Drejtori Rajonal i UNICEF Edouard Beigbeder viziton Shqipërinë
Forcimi i partneriteteve për avancimin e të drejtave të fëmijëve, zhvillimin e kapitalit njerëzor dhe reformat në përputhje me standardet e Bashkimit Evropian
Drejtori Rajonal i UNICEF-it, Edouard Beigbeder, viziton Shqipërinë për të avancuar zhvillimin e kapitalit njerëzor dhe për të përshpejtuar përparimin drejt standardeve evropiane për fëmijët dhe të rinjtë
Tiranë, Shqipëri, 31 korrik 2026 – Drejtori Rajonal i UNICEF-it për Evropën, Azinë Qendrore, Lindjen e Mesme dhe Afrikën e Veriut, Edouard Beigbeder, përmbylli një vizitë zyrtare në Shqipëri, duke rikonfirmuar angazhimin e UNICEF-it për të mbështetur përpjekjet e vendit në ndërtimin, mbrojtjen dhe zhvillimin e kapitalit njerëzor përmes investimeve tek fëmijët, adoleshentët dhe të rinjtë.
Gjatë vizitës, Drejtori Rajonal zhvilloi takime me drejtues të lartë të Qeverisë, përfaqësues të Bashkimit Evropian, autoritete vendore, organizata të shoqërisë civile, partnerë të zhvillimit dhe të rinj, për të diskutuar progresin e Shqipërisë dhe prioritetet për fëmijët, ndërsa vendi vijon rrugën drejt anëtarësimit në Bashkimin Evropian.
Vizita u përqendrua në forcimin e politikave, sistemeve dhe investimeve të nevojshme për të siguruar që çdo fëmijë të mbijetojë, të mësojë, të zhvillohet dhe të kontribuojë në mirëqenien dhe prosperitetin e ardhshëm të Shqipërisë.
"Pasuria më e madhe e Shqipërisë janë njerëzit e saj. Rritja ekonomike, konkurrueshmëria dhe kohezioni social i vendit në të ardhmen do të varen nga mënyra se si investon sot tek fëmijët dhe të rinjtë," tha Edouard Beigbeder.
"Ndërtimi i kapitalit njerëzor nënkupton që çdo fëmijë të ketë mundësinë të zhvillohet, të mësojë, të fitojë aftësi dhe të marrë pjesë plotësisht në jetën e shoqërisë."
Drejtori Rajonal vlerësoi përpjekjet e Shqipërisë për të harmonizuar reformat kombëtare me standardet evropiane dhe theksoi rëndësinë e integrimit të kuadrove të provuara evropiane, si Garancia Evropiane për Fëmijët dhe Garancia Rinore, në strategjitë kombëtare, planet e veprimit dhe procesin e anëtarësimit në Bashkimin Evropian.
"Garancia për Fëmijët dhe Garancia Rinore nuk janë vetëm politika sociale. Ato janë investime në kapitalin njerëzor. Këto nisma ndihmojnë vendet të reduktojnë pabarazitë, të zgjerojnë mundësitë dhe të forcojnë qëndrueshmërinë, duke garantuar që asnjë fëmijë apo i ri të mos mbetet pas."
Diskutimet gjatë vizitës nënvizuan se zhvillimi i kapitalit njerëzor kërkon veprim të koordinuar ndërmjet sektorëve dhe në të gjitha nivelet e qeverisjes. Partneritetet e forta mes institucioneve qendrore, bashkive, Bashkimit Evropian, organizatave të shoqërisë civile, akademisë, komuniteteve dhe sektorit privat janë thelbësore për të arritur rezultate të qëndrueshme për fëmijët.
Drejtori Rajonal vlerësoi angazhimin në rritje të Shqipërisë për forcimin e arsimit gjithëpërfshirës, sistemeve të mbrojtjes së fëmijëve, mbrojtjes sociale, zhvillimit në fëmijërinë e hershme, mirëqenies së adoleshentëve dhe lehtësimit të kalimit të të rinjve drejt punësimit, duke siguruar që fëmijët më të cenueshëm të përfitojnë nga këto reforma.
Vëmendje e veçantë iu kushtua fëmijëve që jetojnë në varfëri, fëmijëve me aftësi të kufizuara, fëmijëve romë dhe egjiptianë, fëmijëve të prekur nga migracioni, si edhe të rinjve që përballen me pengesa në arsim, zhvillimin e aftësive dhe punësim.
Në takimet me drejtuesit e pushtetit vendor, Drejtori Rajonal theksoi rolin vendimtar të bashkive në shndërrimin e politikave kombëtare në shërbime dhe mundësi konkrete për fëmijët dhe familjet.
Të rinjtë pjesëmarrës në nismat e mbështetura nga UNICEF ndanë aspiratat e tyre për të ardhmen e Shqipërisë dhe vizionin për një shoqëri ku çdo i ri ka akses në arsim cilësor, zhvillim aftësish, mundësi punësimi dhe pjesëmarrje kuptimplotë në vendimmarrje.
"Të rinjtë nuk janë vetëm përfitues të zhvillimit. Ata janë agjentë të ndryshimit dhe partnerë të domosdoshëm në ndërtimin e së ardhmes së Shqipërisë."
UNICEF mbetet i angazhuar të mbështesë ambicien e Shqipërisë për të ndërtuar një shoqëri të begatë, gjithëpërfshirëse dhe të qëndrueshme, duke forcuar kapitalin njerëzor të vendit dhe duke përshpejtuar përparimin për çdo fëmijë. Së bashku me Qeverinë e Shqipërisë, Bashkimin Evropian, bashkitë dhe organizatat e shoqërisë civile, UNICEF do të vazhdojë të mbështesë reforma dhe investime të bazuara në fakte, që vendosin fëmijët dhe të rinjtë në qendër të zhvillimit të vendit dhe të rrugëtimit të tij drejt integrimit evropian.
