Fandaharana ara-tsakafo ho an'ny ankizy/zatovo mba hialana amin’ny tsy fanjarian-tsakafo

Ny ady amin’ny tsy fanjarian-tsakafo eto Madagasikara dia miompana hatrany amin’ny zaza latsaky ny 5 taona ao anatin’ny 1000 andro voalohany amin’ny fiainana, amin’ny alàlan’ny fanomezana sakafo tsara ho an’ireo ho reny sy/na ho ray aman-dreny. Na izany aza, tokony ho marihina ihany koa ny vanim-potoanan'ny maha-zatovo, izay toe-javatra fanararaotra entina mampiroborobo ny fomba fisakafoanana sahaza, manohana ny fitomboana fanarenana sy ny fisorohana ny tsy fahampian-tsakafo.

Ny andraikitra faha-4 ao amin'ny Drafitrasa nasionaly momba ireo hetsika marolafy mahakasika ny fanjarian-tsakafo 2022-2026 ao amin'ny rafitra ara-pahasalamana araka izany dia mifantoka amin’ny fanentanana ireo tanora any an-tsekoly sy ivelan'ny sekoly mba hivoahana amin’ny zava-manahirana sarotra ialana manodidina ny tsy fanjarian-tsakafo sy hahazoana antoka fa ireo dingana mikasika ny fisorohana sy ny fitantanana dia madiva hifarana.

Raha jerena ny fomba fiasa ara-drafitra noraisin’ny politikam-pirenena vaovao mahakasika ny fanjarian-tsakafo, dia hita fa nivondrona ny ezaka natao mba hanentanana ny tanora ary nivondrona ireo fikambanana mpiara-miombon’antoka samihafa entina mifantoka amin’ny fandaharan’asa iray ara-tsakafo ho an’ny ankizy sy ny tanora.

Araka izany, teo ambany fitarihan’ny Birao Nasionaly misahana ny fanjarian-tsakafo, niaraka tamin’ny fanohanana ara-teknika sy ara-bola avy amin’ny UNICEF, tamin’ny alàlan’ny fanohanan’ny Komity nasionalin’i Soisa, ny adisisika notontosaina teny Amboasary dia nahafahana nampandray anjara ireo fitaleavana isam-paritra isankarazany tany amin’ny faritra Androy sy Anosy, amin’ny hetsika ho tanterahina mandritra ny 2 taona ho an’ny ady mahomby amin’ny tsy fanjarian-tsakafo. Ny solontenan’ny Minisiteran’ny Tanora sy ny Fanatanjahantena, ny Minisiteran’ny Fanabeazam-pirenena, ny Minisiteran’ny Fahasalamana, ny skoto ary ireo rafitra hafa manohana ny tanora teny an-toerana dia afaka namaritra ireo torolàlana ho an’ny fampiharana ny fandaharan’asa momba ny fanjarian-tsakafo ho an’ny ankizy sy ny tanora, amin’ny alàlan’ny soritr’asa mazava ho an’ny taona 2023 sy 2024. Natomboka ny fampiasana ny fitaovana enti-miasa manan-danja indrindra, ahitana fandaharam-pianarana ara-tsakafo ho an’ny ankizy sy ny tanora, izay mampivondrona ireo hetsika toy ny fanabeazana ara-tsakafo eny anivon’ny sekoly, fanofanana ara-tsakafo ho an’ireo tanora tsy afaka miditra an-tsekoly izay tanterahin’ny skoto sy ny tanora mpanabe ary koa ny famokarana fitaovam-pifandraisana hanohanana ny ady amin’ny tsy fanjarian-tsakafo.

Amin'izao dingana ankehitriny izao dia vita soa aman-tsara ireo dingana voalohany ilaina amin'ny fanatanterahana ilay fandaharan’asa. Antenaina ny hisian’ny fiantraika tsara sy maharitra ateraky ny fandraisana an-tanana ho amin’ny fanovana eo amin’ny ankizy miisa 400.000 eo ho eo any amin’ireo distrika tena iharan’ny hain-tany any atsimon’i Madagasikara, izay voakasik’izany fandaharan’asa izany.