Ady amin’ny aretina lefakozatra : tantaran’ny taranaka iray
Noheverina fa tsy loza mitatao intsony fa aretina efa fongana eto Madagasikara ny lefakozatra. Ireto raki-tsary ireto dia mitatitra ny hetsika fanaovam-bakisiny, fihodinana voalohany, izay mikendry ny hanaovana vakisiny ny ankizy
Ireo mpanentana no nanomboka ny asa. Nitety tokantrano izy ireo tamin'izany. 65 taona i Hermine. Mpanentana koa no asany. Eto dia mampahafantatra ny ray aman-dreny mikasika ny datin'ny hetsika fanaovam-bakisiny izy rehefa avy nametaka marika mialoha teo amin’ny tokantrano notsidihany.
Mametaka ireo takelaka fanentanana mikasika ny hetsika fanaovam-bakisiny i Deux cent premier. Mpanentana ao amin'ny tobim-pahasalaman'i Ankaramena izy. Eny amin'ireo toerana be olona mandalo no ametahany izany.
Mitohy ny fanentanana mialoha ny hetsika fanaovam-bakisiny, ao anatin’izany ny hetsika fanokafana isam-paritra sy isaky ny distrika amin'ny alalan'ny fanentanana ny ray aman-dreny sy ny mpiandraikitra ny ankizy.
Sivy taona i Tsivery. Nandeha irery tany amin'ny tsenan'i Manambaro, distrikan'i Tolagnaro (faritra Anosy) izy mba hitondra ireo anabavikeliny anankiroa antsoina hoe Safidy, 5 taona, sy Volana, 5 volana, hatao vakisiny nandritra ny hetsika fanokafana. Sahirana amin'ny raharaham-barotra ataony mantsy ny i Nandrasana reniny, 27 taona.
Mihoatra ny 2.000 ny isan'ireo mpiasan’ny fahasalamana mandrafitra ny ekipa mpanao vaksiny manerana ny distrika 25 ao amin'ireo fari-piadidiana dimy tafiditra ao anatin'ny faritra Atsimon'i Madagasikara. Anisan'izany i Melanie sy Soafara. Miisa 1.1 tapitrisa ireo zaza latsaky ny dimy taona atao vakisiny. Tao ireo notsidihana isan-tokantrano, ary tao koa ireo namonjy ny tobim-pahasalamana natokana hanaovana ny vakisiny.
Miasa ihany koa i Fy – Mpiaro ny zon'ny ankizy ho an'ny fanaovam-bakisiny sy ny ady amin'ny lefakozatra. Manentana ny fiaraha-monina izy ary manotrona ireo ekipa mpanao vakisiny.
Hitantsika eto, miaraka amin’i Jeannette - mpanao vakisiny - indray i Deux cent premier mandritra ny tsena isan-kerinandron’Ankaramena. Avy nandeha nanao vakisiny nitety tokantrano izy ireo tamin’io.
Zava-dehibe ny manisy marika eo amin'ny ankihikely ankavia rehefa avy nahazo ny vakisiny indroa mitete ao am-bava izay miaro amin'ny karazana poliovisiosy anankiroa (VPOb) ny ankizy.
Ny aretina lefa-kozatra dia aretina azo avy amin'ny viriosy ary tena mifindra izy io. Na izany aza dia azo sorohana amin'ny alalan'ny vaksiny izy. Nandritra ny efatra andro, nanomboka ny 11 ka hatramin'ny 14 Aogositra 2026, no nanaovana ny hetsika fanaovam-bakisiny hiadiana amin'ny aretina lefakozatra. Mihoatra ny 1,2 tapitrisa ireo ankizy eo anelanelan'ny 0 sy 59 volana nahazo izany vakisiny izany, miampy ireo ankizy hafa miisa 42 000 izay mbola tsy nahazo fatra vaksiny polio mihitsy.
Fanamarihana: Eto Madagasikara, ny hetsika fanaovam-bakisiny miaro amin'ny lefakozatra dia tohanan'ireo mpiara-miombon'antoka amin'ny Hetsika Maneran-tany ho famongorana ny aretina lefa-kozatra (GPEI) – ny Fikambanana Maneran-tany momba ny Fahasalamana (OMS), Rotary International, ny Foibe Amerikana misahana ny Fanaraha-maso sy ny Fisorohana ny Aretina (CDC), ny UNICEF, ny Fondation Gates, Gavi – ny Alliance du Vaccin, ny Commission Européenne (EC) ary ny Banky Eoropeanina ho an'ny Famatsiam-bola (EIB).
