គោលនយោបាយសង្គម និងហិរញ្ញវត្ថុសាធារណៈដើម្បីកុមារ

កម្មវិធី​គោលនយោបាយ និងហិរញ្ញប្បទានសាធារណៈ​សម្រាប់កុមារ (PPF4C) របស់យូនីសេហ្វប្រចាំកម្ពុជា (២០២៤-២០២៨) ដោះស្រាយឧបសគ្គទាំងនេះ។ ក្នុងភាពជាដៃគូជិតស្និទ្ធជាមួយ​រាជរដ្ឋាភិបាល អាជ្ញាធរមូលដ្ឋាន និង​សហគមន៍ កម្មវិធី PPF4C ធានា​ថា ធនធាននានា​គ្របដណ្ដប់ទៅដល់​អ្នកទាំងឡាយ ដែលត្រូវការធនធានទាំងនោះ​បំផុត រួមទាំងកុមារមានពិការភាព ស្រ្តីមានផ្ទៃពោះ និងគ្រួសារក្រីក្រខ្លាំង។

ជាមួយប្រព័ន្ធប្រកបដោយបរិយាបន្ន និងការវិនិយោគចំគោលដៅ កម្មវិធី PPF4C ពង្រឹងកិច្ចគាំពារសង្គម លើកកម្ពស់ការចូលរួមរបស់សហគមន៍ និង​កសាងឱកាសស្មើគ្នាសម្រាប់​កុមារគ្រប់រូប។

ការកសាង​ប្រព័ន្ធកិច្ចគាំពារសង្គម​ប្រកបដោយបរិយាបន្ន និងចីរភាព

យូនីសេហ្វ​កំពុងគាំទ្រដល់​ប្រទេសកម្ពុជា​ក្នុងការពង្រីក និងពង្រឹង​ប្រព័ន្ធកិច្ចគាំពារសង្គមរបស់ខ្លួន។ ចំណុចស្នូលនៃប្រព័ន្ធនេះ គឺកម្មវិធីកញ្ចប់គ្រួសារ ដែលផ្ដល់​ការឧបត្ថម្ភសាច់ប្រាក់​ជូនដល់គ្រួសារក្រីក្រ រួមទាំងស្រ្តីមានផ្ទៃពោះ កុមារអាយុក្រោមពីរឆ្នាំ មនុស្សចាស់ ជនមានពិការភាព និង​ជនរស់នៅជាមួយមេរោគអេដស៍/ជំងឺអេដស៍។

ចាប់តាំងពីខែមករា ឆ្នាំ២០២៥ កុមារមកពីគ្រួសារក្រីក្រ​ក៏នឹងទទួលប្រយោជន៍​ពី​កម្មវិធីអាហារូបករណ៍សម្រាប់ការអប់រំផងដែរ ដើម្បីជំរុញ​ការចុះឈ្មោះចូលរៀន និងទប់ស្កាត់ការឈប់រៀន។ យូនីសេហ្វ​ផ្ដល់​ការគាំទ្របច្ចេកទេស និងការបណ្ដុះបណ្ដាល ស្របពេលដែលរដ្ឋាភិបាល​គ្រប់គ្រងការអនុវត្ត និងការផ្ដល់មូលនិធិ។ កញ្ចប់គ្រួសារ​នឹងក្លាយទៅជា​បញ្ជីសង្គមរួមបញ្ជូលគ្នាដំបូង​របស់ប្រទេសកម្ពុជា ដែលមានលក្ខណៈឌីជីថល ឆ្លើយតបចំពោះ​វិបត្តិ និងទទួលបានជោគជ័យនៅពេលអនាគត។

ដើម្បីធានានូវហិរញ្ញប្បទាន​ប្រកបដោយប្រសិទ្ធផល និងបរិយាបន្ន យូនីសេហ្វ​រួមចំណែកចំពោះ​កំណែទម្រង់​ហិរញ្ញវត្ថុសាធារណៈ។ កំណែទម្រង់នេះ​រួមមាន​ការរៀបចំផែនការ​កាន់តែល្អ ការរៀបចំថវិកាដោយគិតគូរអំពី            ហានិភ័យ និងការតាមដាន​ការចំណាយពាក់ព័ន្ធនឹងពិការភាព​នៅតាមក្រសួងនានា ពោលគឺ ការធ្វើឱ្យប្រាកដថាប្រាក់ដែលចំណាយ​ចេញទៅ ផ្ដល់ប្រយោជន៍​ដល់កុមារគ្រប់រូប។ គួរឱ្យកត់សម្គាល់ ក្រោមភាពជាដៃគូ​ជាមួយរាជរដ្ឋាភិបាល យូនីសេហ្វកំពុងដឹកនាំកិច្ចខិតខំប្រឹងប្រែង​ក្នុងការវិភាគលើថវិការបស់កម្មវិធី​នៅតាមក្រសួង និងស្ថាប័ន​សាធារណៈសំខាន់ៗ រួមមាន ​ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួងអប់រំ យុវជន និងកីឡា និងក្រសួងសេដ្ឋកិច្ច និងហិរញ្ញវត្ថុ ដើម្បីវាយតម្លៃការចំណាយលើ​បរិយាបន្ន​ពិការភាព។ ការងារនេះជួយដល់ស្ថាប័នីយកម្ម​ហិរញ្ញប្បទាន​ប្រកបដោយបរិយាបន្ន​ដែលផ្ដោតលើកុមារ និងធានាថា ការវិនិយោគសាធារណៈ​គាំទ្រ​ដល់​កុមារគ្រប់រូប ជាពិសេស កុមារប្រឈមនឹងហានិភ័យខ្លាំងបំផុត។

ការផ្ដល់អំណាចជូនសហគមន៍ និងអភិបាលកិច្ចមូលដ្ឋាន

នៅពេលវិមជ្ឈការសេវាសាធារណៈ រដ្ឋាភិបាលមូលដ្ឋាន​គ្រប់គ្រងការទទួលខុសត្រូវ និងថវិកាកាន់តែច្រើន។            យូនីសេហ្វគាំទ្រដល់​កំណែទម្រង់នេះ​តាមរយៈ​ការបណ្ដុះបណ្ដាល​មន្រ្តីថ្នាក់ជាតិ និងមូលដ្ឋាន​នៅក្នុងការរៀបចំផែនការ ការរៀបចំផែនការថវិកា និងការចូលរួមជាមួយពលរដ្ឋ។ សហគមន៍​នានាកំពុងចូលរួម​នៅក្នុងការកំណត់​សេវាមូលដ្ឋានរបស់ពួកគេ ដើម្បីធានាថា សេចក្ដីសម្រេចចិត្ត​នានាឆ្លុះបញ្ចាំង​នូវតម្រូវការពិតប្រាកដ ហើយសិទ្ធិរបស់កុមារ គឺជាចំណុចសំខាន់​នៃអភិបាលកិច្ច។ កិច្ចការនេះ​ក៏កែលម្អការគ្រប់គ្រងហិរញ្ញវត្ថុ និងធានាការផ្ដល់អាទិភាពចំពោះ​តម្រូវការរបស់​កុមារ​នៅគ្រប់កម្រិតផងដែរ។

គម្រោង ACCESS II៖ ការធ្វើឱ្យបរិយាបន្ន​ គឺជាការពិតសម្រាប់​កុមារមានពិការភាព

ACCESS II គឺជា​គំនិតផ្ដួចផ្ដើមរយៈពេលប្រាំឆ្នាំ ដែលទទួលបានមូលនិធិពី​រដ្ឋាភិបាលអូស្រ្តាលី ដើម្បីគាំទ្រ​ដល់​កិច្ចខិតខំប្រឹងប្រែង​របស់កម្ពុជា​នៅក្នុងការកសាង​សេវាសង្គមដែលមានបរិយាបន្នកាន់តែខ្លាំង។ ក្នុងនាមជាដៃគូអនុវត្តន៍ យូនីសេហ្វប្រចាំកម្ពុជា​ធ្វើការងារ​ជាមួយរដ្ឋាភិបាល ដើម្បីកែលម្អសេវាពិការភាព ធ្វើឱ្យសាលារៀន និងមណ្ឌលសុខភាព​មានផាសុកវត្ថុកាន់តែខ្លាំង និងលើកកម្ពស់​ការយល់ដឹង​ដើម្បីកាត់បន្ថយភាពមាក់ងាយ។ តាមរយៈ​ការរួមចំណែកជាជំនាញបច្ចេកទេស និងការស្វែងរកមតិគាំទ្រចំពោះសិទ្ធិកុមារ យូនីសេហ្វ​ជួយធានាថា កុមារមានពិការភាព​មិនត្រូវបានទុកចោលឡើយ។

ការលើកកម្ពស់ជំនាញ និងការងារសមរម្យសម្រាប់យុវជនមានពិការភាព

ក្នុងភាពជាដៃគូ​ជាមួយទីភ្នាក់ងារសហប្រជាជាតិដទៃទៀត យូនីសេហ្វលើកកម្ពស់​បរិយាបន្ន​សង្គម និងសេដ្ឋកិច្ច​របស់យុវជន​មានពិការភាព​នៅកម្ពុជា តាមរយៈ​ការគាំទ្រដល់​មជ្ឈមណ្ឌលអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET) ។ កិច្ចខិតខំប្រឹងប្រែងទាំងនេះ​មានបំណង​ធ្វើឱ្យស្ថាប័ននានា​មានផាសុកវត្ថុ និងបរិយាបន្នកាន់តែខ្លាំង​​​សម្រាប់អ្នកគ្រប់គ្នា។ តាមរយៈការផ្ដល់ជំនាញ​ ការណែនាំអំពីអាជីពការងារ​ និងសេវា​ទុកដាក់ឱ្យ​ចូលបម្រើការងារ​ដល់​យុវជនមានពិការភាព យូនីសេហ្វ​ជួយ​បង្កើត​គន្លងពិតប្រាកដ​ទៅកាន់ការងារសមរម្យ និងភាពឯករាជ្យ​។ កិច្ចការនេះបិទភ្ជិតគម្លាតរវាង​ការអប់រំ និងការងារ ដោយធានាថា ​យុវជនមានពិការភាព​អាចរួមចំណែកចំពោះ​កំណើនរបស់ប្រទេសកម្ពុជា។

ការកសាងអនាគតកាន់តែប្រសើរ​សម្រាប់កុមារគ្រប់រូប

កម្មវិធី PPF4C របស់យូនីសេហ្វប្រចាំកម្ពុជា​មិនត្រឹមតែពាក់ព័ន្ធនឹងគោលនយោបាយប៉ុណ្ណោះឡើយ ពោលគឺ កម្មវិធីនេះ​ពាក់ព័ន្ធនឹងមនុស្ស។ តាមរយៈការពង្រឹង​ប្រព័ន្ធនានាប្រកបដោយបរិយាបន្ន ការគាំទ្រដល់ហិរញ្ញប្បទានប្រកបដោយចីរភាព និងការផ្ដល់ភាពអង់អាចជូនសហគមន៍ យើងជួយធានាថា កុមារគ្រប់រូប ដោយមិនគិតអំពី​កន្លែងដែលពួកគេរស់នៅ ឬពិការភាពរបស់ពួកគេ​ អាចធំលូតលាស់ប្រកបដោយសុខភាពល្អ ទទួលបាន​ការអប់រំ និងមានសុវត្ថិភាព។ ដោយរួមគ្នាជាមួយនឹង​រដ្ឋាភិបាល និងដៃគូ យូនីសេហ្វ​កំពុងចាក់មូលដ្ឋានគ្រឹះ​សម្រាប់​ប្រទេសមួយកាន់តែមានភាពយុត្តិធម៌ និងភាពធន់កាន់តែខ្លាំង ដែលកុមារគ្រប់រូបមានឱកាសធំលូតលាស់។