ສປປ ລາວ ປະສົບຜົນສໍາເລັດໃນການຫ້າມການລົງໂທດທາງຮ່າງກາຍດ້ວຍການຂ້ຽນຕີ ຄັ້ງປະຫວັດສາດ

ນະຄອນຫຼວງວຽງຈັນ, ວັນທີ 30 ເມສາ 2024. ເນື່ອງໃນໂອກາດ ວັນສາກົນເພື່ອຢຸດຕິການລົງໂທດທາງຮ່າງກາຍດ້ວຍການຂ້ຽນຕີ ວັນທີ 30 ເມສານີ້, ກະຊວງຍຸຕິທຳ ໄດ້ຈັດພິທີສະຫຼອງການປະກາດຜົນສໍາເລັດຂອງ ສປປ ລາວ ກ່ຽວກັບການຫ້າມການລົງໂທດທາງຮ່າງກາຍດ້ວຍການຂ້ຽນຕີ ຄັ້ງປະຫວັດສາດ. ສປປ ລາວ ກາຍເປັນປະເທດທີ 66 ຂອງໂລກ ແລະ ເປັນປະເທດທຳອິດໃນອາຊຽນ ທີ່ມີກົດໝາຍປົກປ້ອງເດັກຈາກການລົງໂທດດ້ວຍຄວາມຮຸນແຮງທຸກຮູບແບບ.

ສປປ ລາວ ໄດ້ສະກັດກັ້ນການໃຊ້ຄວາມຮຸນແຮງຕໍ່ເດັກ ໂດຍຜ່ານການເພີ່ມທະວີການປະສານງານ ແລະ ມາດຕະການປ້ອງກັນ ແລະ ການຕອບໂຕ້ການໃຊ້ຄວາມຮຸນແຮງຕໍ່ເດັກຢູ່ໃນເຮືອນ, ໂຮງຮຽນ, ສະຖານທີ່ທາງອອນໄລນ໌ ແລະ ໃນຊຸມຊົນ. ການສໍາຫຼວດດັດສະນີໝາຍສັງຄົມຄັ້ງທີ 3 (LSIS III) ຂອງ ສປປ ລາວໃນປີ 2023 ຊີ້ໃຫ້ເຫັນເຖິງການຫຼຸດລົງຂອງການປະຕິບັດວິໄນເດັກທີ່ໃຊ້ຮຸນແຮງ, ໂດຍອັດຕາສ່ວນຂອງເດັກອາຍຸ 1 ຫາ 14 ປີ ທີ່ໄດ້ຮັບການລົງໂທດທາງຮ່າງກາຍຫຼຸດລົງຈາກ 77% ເປັນ 62%.

ນອກຈາກນີ້, ການປະກາດໃຊ້ກົດໝາຍວ່າດ້ວຍການປົກປ້ອງສິດ ແລະຜົນປະໂຫຍດຂອງເດັກສະບັບປັບປຸງ ໃນເດືອນ ສິງຫາ ປີ 2023 ແລະ ມີຜົນບັງຄັບໃຂ້ໃນເດືອນ ທັນວາ 2023, ເຊິ່ງໄດ້ຮັບການສະໜັບສະໜູນຈາກອົງການຢູນິເຊັບ ປະຈໍາ ສປປ ລາວ,  ຍັງເປັນການສະແດງເຖິງຄວາມມຸ່ງໝັ້ນຂອງ ສປປ ລາວ ທີ່ຈະດໍາເນີນການເພື່ອໃຫ້ສອດຄ່ອງກັບແຜນດໍາເນີນງານຂອງພາກພື້ນອາຊຽນ ໃນການລົບລ້າງການໃຊ້ຄວາມຮຸນແຮງຕໍ່ເດັກ 2016-2025.

ທ່ານ ກົງຈີ ຢ່າງຈື່ ຮອງລັດຖະມົນຕີ ກະຊວງຍຸຕິທໍາ ທັງເປັນຫົວໜ້າຄະນະປັບປຸງກົດໝາຍວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ ໄດ້ກ່າວວ່າ “ການປັບປຸງກົດໝາຍວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ ແມ່ນໜຶ່ງໃນການຈັດຕັ້ງປະຕິບັດຕົວຈິງຂອງລັດຖະບານ ສປປ ລາວ ໃນການຈັດຕັ້ງປະຕິບັດຂໍ້ສະເໜີແນະຂອງຄະນະກໍາມະການສິດທິເດັກ ຂອງສະຫະປະຊາຊາດ ໃນການສ້າງຄວາມເຂັ້ມແຂງໃຫ້ແກ່ລະບົບການປົກປ້ອງເດັກຂອງ ສປປ ລາວ.” ທ່ານ ຮອງລັດຖະມົນຕີ ກະຊວງຍຸຕິທໍາ ຍັງກ່າວວ່າ“ມັນເປັນສັນຍານທີ່ຊັດເຈນເຖິງການທຸ້ມເທຂອງພວກເຮົາໃນການປັບປຸງການບັງຄັບໃຊ້ກົດຫມາຍ ແລະ ໃນການປົກປ້ອງສິດທິຂອງເດັກທຸກຄົນ"

ການເປີດ ຂະບວນການໂຄສະນາປູກຈິດສໍານຶກກ່ຽວກັບການຢຸດຕິການໃຊ້ຄວາມຮຸນແຮງຕໍ່ເດັກທົ່ວໂລກຂອງອົງການຢູນີເຊັບ (#ENDviolence against children) ໃນປີ 2014 ໄດ້ເນັ້ນໃຫ້ເຫັນເຖິງຍຸດທະສາດທີ່ມີປະສິດທິຜົນ ແລະ ຜົນສຳເລັດທີ່ອີງໃສ່ຫຼັກຖານໃນການປ້ອງກັນ ແລະ ຕອບໂຕ້ຕໍ່ຄວາມຮຸນແຮງໃນລະດັບຊາດ. ການ​ປັບປຸງ​ກົດໝາຍ​ເມື່ອ​ບໍ່​ດົນ​ມາ​ນີ້, ຖື​ເປັນ​ຈຸດ​ສູງສຸດ​ຂອງ​ຂະ​ບວນການທົບທວນກົດໝາຍໃນໄລຍະເວລາ 2 ​ປີ ​ທີ່​ເລີ່​ມ​ແຕ່​ປີ 2022 ​ເຊິ່ງໄດ້​ມີ​ການ​ປຶກສາ​ຫາລື​ຢ່າງກ້ວາງຂວາງ​ກັບ​ເດັກ ​ແລະ ໄວ​ໜຸ່ມຢູ່ 6 ​ແຂວງ ​ແລະ ນະຄອນຫຼວງ​ວຽງ​ຈັນ. ໃນຂະບວນການນີ້, ໄດ້ມີການປະສານສົມທົບກັບຫຼາຍກະຊວງ ແລະ ຫຼາຍພາກສ່ວນກ່ຽວຂ້ອງ, ເຊິ່ງຊີ້ໃຫ້ເຫັນເຖິງຄວາມຕັ້ງໃຈຂອງລັດຖະບານ ສປປ ລາວ ໃນການຜັນຂະຫຍາຍສິດທິເດັກເຂົ້າໃສ່ໃນກອບນິຕິກໍາຂອງປະເທດ.

ທ່ານ ກົງຈີ ຢ່າງຈື່ ຮອງລັດຖະມົນຕີ ກະຊວງຍຸຕິທໍາ ຍັງໄດ້ກ່າວວ່າ “ລັດຖະບານ ສປປ ລາວ ໃຫ້ຄວາມສຳຄັນຕໍ່ວຽກງານການປົກປ້ອງເດັກ ໂດຍໄດ້ມອບໝາຍໃຫ້ກະຊວງຍຸຕິທໍາ ປັບປຸງກົດໝາຍວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ ເພື່ອຮັບປະກັນວ່າເດັກນ້ອຍລາວໄດ້ຮັບການປົກປ້ອງ, ໂດຍສະເພາແມ່ນການປົກປ້ອງເດັກຈາກທຸກຮູບແບບຂອງການໃຊ້ຄວາມຮຸນແຮງ.”

ການຫ້າມການລົງໂທດທາງຮ່າງກາຍດ້ວຍການຂ້ຽນຕີ ເປັນສ່ວນໜຶ່ງຂອງຍຸດທະສາດຮອບດ້ານ ເພື່ອແນໃສ່ຊຸກຍູ້ສົ່ງເສີມການປົກປ້ອງເດັກ ແລະ ແກ້ໄຂຄວາມຮຸນແຮງຕໍ່ເດັກ ໃນທຸກສະພາບແວດລ້ອມ, ລວມທັງຢູ່ໃນເຮືອນ, ໂຮງຮຽນ ແລະ ສະຖານທີ່ທາງອອນໄລນ໌. ການລິເລີ່ມນີ້ ແມ່ນສອດຄ່ອງກັບແຜນດຳເນີນງານແຫ່ງຊາດ ເພື່ອປ້ອງກັນ ແລະ ລຶບລ້າງ ຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ 05 ປີ ຄັ້ງທີ II (2021 – 2025), ເຊິ່ງສຸມໃສ່ການສ້າງຄວາມເຂັ້ມແຂງໃຫ້ແກ່ລະບົບ ແລະ ການສ້າງຄວາມສາມາດໃນການປ້ອງກັນ ແລະ ຕອບໂຕ້ຕໍ່ການໃຊ້ຄວາມຮຸນແຮງ.

ທ່ານ ອາຕູໂຣ ຣົມໂບລິ ຮອງຜູ້ຕາງໜ້າອົງການ ຢູນິເຊັບ ປະຈໍາ ສປປ ລາວ ໄດ້ຊົມເຊີຍການປັບປຸງກົດໝາຍດັ່ງກ່າວ, ໂດຍກ່າວວ່າ, “ພວກເຮົາສະແດງຄວາມຊົມເຊີຍລັດຖະບານ ແຫ່ງ ສປປ ລາວ ສໍາລັບຄວາມພະຍາຍາມໃນການສົ່ງເສີມສິດທິເດັກ ໂດຍຜ່ານນິຕິກໍາອັນສໍາຄັນນີ້. ກົດໝາຍ​ສະບັບ​ນີ້​ເປັນ​ບາດກ້າວ​ອັນ​ສຳຄັນ​ໃນ​ການ​ສ້າງ​ສະພາບ​ແວດ​ລ້ອມ​ທີ່​ປອດ​ໄພ ​ເຊິ່ງ​ເດັກ​ທຸກ​ຄົນຈະໄດ້ຮັບການປົກ​ປ້ອງຈາກ​ອັນຕະລາຍ. ພວກເຮົາຂໍສະແດງຄວາມຍິນດີກັບ ສປປ ລາວ ທີ່ໄດ້ເປັນແບບຢ່າງໃຫ້ແກ່ບັນດາປະເທດສະມາຊິກອາຊຽນ ແລະ ພວກເຮົາຈະຍັງຄົງສືບຕໍ່ສະໜັບສະໜູນລັດຖະບານ ແລະ ຄູ່ຮ່ວມງານໃນການປົກປ້ອງເດັກຈາກຄວາມຮຸນແຮງໃນທຸກສະພາບແວດລ້ອມ."

ການປັບປຸງກົດໝາຍ ວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ ສະບັບນີ້ ແມ່ນໄດ້ຮັບທຶນຊ່ວຍເຫຼືອຈາກ ລັດຖະບານປະເທດອົດສະຕຣາລີ ໂດຍຜ່ານອົງການ ຢູນິເຊັບ ປະຈໍາປະເທດອົດສະຕຣາລີ.