UNICEF mirëpret miratimin e Planit Nacional të Veprimit për të Drejtat e Fëmijëve 2025-2029

Shkup, 14 gusht 2025 — UNICEF-i mirëpret miratimin nga Qeveria të Planit Nacional të Veprimit për të Drejtat e Fëmijëve 2025–2029 - një udhërrëfyes për pasqyrimin e Konventës së OKB-së për të Drejtat e Fëmijëve në veprime konkrete, të cilat i sjellin dobi çdo fëmije. 

Me miratimin e këtij dokumenti, Qeveria përkushtohet t’i fuqizojë përpjekjet e saja në mbrojtjen, promovimin dhe respektimin e të drejtave të fëmijëve në Maqedoninë e Veriut.

UNICEF vlerëson angazhimet e veçanta të ndërmarra nga Qeveria për përmirësimin e mekanizmave të parandalimit dhe përgjigjes ndaj të gjitha formave të dhunës, abuzimit dhe neglizhencës; sigurimin e qasjes së barabartë në shërbimet shëndetësore, mbështetjen e shëndetit mendor dhe zhvillimin në fëmijëri të hershme; promovimin e arsimit gjithëpërfshirës dhe cilësor dhe të mundësive për mësim gjatë gjithë jetës; si dhe fuqizimin  fëmijëve për t’i shprehur pikëpamjet e tyre dhe për të ndikuar në vendimet që kanë të bëjnë me ta.

Ne gjithashtu e përshëndesim përfshirjen e masave të politikave për zvogëlimin e  varfërisë së fëmijëve në këtë Plan dhe përmirësimin e qasjes në shërbimet themelore sociale pa kurrfarë diskriminim. Zbatimi i Garancisë Evropiane për Fëmijë, e cila në veçanti ka në fokus varfërinë e fëmijëve dhe përjashtimin social, gjegjësisht rritjen e parashikuar të përfitimeve financiare për fëmijët prej 15%, mund të ndihmojë në adresimin e pabarazive midis fëmijëve. UNICEF-i pret që këto masa të kontribuojnë në një përfshirje më të madhe sociale dhe barazi midis fëmijëve.

Pikë referimi e rëndësishme e Planit është angazhimi për krijimin e një Komitet Nacional për të Drejtat e Fëmijëve. Krijimi i një organi të tillë, të përhershëm, me mandat për koordinimin e të gjitha aktivitetet dhe monitorimin e përmbushjes së detyrimeve të vendit sipas Konventës për të Drejtat e Fëmijëve ishte një nga rekomandimet kryesore të Komitetit për të Drejtat e Fëmijëve në observimet e tija përfundimtare të vitit 2022 për Maqedoninë e Veriut. Krijimi i organit dhe miratimi i planit nacional të veprimit i përmbushin standardet e rëndësishme të pranimit në BE, të përcaktuara në Udhërrëfyesin mbi sundimin e ligjit në vend.

UNICEF-i inkurajon autoritetet të sigurojnë që Plani në fjalë është më shumë se një dokument dhe i njëjti i disponon burimet e nevojshme për zbatimin e tij të plotë. Ne ngelim të përkushtuar në mbështetjen e Qeverisë dhe partnerëve tjerë, të angazhuar në gjallërimin e këtij Plani. Së bashku mund të sigurojmë që secilin fëmijë në vend t’i gëzojë të drejtat e tija të plota, të rritet në një mjedis me mundësi dhe dinjiteti dhe të kontribuojë në ndërtimin e një shoqërie të drejtë dhe gjithëpërfshirëse për të gjithë.