Баткендин башпаанек катары колдонулган мектептеринде ЮНИСЕФтин колдоосу менен суу түтүктөрү жана канализация системалары оңдолду

БИШКЕК/БАТКЕН, 2023-жылдын 26-майы – ЮНИСЕФтин жана Баткен мэриясынын өкүлдөрү суу менен жабдуу жана канализация кызмат көрсөтүүлөрү жакшыртылган беш билим берүү мекемесинде болушту. Бөкөнбаев, Умаров жана Ленин атындагы мектептерде, ошондой эле №57 лицейде, Баткен мамлекеттик университетинин колледжинде 6700дөн ашык бала жана өспүрүмдөр билим алышат. Бул мекемелердин баары 2022-жылдын сентябрында кыргыз-тажик чек арасында болгон жаңжалдан кийин жер которгондор үчүн убактылуу башпаанек катары кызмат кылып келген. Көрсөтүлгөн колдоонун жалпы баасы 45 000 доллардан ашат.

Баткен мэриясы менен өнөктөштүктүн натыйжасында Ленин атындагы мектептин жана №56 лицейдин суу менен жабдуу системасы жакшыртылды; бардык мектептерде кошумча раковиналар жана таштанды үчүн челектер орнотулду, башка санитардык-техникалык иштер жасалды, ошондой эле зарыл болгон санитария жана гигиена буюмдары, анын ичинде 9000 литр суюк самын берилди. Ошондой эле жергиликтүү өнөктөштөр менен кызматташтыкта жана КР Президентинин Баткен облусундагы ыйгарым укуктуу өкүлүнүн катышуусунда балдар, өспүрүмдөр жана алардын ата-энелери арасында таза сууну керектөөнүн маанилүүлүгү, бул мектептердин айланасында ишембиликтерди жана тазалык иш-чараларын туруктуу уюштуруу тууралуу бир катар маалыматтык сабактар өткөрүлдү.

ЮНИСЕФтин Кыргызстандагы өкүлү Кристин Жольм Баткендеги Үй-бүлөлүк медицина борборуна Баткен облусундагы балдар жана аялдар үчүн темир жана фолий кычкылдыгы сыяктуу витаминдерди тапшырды. Мунун алдында чукул жооп кайтаруу иш-чараларынын жүрүшүндө баштапкы медициналык-санитардык жардам борборлоруна негизги медициналык жана стерилдөөчү комплекттер өткөрүлүп берилген.

ЮНИСЕФ Баткен облусунун чек арага чектеш райондорунда жабыркаган эл үчүн калыбына келтирүү жана туруктуулук боюнча узак мөөнөттүү планга ылайык Кыргызстандын өкмөтүнө колдоо көрсөтүп келүүдө.