မြန်မာနိုင်ငံတွင် COVID ကာကွယ်ဆေးရရှိမှုအရှိန်အဟုန်မြှင့်ရန် ကြိုးပမ်းမှုများနှင့် စပ်လျဥ်း၍ GAVI၊ UNICEF နှင့် WHO တို့၏ ပူးတွဲကြေညာချက်

ရန်ကုန်၊ ၂၀၂၁ ခုနှစ်၊ စက်တင်ဘာလ (၃၀) ရက် - အရှေ့တောင်အာရှဒေသရှိ အခြားနိုင်ငံများနှင့် နှိုင်းယှဉ်လျှင် မြန်မာနိုင်ငံတွင် ရောဂါစစ်ဆေး ထိန်းချုပ်နိုင်မှု အကန့်အသတ်ရှိခြင်းနှင့်အတူ COVID ကာကွယ်ဆေးထိုးပေးနိုင်မှု နည်းပါးခြင်းသည် COVID-19 ရောဂါအပြင်းအထန်ပျံ့နှံ့ခြင်းကို ဖြစ်ပွားစေခဲ့ပါသည်။

ကူးစက်ရောဂါဖြစ်ပွားချိန်မှစ၍ မြန်မာနိုင်ငံတွင် COVID-19 ကူးစက်ခံရမှု ဖြစ်ရပ် ၄၆၀,၀၀၀ ကျော်ရှိပြီး ၁၈,၀၀၀ ကျော်ဦးရေ သေဆုံးခဲ့သည်ဟု အစီရင်ခံမှတ်တမ်းအရသိရှိခဲ့ပြီး မေလ ၁ရက်မှစ၍ ကူးစက်ခံရမှု ဖြစ်ရပ် ၃၁၈,၂၄၉ နှင့် သေဆုံးသူ ၁၄,၄၂၂ ဦးရေ ရှိခဲ့ပါသည်။ ယနေ့အထိ လူဦးရေ၏ ၆.၈ ရာခိုင်နှုန်းသာ COVID-19 ကာကွယ်ဆေးနှစ်ကြိမ် ထိုးထားပြီး နောက်ထပ် ၁၃.၁ ရာခိုင်နှုန်းသည် အနည်းဆုံး တစ်ကြိမ်ထိုးထားပါသည်။ COVID-19 ကာကွယ်ဆေးထိုးပေးခြင်းကို ကျယ်ကျယ်ပြန့်ပြန့် လုပ်ဆောင်နိုင်ခြင်းမရှိသေးလျှင်  ရောဂါကူးစက်မှုကာကွယ်နိုင်ခြင်းအခြေအနေ တိုးတက်စေမှုအားနှောင့်နှေးစေနိုင်ပါသည်။

ကုလသမဂ္ဂနှင့် ၎င်း၏ မိတ်ဖက်အဖွဲ့များ၏ COVID-19 ကာကွယ်ဆေးထိုးခြင်း အရှိန်အဟုန်မြှင့်ရန် ကြိုးပမ်းမှုတစ်ရပ်အနေဖြင့် COVAX¹ ပံ့ပိုးမှုနှင့် မြန်မာနိုင်ငံအတွက် COVID-19 ကာကွယ်ဆေး ၆.၂ သန်းကို ဦးစွာပဏာမခွဲဝေပေးထားခဲ့ပါသည်။ ၄င်းကာကွယ်ဆေးများကို WHO ၏ ဦးစားပေးလမ်းညွှန်ချက်များနှင့်အညီ ဖြန့်ဝေရပါမည် ဖြစ်ပါသည်။ 

၄င်းကာကွယ်ဆေးအထောက်အပံ့များကို မြန်မာနိုင်ငံအတွက် ခွဲဝေကူညီထောက်ပံ့ရန် နောက်ဆုံး အတည်ပြုခြင်းသည် မြန်မာပြည်သူများအားလုံးထံသို့ လူမျိုး၊ ကျားမ၊ လူမှုစီးပွားအဆင့်အတန်း၊ သို့မဟုတ် နိုင်ငံရေးနှီးနွယ်မှုအရ ခွဲခြားခြင်းမပြုဘဲ ဘက်မလိုက်သောပုံစံဖြင့် လိုအပ်သောအရှိန်အဟုန်၊ အတိုင်းအတာဖြင့် ပို့ဆောင်ပေးနိုင်ခြင်းရှိမရှိ အပေါ်တွင်မူတည်ပါသည်။ ထို့အပြင် ကာကွယ်ဆေးအတွက် သင့်လျော်သော အအေးခန်းများထားရှိနိုင်မှုနှင့် တာဝန်ထမ်းဆောင်မည့် ကျန်းမာရေးစောင့်ရှောက်မှုလုပ်သားများ၏ လုံခြုံရေးအတွက် အာမခံချက်များအပေါ်တွင်လည်း မူတည်မည် ဖြစ်ပါသည် ။

အထက်ပါကိစ္စနှင့်စပ်လျဉ်း၍ GAVI, UNICEF နှင့် WHO တို့သည် လိုအပ်သောအခြေအနေများ ပြည့်မှီစေနိုင်သည့် နည်းလမ်းများအားဖော်ထုတ်ရန်အတွက် အဓိကတာဝန်ရှိသည့် သက်ဆိုင်သူများနှင့် လက်ရှိတွေ့ဆုံဆွေးနွေးမှုများ လုပ်ဆောင်နေကြပါသည်။ ၄င်းဆွေးနွေးမှုသည် လူသားချင်း စာနာမှုဆိုင်ရာအထောက်အပံ့၏ အဓိကရည်မှန်းချက်ဖြစ်သော လူ့အသက်များအားကယ်တင်ခြင်းအား ဆက်လက်လုပ်ဆောင်သွားနိုင်ရန်နှင့် မြန်မာနိုင်ငံ၏ကာကွယ်ဆေးထိုးခြင်းစနစ် ပြန်လည်အသက်၀င်စေရန် အတွက် ဦးတည်သော ပထမခြေလှမ်းတစ်ခုဖြစ်ပါသည်။
________________________________________

[1] COVAX သည် ကမ္ဘာ့ကျန်းမာရေးအဖွဲ့ (WHO)၊ ကာကွယ်ဆေးထိုးခြင်းနှင့် ကမ္ဘာလုံးဆိုင်ရာ ကာကွယ်ဆေးထိုးနှံရေးမဟာမိတ်အဖွဲ့ (GAVI)၊ ကူးစက်ရောဂါကြိုတင်ပြင်ဆင်မှု ဆန်းသစ်တီထွင်မှုများအဖွဲ့ (CEPI) နှင့် ယူနီဆက်တို့အကြား ပူးပေါင်းဆောင်ရွက်မှုတစ်ခု ဖြစ်ပါသည်။ ၎င်းသည် COVID-19 ကာကွယ်ဆေးများအား တရားမျှတသော လက်လှမ်းမီစေမှုရရှိစေရန် ရည်ရွယ်ပါသည်။