Miditra an-tsehatra ireo ekipa mandehandeha misahana ny fahasalamana sy ny sakafo ara-pahasalamana

Avy any ankavia miankavanana, Edith, 31 taona, Alexia, 28 taona ary Rocklain, 33 taona, no mandrafitra ny ekipa mandehandeha any amin’ny faritra Farafangana, atsimo atsinanan’i Madagasikara, izay tohanan’ny UNICEF. Mitety ireo tanànan’ny fokontany Miarinarivo any amin’ny faritra atsimo atsinanana izy ireo mba hamantarana ny trangana tsy fanjarian-tsakafo sy hamahana izany olana izany.

Manangona ny vaksiny sy ireo fitaovana ilaina avy any amin'ny tobim-pahasalamana any afovoan-tanàna ny ekipa ; ka  handeha an-tongotra 7 kilometatra izy ireo hahatongavana any an-tanànan'i Miarinarivo.

Maka aina ny ekipa. « Tsy mitondra sakafo avy any an-trano izahay satria tokony ho amin’ny 6 ora maraina no miala ao Farafangana. Hohaninay izay hitanay eny an-dalana, na voankazo izany na zavatra hafa, » hoy ny fanazavan’i Alexia.

Niakatra sambo hiampita ny Reniranon'i Menagnivo ny ekipa, izay nampian’ny fokonolona tamin’ny fitaomana ireo sakafo ara-pahasalamana amin’ny baoritra. Entina manohana ireo zaza tsy ampy sakafo izany mba hahazoan’izy ireo fahasalamana.

Adiny iray aty aoriana, mbola mihosina ao anaty fotaka ny ekipa. Amin’ny maha mpilatsaka an-tsitrapo ao amin’ny hopitaly Farafangana teo aloha azy ireo dia efa zatra miatrika olana izy ireo.  « Indroa isam-bolana izahay no mitsidika ity tanàna ity. Efa zatra havizanana izahay, » hoy i Rocklain narahana tsiky

Mitondra boaty izay mihazona ny vaksiny amin'ny maripana sahaza i Rocklain, no sady manampy an'i Alexia hiala amin'izany fotaka izany.

Ireo mpikambana ao amin'ny vondrom-piarahamonina dia mitondra baoritra misy sakafo ara-pahasalamana efa vonona, fantatra amin'ny anarana hoe PlumpyNut izay mitovy amin'ny dibera voanjo.

Adiny iray sy sasany aty aoriana, tonga ao Miarinarivo ny ekipa mandehandeha ary efa niandry azy ireo tamim-paharetana ny fokonolona teo an-toerana. Nanomana ireo fitaovana fanaovana fitiliana ny tsy fanjarian-tsakafo, sy ny fitsaboana izany, ary ireo kojakoja fanaovam-baksiny sy fandrindram-pianakaviana ny ekipa.

Mandrefy ny manodidina ny sandrin’ny zaza iray i Alexia. Mampiasa kofehy miloko sady misy refy izy mba hamantarana raha tratran’ny tsy fanjarian-tsakafo ilay zaza na tsia.

Manindrona vehivavy iray izay nisafidy ny hanao fandrindram-pianakaviana i Edith.  « Naniry hatrany ny ho lasa mpitsabo na mpampivelona aho. Izaho no voalohany miasa amin'ny sehatry ny fitsaboana ao amin'ny fianakaviako, » hoy izy.

Mizara PlumpyNut amin’ireo renin’ny zaza izay mbola manaraka fitsaboana i Rocklain. Ankizy 52 no natao fitiliana tamin’io andro io.

Mandrefy ny halavan’ny zaza iray i Rocklain. « Na dia eo aza ny sakana sy ny havizanana, dia mandrisika ahy hatrany ny fanampiana ireo ankizy ireo, » hoy izy. « Ny sasany tamin’izy ireo dia tao anaty toe-pahasalamana tena ratsy no hitako, ary efa sitrana izy ireo ankehitriny. »

Vita ny asa nataon’izy ireo adiny efatra taorian'ny nahatongavany tao an-tanàna, ka nanomana ny fodiany izy ireo. « Tsy ijerena hoe lahy na vavy, fa samy manao asa mitovy am-pitiavana izahay rehetra, » hoy i Alexia sady nitsiky.