НҮБ-ын Хүүхдийн Сан нийслэлийн 4 газарт хүүхдүүдийг баярлуулж байна

НҮБ-ын Хүүхдийн Сан жил бүр Хүүхдийн баярын өргөн дэлгэр тэмдэглэн өнгөрүүлдэг билээ. Энэ жил бид 4 байршилд ажиллан хүүхдүүдийг баярлуулж байна.

НҮБ-ын Хүүхдийн Сангаас Хүүхдийн ордоны параданд оролцож, Сүхбаатарын талбайн Хүүхдийн баярын нээлтийн үйл ажиллагаанд оролцож байна. Мөн НҮБ-ын Хүүхдийн Сангийн хотхон талбай дээр ажиллаж, хүүхдүүдэд зориулсан хөгжөөнт тоглоом, хүүхдийн эрхийн талаар мэдээлэл сурталчилгаа түгээх зэрэг олон үйл ажиллагаа боллоо.

Сүхбаатарын талбайн үйл ажиллагааны албан ёсны нээлтэд НҮБ-ын Суурин зохицуулагч Яап ван Хиердэ нээлтийн үг хэлж, НҮБ-ын Хүүхдийн Сангийн Суурин төлөөлөгч Эваристе Коуасси-Комлан болон тус сангийн Үндэсний элч Р.Мөнхтуяа, хүүхэд хамгаалал, боловсролын Элч Н.Мөнхнасан нар үйл ажиллагаанд оролцлоо. 

Мөн НҮБ-ын Хүүхдийн Сан Сонгинохайрхан дүүргийн  Хүүхэд залуучуудын театртай хамтран урлагийн тоглолт болон “Арслан хүлэгт баатар” хүүхдийн жүжгийг тус дүүргийн зорилтот 700 хүүхдэд зориулан тоглоллоо.   

Хамтарсан арга хэмжээнд НҮБ-ын Хүүхдийн Сангийн Хүүхдийн эрүүл мэнд, хөгжлийн Элч Н.Цэлмүүн оролцож, хүүхдийн баярын мэндчилгээ хүргэж, НҮБ-ын Хүүхдийн Сангийн нэрийн өмнөөс ирсэн хүүхдүүдэд Хүүхдийн эрхийн пасспорт бүхий бэлэг гардууллаа. 

Мөн НҮБ-ын Хүүхдийн Сангийн Элч “Ангууч” Баттөр Яармагийн Номин Макро Моллын гадаа болсон хүүхдийн баярын арга хэмжээнд оролцож, хүүхдүүдтэй уулзаж мэндчилгээ хүргэлээ.

НҮБ-ын Хүүхдийн Санг хоёр дах жилдээ Кидс Арт Фестивал арга хэмжээг, энэ жил Төв цэнгэлдэхийн Сурын талбайд хүүхдүүдэд зориулсан зураг авхуулах хэсэг, амрах булан тохижууллаа.

НҮБ-ын Хүүхдийн Сангаас Хүүхдийн эрхийн талаарх мэдлэг ойлголтыг нэмэгдүүлэх зорилгоор Хүүхдийн эрхийн пасспортыг 21 аймгийн хүүхдүүдэд хүргүүлэв.