ជួបជាមួយជំនាន់ថ្មី

ត្រឹមរយៈពេលប្រាំពីរខែ បន្ទាប់ពីបេក្ខជនក្នុងកម្មវិធីជំនាន់ថ្មីនៅក្នុងឆ្នាំនេះត្រូវបានសម្រិតសម្រាំងជ្រើសរើសឲ្យចូលរួមអនុវត្តគម្រោងរបស់ពួកគេ ដោយទទួលនូវការគាំទ្រពីយូនីសេហ្វ គម្រោងរបស់ពួកគេបាននឹងកំពុងតែផ្តល់អត្ថប្រយោជន៍នៅទូទាំងប្រទេសកម្ពុជារួចជាស្រេចទៅហើយ។ មានយុវជនជាង ២០០០​នាក់បានចូលរួមដោយផ្ទាល់នៅក្នុងគម្រោង ដោយរួមទាំងកុមារ និងយុវជនដែលបានស្ម័គ្រចិត្ត ឬចូលរួមនៅក្នុងសិក្ខាសាលាផងដែរ ។ លើសពីនេះក៏មានអ្នកគាំទ្ររាប់សែននាក់ដទៃទៀត នៅលើបណ្ដាញសង្គម.... ហើយនេះគ្រាន់តែជាការចាប់ផ្ដើមប៉ុណ្ណោះ ។

ព្រឹត្តិការណ៍ កិច្ចសហការ និងភាពជាដៃគូជាច្រើនទៀត ត្រូវបានគ្រោងទុកនឹងរៀបចំនាខែក្រោយៗ ដើម្បីបង្កើនវិសាលភាពនៃកម្មវិធីជំនាន់ថ្មី និងដើម្បីធានាថាគម្រោងទាំងនេះនឹងដឹងឮដល់មនុស្សកាន់តែច្រើនថែមទៀត។ យូនីសេហ្វនឹងបន្តធ្វើការជាមួយនឹងក្រសួងអប់រំ យុវជន និងកីឡា ដើម្បីធ្វើការផ្ទាល់ជាមួយកុមារនៅតាមសាលារៀន តាមរយៈកម្មវិធីបំណិនជីវិតតាមមូលដ្ឋានរបស់ក្រសួង។ ជាមួយគ្នានេះ យូនីសេហ្វក៏នឹងធ្វើការជាមួយវិស័យឯកជនដើម្បីរៀបចំព្រឹត្តិការណ៍នានា ដែលអាចឲ្យសាធារណជនទូទៅចូលរួមកាន់តែច្រើន រួមមានទាំងការបង្កើតឱកាសដល់យុវជនរាប់ពាន់នាក់ក្នុងការអភិវឌ្ឍជំនាញ និងការលើកកម្ពស់ឱកាសការងាររបស់ពួកគេផងដែរ។

កម្មវិធីជំនាន់ថ្មីនៅក្នុងឆ្នាំនេះត្រូវបានដឹកនាំដោយយុវជនកម្ពុជាមកពីគ្រប់ទិសទីទូទាំងប្រទេសកម្ពុជា ដែលមានអាយុចន្លោះពី ១៦ឆ្នាំ ដល់ ២៤ឆ្នាំ។ វីដេអូខាងក្រោមនេះបង្ហាញអំពីសកម្មភាពនៃគម្រោងចំនួនប្រាំមួយ ដែលផ្ដោតលើបញ្ហាសំខាន់ៗ ដូចជាការអប់រំ ការអភិរក្សបរិស្ថាន និងសមត្ថភាពធ្វើការងាររបស់យុវជន។ បញ្ហាប្រឈមផ្សេងៗ ដែលបាននឹងកំពុងអនុវត្តដោយកម្មវិធីយុវជនជំនាន់ថ្មីមានដូចជាសុខភាពផ្លូវចិត្ត អក្ខរកម្មឌីជីថល អាហារូបត្ថម្ភកុមារ និងការផ្លាស់ប្ដូរអាកាសធាតុ។