Ady amin'ny COVID-19, mbola manan-danja ny vaksiny ankehitriny!
Manamafy ny maha zava-dehibe ny fanaovana vaksiny i Dalvis, mpihira malaza avy any amin’ny faritra avaratr’i Madagasikara sy Andry Lalaina Andriamasy, lehiben’ny tonian-dahatsoratry ny fahitalavitra iray eto an-drenivohitra. Fijoroana vavolombelona.
« Efa saika maty aho », hoy i Andry Lalaina Andriamasy, mpanao gazety matihanina. Nandritra ny andiany voalohany tamin'ilay valan’aretina no nitrangan’izany tamin'ny Jona 2020. Farafahakeliny 10 andro vao nanjavona ireo soritr'aretina ka nahafahany niezaka namerina fahasalamana haingana. « Nanaraka ny fepetra fitsaboana rehetra tany an-trano aho. Misaotra ny lanitra aho fa tafantsangana indray ary afaka nanohy ny fiainako ». Tsy afa-bela tamin’ny fiverenan’ilay aretina izy tamin’ny andiany faharoa. Mbola tratran’ilay aretina indray izy, saingy tsy mitovy intsony ny zava-nitranga satria nahazo ny fatrana vaksiny izy teo anelanelan’izay fotoana izay. « Tsy nisalasala aho na dia iray segondra aza satria mampilamin-tsaina sy mampantanjan-tsaina ahy kokoa izany, mba hiatrehana ireo soritr'aretina rehetra ary mba tsy hiainana ny tranga misy fahasarotana amin'ny COVID-19. Mahatsiaro malalaka sy milamina kokoa aho rehefa mivezivezy. Na izany aza, mbola manaja ny hetsika sakana aho rehefa misy oloa maromaro satria ny fitandremana foana no fototry ny fiarovana, » hoy izy. Tanjon’i Andry Lalaina sy ny vadiny izao ny hanao vaksiny feno. Mikasa ny hampanao vaksiny ny zanany 2 lahy mihitsy aza izy raha vao omen’ny Fanjakana alàlana ny fanaovana vaksiny ny zaza latsaky ny 18 taona.
« Ny fanaovana vakisiny dia resaka fifampitsinjovana: andraikitra mikasika ny fiarovan-tena sy fiarovana ny hafa », hoy i Dalvis. Ity mpihira avy any avaratra ity dia nanolotra ny feony ho fanentanana ny mponina ao Nosy-Be entina mamporisika azy ireo hanao vaksiny. Tsy mbola voan'ny COVID-19 izy hatramin'ny niandohan'ny aretina, saingy fantany ny maha-zava-dehibe an'ity fihetsika ity: anisan'ireo olona voalohany namonjy ny toerana fanaovam-baksiny COVID-19 izy. « Amin’ny maha mpihira ahy dia matetika aho no manao fitetezam-paritra. Ny sisin-tany, indrindra any Eoropa, dia mihidy amiko avokoa raha tsy manana karatra vaksiny aho, » hoy izy. Amin'ny maha-mpanakanto azy, noho izany mpitondra hafatra ho an'ny fiaraha-monina, dia mametraka ny tenany ho modely ho an'ny mpankafy azy izy mba handraisana ny fitondran-tena mahasalama indrindra. « Mamporisika ny fanaovam-bakisiny araka izay azoko atao aho satria hitako fa sarotra sy tsy dia azo antoka loatra ny manao seho ho an’ny andian’olona tsy voaaro. Hiaina miaraka amin'ity otrik’aretina tokoa mantsy isika mandritra ny taona vitsivitsy ho avy. Tsara kokoa noho izany ny mandray fepetra rehetra dieny izao mba haha-salama hatrany ny tena sy hiarovana ny hafa, » hoy izy teo am-pamaranana.
Tao anatin'ny herinandro vitsivitsy izay dia nitombo ny trangana COVID-19 voamarina, indrindra teto an-drenivohitra izay misy ny ankamaroan'ireo marary. Manohy ny ezaka ataony ny UNICEF mba hanatrarana olona maro atao vaksiny araka izay azo atao: Mitondra ny anjara birikiny ny UNICEF amin'ny alàlan’ny fividianana vaksiny, ny fitaterana izany miainga avy any amin'ny toeram-pamokarana mankany amin'ny distrika samihafa na koa ny fitehirizana izany vaksiny izany.
