ກ່ຽວກັບພວກເຮົາ
ເຮັດວຽກເພື່ອສິດທິຂອງເດັກທຸກໆຄົນໃນ ສປປ ລາວ
- ສາມາດມີໃນ:
- English
- ລາວ
ອົງການຢູນິເຊັບກຳລັງອອກແບບແຜນງານ ເພື່ອສົ່ງເສີມສິດທິ ແລະ ສະຫວັດດີການຂອງເດັກນ້ອຍທຸກໆຄົນ. ຄຽງຄູ່ກັບບັນດາຄູ່ຮ່ວມງານ, ພວກເຮົາກຳລັງສຸມຄວາມພະຍາຍາມເປັນພິເສດ ໃສ່ໃນການເຂົ້າຫາເດັກທີ່ດ້ອຍໂອກາດທີ່ສຸດໃນທົ່ວປະເທດ.
ປະເທດລາວ ເປັນປະເທດທີ່ບໍ່ມີຊາຍແດນຕິດກັບທະເລ, ພູມສັນຖານເປັນພູຜາປ່າດົງ, ປະຊາກອນສ່ວນໃຫຍ່ຍັງໜຸ່ມ ແລະ ມີຫຼາຍຊົນເຜົ່າ. ມີປະຊາກອນທັງໝົດ 6,5 ລ້ານຄົນ, ປະມານ 59 %ແມ່ນເດັກ ແລະ ຊາວໜຸ່ມທີ່ອາຍຸຕໍ່າກວ່າ 25 ປີ.
ສປປ ລາວ ໄດ້ສ້າງແຜນພັດທະນາເສດຖະກິດ - ສັງຄົມແຫ່ງຊາດຄັ້ງທີ 8 ປີ 2016-2020, ເຊິ່ງມີຈຸດປະສົງເພື່ອຫລຸດຜ່ອນຄວາມທຸກຍາກໃຫ້ໄດ້ຫຼາຍທີ່ສຸດ ແລະ ຫລຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2020. ແຜນການນີ້ແມ່ນຖືເອົາເປົ້າໝາຍການພັດທະນາແບບຍືນຍົງເປັນເປົ້າໝາຍແຫ່ງຊາດ ແລະ ໃຫ້ຄວາມສຳຄັນຢ່າງສູງຕໍ່ຜົນສຳເລັດຂອງເປົ້າໝາຍສະຫັດສະວັດທີ່ຍັງບໍ່ທັນບັນລຸ.
ການເຕີບໂຕທາງດ້ານເສດຖະກິດທີ່ເຂັ້ມແຂງ ເຮັດໃຫ້ລາວປ່ຽນຈາກປະເທດທີ່ມີລາຍໄດ້ຕໍ່າໄປເປັນປະເທດທີ່ມີລາຍໄດ້ປານກາງຂັ້ນຕົ້ນ ໃນປີ 2011. ເສດຖະກິດຂະຫຍາຍຕົວໃນລະດັບ 7,5 %ໃນລະຫວ່າງປີ 2011 ແລະ 2013, ແລະ ຄວາມທຸກຍາກໄດ້ຫລຸດລົງເຄິ່ງໜຶ່ງ. ເຖິງຢ່າງໃດກໍຕາມ, ຄວາມບໍ່ເທົ່າທຽມຍັງຄົງມີຢູ່ຫຼາຍ ແລະ ມີຄວາມແຕກຕ່າງກັນລະຫວ່າງ ຕົວເມືອງ ແລະ ຊົນນະບົດ, ເຂດເນີນສູງ ແລະ ເຂດທົ່ງພຽງ, ລະດັບຄວາມຮັ່ງມີ, ການສຶກສາຂອງແມ່ ແລະ ຊົນເຜົ່າ.
ປະເທດລາວໄດ້ບັນລຸເປົ້າໝາຍສະຫະສະຫວັດດ້ານການຫລຸດຜ່ອນຄວາມທຸກຍາກ, ການເຂົ້າເຖິງ ແລະ ຄວາມສະເໝີພາບຍິງຊາຍໃນການສຶກສາຊັ້ນປະຖົມ, ການຫລຸດຜ່ອນການຕາຍຂອງແມ່ ແລະ ການເຂົ້າເຖິງນໍ້າ ແລະ ສຸຂາພິບານ. ເຖິງຢ່າງໃດກໍຕາມ, ບາງເປົ້າໝາຍເຊັ່ນ: ໂພຊະນາການເດັກ ແລະ ການຮຽນຈົບຊັ້ນປະຖົມຍັງບໍ່ທັນບັນລຸ, ແລະ ຕົວຊີ້ວັດທາງສັງຄົມສ່ວນຫຼາຍແມ່ນຢູ່ໃນລະດັບທີ່ຕໍ່າທີ່ສຸດໃນພາກພື້ນອາຊີ ແລະ ປາຊີຟິກ. ກຸ່ມທີ່ດ້ອຍໂອກາດກວ່າໝູ່, ໂດຍສະເພາະແມ່ນກຸ່ມຊົນເຜົ່າທີ່ບໍ່ແມ່ນລາວ-ໄຕ ທີ່ອາໄສຢູ່ເຂດຊົນນະບົດທີ່ຫ່າງໄກ, ບ່ອນທີ່ເປັນເນີນພູທີ່ບໍ່ມີຫົນທາງ ແລະ ພື້ນທີ່ດິນກໍຍັງມີລະເບີດບໍ່ທັນແຕກ.
ສປປ ລາວ ມີຄວາມຈຳເປັນຕ້ອງປັບປຸງນະໂຍບາຍ ແລະ ກົດໝາຍແຫ່ງຊາດຕື່ມອີກ ເພື່ອໃຫ້ສອດຄ່ອງຕາມພັນທະທາງກົດໝາຍສາກົນ ແລະ ນໍາໄປປະຕິບັດຢ່າງເປັນຮູບປະທໍາ. ອີງໃສ່ຜົນການສຶກສາ ຊີ້ໃຫ້ເຫັນວ່າການປະຕິບັດນະໂຍບາຍ ແລະ ແຜນງານປະສົບກັບສິ່ງທ້າທາຍຫຼາຍຢ່າງ ເນື່ອງຈາກຄວາມສາມາດມີບໍ່ພຽງພໍ, ພູມສັນຖານຫຍຸ້ງຍາກ, ປະຊາກອນກະແຈກກະຈາຍຢູ່ໃນເຂດຫ່າງໄກ ແລະ ຂາດຄວາມຕ້ອງການ.
ອົງການຢູນິເຊັບລາວ ເຮັດວຽກໃນຫຼາຍຂົງເຂດເພື່ອຊ່ວຍຮັບປະກັນການຢູ່ລອດຂອງເດັກ ແລະ ສົ່ງເສີມສິດທິເດັກ. ໂດຍຮ່ວມມືກັບລັດຖະບານແຫ່ງ ສປປ ລາວ, ບັນດາອົງການໃນເຄືອຂອງສະຫະປະຊາຊາດ, ອົງການຈັດຕັ້ງທາງສັງຄົມ ແລະ ອົງການຈັດຕັ້ງສາກົນ, ອົງການຢູນິເຊັບ ເຮັດວຽກໃນທົ່ວຂະແໜງ ສາທາລະນະສຸກ, ໂພຊະນາການ, ສຶກສາ, ນໍ້າ ແລະ ສຸຂາພິບານ ແລະ ການປົກປ້ອງເດັກ ດ້ວຍຈຸດປະສົງເພື່ອປະຕິບັດສິດທິຂອງເດັກທຸກໆຄົນ.
ອີງຕາມສົນທິສັນຍາວ່າດ້ວຍສິດທິເດັກ, ຂໍ້ໄດ້ປຽບຂອງອົງການຢູນິເຊັບ ປະກອບມີຄວາມຊຳນານດ້ານວິຊາການທີ່ເຂັ້ມແຂງຢູ່ໃນພື້ນທີ່, ມີຄວາມສາມາດດຳເນີນງານທັງເພື່ອການພັດທະນາ ແລະ ມະນຸດສະທຳ, ມີການອອກແບບແຜນງານຕາມຂໍ້ມູນຫຼັກຖານຕົວຈິງ ເຊິ່ງໄດ້ສຸມໃສ່ຄວາມຕ້ອງການຂອງເດັກທີ່ດ້ອຍໂອກາດ ແລະ ເຂົ້າເຖິງຍາກ, ມີວິທີດໍາເນີນງານທີ່ດຸ່ນດ່ຽງກັບນະໂຍບາຍຂັ້ນເທິງ ແລະ ລະດັບປະຕິບັດການຂັ້ນລຸ່ມ, ມີການລະດົມຄວາມເຂົ້າໃຈ ແລະ ການສື່ສານ, ແລະ ມີວິທີການເຮັດວຽກຮ່ວມກັນຫຼາຍຂະແໜງການດ້ານສັງຄົມ.
