ນໍ້າ, ສຸຂາພິບານ ແລະ ສຸຂະອານາໄມ ແລະ ການຕ້ານທານກັບການປ່ຽນແປງດິນຟ້າອາກາດ

ແຜນງານນໍ້າ, ສຸຂາພິບານ ແລະ ສຸຂະອານາໄມ ແລະ ການຕ້ານທານກັບການປ່ຽນແປງດິນຟ້າອາກາດ ອົງການຢູນິເຊັບ ສະ ໜັບສະໜູນ ສປປ ລາວ ໃນການພະຍາຍາມເພື່ອບັນລຸເປົ້າໝາຍການພັດທະນາແບບຍືນຍົງ, ໂດຍແນໃສ່ເດັກ ແລະ ຄອບຄົວທີ່ດ້ອຍໂອກາດທີ່ສຸດ ແລະ ຮັບປະກັນໃຫ້ພວກເຂົາມີການເຂົ້າເຖິງ ແລະ ນຳໃຊ້ແຫຼ່ງນໍ້າ ແລະ ສຸຂາພິບານຂັ້ນພື້ນຖານທີ່ຍືນຍົງ.

ອົງການຢູນິເຊັບ ຍັງໄດ້ສົ່ງເສີມພຶດຕິກຳການອານາໄມທີ່ດີ ແລະ ເຮັດວຽກຮ່ວມກັບ ກະຊວງສຶກສາທິການ ແລະ ກິລາ ເພື່ອສົ່ງເສີມການປະຕິບັດການອານາໄມປະຈຳວັນໃນໂຮງຮຽນປະຖົມ ແລະ ອະນຸບານ ໂດຍການສ້າງສະພາບແວດລ້ອມທີ່ອຳນວຍໃຫ້ແກ່ການປ່ຽນແປງພຶດຕິກຳ ດ້ວຍການມີສ່ວນຮ່ວມຂອງນັກຮຽນ. ຍິ່ງໄປກວ່ານັ້ນ, ປະຈຸບັນ ກະຊວງສຶກສາທິການ ແລະ ກິລາ ກຳລັງພັດທະນາມາດຕະຖານແຫ່ງຊາດສໍາລັບນໍ້າ, ສຸຂາພິບານ ແລະ ສຸຂະອານາໄມໃນໂຮງຮຽນ ໂດຍການສະໜັບສະໜູນຈາກ ອົງການຢູນິເຊັບ. 

ອົງການຢູນິເຊັບ ຍັງເຮັດວຽກເພື່ອສະໜັບສະໜູນຊຸມຊົນໃນການປັບປຸງສຸຂາພິບານ ແລະ ຢຸດຕິການຖ່າຍຊະຊາຍ,  ແລະ ສົ່ງເສີມການລ້າງມື ແລະ ການວາງແຜນນໍາໃຊ້ນໍ້າສະອາດ. ຄຽງຄູ່ກັບ ກະຊວງສາທາລະນະສຸກ, ອົງການຢູນິເຊັບ ກຳລັງທົດລອງໃຊ້ວິທີການໃໝ່ທີ່ມີຊື່ວ່າ 'ວິທີການໃຫ້ເມືອງເປັນເຈົ້າການໃນການລົບລ້າງການຖ່າຍຊະຊາຍຢູ່ ແຂວງ ບໍລິຄຳໄຊ'. ມາຮອດປະຈຸບັນ, 3 ເມືອງພາຍໃນແຂວງດັ່ງກ່າວ ໄດ້ຮັບການປະກາດເປັນເມືອງຢຸດຕິການຖ່າຍຊະຊາຍ. ຮອດປີ 2020, ຄາດວ່າທົ່ວແຂວງຈະຖືກປະກາດເປັນແຂວງຢຸດຕິການຖ່າຍຊະຊາຍ. ຂໍຂອບໃຈກັບຕົວແບບນີ້, ອົງການຢູນິເຊັບ ແລະ ລັດຖະບານແຫ່ງ ສປປ ລາວ ຄາດວ່າຈະເລັ່ງອັດຕາການປົກຄຸມວິດຖ່າຍ, ຢຸດຕິການຖ່າຍຊະຊາຍ ໃຫ້ຂຶ້ນໄປຕາມຂັ້ນໄດ ເພື່ອສຸຂາພິບານທີ່ດີຂຶ້ນເທື່ອລະກ້າວ.