Хүрээлэн буй орчин, агаарын бохирдол
Уур амьсгалын өөрчлөлт, байгаль орчны доройтол нь хүүхдийн эрхийг зөрчиж байна.
- English
- Mongolian
Тулгарч буй сорилтууд
Улаанбаатар хот – Монгол улсын нийт хүн амын тал нь амьдардаг - дэлхийн хамгийн бохирдол ихтэй нийслэл хотуудын нэг. Жилийн хамгийн хүйтэн өдөр PM2.5 бохирдлын өдрийн дундаж шоо метрт 687 микрограм хүрч байгаа нь ДЭМБ-ын зөвлөж буй аюулгүй төвшнөөс 27 дахин их байна. Хүйтний улирал дахь агаарын бохирдлын хамгийн гол эх үүсвэр нь гэр хороолол (албан бус суурьшлын бүс)-ын түүхий нүүрсээр галладаг зуухнууд байна.
Хотжилт огцом нэмэгдэж байгаа нь төлөвлөлтгүй суурьшлын бүсүүд бий болж, агаар, ус, хөрсний бохирдлыг нэмэгдүүлсээр байна. Энэ нөхцөл байдалд чиглэсэн тодорхой арга хэмжээ авахгүй бол, ирэх жилүүдэд хотын хүн ам ялангуяа хүүхдийн эрүүл мэндэд ноцтой үр дагавар учруулахаар байна.
Агаарын бохирдлоос хүүхдэд үзүүлж буй нөлөөллийн баримт нотолгоо
Агаарын бохирдлын асуудал бий болсноос хойш түүний нөлөөнд хүүхдүүд хамгийн ихээр өртөж байгааг тогтоосон. Үндэсний хэмжээнд 5 хүртэлх насны хүүхдүүдийн эндэгдлийн хоёр дахь шалтгаанд уушгины хатгалгаа орж байна. Улаанбаатар хотын бохирдол өндөртэй нэг дүүрэгт амьдардаг хүүхдүүдийн уушгины ажиллагаа хөдөө орон нутагт амьдардаг хүүхдүүдтэй харьцуулахад 40%-аар бага байна. Агаарын бохирдлын улмаас хүүхдүүд бронхит, астам зэрэг хүнд өвчтэй болж, хичээл сургуульдаа явж чадахгүйд хүрч, улмаар сурч, хөгжих бусад боломжуудаа алдахад хүрч байна.
Агаарын бохирдолд жирэмсэн эмэгтэйчүүд өртөж, хэвлий дэх хүүхдийн уушги, амьсгалын замд нөлөөлж, хугацаанаас өмнө төрөх эсвэл мэс ажилбар хийлгэж авхуулахад хүрч байна. Өнгөрсөн 10 жилд Улаанбаатар хотын оршин суугчдын дунд амьсгалын замын өвчин асар хурдтай нэмэгдэж, 10,000 хүн тутамд амьсгалын замаар халдвар авах тохиолдлууд 2.7-дахин нэмэгдсэн. Монголд өвөл зуны хооронд тэмдэглэгдсэн үр зулбалт 3.5-дахин нэмэгдсэн байна.
НҮБ-ын Хүүхдийн сангийн үйл ажиллагаа
НҮБ-ын Хүүхдийн Cан дараах үйл ажиллагааны хүрээнд Монголын Засгийн газар, иргэний нийгмийн байгууллага, хувийн хэвшил, хэвлэл мэдээлэл, иргэд олон нийтийн төлөөлөл, олон улсын хөгжлийн түншлэгч байгууллага, өмгөөлөгчид болон нөлөө бүхий хүмүүстэй хамтран ажиллаж байна.
- Уушгины хатгалгаа, астам, амьсгалын замын бусад архаг өвчтэй хүүхдүүдийг эмчлэх эмч, эрүүл мэндийн ажилтны мэдлэг, ур чадварыг дээшлүүлэх,
- Өрхийн эрүүл мэндийн үйлчилгээ ялангуяа эмзэг бүлгийн өрхүүдэд өртөг зардал хямд, чанартай эм, эмчилгээ авах боломжийг нэмэгдүүлэх,
- Өрхийн эрүүл мэндийн төвүүдээр хийгддэг уушгины хатгалгааны эсрэг вакцин, эмчилгээний хамрагдалтыг нэмэгдүүлэх,
- Олон нийт, төр засаг, иргэний нийгмийн дунд агаарын бохирдлоос эрүүл мэндэд үзүүлэх нөлөөллийн талаар мэдээлэл сурталчилгааг нэмэгдүүлэх,
- Иргэд олон нийт, эцэг эхчүүдийн дунд хүүхдүүдээ бүр эхийн хэвлийд байх үеэс эхлэн бага насанд нь агаарын бохирдол (тамхины утааг оруулан) болон уушгины хатгалгаанаас урьдчилан сэргийлэх, хамгаалах зан үйл, хандлагыг өөрчлөх практик мэдээ мэдээлэл хүргэх,
- Агаарын бохирдлоос хүүхдийн эрүүл мэндэд үзүүлж буй аюултай нөлөөг нэн даруй бууруулах хамтын хүчин чармайлтыг өрнүүлэх, зохицуулах ажлыг үргэлжлүүлж байна.
