ປອດໄພກັບໄປໂຮງຮຽນ
ຫຼັງຈາກ ປິດໂຮງຮຽນເປັນເວລາ ສອງເດືອນ ເພື່ອຕອບໂຕ້ກັບພະຍາດໂຄວິດ-19, ເດັກນ້ອຍ ໃນສປປລາວ ພວມຈະກັບຄືນໄປໂຮງຮຽນຕາມ “ສະພາບປົກກະຕິແບບໃໝ່”.
- English
- ລາວ
ເດັກຍິງ ເກດສະຫັວນ ອາຍຸ 18 ປີ, ນັກຮຽນຊັ້ນມໍ 7 ຊຶ່ງແມ່ນປີສຸດທ້າຍຂອງມັດທະຍົມຕອນປາຍ, ຮູ້ສຶກຕື່ນເຕັ້ນທີ່ຈະໄດ້ພົບກັບ ໝູ່ເພື່ອນຂອງຕົນອີກຄັ້ງ ຫຼັງຈາກປິດໂຮງຮຽນແບບບໍ່ຄາດຄິດເປັນເວລາດົນນານ. ກໍຄືກັນກັບແຕ່ກ່ອນ, ນາງໃສ່ຊຸດນັກຮຽນຂອງຕົນ ຊຶ່ງດຽວນີ້ມີສິ່ງໜຶ່ງເພີ່ມເຂົ້າອີກ ນັ້ນກໍແມ່ນໜ້າກາກອະນາໄມ ແລະ ກັບຄືນໄປໂຮງຮຽນຂອງນາງ - ໂຮງຮຽນມັດທະຍົມສົມບູນວຽງຈັນ, ຊຶ່ງເປັນໂຮງຮຽນລັດ ໃນນະຄອນຫຼວງວຽງຈັນຂອງສປປລາວ.
ໃນວັນທີ 18 ເດືອນພຶດສະພາ, ໂຮງຮຽນຂອງນາງໄດ້ຕ້ອນຮັບນັກຮຽນ 900 ກ່ວາຄົນຈາກຊັ້ນມໍ 4, ມໍ 5 ແລະ ມໍ 7 ພາຍຫຼັງທີ່ປິດເປັນເວລາສອງເດືອນ. ບັນດາໂຮງຮຽນໃນທົ່ວປະເທດໄດ້ປິດລົງເຊິ່ງເປັນສ່ວນໜຶ່ງຂອງການຕອບໂຕ້ຂອງລັດຖະບານຕໍ່ການແຜ່ລະບາດຂອງພະຍາດໂຄວິດ-19. ຍ້ອນວ່າ ບໍ່ມີການລາຍງານກໍລະນີໃໝ່ ໃນໄລຍະໜຶ່ງເດືອນ, ກະ ຊວງສຶກສາທິການ ແລະ ກິລາໄດ້ອອກຄຳແນະນຳ ກ່ຽວກັບໂຮງຮຽນປອດໄພ ແລະ ໄດ້ຕັດສິນໃຈເປີດໂຮງຮຽນຄືນເປັນສອງໄລຍະ. ວັນທີ 18 ເດືອນພຶດສະພາ ສຳລັບ ບາງຫ້ອງຮຽນ ແລະ ເດັກທຸກຄົນຈະກັບຄືນໄປຮຽນໃນວັນທີ 2 ເດືອນ ມິຖຸນາ.
ເດັກຍິງອາຍຸ18 ປີກ່າວວ່າ: “ພວກເຮົາຢູ່ເຮືອນດົນເກີນໄປແລ້ວ. ນີ້ແມ່ນປີສຸດທ້າຍຂອງຂ້ອຍຢູ່ໂຮງຮຽນ ແລະ ຂ້ອຍກັງວົນໃຈວ່າພວກເຮົາຈະບໍ່ສາມາດໄປປະກົດຕົວໃນການສອບເສັງທົ່ວປະເທດ. ຂ້ອຍຮູ້ສຶກໂລ່ງໃຈທີ່ໄດ້ກັບມາ”.
ເພື່ອຮັບປະກັນໃຫ້ເດັກໄດ້ສືບຕໍ່ການຮຽນ, ໂຮງຮຽນໄດ້ເລີ່ມຕົ້ນຊ່ອງທາງ YouTube. ນາງເກດສະຫັວນ ແລະ ນັກຮຽນຄົນອື່ນໆໄດ້ຕິດຕາມຊ່ອງທາງດັ່ງກ່າວ ເພື່ອຮໍ່າຮຽນ.
ນາງເກດສະຫັວນ ເວົ້າວ່າ: “ເຖິງວ່າຈະມີຄວາມອັນຕະ ລາຍຂອງພະຍາດໂຄວິດ-19, ຂ້ອຍກໍໝັ້ນໃຈວ່າໂຮງຮຽນຂອງຂ້ອຍປອດໄພ ເພາະວ່າພວກເຂົາເຮັດທຸກຢ່າງເພື່ອຮັກສາພວກເຮົາໃຫ້ປອດໄພ ດ້ວຍການປະຕິບັດຕາມກົດລະບຽບໃໝ່ເຫຼົ່ານີ້.
ໃນມື້ທຳອິດ, ນາງຕົກຕະລຶງເມື່ອເຫັນວ່າກົດລະບຽບໃນໂຮງຮຽນຂອງຕົນໄດ້ປ່ຽນໄປແລ້ວ. ນີ້ແມ່ນຜົນ ຂອງຄຳແນະນຳໃໝ່ກ່ຽວກັບໂຮງຮຽນປອດໄພ.
ກ່ອນອື່ນໝົດ, ນາງຕ້ອງຮັກສາໄລຍະຫ່າງ 1 ແມັດ ກັບໝູ່ເພື່ອນຂອງຕົນນາງ ແລະ ຢືນລຽນແຖວ ຢູ່ປະຕູທາງເຂົ້າເພື່ອກວດອຸນ ຫະພູມ. ຫຼັງຈາກນັ້ນ, ພວກເຂົາຕ້ອງໄດ້ລ້າງມື ແລະ ໃຊ້ນ້ຳຢາຂ້າເຊື້ອມື ຢູ່ໜ້າຫ້ອງຮຽນຂອງຕົນ.
ບໍ່ພຽງແຕ່ນັກຮຽນເທົ່ານັ້ນ, ແຕ່ຄູອາຈານກໍ່ມີຄວາມສຸກຄືກັນທີ່ໄດ້ກັບຄືນໄປໂຮງຮຽນ.
ທ່ານວຽງໄຊ ສິນທຳວົງສາ, ຄູສອນວິຊາສຸຂະພາບ ແລະ ພົນລະເມືອງສາດຂອງໂຮງຮຽນຊັ້ນສູງ ກ່າວວ່າ: “ເປັນການດີຫຼາຍທີ່ນັກ ຮຽນຂອງຂ້າພະເຈົ້າໄດ້ກັບມາເຂົ້າຫ້ອງຮຽນຄືນ”. ທ່ານຍັງກ່າວວ່າ: “ໃນລະຫວ່າງການປິດເມືອງ, ພວກເຮົາໄດ້ຕິດຕາມນັກຮຽນຂອງຕົນເປັນປະຈຳ. ໂຊກດີທີ່ພວກເຂົາ ແລະ ຄອບຄົວປອດໄພດີ.”
ໃນສປປລາວ, ໂຮງຮຽນຫຼາຍແຫ່ງໄດ້ຖືກນຳໃຊ້ເປັນສະຖາທີ່ກັກກັນ ສຳລັບຜູ້ທີ່ກັບມາຈາກປະເທດເພື່ອນບ້ານ. ຕາມຄຳແນະນຳ ກ່ຽວກັບໂຮງຮຽນປອດໄພ, ໂຮງຮຽນໄດ້ມີການຂ້າເຊື້ອ ແລະ ທຳຄວາມສະອາດຢ່າງກວ້າງຂວາງ.
ທ່ານວຽງຈິດກ່າວວ່າ: “ເຖິງວ່າໂຮງຮຽນຂອງພວກເຮົາບໍ່ຖືກນຳໃຊ້ເປັນບ່ອນກັກກັນໃນຊ່ວງປິດເມືອງ, ແຕ່ວ່າ ພວກເຮົາກໍ່ບໍ່ລະເລີຍຕໍ່ຄວາມປອດໄພຂອງພວກເຮົາ”. ທ່ານຍັງກ່າວຕື່ມວ່າ: “ໜຶ່ງອາທິດກ່ອນເປີດຮຽນຄືນໃໝ່, ພວກເຮົາສີດຢາຂ້າເຊື້ອໃນຫ້ອງຮຽນ ແລະ ສະຖານທີ່ອື່ນໆ. ເຊັ່ນດຽວກັນນັ້ນ, ພວກເຮົາໄດ້ຈັດສັນເວລາ 30 ນາທີໃນຕອນເຊົ້າເພື່ອກວດອຸນຫະພູມ ແລະ ຜູ້ທີ່ເປັນໄຂ້ຈະຖືກສົ່ງກັບເມືອເຮືອນເພື່ອພັກຜ່ອນ,”.
ໃນໂຮງຮຽນ, ນາງເກດສະຫັວນ ພົບກັບໝູ່ເພື່ອນຂອງຕົນ. ພວກເຂົາແລກປ່ຽນປະສົບການຂອງຕົນໃນຊ່ວງປິດເມືອງ. ເພື່ອນນັກຮຽນຄົນ ໜຶ່ງຂອງນາງ ຊື່ລີວາ ວ່າງ. ທ້າວລີວາ ແມ່ນຊົນເຜົ່າມົ້ງຈາກບ້ານຫ່າງໄກສອກຫຼີກໃນພາກເໜືອຂອງປະເທດ. ຫຼັງຈາກໂຮງຮຽນປິດ, ລາວໄດ້ກັບໄປບ້ານຂອງຕົນ.
ທ້າວລີວາ ແລກປ່ຽນປະສົບການຂອງຕົນວ່າ: “ຂ້ອຍບໍ່ມີເວລາພຽງພໍເພື່ອຮ່ຳຮຽນຢູ່ບ້ານ. ຂ້ອຍໄດ້ຊ່ວຍຄອບຄົວຂອງຂ້ອຍຢູ່ໄຮ່ສວນໝົດມື້”. “ເວົ້າຄວາມຈິງແລ້ວ, ຂ້ອຍຢ້ານກົວແທ້ໆ ຍ້ອນຄວາມບໍ່ແນ່ນອນຂອງການແຜ່ລະບາດຂອງພະຍາດໂຄວິດ-19. ຂ້ອຍວາງແຜນວ່າຈະສະໝັກຂໍທຶນການສຶກສາຂັ້ນວິທະຍາໄລ. ຂ້ອຍຄິດວ່າຂ້ອຍຈະສູນເສຍທຸກຢ່າງໄປແລ້ວ.”
ດ້ວຍຄວາມໂລ່ງໃຈຂອງລາວ, ດຽວນີ້ຫ້ອງຮຽນໄດ້ເລີ່ມຕົ້ນໃໝ່ແລ້ວ ແລະ ໄດ້ກຳນົດວ່າຈະດຳເນີນການສອບເສັງໃນທ້າຍເດືອນກໍລະກົດນີ້. ທັງຄູອາຈານ ແລະ ນັກຮຽນກໍລ້ວນແຕ່ມີຄວາມໝັ້ນໃຈວ່າ ພວກເຂົາມີເວລາພຽງພໍ ເພື່ອຄວບຄຸມເວລາທີ່ສູນເສຍໄປ ແລະ ກຽມຕົວເຂົ້າໃນການສອບເສັງ.
ທ່ານນາງໄພວອນ ສີວິໄລ, ຄູອາຈານສອນວິຊາຟີຊິກ ຊັ້ນມໍ 5 ກ່າວວ່າ: “ພວກເຮົາໄດ້ດຳເນີນການສອນທາງອິນເຕີເນັດ ເພື່ອຮັບ ປະກັນວ່າ ການສຶກສາຂອງນັກຮຽນຈະບໍ່ໄດ້ຂາດສະບັ້ນ. ນາງຍັງກວດກາເບິ່ງສະພາບຈິດໃຈ ແລະ ຄວາມຮູ້ສຶກຂອງພວກເຂົາ ໃນໄລຍະປິດເມືອງອີກດ້ວຍ. ນາງຍັງກ່າວວ່າ: "ຂ້າພະເຈົ້າດີໃຈທີ່ເຫັນວ່າ ພວກເຂົາທຸກຄົນມີຈິດໃຈດີ ແລະ ຂ້ອຍເຊື່ອໝັ້ນວ່າ ພວກເຮົາຈະຮຽນຈົບຕາມຫຼັກສູດຂອງພວກເຮົາ ແລະ ກຽມພ້ອມທີ່ຈະໄປສອບເສັງໃນໄວໆນີ້."
ສິ່ງທ້າທາຍອັນດຽວເທົ່ານັ້ນ ທີ່ນາງຄິດວ່າພວກເຂົາອາດຈະມີ ອີງຕາມຄຳແນະນຳໃໝ່ ແມ່ນການສົ່ງເສີມໃຫ້ຮັກສາໄລຍະຫ່າງທາງສັງຄົມໃນໂຮງຮຽນໃຫຍ່ຄືແນວນີ້ ຊຶ່ງມີຄວາມສາມາດບັນຈຸທັງໝົດ 3,000 ຄົນ. ແຕ່ນາງສັນຍາວ່າຄູອາຈານທຸກຄົນຈະພະຍາ ຍາມຈົນສຸດຄວາມສາມາດຂອງຕົນ.
ອົງການຢູນິເຊັບ ແລະ ບັນດາຄູ່ຮ່ວມພັດທະນາໄດ້ສະໜັບສະໜູນ ກະຊວງສຶກສາທິການ ແລະ ກິລາ, ແລະ ກະຊວງສາທາລະນະສຸກໃນການຕອບໂຕ້ຕໍ່ການແຜ່ລະບາດຂອງພະຍາດດັ່ງກ່າວ ນັບຕັ້ງແຕ່ມື້ທຳອິດ ໃນສປປລາວ. ອົງການຢູນິເຊັບໄດ້ສະໜັບສະໜູນ ສປປລາວ ດ້ວຍການສະໜອງອຸປະກອນປ້ອງກັນສ່ວນບຸກຄົນ (PPE) ໃຫ້ແກ່ພະນັກງານສາທາລະນະສຸກ, ສົ່ງເສີມການປະຕິບັດຕົວຈິງການຮັກສາອະນາໄມ, ຝຶກອົບຮົມນັກຂ່າວກ່ຽວກັບ ພະຍາດໂຄວິດ-19 ແລະ ເຜີຍແຜ່ຂໍ້ມູນຂ່າວສານຜ່ານສື່ປະເພນີ ແລະ ສື່ດີຈີຕອນ. ຫ່ວາງມໍ່ໆມານີ້, ອົງການຢູນິເຊັບໄດ້ສະໜັບສະໜູນ ຂະບວນການໂຄສະນາກ່ຽວກັບການກັບຄືນສູ່ໂຮງຮຽນ ເຊິ່ງປະ ກອບມີການສົ່ງຂໍ້ຄວາມຜ່ານເຄືອຂ່າຍອົງການບໍ່ແມ່ນລັດຖະບານ (INGO) ແລະ ກຸ່ມຄູອາຈານ, ໄດ້ແຈກຢາຍໂປສເຕີໃຫ້ທຸກໂຮງ ຮຽນໃນລາວ, ແລະ ນຳໃຊ້ສື່ດິຈິຕອນ ແລະ ສື່ປະເພນີ ເພື່ອເຜີຍແຜ່ຂໍ້ມູນເພີ່ມເຕີມໃຫ້ພໍ່ແມ່, ຄູ ແລະ ນັກຮຽນ.
