Federata Ndërkombëtare e Kryqit të Kuq dhe Shoqëritë e Gjysmëhënës së Kuqe (IFRC), UNICEF dhe Organizata Botërore e Shëndetit (OBSH) publikuan sot udhëzimin e ri që i vjen në ndihmë mbrojtjes së fëmijëve dhe shkollave nga transmetimi i virusit COVID-19.

GJENEVË/NJU JORK, 10 mars 2020 – Federata Ndërkombëtare e Kryqit të Kuq dhe Shoqëritë e Gjysmëhënës së Kuqe (IFRC), UNICEF dhe Organizata Botërore e Shëndetit (OBSH) publikuan sot udhëzimin e ri që i vjen në ndihmë mbrojtjes së fëmijëve dhe shkollave nga transmetimi i virusit COVID-19. Udhëzimi përmban parashtrime kritike dhe lista kontrolli praktike për ruajtjen e sigurisë në shkolla. Ai i jep këshilla autoriteteve kombëtare dhe vendore rreth mënyrës se si t’i përshtatin dhe zbatojnë planet e emergjencës për strukturat arsimore.

Në rast të mbylljes së shkollave, udhëzimi jep disa rekomandime për zbutjen e ndikimeve negative të mundshme te të nxënit dhe mirëqenia e fëmijëve. Kjo do të thotë se duhet të kemi plane të konsoliduara për të siguruar vijimësinë e të nxënit, duke përfshirë edhe mundësitë e të nxënit në distancë si p.sh strategjitë e arsimimit përmes internetit dhe transmetimeve radiofonike të përmbajtjes akademike, apo aksesin në shërbime jetike për të gjithë fëmijët.  Këto plane duhet të përfshijnë edhe hapat e nevojshëm për rihapjen e sigurt të shkollave.

Në rast se shkollat qëndrojnë të hapura, për të siguruar mbrojtjen dhe informimin e fëmijëve dhe familjeve të tyre, udhëzimi bën thirrje që:

• fëmijët të informohen se si të mbrojnë veten;
• të promovohet praktika e larjes së duarve dhe mbajtjes së higjienës, si dhe ofrimi i artikujve higjienikë.
• të pastrohen dhe dezinfektohen shkollat, veçanërisht objektet e ujësjellës-kanalizimeve; dhe
• të promovohet ajrosja dhe ventilimi i ambienteve.

Udhëzimi, ndonëse specifik për vendet që e kanë konfirmuar tashmë përhapjen e virusit COVID-19, gjen zbatim edhe për vende të tjera. Arsimi mund t’i inkurajojë nxënësit që të advokojnë për parandalimin e sëmundjes dhe kontrollin e saj në shtëpi, shkollë dhe komunitet, duke diskutuar me të tjerët rreth mënyrës së parandalimit të përhapjes së viruseve. Operimi i sigurt i shkollave dhe rihapja e tyre kërkon kujdes të veçantë, po nëse realizohen siç duhet, mund të promovojnë shëndetin publik.

Për shembull, udhëzimet për shkollat e sigurta që u zbatuan në Guine, Liberi dhe Sierra Leone gjatë shpërthimit të sëmundjes së Ebolës për periudhën 2014-2016 ndihmuan në parandalimin e transmetimit me bazë shkollën të këtij virusi.

UNICEF i nxit shkollat, qofshin të hapura apo funksionale përmes të nxënit në distancë, që t’i ofrojë nxënësve mbështetje të gjithanshme. Shkollat duhet t’iu ofrojnë fëmijëve informacion jetik për larjen e duarve dhe masa të tjera për të mbrojtur jo vetëm veten, por edhe familjet; për të lehtësuar mbështetjen e ofruar për shëndetin mendor; si dhe për të parandaluar stigmatizimin dhe diskriminimin, duke i inkurajuar nxënësit që të tregohen të dashur ndaj njëri-tjetrit dhe të shmangin stereotipat në diskutimet e tyre rreth virusit.

Udhëzimi i ri përmban këshilla dhe lista kontrolli të dobishme për prindërit dhe kujdestarët, si dhe vetë fëmijët dhe nxënësit. Veprimet e rekomanduara përfshijnë:

• Mbikëqyrjen e shëndetit të fëmijës dhe qëndrimin e tyre në shtëpi duke mos i dërguar në shkollë nëse janë sëmurë;
• Inkurajimin e fëmijëve për të bërë pyetje dhe shprehur shqetësimet e tyre; dhe

Kollitjen apo teshtitjen në shami letre apo në cepin e bërrylit, si dhe shmangien e prekjes së fytyrës, syve, gojës dhe hundës.
 

Shkarkoni udhëzuesin: https://uni.cf/33hxaSd