កម្មវិធីជំនាន់ថ្មី ឆ្នាំ២០២៥
ការផ្ដល់ភាពអង់អាចជូននវានុវត្តន៍ករសង្គមវ័យក្មេងកម្ពុជា ដើម្បីកសាងសហគមន៍កាន់តែខ្លាំងក្លា និងមានបរិយាបន្ន
- English
- Khmer
កម្មវិធីជំនាន់ថ្មីផ្ដល់ឱកាសជូនដល់យុវជនដែលមានសាវតារខុសៗគ្នានៅកម្ពុជា ដើម្បីរៀនសូត្រ មានភាពរីកចម្រើន និងចែករំលែកគំនិតប្រកបដោយនវានុវត្តន៍ថ្មីៗ។ តាមរយៈការផ្ដល់ភាពអង់អាចជូនដល់នវានុវត្តន៍ករ និងអ្នកធ្វើការផ្លាស់ប្ដូរជំនាន់ក្រោយជាមួយនឹងជំនាញសហគ្រិនភាពនៅក្នុងការដំណើរការគម្រោងសហគមន៍ កម្មវិធីជំនាន់ថ្មីមានបំណងកសាងប្រទេសកម្ពុជាដែលកាន់តែខ្លាំងក្លា កាន់តែមានបរិយាបន្ន និងមានការរៀបចំផែនការសម្រាប់ពេលអនាគត។
នៅឆ្នាំ២០២៥ យើងចាប់ដៃគូជាមួយសហគ្រាសសង្គមមួយឈ្មោះ អ៊ីមផេកហាប់ (Impact Hub) ដើម្បីគាំទ្រដល់អ្នកដឹកនាំវ័យក្មេង ១០៥នាក់ ដែលកំពុងធ្វើការងាររួមគ្នាជាក្រុមចំនួន ១៥ក្រុម នៅរាជធានីភ្នំពេញ និងខេត្តសៀមរាប។ នៅក្នុងរយៈពេលប្រាំពីរខែនេះ ពួកគេចូលរួមនៅក្នុងការបោះជំរុំ (Bootcamp) ការចុះតាមសហគមន៍ និងការភ្ជាប់ទំនាក់ទំនងជាមួយដៃគូក្នុងមូលដ្ឋាន ដើម្បីស្វែងយល់កាន់តែច្បាស់អំពីបញ្ហាប្រឈម និងកំណត់ដំណោះស្រាយចំពោះបញ្ហានានា ដែលមានផលប៉ះពាល់ចំពោះយុវជន និងសហគមន៍នៅពេលបច្ចុប្បន្ន ដូចជា សុខភាពផ្លូវចិត្ត ការប្រែប្រួលអាកាសធាតុ អនាម័យពេលមានរដូវ ការចូលរួមរបស់យុវជនក្នុងនាមជាពលរដ្ឋ សុវត្ថិភាពចរាចរណ៍ផ្លូវគោក បំណិនជីវិត និងប្រធានបទជាច្រើនទៀត។ នៅលើផ្លូវធ្វើដំណើរនេះ ពួកគេទទួលបានការណែនាំពីអ្នកណែនាំ និងគ្រូបង្វឹក ចូលរួមនៅក្នុងថ្នាក់ពិសេស និងប្រើប្រាស់ថ្នាលរៀនសូត្រអនឡាញ ដើម្បីរៀនសូត្រទៅតាមល្បឿនរបស់ពួកគេ។
ការធ្វើដំណើររបស់ជំនាន់ថ្មី
- វគ្គ Hackathon៖ យើងបានប្រមូលផ្ដុំយុវជនជាអ្នកធ្វើការផ្លាស់ប្ដូរចំនួនជាង ១៥០នាក់មកពីរាជធានីភ្នំពេញ និងខេត្តសៀមរាប ព្រមទាំងបានរៀបចំវគ្គ Hackathon សង្គម នៅក្នុងទីក្រុងនីមួយៗ។ ក្នុងរយៈពេលមួយថ្ងៃ យុវជនជាអ្នកធ្វើការផ្លាស់ប្ដូររបស់យើងបានស្វែងយល់អំពី ប្រធានបទផ្សេងៗគ្នាស្ដីពីសហគ្រិនភាព រួមទាំងការគិតបែបយុទ្ធសាស្រ្ត ការរៀបចំគំរូដើម និងការរៀបចំគម្រោងធុរកិច្ច។ នៅត្រឹមចុងបញ្ចប់នៃវគ្គ Hackathons មានការជ្រើសរើសក្រុមលេចធ្លោចំនួន ១៥ក្រុមដើម្បីប្រែក្លាយគំនិតរបស់ពួកគេក្លាយទៅជាការពិតជាក់ស្ដែងជាមួយនឹងការផ្ដល់មូលនិធិដើមទុនពីយូនីសេហ្វ។
- ការបោះជំរុំ Bootcamp៖ ក្រុមដែលត្រូវបានជ្រើសរើសទាំង ១៥ក្រុមបានឆ្លងកាត់ការបោះជំរុំរយៈពេលប្រាំថ្ងៃ ដើម្បីកំណត់ដំណោះស្រាយរបស់ពួកគេចំពោះបញ្ហាសហគមន៍ ដែលពួកគេចង់ដោះស្រាយ។ កិច្ចគាំទ្រពីគ្រូបង្វឹក និងដៃគូគម្រោងជួយប្រែក្លាយគំនិតទៅជាវិធានការ និងសកម្មភាពដែលអាចធ្វើបាន។
- ការអនុវត្តគម្រោងជាមួយការផ្ដល់មូលនិធិដើមទុន ថ្នាក់ពិសេស និងការណែនាំ៖ បន្ទាប់ពីការពង្រឹងគំនិតគម្រោងរបស់ពួកគេ យើងផ្គូផ្គងគំនិតទាំងនោះជាមួយនឹងអ្នកណែនាំវិជ្ជាជីវៈ និងមានបទពិសោធន៍មកពីឧស្សាហកម្មផ្សេងៗគ្នា ដើម្បីដឹកនាំពួកគេនៅទូទាំងការអនុវត្ត និងការកែលម្អគម្រោង។ អ្នកចូលរួមក៏ចូលរួមនៅក្នុងកម្រងនៃថ្នាក់រៀនពិសេស ដែលជួយពួកគេកសាងជំនាញចាំបាច់នានា ដូចជា ការគ្រប់គ្រងគម្រោង រួមទាំងការរៀបចំថវិកា និងការគ្រប់គ្រងក្រុម ការស្វែងរកមតិគាំទ្រតាមប្រព័ន្ធឌីជីថល ព្រមទាំងការពិនិត្យតាមដាន និងការវាយតម្លៃផងដែរ។
ជួបជាមួយក្រុមនវានុវត្តន៍ករសង្គមវ័យក្មេង
ក្រុម D-Mental Girls៖ គឺជាគំនិតផ្ដួចផ្ដើមដឹកនាំដោយយុវជន ដែលមានការប្ដេជ្ញាចិត្តចំពោះការលើកកម្ពស់ការយល់ដឹងអំពីបញ្ហាប្រឈមផ្នែកសុខភាពផ្លូវចិត្ត ដែលជនមានពិការភាពប្រឈមមុខជាមួយ។ បេសកកម្មរបស់ពួកគេ គឺដើម្បីដេញដោយចំពោះភាពមាក់ងាយ និងការយល់ខុសនានា ព្រមទាំងលើកស្ទួយសង្គមមួយដែលកាន់តែមានបរិយាបន្ន និងសេចក្ដីមេត្តាករុណា តាមរយៈមាតិកាតាមបណ្ដាញទំនាក់ទំនងសង្គម សកម្មភាពដោយផ្ទាល់ និងការចូលរួមជាមួយសហគមន៍ ដែលជំរុញការគាំទ្រដល់សុខុមាលភាពផ្លូវចិត្តរបស់ពួកគេ។ សមាសធាតុសំខាន់មួយ គឺព្រឹត្តិការណ៍ “សំឡេងរបស់អ្នក ការផ្លាស់ប្ដូររបស់យើង” ដែលសមាជិកសហគមន៍ចែករំលែកការយល់ឃើញរបស់ពួកគេអំពីបញ្ហាប្រឈមពាក់ព័ន្ធនឹងសុខភាពផ្លូវចិត្ត។
ក្រុម Empower Girls៖ គឺជាក្រុមដឹកនាំដោយយុវជន ដែលត្រូវបានបង្កើតឡើងដោយស្រ្តីវ័យក្មេងនៅក្នុងវិស័យ STEM ដើម្បីជំរុញទឹកចិត្តសិស្សានុសិស្សថ្នាក់មធ្យមសិក្សានៅកម្ពុជា ជាពិសេស ក្មេងស្រី ក្នុងការស្វែងយល់អំពី STEM តាមរយៈឧបករណ៍ និងបទពិសោធន៍ជាក់ស្ដែង។ ក្រុមនេះមានបំណងលើកទឹកចិត្តក្មេងស្រីឱ្យបន្តការសិក្សានៅក្នុងវិស័យ STEM និងជជែកអំពីគោលដៅរបស់ពួកគេជាមួយនឹងគ្រួសាររបស់ពួកគេ ដែលអាចពុំមើលឃើញថា វាជាគន្លងមួយសម្រាប់ពួកគេឡើយ។ បេសកកម្មរបស់ក្រុម Empower Girls គឺដើម្បីបណ្ដុះចំណាប់អារម្មណ៍រយៈពេលវែងទៅលើ STEM និងធានាថា ក្មេងស្រីកាន់តែច្រើនមើលឃើញខ្លួនឯងថាជានវានុវត្តន៍ករ អ្នកដឹកនាំ និងអ្នកធ្វើការផ្លាស់ប្ដូរនៅពេលអនាគត។
ក្រុម Green Miracle៖ មានបំណងលើកកម្ពស់ការយល់ដឹង និងជំរុញទឹកចិត្តយុវជនឱ្យចាត់វិធានការទៅលើការប្រែប្រួលអាកាសធាតុ និងការបំពុលដោយប្លាស្ទិក។ ការប្រកួតប្រជែងអំពីសិល្បៈលើធុងសំរាមនឹងផ្ដល់ជូនសិស្សានុសិស្សថ្នាក់វិទ្យាល័យរាប់រយនាក់នូវឱកាស ដើម្បីប្រែក្លាយធុងសំរាមទៅជាការងារសិល្បៈដ៏ស្រស់ស្អាត និងបង្ហាញភាពច្នៃប្រឌិត នវានុវត្តន៍ និងការអនុវត្តប្រកបដោយចីរភាពរបស់ពួកគេ។
ក្រុម Hyper Healer៖ មានការប្ដេជ្ញាចិត្តចំពោះការកាត់បន្ថយបន្ទុកការងារផ្លូវចិត្ត ដែលនិស្សិតផ្នែកវេជ្ជសាស្រ្តបានប្រឈមមុខជាមួយ។ ក្រុមនេះមានបំណងផ្ដល់ភាពអង់អាចជូននិស្សិតក្នុងការផ្ដល់អាទិភាពចំពោះស្វ័យថែទាំ និងពង្រឹងភាពធន់ផ្នែកវិជ្ជាជីវៈរបស់ពួកគេ ហេតុនេះ នៅទីបំផុត ពួកគេអាចផ្ដល់ការថែទាំកាន់តែល្អជូនអ្នកជំងឺ ដែលពួកគេនឹងបម្រើនៅថ្ងៃណាមួយខាងមុខ។ ដំណោះស្រាយ គឺត្រូវរចនាកម្រងកាតរូបភាពដើម្បីបង្កើនស្មារតី នៅពេលពួកគេមានអារម្មណ៍ពិបាកចិត្ត។ កាតរូបភាពទាំងនេះក៏អាចដើរតួនាទីជាឧបករណ៍បំបែកឧបសគ្គ និងលំហាត់ឆ្លុះបញ្ចាំងរវាងមិត្តប្រកបដោយប្រសិទ្ធភាពផងដែរ។
ក្រុម Neary Flow៖ ស្ដីពីការថែទាំ និងការបំបែកភាពស្ងៀមស្ងាត់។ ដោយទទួលស្គាល់ថាក្មេងស្រីជាច្រើនខ្វះសំឡីអនាម័យ និងកន្លែងប្រកបដោយសុវត្ថិភាព ព្រមទាំងកេ្មងស្រីជាច្រើនមិនបានទៅរៀន ឬទទួលរងទុក្ខតែម្នាក់ឯង យុទ្ធនាការ “ការមានរដូវដោយសប្បាយរីករាយ” មានបំណងលើកកម្ពស់ការយល់ដឹង និងផ្ដល់សំឡីអនាម័យដោយឥតគិតថ្លៃ។ ជាមួយនឹងក្រុម Neary Flow ក្មេងស្រីគ្រប់រូបអាចប្រឈមមុខជាមួយនឹងការមានរដូវរបស់ពួកគេដោយមោទនភាព និងជំនឿចិត្ត។ គ្មានក្មេងស្រីណាម្នាក់មានអារម្មណ៍អាម៉ាស ឬត្រូវបានគេទុកចោលឡើយ ខណៈដែលពួកគេគប្បីផ្ដោតការយកចិត្តទុកដាក់ទៅលើក្ដីសុបិន្តរបស់ពួកគេ មិនមែនភាពមិនសុខស្រួលឡើយ។
ក្រុមស្រឡាញ់ក្មេង៖ គឺជាគំនិតផ្ដួចផ្ដើមមួយ ដែលបង្កើតឡើងដោយយុវជន ដើម្បីយុវជន។ បេសកកម្មរបស់ពួកគេ គឺដើម្បីលើកកម្ពស់ការយល់ដឹងនៅក្នុងចំណោមសិស្សថ្នាក់វិទ្យាល័យអំពី ការរករឿងឈ្លោះ និងការរើសអើង ព្រមទាំងដើម្បីផ្ដល់លំហសុវត្ថិភាពមួយ ដែលបុគ្គលទាំងឡាយអាចបង្ហាញអារម្មណ៍របស់ខ្លួនបានដោយគ្មានការភ័យខ្លាច ឬភាពអាម៉ាស។ ពួកគេមានបំណងគាំទ្រដល់សុខុមាលភាពផ្លូវចិត្តចិត្ត និងផ្ដល់ភាពអង់អាចជូនសិស្សានុសិស្សក្នុងការសម្ដែងមតិ ទទួលបានការស្ដាប់លឺពីអ្នកដទៃ និងគាំទ្រសិស្សានុសិស្សផ្សេងទៀត។
ក្រុមថាមវ័ន្ត៖ គឺជាគម្រោងដឹកនាំដោយយុវជន ដើម្បីដោះស្រាយគម្លាតរវាងបំណិនជីវិតដែលបានរៀននៅសាលារៀនកម្ពុជា និងការអនុវត្តបំណិនទាំងនោះនៅក្នុងជីវិតជាក់ស្ដែង។ ក្រុមនេះរៀបចំការអង្កេតប្រកបភាពទាក់ទាញ និងការបណ្ដុះបណ្ដាលយុវជនស្ម័គ្រចិត្ត ប្រមូលទិន្នន័យតាមរយៈដំណើរកម្សាន្ត និងព្រឹត្តិការណ៍បែបអន្តរកម្ម វិភាគរបកគំហើញដើម្បីបង្កើតរបាយការណ៍ច្បាស់លាស់ដែលមានភាពទាក់ទាញ និងចែករំលែកលទ្ធផលជាមួយអ្នកពាក់ព័ន្ធ។ គម្រោងនេះផ្ដល់ភាពអង់អាចជូនយុវជនដើម្បីចូលរួមនៅក្នុងការធ្វើសេចក្ដីសម្រេចចិត្ត និងស្វែងរកមតិគាំទ្រឱ្យមានការអប់រំបំណិនជីវិតកាន់តែខ្លាំងក្លា។
ក្រុម 4 Youth៖ មានបំណងពង្រឹងសមត្ថភាពរបស់យុវជនកម្ពុជាក្នុងការស្វែងរកការងារធ្វើ។ គម្រោងរបស់ពួកគេដោះស្រាយភាពអត់ការងារធ្វើរបស់យុវជន តាមរយៈការបំពាក់ជូនសិស្សានុសិស្សនូវជំនាញចាំបាច់នានា ដែលមានត្រៀមលក្ខណៈរបស់ពួកគេរួចជាស្រេចសម្រាប់ការងារ។
និងក្រុមចំនួនបួននៅខេត្តសៀមរាប
ក្រុមអនាគតកូនយើង៖ មានបំណងកាត់បន្ថយអំពើហិង្សាក្នុងគ្រួសារ តាមរយៈការចែករំលែកចំណេះដឹងអំពីការចិញ្ចឹមកូនបែបវិជ្ជមាន។ សៀវភៅសរសេរមួយនឹងត្រូវរចនាឡើងដោយមានសារអប់រំ និងគន្លឹះអំពីការចិញ្ចឹមកូនបែបវិជ្ជមាននៅក្នុងសៀវភៅនោះ ដែលនឹងត្រូវចែកជូនតាមគ្រួសារនៅក្នុងឃុំសង្កាត់ដែលបានជ្រើសរើស។ សៀវភៅនេះនឹងដើរតួនាទីជាសៀវភៅសរសេរប្រចាំថ្ងៃ និងជាវិធីសាស្រ្តមួយដើម្បីដាក់បញ្ចូលផ្នត់គំនិតអំពីការចិញ្ចឹមកូនបែបវិជ្ជមានចំពោះឪពុកម្ដាយ។
ក្រុមច្នៃ៖ ដោយកត់សម្គាល់ឃើញបញ្ហានានាជាមួយនឹងសំណល់កាកអំពៅ និងសម្ភារៈដែលអ្នកលក់ទឹកអំពៅបន្យល់ទុក ជាពិសេស នៅតាមទីតាំងនានា ដូចជា ក្រុងសៀមរាប។ សំណល់នេះមិនត្រឹមតែប្រមូលផ្ដុំនៅតាមដងផ្លូវ ដែលជាគោលដៅទេសចរណ៍សំខាន់ៗប៉ុណ្ណោះឡើយ ប៉ុន្តែថែមទាំងមានផលប៉ះពាល់ចំពោះសម្រស់ជារួមរបស់ទីក្រុងផងដែរ។ ក្រុមនេះបានបង្កើតគំរូមួយដែលប្រែក្លាយសំណល់កាកអំពៅទៅជាជីកំប៉ុសសរីរាង្គ។ ជីវធម្មជាតិដែលផលិតនៅក្នុងមូលដ្ឋានជំនួសជីគីមី ពង្រឹងគុណភាពដំណាំ និងគាំទ្រដល់ការធំលូតលាស់របស់ផ្លែឈើ ផ្កា និងបន្លែប្រកបដោយសុខភាពល្អតាមវិធីដែលមិនប៉ះពាល់ដល់បរិស្ថាន។
ក្រុមរៀនក្រៅប្រព័ន្ធ៖ កំពុងបង្កើតថ្នាលនិទានរឿងតាមប្រព័ន្ធឌីជីថល ដែលចែករំលែកបទពិសោធន៍ជាក់ស្ដែងរបស់យុវជនអំពីការកសាងជីវិត ភាពបរាជ័យ ការដឹកនាំ និងការកាច់ចង្កូតជីវិត ពោលគឺមិនពាក់ព័ន្ធនឹងចំណាក់ថ្នាក់ ឬឋានៈឡើយ ប៉ុន្តែពាក់ព័ន្ធនឹងភាពក្លាហាន ភាពរីកចម្រើន មេរៀនដែលទទួលបាននៅក្រៅថ្នាក់រៀន។ ដោយប្រើប្រាស់បញ្ញាសិប្បនិម្មិត (AI) ថ្នាលនេះជួយយុវជនផ្សេងទៀតឱ្យរកឃើញសាច់រឿង និងការយល់ដឹងស៊ីជម្រៅ ដែលពួកគេអាចភ្ជាប់ទំនាក់ទំនងជាមួយបាន និងធ្វើឱ្យពួកគេមានអារម្មណ៍ដូចជាទទួលការណែនាំពីអ្នកណាម្នាក់ដែលធ្លាប់បានទៅដល់ទីនោះដែរ។ ពួកគេជឿជាក់ថា មេរៀនដ៏មានសំខាន់បំផុតទាំងនេះមិនតែងតែត្រូវបានបង្រៀនឡើយ ពោលគឺចំណេះដឹងទាំងនេះ គឺជាបទពិសោធន៍ជីវិត។
ក្រុមពន្លឺនាពេលរាត្រី៖ មានបេសកកម្មដើម្បីពង្រឹងផាសុកភាព និងសុវត្ថិភាពរបស់សហគមន៍នៅពេលរាត្រី ទោះជានៅតាមដងផ្លូវ ឬនៅក្នុងភូមិក្ដី។ គម្រោងនេះផ្ដោតការយកចិត្តទុកដាក់លើការធានាសុវត្ថិភាពរបស់បុគ្គលគ្រប់រូប ជាមួយនឹងការយកចិត្តទុកដាក់ជាពិសេសចំពោះស្រ្តីវ័យក្មេងដែលធ្វើដំណើរនៅពេលយប់។ ដំណោះស្រាយនេះពាក់ព័ន្ធនឹងកិច្ចសហការជាមួយអាជ្ញាធរមូលដ្ឋាន ដើម្បីដំឡើងភ្លើងបំភ្លឺសូឡាតាមផ្លូវ ដែលធ្វើឱ្យងាយមើលឃើញកាន់តែច្បាស់។
ក្រុមសប្បាយអាន៖ គម្រោងការអានពោរពេញទៅដោយភាពរីករាយ ដែលនាំយកសៀវភៅ និងសកម្មភាពរៀនសូត្របែបលេងកម្សាន្តសប្បាយទៅដល់កុមារនៅតំបន់ជនបទ។ នៅក្នុងសហគមន៍នានា ដែលសាលារៀនខ្វះបណ្ណាល័យ ហើយគ្រួសារមានលទ្ធភាពមានកម្រិតក្នុងការទទួលបានសៀវភៅ ក្រុមសប្បាយអានបង្កើតលំហប្រកបដោយការស្វាគមន៍ ដែលជំរុញឱ្យមានការស្រឡាញ់ការអាន កសាងជំនឿចិត្ត និងគាំទ្រដល់ការបង្ហាញអំពីខ្លួនឯង។ តាមរយៈសកម្មភាព ការនិទានរឿង និងវគ្គអំណាននៅក្នុងមូលដ្ឋាន គម្រោងនេះផ្ដល់ឱកាសអានទៅដល់កុមារតូចៗ ដែលជួយពួកគេអភិវឌ្ឍជំនាញអក្ខរកម្មដ៏ខ្លាំងក្លា និងកំណត់មូលដ្ឋានគ្រឹះសម្រាប់ភាពជោគជ័យនៅក្នុងសាលារៀន និងជីវិត។
ក្រុមសុខភាពយុវតី៖ ផ្ដល់ភាពអង់អាចជូនក្មេងស្រី និងស្រ្តីក្នុងការថែទាំសុខភាពរបស់ពួកគេ តាមរយៈការលើកទឹកចិត្តដល់ការត្រួតពិនិត្យសុដន់ដោយខ្លួនឯងជាប្រចាំ។ តាមរយៈសិក្ខាសាលា និងយុទ្ធនាការលើកកម្ពស់ការយល់ដឹង ពួកគេមានបំណងជួយក្មេងស្រី និងស្រ្តីឱ្យយល់អំពី សារសំខាន់នៃការរកឃើញទាន់ពេលនៅក្នុងការបង្ការជំងឺមហារីកសុដន់។ ពួកគេប្រើប្រាស់ព័ត៌មានច្បាស់ៗ និងសាមញ្ញៗ ដើម្បីបង្រៀនពួកគេអំពី របៀបត្រួតពិនិត្យរាងកាយរបស់ពួកគេ ការដឹងអំពីសញ្ញាដាស់តឿន និងស្វែងរកជំនួយវេជ្ជសាស្រ្តនៅពេលចាំបាច់។ តាមរយៈការផ្ដល់ចំណេះដឹង និងជំនឿចិត្តជូនពួកគេ ក្រុមនេះសង្ឃឹមថានឹងជំរុញទឹកចិត្តក្មេងស្រី និងស្រ្តីនៅក្នុងការការពារអាយុជីវិតរបស់ពួកគេផ្ទាល់។
ក្រុមអ្នកម្ដាយអស្ចារ្យ៖ មានបំណងលើកម្ពស់សុខុមាលភាពផ្លូវចិត្តរបស់ស្រ្តីមានផ្ទៃពោះ ដែលប្រឈមមុខនឹងការលំបាកផ្លូវចិត្ត ប៉ុន្តែមិនអាចបង្ហាញការលំបាកទាំងនោះបាន។ ក្រុមអ្នកម្ដាយអស្ចារ្យនឹងនិយាយជំនួសមុខស្រ្តីទាំងនេះ និងផ្ដល់សារអប់រំទៅដល់សង្គម ពោលគឺ ដើម្បីស្ដាប់ យល់ និងបង្ហាញការយកចិត្តទុកដាក់ចំពោះស្រ្តី ដែលកំពុងនាំយកជីវិតថ្មីចូលមកនៅក្នុងពិភពលោកនេះ ដោយហេតុនេះ ទាំងម្ដាយ និងទារក/ទារិកាអាចមានសុខុមាលភាពពេញលេញ និងប្រកបដោយសុខភាពល្អ។
Meet the project ជួបជាមួយអ្នកណែនាំរបស់គម្រោង!
Green Miracle
Tea Thierry គឺជាសហគ្រិន និងនាយកប្រតិបត្តិមួយរូប ដែលមានបទពិសោធន៍ជាង ២០ឆ្នាំនៅក្នុងវិស័យអាកាសចរណ៍ ហេដ្ឋារចនាសម្ព័ន្ធ ទុនវិនិយោគផ្សងគ្រោះថ្នាក់ និងបច្ចេកវិទ្យា។ ក្នុងនាមជានាយករងនៃក្រុម OCIC (សាជីវកម្មនិយោគកម្ពុជានៅបរទេស) ព្រមទាំងស្ថាបនិក និងវិនិយោគិននៅ Negotia Capital គាត់គាំទ្រដល់ការចាប់ផ្ដើមធុរកិច្ចថ្មីចំនួនជា ៣០ នៅក្នុងវិស័យបច្ចេកវិទ្យាហិរញ្ញវត្ថុ លំហអាកាស បច្ចេកវិទ្យាស្អាត និងបច្ចេកវិទ្យាពាក់ពន្ធនឹងទ្រព្យ ដោយផ្តោតលើភាពលូតលាស់ប្រកបដោយចីរភាព និងនវានុវត្តន៍បច្ចេកវិទ្យានៅក្នុងវិស័យចល័តភាពផ្លូវអាកាសតាមទីក្រុង លំហអាកាស និងកសិកម្ម។ គាត់ផ្ដល់ការណែនាំយ៉ាងសកម្មដល់សហគ្រិនវ័យក្មេង ហើយពីមុន គាត់ដើរតួនាទីជានាយកប្រតិបត្តិនៃ Airbus Group នៅប្រទេសហ្វីលីពីន។ គាត់ក៏ជានាយកប្រតិបត្តិរងនៃ Connexion Tech Hub និងសហស្ថាបនិកនៃគំនិតផ្ដួចផ្ដើម Green Oasis Initiative ផងដែរ។
D-Mental Girls
Alejandra Martinez Zavala គឺជានាយិកាគ្លីនិកព្យាបាលកុមារពហុជំនាញមួយកន្លែង ដែលផ្ដល់ការព្យាបាលការនិយាយ និងភាសា ការព្យាបាលមុខងារ កាវិភាគទៅលើអាកប្បកិរិយា និងសេវាចិត្តសាស្រ្ត។ គាត់មានបទពិសោធន៍ព្យាបាលការនិយាយរយៈពេលជាង១០ឆ្នាំ ដោយគាំទ្រដល់កុមារមានពិការភាពនៅតាមបរិបទវប្បធម៌ចម្រុះនៅប្រទេសកម្ពុជា និងប្រទេសដទៃទៀត ហើយគាត់មានអារម្មណ៍ខ្លាំងក្លាចំពោះភាពរីកលូតលាស់របស់អង្គការប្រកបដោយចីរភាព ការអភិវឌ្ឍទេពកោសល្យ និងការជំរុញគំនិតផ្ដួមផ្ដើមដែលមានផលជះចំពោះសង្គម។
Hyper Healer
Constanza González Vásquez គឺជាចិត្តវិទូផ្នែកគ្លីនិកដែលបានចុះបញ្ជីនៅប្រទេសឈីលី ដោយមានបទពិសោធន៍អន្តរជាតិជាងមួយទសវត្សរ៍នៅក្នុងវិស័យកិច្ចគាំពារសង្គម និងការថែទាំសុខភាពនៅក្នុងប្រទេសឈីលី អាហ្សង់ទីន ប្រេស៊ីល សហរដ្ឋអាមេរិក ហ្វីលីពីន និងកម្ពុជា។ នៅកម្រិតការអនុវត្តផ្ទាល់ខ្លួនរបស់គាត់ គាត់ព្យាយាមជួយដល់ប្រជាជនមានវប្បធម៌ចម្រុះក្នុងការឆ្លងកាត់បញ្ហាប្រឈមក្នុងជីវិត និងជំរុញភាពរីកចម្រើនប្រកបដោយអត្ថន័យ។ ទោះជានៅក្នុងការព្យាបាល ឬតាមរយៈការងារស្ម័គ្រចិត្តរបស់គាត់ក្ដី គាត់មានការប្ដេជ្ញាចិត្តជ្រាលជ្រៅចំពោះការលើកកម្ពស់សុខភាព និងសុខុមាលភាពផ្លូវចិត្តប្រកបដោយសេចក្ដីថ្លៃថ្នូរ បរិយាបន្ន និងឆ្លើយតបចំពោះវប្បធម៌។
Empower Girls
Lay Sivhuang គឺជាកម្លាំងប្រកបដោយថាមវ័ន្តនៅក្នុងប្រព័ន្ធអេកូឡូស៊ីបច្ចេកវិទ្យាអាស៊ីអឺរ៉ុប ដែលមានបទពិសោធន៍រយៈពេលជាង ១២ឆ្នាំក្នុងការផ្សារភ្ជាប់នវានុវត្តន៍ Silicon Valley ជាមួយនឹងទីផ្សារអាស៊ីអាគ្នេយ៍។ ជំនាញរបស់គាត់លាតសន្ធឹងពីបច្ចេកវិទ្យា NGC ដ៏ទំនើបប្រឆាំងភាពក្លែងបន្លំ ការកាត់សង្វាក់បច្ចេកវិទ្យាហិរញ្ញវត្ថុ ភស្តុភារឆ្លាត បរិវត្តកម្មពាណិជ្ជកម្មតាមប្រព័ន្ធអេឡិចត្រូវនិក និងបដិវត្តន៍បច្ចេកវិទ្យាអប់រំ។ ក្នុងនាមជានាយិកាគ្រប់គ្រងនៃ Dichi Academy គាត់នាំយកការបណ្ដុះបណ្ដាលបច្ចេកវិទ្យា Silicon Valley ទាំងស្រុងមកកម្ពុជា ដែលជាការកំណត់ឡើងវិញនូវទេពកោសល្យឌីជីថលរបស់ប្រទេសនេះ។ ឥទ្ធិពលរបស់គាត់ពង្រីកទៅដល់តួនាទីផ្ដល់ប្រឹក្សាជូនរដ្ឋាភិបាលជាមួយនឹងក្រសួងប្រៃសណីយ៍ និងទូរគមនាគមន៍ និងភាពជាអ្នកដឹកនាំក្នុងនាមជាប្រធានសមាគម Erasmus Mundus នៅកម្ពុជា។
Neary Flow
Sarah Udin កំពុងធ្វើបរិវត្តកម្មសុខភាពក្នុងពេលមានរដូវនៅទូទាំងប្រទេសកម្ពុជាតាមរយៈ Amala Periods ជាសហគ្រាសសង្គមមួយ ដែលគាត់បានបង្កើតឡើងនៅឆ្នាំ២០២១ នៅរាជធានីភ្នំពេញ។ តាមរយៈការផ្ដល់ផលិតផលសម្រាប់ពេលមានរដូវដែលអាចប្រើប្រាស់ឡើងវិញបាន គាត់បានឈ្នះពានរង្វាន់ក្រុមសហគ្រិនភាពនៃអ៊ីមផេកហាប់ (Impact Hub Entrepreneurship Panel Award) និងនៅពេលបច្ចុប្បន្ន ផ្តោតលើសម្លៀកបំពាក់ក្នុងសម្រាប់ពេលមានរដូវដែលផលិតនៅក្នុងស្រុក ស្របពេលដែលបន្តបរិច្ចាគ និងអប់រំអំពីការមានរដូវទៅដល់សាលារៀនក្នុងមូលដ្ឋាន និងអង្គការមិនមែនរដ្ឋាភិបាល។ ដោយមានប្រវត្តិសាវតារក្នុងវិស័យធុរកិច្ចប្រកបដោយចីរភាព ការអប់រំ និងការរៀបចំព្រឹត្តិការណ៍ផ្សេងៗ Sarah មានភាពរំភើបចិត្តក្នុងការចែករំលែកចំណេះដឹងរបស់គាត់ជាមួយនឹងសហគ្រិនជំនាន់បន្ទាប់ពាក់ព័ន្ធនឹងការមានរដូវ។
ក្រុមស្រឡាញ់ក្មេង
Dixon Siu: លើកកម្ពស់ និងប្រតិបត្តិអភិបាលកិច្ចលើបញ្ញាសិប្បនិម្មិត (AI) នៅ Fujitsu ក្នុងប្រទេសជប៉ុន។ គាត់បានរៀបចំសិក្ខាសាលាស្ដីពីសុវត្ថិភាពតាមប្រព័ន្ធអនឡាញសម្រាប់កុមារ និងលើកកម្ពស់សិទ្ធិមនុស្សតាមប្រព័ន្ធឌីជីថល និងការចែករំលែកទិន្នន័យប្រកបដោយក្រមសីលធម៌ទាំងនៅ Fujitsu និងអង្គការសង្គមស៊ីវិល។
4 Youth
Chhay Sophorn ជាជនជាតិកម្ពុជាមានសញ្ជាតិបារាំង គាត់មានបទពិសោធន៍ជាង២០ឆ្នាំនៅក្នុងស្រាវជ្រាវវិទ្យាសាស្រ្ត ធុរកិច្ចគ្រឿងប្រណិត និងសមាគមធុរកិច្ច។ នៅពេលបច្ចុប្បន្ន គាត់ដឹកនាំក្រុមហ៊ុន HR CODE ដែលជាក្រុមហ៊ុនជ្រើសរើសបេក្ខជន/បេក្ខនារីល្អបំផុតសម្រាប់ការងារ និងពិគ្រោះយោបល់អំពីធនធានមនុស្ស បន្ទាប់ពីកាន់តួនាទីជាន់ខ្ពស់នៅ IBC និង EuroCham ។ ក្នុងនាមជាទីប្រឹក្សាធុរកិច្ច គាត់គាំទ្រដល់សហគ្រាសខ្នាតតូច និងមធ្យម (SMEs) និងការចាប់ផ្ដើមធុរកិច្ចនៅក្នុងវិស័យការស្រាវជ្រាវ និងការអភិវឌ្ឍ (R&D) សេវាអាហារ និងភេសជ្ជៈ (F&B) សំណង់ ការអប់រំ និងអាកាសចរណ៍។ ដោយមានទំនាក់ទំនងល្អនៅទូទាំងប្រទេសកម្ពុជា និងអាស៊ីអាគ្នេយ៍ Sophorn មានតួនាទីនៅក្នុងក្រុមប្រឹក្សាភិបាលនៅ Platform Impact, គណៈកម្មាធិការធនធានមនុស្សនៃ EuroCham សភាពាណិជ្ជកម្មបារាំង ស្ថានកុងស៊ុលបារាំងនៅកម្ពុជា និងក្លឹបវិនិយោគភ្នំពេញឯកជន។
ក្រុមថាមវ័ន
Path Heang គឺជាអ្នកឯកទេសផ្នែកគោលនយោបាយសង្គមជាមួយយូនីសេហ្វប្រចាំកម្ពុជា ដែលគាំទ្រដល់កំណែទម្រង់វិមជ្ឈការ និងវិសហមជ្ឈការ (D&D) របស់រដ្ឋាភិបាល។ ចាប់តាំងពីឆ្នាំ២០០៩ គាត់បានដើរតួនាទីអ្នកឯកទេសផ្នែកអភិវឌ្ឍន៍យុវជន ប្រធានការិយាល័យមូលដ្ឋាន និងអ្នកឯកទេសកម្មវិធី D&D និងនគរូបនីយកម្ម។ ពីមុន គាត់បានធ្វើការងារជាមួយនឹង UNDP ធនាគារពិភពលោក និង ILO ជាសមាជិកបង្កើតក្រុមប្រឹក្សាអាជ្ញាកណ្ដាលការងាររបស់ប្រទេសកម្ពុជា។
ក្រុមរៀនក្រៅប្រព័ន្ធ
Chanda Pen មានអាជីពការងាររយៈពេល ២០ឆ្នាំនៅក្នុងការអភិវឌ្ឍផលិតផល និងការរចនាប្រព័ន្ធ ដែលនាំមកនូវចំណង់ចំណូលចិត្តចំពោះបច្ចេកវិទ្យា ការទូទាត់ប្រាក់តាមប្រព័ន្ធអេឡិចត្រូនិក និងប្រព័ន្ធអេកូឡូស៊ីនៃការចាប់ផ្ដើមធុរកិច្ចថ្មីៗ។ ពីមុន គាត់បានដឹកនាំគំនិតផ្ដួចផ្ដើមអភិវឌ្ឍន៍កម្លាំងការងារឌីជីថលរបស់ USAID ក្នុងនាមជាប្រធាន (Chief of Party) ដែលផ្ដោតការយកចិត្តទុកដាក់លើការពង្រឹងការអប់រំបច្ចេកទេសនៅកម្ពុជា។ Chanda បានសហការបង្កើត និងបានចាកចេញពី Bongloy ដែលជាក្រុមហ៊ុនបច្ចេកវិទ្យាហិរញ្ញវត្ថុនៅអាស៊ីអាគ្នេយ៍ នៅឆ្នាំ២០២១។ គាត់បានកាន់តួនាទីលេចធ្លោនានា ដូចជា សមាជិកក្រុមប្រឹក្សានៃសមាគមធនាគារនៃកម្ពុជា ប្រធានគណៈកម្មាធិការក្រុមការងារ KHQR ជាតិ និងប្រធានសមាគមហិរញ្ញវត្ថុ និងបច្ចេកវិទ្យាកម្ពុជា។ បច្ចុប្បន្ន Chanda បង្រៀនអំពីបច្ចេកវិទ្យាហិរញ្ញវត្ថុនៅសាកលវិទ្យាល័យជាតិគ្រប់គ្រង និងដើរតួនាទីជានាយកឯករាជ្យនៅក្នុងក្រុមប្រឹក្សានៃធនាគារ Phillip Bank ។
ក្រុមអនាគតកូនយើង
Chhay Vivodin គឺជាអ្នកឯកទេសផ្នែកអភិវឌ្ឍន៍សហគមន៍កម្ពុជា ដែលមានបទពិសោធន៍រយៈពេលជាង ២០ឆ្នាំនៅក្នុងការដឹកនាំកម្មវិធី ការកសាងសមត្ថភាព និងកិច្ចការពារសុវត្ថិភាព។ គាត់បានរចនា និងសម្របសម្រួលការបណ្ដុះបណ្ដាលគ្រូបង្គោល (ToT) សម្រាប់មន្រ្តីរដ្ឋាភិបាល អង្គការមិនមែនរដ្ឋាភិបាល និងក្រុមសហគមន៍អំពី ប្រធានបទនានា រួមមាន កិច្ចការពារកុមារ ការទប់ស្កាត់អំពើហិង្សាទាក់ទងនឹងយេនឌ័រ ការចិញ្ចឹមកូនបែបវិជ្ជមាន ចំណេះដឹងហិរញ្ញវត្ថុ និងការផ្ដល់ប្ដូរអាកប្បកិរិយាសង្គម។ គាត់បានទទួលការទទួលស្គាល់ពី ILO ថាជាគ្រូបង្គោលជាតិអំពីការអប់រំហិរញ្ញវត្ថុ និងការទទួលស្គាល់ពីក្រសួងកិច្ចការនារី ថាជាគ្រូបណ្ដុះបណ្ដាលបង្គោលអំពីការចិញ្ចឹមកូនបែបវិជ្ជមាន។
ក្រុមអនាគតកូនយើង
Prak Sopheap គឺជាអ្នកវិជ្ជាជីវៈការងារសង្គមកិច្ច ដែលមានសញ្ញាបត្របរិញ្ញាបត្រជាន់ខ្ពស់ និងបទពិសោធន៍រយៈពេលប្រាំបួនឆ្នាំក្នុងវិស័យកិច្ចការពារកុមារ ការអភិវឌ្ឍកុមារតូច និងការគ្រប់គ្រងគម្រោងរបស់អង្គការមិនមែនរដ្ឋាភិបាល។ គាត់មានឯកទេសនៅក្នុងការអនុវត្តកម្មវិធីផ្អែកលើសិទ្ធិបែបរួមបញ្ចូលគ្នា ដែលលើកកម្ពស់បរិយាកាសសុវត្ថិភាពសម្រាប់កុមារងាយរងគ្រោះ និងពង្រឹងភាពធន់របស់សហគមន៍។ ការងាររបស់គាត់ទទួលបានការជំរុញពីការប្ដេជ្ញាចិត្តក្នុងការបំបែកវដ្ដនៃភាពក្រីក្រ និងការជំរុញផលជះប្រកបដោយចីរភាពចំពោះសហគមន៍។
ក្រុមអ្នកម្ដាយអស្ចារ្យ
Somontha Koy មានបទពិសោធន៍រយៈពេល ២០ឆ្នាំនៅក្នុងវិស័យសុខភាពសាធារណៈជាមួយអង្គការអន្តរជាតិ និងទីភ្នាក់ងារសហប្រជាជាតិ (Jhpiego, FHI 360, ITECH, ធនាគារពិភពលោក URC, Intervida International, WHO, IOM) ដោយគាត់ដើរតួនាទីជាប្រធានផ្នែកសុខភាព អ្នកគ្រប់គ្រង និងអ្នកដឹកនាំក្រុម។ បច្ចុប្បន្ន គាត់ជាអនុប្រធាន (Deputy Chief of Party) សម្រាប់គម្រោងប្រទេស MOMENTUM និងភាពជាអ្នកដឹកនាំសកលនៅកម្ពុជា។ គាត់មានបទពិសោធន៍ពាក់ព័ន្ធនឹងអាហារូបត្ថម្ភ សុខភាពមាតា និងទារក (MCH សុខភាពផ្លូវចិត្ត សុខភាពទេសន្តរប្រវេសន៍ ការពង្រឹងប្រព័ន្ធសុខាភិបាល និងការអប់រំមុនពេលចូលបម្រើការងារ ជាមួយនឹងបទពិសោធន៍រយៈពេល ១០ឆ្នាំនៅក្នុងបរិយាកាសគ្លីនិកជាប្រធានគិលានុបដ្ឋាយិការផ្នែកសង្គ្រោះបន្ទាន់ និងអ្នកប្រតិបត្តិការធ្វើរោគវិនិច្ឆ័យ និងការព្យាបាលតាមប្រព័ន្ធទូរគមនាគមន៍។
ក្រុមអ្នកម្ដាយអស្ចារ្យ
វេជ្ជបណ្ឌិត Khine Haymar Myint នាំមកនូវជំនាញឯកទេសរយៈពេលជាង ១៦ឆ្នាំនៅក្នុងវិស័យសុខភាពមាតា និងទារក ការពង្រឹងប្រព័ន្ធសុខាភិបាល ព្រមទាំងការពិនិត្យតាមដាន និងការវាយតម្លៃ។ បច្ចុប្បន្ន គាត់ជាប្រធានផ្នែកពិនិត្យតាមដាន វាយតម្លៃ និងរៀនសូត្រ (MEL) នៅ Jhpiego ប្រចាំប្រទេសមីយ៉ាន់ម៉ា និងកម្ពុជា ដែលគាត់ដឹកនាំយុទ្ធសាស្រ្តដែលត្រូវរៀបចំឡើងដោយផ្អែកលើទិន្នន័យ ដើម្បីកែលម្អលទ្ធភាពសុខភាពនៅតាមសហគមន៍ចម្រុះគ្នា។ អាជីពការងាររបស់គាត់លាតសន្ធឹងពីតួនាទីបច្ចេកទេស និងតួនាទីដឹកនាំនៅប្រទេសមីយ៉ាន់ម៉ា និងកម្ពុជា រួមទាំងការដឹកនាំគំនិតផ្ដួចផ្ដើមកម្លាំងការងារសុខភាពជាតិ និងការពិនិត្យតាមដានបុគ្គលិកសុខាភិបាលជួរមុខ។ គាត់មានបំណងខ្លាំងក្លាក្នុងការគាំទ្រដល់ស្រ្តីអ្នកដឹកនាំនៅក្នុងការបង្កើតការផ្លាស់ប្ដូរសហគមន៍ប្រកបដោយអត្ថន័យ។
ក្រុមសុខភាពយុវតី
Lauren Shear Zinner បានចូលរួមជាមួយយូនីសេហ្វប្រចាំកម្ពុជាជាអ្នកឯកទេសផ្នែកសុខភាពនៅខែមករា ឆ្នាំ២០២៥ បន្ទាប់ពីកាន់តួនាទីបច្ចេកទេស និងដឹកនាំជាងមួយទសវត្សរ៍នៅប្រទេសម៉ាឡាវី លីប៊ី មីយ៉ាន់ម៉ា និងអ៊ុយក្រែន។ គាត់បាននាំមកនូវបទពិសោធន៍ទូលំទូលាយក្នុងការធ្វើការងារជាមួយរដ្ឋាភិបាល ដើម្បីកសាង និងកែទម្រង់ប្រព័ន្ធសុខភាពសាធារណៈ រៀបចំគោលនយោបាយដោយផ្អែកលើទិន្នន័យ បង្កើនសមាហរណកម្ម លើកកម្ពស់នវានុវត្តន៍ និងកសាងសមត្ថភាពនៅក្នុងវិស័យជំងឺឆ្លង និងជំងឺមិនឆ្លង សុខភាពមាតា និងការពង្រឹងប្រព័ន្ធសុខាភិបាល។
ក្រុមសប្បាយអាន
Huon Sothearoath គឺជាអ្នកជំនាញផ្នែកបណ្ណាល័យនៅសមាគមអ្នកស្ម័គ្រចិត្ត Shanti តាំងពីឆ្នាំ១៩៩៥ មក ហើយបច្ចុប្បន្ន គាត់សម្របសម្រួលគម្រោងផ្សព្វផ្សាយអំពីការអាន និងការអប់រំកុមារតូច។ គាត់បានដើរតួនាទីជាអ្នកណែនាំនៅបណ្ដាល័យ (២០០៤-២០១៣) សាលាបណ្ដុះបណ្ដាលនៅខេត្តបន្ទាយមានជ័យ កំពង់ធំ និងសៀមរាប និងបានសហការជាមួយនាយកដ្ឋាននានារបស់ក្រសួងអប់រំក្នុងការរៀបចំសៀវភៅមគ្គុទ្ទេសក៍សម្រាប់បណ្ណាល័យ (២០០៨) បទដ្ឋានបណ្ណាល័យនៅសាលារៀនបឋមសិក្សា (២០០៩-២០១១) និងសម្ភារៈសម្រាប់ទិវាអំណានជាតិ (២០១២)។ គាត់ គឺជាសមាជិកសកម្មភាពនៃគណៈកម្មាធិការការតាំងពិពណ៌សៀវភៅកម្ពុជាចាប់តាំងពីឆ្នាំ២០១៣ មក។
ក្រុមពន្លឺនាពេលរាត្រី
Ol Chin គឺជាអ្នកឯកទេសផ្នែកថាមពលកកើតឡើងវិញនៅ CAPRED ដែលកំពុងគាំទ្រដល់អន្តរកាលរបស់កម្ពុជាទៅរកថាមពលបៃតង។ គាត់ធ្វើការងារជាមួយរាជរដ្ឋាភិបាលកម្ពុជាក្នុងការកែលម្អការគ្រប់គ្រងថាមពលកកើតឡើងវិញ លើកកម្ពស់សមាហរណកម្ម និងជំរុញវិស័យឯកជនឱ្យវិនិយោគលើប្រសិទ្ធផលថាមពល។ ជាមួយនឹងបទពិសោធន៍ពីមុននៅក្នុងក្រុមហ៊ុនថាមពលពន្លឺព្រះអាទិត្យ គាត់ប្ដេជ្ញាចិត្តចំពោះការជំរុញដំណោះស្រាយថាមពលបៃតងតម្លៃសមរម្យ ដើម្បីជួយកម្ពុជាដោះស្រាយការប្រែប្រួលអាកាសធាតុ។
ក្រុមច្នៃ
Sam Phalla មានបទពិសោធន៍រយៈពេលជាង ២៧ឆ្នាំលើការគ្រប់គ្រងសំណល់ និងវដ្ដនៃការធ្វើជីកំប៉ុស ក្នុងនាមជាប្រធានអង្គការ COMPOSTED ជាអង្គការមិនមែនរដ្ឋាភិបាលកម្ពុជាមួយ ដែលផ្ដោតលើការកសាងសមត្ថភាព និងការគ្រប់គ្រងសំណល់ប្រកបដោយចីរភាព។ គាត់បានអនុវត្តដោយជោគជ័យនូវគម្រោង “គ្មានសំណល់នៅកោះទ្រុង” ក្នុងនាមទីប្រឹក្សាជាតិសម្រាប់ 3RproMar ជាមួយអង្គការ GIZ ។ តាំងពីឆ្នាំ១៩៩៧មក អង្គការ COMPOSTED បានកែច្នៃសំណល់សរីរាង្គចំនួន ៥-១០តោនជារៀងរាល់ថ្ងៃ ទៅជាជីកំប៉ុស និងបានដាក់ដំណើរការសកម្មភាពសម្អាតប្លាស្ទិកនៅខេត្តបាត់ដំបង កំពង់ចាម និងក្រចេះ ដោយប្រមូលសំណល់ពីស្ទឹងសង្កែ និងទន្លេមេគង្គ ដោយមានការគាំទ្រពីអង្គការផែនដីមួយ មហាសមុទ្រមួយ (One Earth – One Ocean)។