្នាក់ ឬយុវវ័យម្នាក់ សូមស្វែងយល់អំពី គន្លឹះជាច្រើនទៀតនៅទីនេះ។
*** ឪពុកម្ដាយ មនុស្សពេញវ័យ និងអ្នកថែទាំអាចស្វែងយល់អំពីគន្លឹះជាច្រើនទៀតនៅទីនេះ។