बालबालिका र कोभिड-१९

कोभिड-१९को संक्रमण भएका धेरैजसो बालबालिकामा लक्षणहरू नदेखिन सक्छ वा उनीहरूमा सामान्य लक्षण देखिन सक्छ । लक्षण भएका बालबालिका मध्ये केहीलाई अस्पताल भर्ना गर्नपर्ने हुन सक्छ भने केही बालबालिका सिकिस्त बिरामी हुन सक्छन् । यस्ता बालबालिकालाई पूर्ण हेरचाहको आवश्यकता हुन्छ ।

परिवारका सदस्यको  कोभिड-१९ परीक्षणको नतिजा पोजेटिभ आउँदा परिवारका सबै सदस्यको परीक्षण गर्नुपर्ने र त्यस्तो परीक्षणमा सामान्यतः लक्षण नभएका तर संक्रमण भएका बालबालिकाको पहिचान हुने गर्दछ । यस्ता बालबालिकालाई होम आइसोलेसनमा रहँदा चिकित्सकको निर्देशन अनुसार लक्षणहरूको विकास र गाम्भीर्यताका आधारमा उपचार आवश्यकता भए/नभएको अनुगमन गर्नु बाहेक कुनै उपचारको आवश्यकता हुँदैन ।

सामान्य लक्षण भएका बालबालिकामा ज्वरो, खोकी, श्वास-प्रश्वासमा समस्या, थकान, मांशपेशी दुख्ने, नाकको दुखाइ, घाँटीमा खसखसावट, पखाला, गन्ध तथा स्वाद हराउने लगायत हुन सक्छ । यस्ता बालबालिकालाई घरमै होम आइसोलेसन गरी व्यवस्थित गर्न सकिन्छ र  चिकित्सकको निर्देशनमा व्यवस्थित उपचार गर्न सकिन्छ  ।

यदि तपाईँ  कोभिड-१९को संक्रमण भएका बालबालिकाको हेरचाह गरिरहनु भएको छ भने;

🍎 बिरामी नानीले प्रशस्त झोलिलो र पोषणयुक्त खानेकुरा खान्छ र आराम गर्छ भन्ने कुरा सुनिश्चित गर्नुहोस् ।

😷 बिरामी नानीको साथ एकै कोठामा हुँदा मेडिकल मास्क लगाउनुहोस् । मास्क प्रयोगको क्रममा मास्क वा अनुहार नछुनुहोस् र प्रयोग पछि सुरक्षित ठाउँमा फालिदिनुहोस् । यदि तपाईँको नानी पाँच वर्ष भन्दा माथिको छ भने, उसको नजिक जाँदा उसलाई पनि मास्क लगाउन दिनुहोस् ।

💦 विषेशगरी निम्न अवस्थापछि साबुनपानीले नियमित हात धुने वा गुणस्तरीय स्यानिटाइजरले हात सफा गरिरहने गर्नुहोस्;

• बिरामी नानीसँगको सम्पर्क वा उसको नजिक गएपछि
• खाना पकाउनु भन्दा अगाडि, पकाइरहेका अवस्थामा र पकाइसकेपछि
• खाना खानु अगाडि
• शौचालय प्रयोग गरिसकेपछि

🥄 बिरामी नानीको लागि छुट्टै भाँडा, कप, थाल कचौरा, तौंलीया (रुमाल) र तन्नाहरू प्रयोग गर्नुहोस् । बिरामी नानीले प्रयोग गरेका भाँडाहरु, थाल कचौरा, गिलास तौंलीया अथवा तन्नाहरू साबुन पानीले सफासँग धुनुहोस् ।

🧼 बिरामी नानीले प्रायः छुने स्थानहरूको पहिचान गर्नुहोस् र तिनीहरूलाई दैनिक निर्मलीकरण गरी सफा गर्नुहोस् ।

☎️ बिरामी नानीको अवस्था नाजुक भएमा वा श्वास-प्रश्वासमा समस्या भएमा तुरुन्तै नजिकको स्वास्थ्य संस्थामा सम्पर्क गर्नुहोस् ।

कोभिड-१९ बाट बिरामी बालबालिकाको हेरचाह गरिरहेका अभिभावक र हेरचाहकर्तालाई केही थप सुझावहरू;

• कोभिड-१९का बारेमा कुरा गर्नुहोस् । तपाईँको नानीले पहिले नै यस बारेमा केही सुनिसकेको होला। मौनता र गोप्यताले तपाईँको नानीको सुरक्षा गर्दैन, बरु इमानदारीता र खुलापनले गर्दछ । तपाईँले आफ्ना बालबालिकालाई राम्ररी बुझ्नुहुन्छ त्यसैले उनीहरूले कति बुझ्न सक्दछन् भन्ने कुरा सोच्नुहोस् ।
• सहयोगी हुनुहोस् । तपाईँको नानी डराउन वा अलमलमा पर्न सक्छ । उनीहरूले कस्तो महशुस गरिहेका छन्  भनेर   नीहरूलाई आफ्नो कुरा भन्ने वातावरण दिनुहोस् र साथै उनीहरूको सहयोगमा आफूसँगै रहेको छु भन्ने विश्वस्त पार्नुहोस् ।
• अस्थायी रुपमा अरुबाट भौतिक दूरी कायम गरेर परिवारका अन्य  सदस्यलाई सुरक्षित बनाउनु उसको महत्त्वपूर्ण काम हो भन्ने कुरा आफ्ना नानीलाई बुझाउनुहोस ।