ສປ.ຈີນ ຮ່ວມມືກັບລັດຖະບານ ແຫ່ງ ສປປ ລາວ ແລະ ອົງການຢູນີເຊັບ ສົ່ງມອບການຊ່ວຍເຫຼືອໃຫ້ແກ່ເດັກນ້ອຍ
- English
- ລາວ
ນະຄອນຫຼວງວຽງຈັນ, ວັນທີ 04 ທັນວາ 2024 – ການຮ່ວມມືແບບພິເສດລະຫວ່າງ ສປ. ຈີນ, ລັດຖະບານ ແຫ່ງ ສປປ ລາວ ແລະ ອົງການຢູນີເຊັບ ໄດ້ເລີ່ມຂຶ້ນໃນມື້ນີ້ ເພື່ອຕ້ານພາວະການຂາດສານອາຫານຢ່າງຮ້າຍແຮງ, ການປັບປຸງຜົນໄດ້ຮັບດ້ານສຸຂະພາບຂອງເດັກ ແລະ ການເພີ່ມທະວີການບໍລິການໃນການປົກປ້ອງເດັກຢູ່ ສປປ ລາວ. ພາຍໃຕ້ການລົງທຶນ 1,5 ລ້ານໂດລາສະຫະລັດ, ການຮ່ວມມືຄັ້ງນີ້ສົ່ງຜົນປະໂຫຍດໂດຍກົງໃຫ້ແກ່ເດັກນ້ອຍ ແລະ ຄອບຄົວເປັນຈຳນວນຫຼາຍກວ່າ 221,000 ຄົນໃນທົ່ວປະເທດ ໂດຍສະເພາະແມ່ນຜູ້ທີ່ດ້ອຍໂອກາດ ທີ່ອາໄສຢູ່ໃນເຂດຫ່າງໄກສອກຫຼີກ.
ພາຍໃຕ້ໂຄງການຂໍ້ລິເລີ່ມນີ້, ສປ. ຈີນໄດ້ສະໜອງອຸປະກອນຊ່ວຍຊີວິດ, ລວມທັງອາຫານບຳບັດພ້ອມໃຊ້ (RUTF) 6,200 ກ່ອງ ເຊິ່ງຈຳເປັນສຳລັບການປິ່ນປົວພະຍາດຂາດສານອາຫານຮ້າຍແຮງໃນເດັກ, ລວມໄປເຖິງນົມທາງການແພດ, ຊຸດອຸປະກອນປິ່ນປົວຄົນເຈັບ. ນອກຈາກນີ້, ໂຄງການຍັງສົ່ງເສີມການສ້າງຂີດຄວາມສາມາດໃນການຝຶກອົບຮົມພະນັກງານສາທາລະນະສຸກຈຳນວນ 600 ກວ່າຄົນ ແລະ ໃຫ້ແກ່ໂຮງໝໍແຂວງ 17 ແຫ່ງ ເພື່ອປິ່ນປົວພະຍາດໃນເດັກນ້ອຍເຊັ່ນ: ພະຍາດປອດບວມ ແລະ ຖອກທ້ອງ.
ທ່ານ ດຣ. ສະໜອງ ທອງຊະນະ, ຮອງລັດຖະມົນຕີກະຊວງສາທາລະນະສຸກ ໄດ້ກ່າວເຖິງຄວາມສຳຄັນຂອງການຮ່ວມມືດ້ານການລິເລີ່ມດ້ານສາທາລະນະສຸກຂອງປະເທດ. "ການຮ່ວມມືກັບ ອົງການຢູນີເຊັບ ແລະ ລັດຖະບານແຫ່ງ ສປ. ຈີນ ແມ່ນມີຄວາມສໍາຄັນຕໍ່ການບັນລຸເປົ້າໝາຍດ້ານສຸຂະພາບ ແລະ ໂພຊະນາການຂອງພວກເຮົາ. ການເລີ່ມຕົ້ນຂອງການຮ່ວມມືໃໝ່ນີ້ຈະສົ່ງຜົນກະທົບທາງບວກຕໍ່ການຊ່ວຍຊີວິດເດັກນ້ອຍ ແລະ ຄອບຄົວໃນທົ່ວປະເທດ,” ກ່າວໂດຍທ່ານຮອງລັດຖະມົນຕີ.
ຂໍ້ລິເລີ່ມດັ່ງກ່າວຍັງໃຫ້ບຸລິມະສິດແກ່ການບໍລິການໃນການປົກປ້ອງເດັກ, ການສະໜັບສະໜູນເດັກທີ່ມີຄວາມສ່ຽງຈຳນວນ 15,000 ຄົນ ໃນໂຮງຮຽນກິນນອນ ແລະ ການຈັດຫາພະນັກງານສັງຄົມສົງເຄາະໃນທົ່ວ 18 ແຂວງ ດ້ວຍການສະໜອງອຸປະກອນທີ່ຈຳເປັນສຳລັບການຕ້ານຄວາມຮຸນແຮງທາງເພດ ແລະ ການບໍລິການດ້ານສຸຂະພາບຈິດ.
“ການລິເລີ່ມໂຄງການໃໝ່ດັ່ງກ່າວສະແດງໃຫ້ເຫັນເຖິງຫຼັກການພາຍໃຕ້ ຂໍ້ລິເລີ່ມການພັດທະນາໂລກ ຂອງ ສປ. ຈີນ ພ້ອມທັ້ງສະແດງໃຫ້ເຫັນເຖິງຄວາມໝຸ້ງໝັ້ນເອົາໃຈໃສ່ຂອງ ສປ. ຈີນ ໃນຖານະໜື່ງໃນປະເທດຜູ້ນຳໂລກ.” ກ່າວໂດຍ ພະນະທ່ານ ນາງ ຟາງຫົງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາຊົນຈີນ ປະຈຳ ສປປ ລາວ. "ພວກເຮົາຫວັງວ່າໂຄງການນີ້ບໍ່ພຽງແຕ່ຈະຊ່ວຍເດັກນ້ອຍທີ່ປະສົບກັບບັນຫາການຂາດສານອາຫານ ແລະ ພະຍາດຕ່າງໆເທົ່ານັ້ນ, ແຕ່ຍັງຈະຊ່ວຍສະແດງເຖິງຄວາມສາມັກຄີລະຫວ່າງຜູ້ຄົນ ເເລະ ສັງຄົມ ພ້ອມເສີມສ້າງອະນາຄົດຮ່ວມກັນຂອງຊຸມຊົນພວກເຮົາ."
ທ່ານ ບີລາລ ອູແຣັງ ເຊັບ ດູຣານິ, ຜູ້ຕາງໜ້່າ ອົງການຢູນີເຊັບ ປະຈຳ ສປປ ລາວ, ກໍໄດ້ຍົກໃຫ້ເຫັນເຖິງທ່າແຮງໃນການສ້າງການປ່ຽນເເປງທີ່ດີຜ່ານການຮ່ວມມືນີ້. “ຂໍ້ລິເລີ່ມນີ້ ແມ່ນຜົນໄດ້ຮັບທີ່ປະກົດຜົນເປັນຈິງຄື ການຊ່ວຍເຫຼືອຊີວິດ, ການປົກປ້ອງຜູ້ທີ່ມີຄວາມສ່ຽງ ແລະ ການສ້າງພື້ນຖານທີ່ເຂັ້ມແຂງເພື່ອອະນາຄົດ. ພ້ອມກັນນັ້ນ, ພວກເຮົາຈະຮັບປະກັນວ່າ ຈະບໍ່ມີເດັກນ້ອຍຄົນໃດຖືກປະຖິ້ມຢູ່ທາງຫຼັງພຽງລຳພັງ ຢູ່ ສປປ ລາວ.”
ຜົນກະທົບທາງບວກທີ່ສາມາດວັດແທກໄດ້ຂອງໂຄງການລວມມີການປິ່ນປົວເດັກນ້ອຍຈຳນວນ 6,200 ຄົນທີ່ປະສົບກັບສະພາວະການຂາດສານອາຫານຢ່າງຮຸນແຮງ, ການປັບປຸງການເຂົ້າເຖິງການບໍລິການດ້ານສຸຂະພາບສໍາລັບເດັກນ້ອຍ 165,000 ຄົນທີ່ມີອາຍຸຕ່ໍາກວ່າ 5 ປີ ແລະ ການດູແລໃຫ້ແກ່ເດັກນ້ອຍເກີດໃໝ່ຈຳນວນ 34,000 ຄົນ. ນອກຈາກນັ້ນ, ກໍ່ມຸ່ງເນັ້ນໄປເຖິງການສ້າງລະບົບການບໍລິການດ້ານສຸຂະພາບ ແລະ ການບໍລິການສັງຄົມແບບຍືນຍົງ, ການຮັບປະກັນຜົນປະໂຫຍດອັນຍາວນານໃຫ້ແກ່ຄົນຮຸ່ນຫຼັງ.
ການຮ່ວມມືຄັ້ງນີ້ເປັນສ່ວນໜຶ່ງຂອງ ຂໍ້ລິເລີ່ມການພັດທະນາໂລກ (Global Development Initiative) ທີ່ໄດ້ຮັບການຮັບຮອງຈາກ ສປ. ຈີນ, ເຊິ່ງສອດຄ່ອງກັບເປົ້າໝາຍການພັດທະນາແບບຍືນຍົງ, ລວມທັງການຢຸດຕິຄວາມອຶດຫິວ, ປັບປຸງຜົນໄດ້ຮັບດ້ານສຸຂະພາບ ແລະ ການລົບລ້າງຄວາມຮຸນແຮງໃນເດັກ.
ການຈັດຕັ້ງປະຕິບັດໂຄງການແມ່ນຈະສຸມໃສ່ 10 ແຂວງທີ່ມີທ່າແຮງຄວາມຕ້ອງການຫຼາຍ, ໃນນັ້ນປະກອບມີ ແຂວງຜົ້ງສາລີ, ອັດຕະປື ແລະ ຈໍາປາສັກ ເພື່ອໃຫ້ຮັບປະກັນວ່າ ການສະໜອງການບໍລິການ ແມ່ນຈະຖືກນຳໃຊ້ໃນເຂດທີ່ຕ້ອງການຫຼາຍທີ່ສຸດ.
ຕິດຕໍ່ຜູ້ຮັບຜິດຊອບຂ່າວ
ກ່ຽວກັບອົງການຢູນິເຊັບ
ອົງການຢູນິເຊັບ ເຮັດວຽກໃນບາງບ່ອນທີ່ຫຍຸ້ງຍາກທີ່ສຸດ ເພື່ອເຂົ້າເຖິງເດັກທີ່ດ້ອຍໂອກາດທີ່ສຸດໃນໂລກ. ໃນ 190 ປະເທດ ແລະ ເຂດແຄວ້ນ, ພວກເຮົາເຮັດວຽກເພື່ອເດັກທຸກຄົນ ແລະ ໃນທຸກແຫ່ງຫົນ ເພື່ອສ້າງໂລກທີ່ດີກວ່າສໍາລັບທຸກຄົນ.
ສໍາລັບຂໍ້ມູນເພີ່ມເຕີມກ່ຽວກັບອົງການຢູນິເຊັບ ແລະ ວຽກງານຂອງອົງການເພື່ອເດັກ ຈົ່ງເຂົ້າເບິ່ງ www.unicef.org.
ຕິດຕາມອົງການຢູນິເຊັບໃນ Twitter and Facebook
