განათლებისა და მეცნიერების სამინისტროში „მედიაწიგნიერების ფორმალურ განათლებაში ინტეგრირების“ პროექტის შედეგების პრეზენტაცია გაიმართა

თბილისი, საქართველო, 5 აპრილი, 2023 წ. კომუნიკაციების კომისიის(ComCom), გაეროს ბავშვთა ფონდისა და საქართველოს განათლებისა და მეცნიერების სამინისტროს ერთობლივი პროექტის, „მედიაწიგნიერების ფორმალურ განათლებაში ინტეგრირების“, შედეგებისა და სამომავლო გეგმების შესახებ იმსჯელეს განათლების და მეცნიერების სამინისტროში გამართულ შეხვედრაზე. ღონისძიება მისასალმებელი სიტყვით საქართველოს განათლებისა და მეცნიერების მინისტრმა, გიორგი ამილახვარმა, ComCom-ის წევრმა, ნათია კუკულაძემ და საქართველოში გაეროს ბავშვთა ფონდის წარმომადგენელმა, ღასან ხალილმა გახსნეს და მედიაწიგნიერების ფორმალურ განათლებაში ინტეგრირების მნიშვნელობაზე ისაუბრეს.

შეხვედრაზე წარადგინეს პროექტის ამ ეტაპზე არსებული შედეგები და დასახეს სამომავლო გეგმები.  ინიციატივის ფარგლებში შემუშავდა მედიაწიგნიერების საგანმანათლებლო სტანდარტი, სახელმძღვანელო და ტრენინგ-მოდული მასწავლებლებისთვის. გადამზადა 600-მდე პედაგოგი თბილისში, ბათუმში, ქუთაისში, ზუგდიდში, ზესტაფონში, ამბროლაურში, გორში, მცხეთაში, თელავში, ოზურგეთში, ჩოხატაურში, მარნეულში, ახალციხესა და პანკისში. შეხვედრის მონაწილე პედაგოგებმა ისაუბრეს ტრენინგებისა და საკუთარი გამოცდილების შესახებ.  შეხვედრის ბოლოს, მათ შესაბამისი სერტიფიკატები გადაეცათ.

მედიაწიგნიერება არჩევით საგნად შევა სასწავლო პროგრამაში მეათე კლასელებისთვის. მოსწავლეები გადამზადებული მასწავლებლების დახმარებით, ერთი სემესტრის განმავლობაში გაივლიან მედიაწიგნიერების საგანს, მიიღებენ ინფორმაციას მედიისა და ინფორმაციის ენის, ინფორმაციის დამუშავების და დეზინფორმაციის შესახებ. მოსწავლეები კონკრეტული რესურსებითა და უნარებით აღიჭურვებიან, თუ როგორ შეძლონ ინფორმაციის და ფაქტების გადამოწმება.

პროექტს „მედიაწიგნიერების ფორმალურ განათლებაში ინტეგრირება“ კომუნიკაციების კომისიასაქართველოს განათლებისა და მეცნიერების სამინისტროსთან თანამშრომლობით და გაეროს ბავშვთა ფონდის დაფინანსებით 2022 წლიდან ახორციელებს.